سلولى بات شورلى .. و الكايزن .. و اللى حصل

سلولى بات شورلى .. و الكايزن .. و اللى حصل فرمضان و ما أدراك

لسبب واضح جداً بالنسبالى .. أكتر شخصية كنت إتعلقت بيها فمسلسل ناروتو .. هى شخصية (روك لى ) .. و لو ماكنتش شفت المسلسل .. فالشخصية دى ببساطة عبارة عن ولد – مش بطل المسلسل بالمناسبة – لا يمتلك أى موهبة .. على الإطلاق .. إلا الإصرار … (أو فرواية أخرى .. الغتاتة و التناحة ) . بمعنى إنه مش مولود بقوة عضلية خارقة مثلاً .. أو عبقرى .. أو إبن ناس أغنيا .. أبداً .. عااااادى جداً ..و يمكن أقل من العادى كمان .. لكن فمشهد رائع .. و هو فقمة اليأس و أستاذه بيقوله يابنى إنت مافيش منك رجا .. و إنك بنسبة 99% مش حتنفع تبقى حاجة .. بطل عياط فجأة و سأله ( 99% ) ؟ .. يعنى 1% ممكن أبقى حاجة ؟ قاله ممكن بس إنت حتحتاج إنك ماتبطلش تمرين .. أبداً .. و تتمرن أكتر من أى حد تانى .. فى التاريخ .. قاله (و ساعتها … ساعتها ممكن أوصل ؟ ) .. قاله ما معناه .. إنه بالتأكيد حتوصل . و من يومها و “روك لى ” بيتمرن . ليل نهار .. و كل يوم .. و فكل وقت .. و بكل شكل .. بالظبط زى السلحفة فقصة السلحفة و الأرنب . نصيحتى ليك شوف المسلسل .. لأن (روك لى ) يعتبر هو سبب إنى عشقت ناروتو .. و لأنى مش واثق إنى فاكر السيناريو بالظبط .. الكلام ده كان من 9 سنين . المهم إنه بيوصل .. و بيبقى من أف… ضل الشخصيات فى المسلسل كله ..

حاعترف بقى .. بس أعتقد اللى حواليا يعرفوا ده عنى كويس .. أنا بقى طماع جداً .. ممكن ماكونش إتولدت أقل من غيرى بكتير بفضل الله .. لكن مافتكرش إنى كنت الأول برضو .. عدد قليل جداً من المسابقات اللى فزت بيها .. أو الإمتحانات اللى طلعت فيها الأول .. بس طمعى ماكنش أبداً إنى أكون الأول فأى حاجة من دول .. طمعى دايماً كان إنى أعرف أكتر .. و أمتلك مهارات أكتر .. بمعنى إنى عمرى ما فرقت معايا أكون ال 100% فأى مجال من اللى أنا فيهم .. بس يفرق معايا جداً .. معايا كام مجال ؟ .. و إنى على الأقل أكون 75% فيهم كلهم .. أسباب الموضوع ده كتير و يطول شرحها .. و ممكن نتكلم عنها بعدين .. لكن اللى عايز أتكلم عنه دلوقتى هو حاجة تانية خالص ..

خلال خبرتى الصغننة فى الحياة بقى .. قابلت نوعين أساسيين من البشر .. اللى نفسه يعدى ال 50% فأى مجال .. واللى مش فارق معاه أساساً هو فين و بيعمل إيه .. طالما إنه حي يرزق و بيقعد عالقهوة .. أو الكافيه . كلامى ده .. للنوع الأول مش التانى . سلولى بات شورلى .. الجملة دى بابا كان دايماً يقولهالنا و إحنا صغننين و بنحاول نتعلم أى حاجة .. أو نعمل أى حاجة .. و شرحلنا إنها مبدأ إنجليزى معناه ( ببطء و لكن بالتأكيد ) .. يعنى إختار أى شىء فى الحياة .. و ماتبطلش شغل فيه .. و أكيد حتوصل .. و لكن .. النفس أمارة بالسوء .. و اليأس .. و الإحباط .. و الزهق .. صح ؟ الحل بسيط .. و يابانى كمان 

فى مبدأ يابانى جميل إسمه ( كايزن) .. مفاده إنك الحاجة اللى تحب تعملها .. أياً كانت هى إيه .. إعملها لمدة دقيقة واحدة بس .. يومياً .. بس .. والله العظيم . و بعد فترة .. حتلاقى إنك لواحدك حتزود و المكنة حتشتغل و حتجيب قماش .. السبب ؟ ببساطة إنك لما بتحب تعمل أى حاجة محتاجة وقت .. بتحاول تفضى وقت لها .. و مجهود .. و فنجان قهوة . و ده بيبقى صعب لأنك مش دايماً حتقدر تعمل ده .. فحتكسل و تلغى .. و بعدين حتحس بالذنب إنك لغيت .. فعشان ماتحس بالذنب .. حتبطل تحاول من الأساس بعد كده .. و كل سنة و إنت طيب بقى .. و لكن : لو حطيت هدفك دقيقة واحدة بس .. و جربت تعمل الحاجة دى لمدة دقيقة واحدة بس .. بعد الدقيقة حتحس إحساس حلو أوى .. إسمه الإنجاز .. إنك أنجزت شىء حددته فعلاً لنفسك .. و حتستطعم ده .. و تدمنه .. و لكن .. لأنك بتكرر التمرين أو ممارسة الشىء ده .. فحتتحسن فيه .. و بعد فترة .. حتلاقى إن الدقيقة بتبقى 2 .. و 4 .. و هكذا .. و عيش بقى يا برنس .. بس أبداً ماتبطلش الدقيقة .. زود ماشى .. بس أبداً ماتلغيهاش ..

فبداية رمضان ده كنت حطيت شوية أهداف لنفسى .. بفضل الله خلينى أقولك علي شوية منهم .. و على شوية حاجات تانية كمان : 1- كنت عايز أخلص دراسة كورس بايثون .. تم بفضل الله 2- كنت عايز أخلص تحضير و تجهيز كورس إلستريتور .. .تم بفضل الله 3- خلصت كتاب كنت سايبه لرمضان : zero to one
4- من 7 شهور كنت بارفع نفسى على العقلة بالنط و العافية .. حالياً باعمل 10 مستريح بفضل الله .. ( كل التشكيلات) . 5- ده ماجاش على حساب شغلى (اللى يعرفنى عارف أنا باشتغل فكام حاجة فنفس الوقت ) , (الجيم ) , التراك , عباداتى . 6- أينعم كنت بنام 4 ساعات بالكتير .. و كنت بطلت تدريب الكمان لمدة 3 أسابيع  .

الحاجات اللى ذكرتها فوق دى .. كلها تمت بنفس الطريقة .. سلولى بات شورلى .. جداً .. فخلاصة البوست الصغنن ده كالتالى : خليك غتت و تنح فأى شىء تحب تعمله و تتعلمه .. ماتفرحش بالإنتصارات السريعة الكبيرة المفاجأة .. و لكن أبداً .. ماتبطلش الدقيقة .. (خير السنن أقلها و أدومها ) … و الله أعلم ,