خرسانة بالمهلبية

خرسانة بالمهلبية .

أنا بقالي فترة طويلة باحاول والله ماكتبش .. ماتفاعلش .. ماشغلش بالي .. باحاول فعلاً ألتزم بمبدأ ( ياكشي تولع ) .. و أركز في الفيديو جيمز بقي و أعلي الرانك بتاعي بزمة و ضمير في ( ليج أوف ليجيندز ) لأول مرة من 10 سنين أو أكتر .. .. بس بييجي قدامي بوستات عالصبح بالغلط .. بتخليني برضو أتعصب و أبدأ أكتب .. و الله أعلم بعد كام سطر في البوست ده حاسيبه و أنشره .. ولا أمسحه زي ما بعمل كل يوم تقريباً . … … البيت اللي سيادتك قاعد فيه .. و مستقر .. و بتقفل شباكك عليك بالليل عشان البرد مايدخلش لك .. عشان يتبني .. تم مزج رمل و زلط و أسمنت .. بنسب معينة جداً .. مع المياه .. عشان تتعمل حاجة إسمها خرسانة .. و بعد كده تم صب الخرسانة حوالين عدد من الأسياخ الحديد المسلح ( اللنيات ) اللي متصممة و متركبة بشكل معين و محسوب جداً .. و كل ده بنسب و مقاييس متفق عليها .. و عارفها معظم المهندسين المدني و العمارة .. و النجارين المسلح .. … إتخيل بقي لما آجي أثناء تصميم مبني .. و أبدأ أجود .. أبدع .. أفتكس .. أحاول أحط التاتش بتاعي .. بس بدون ما يكون عندي أيها علم أو دراسة بأى حاجة ليها علاقة بالهندسة المدني أو العمارة … أو حتي عمري ما دقيت مسمار في لوح خشب .. و كل ما حد من اللي دارسين و فاهمين الكلام ده حواليا يقول ليا ” أيون .. بس كده البيت يقع .. يتهد علي دماغ اللي حيعيشوا فيه .. و علي اللي ماشيين في الشارع .. و حيبقي خطر علي المنطقة كلها و البيوت اللي حواليه ” .. أروح مزعق لهم بتأثر و أقول : ” مالكوش دعوة .. هو بيتي ولا بيتكم ؟ هي فلوسي ولا فلوسكم ؟ أنا حاسسها كده .. إحساسي و مشاعري بيقولوا لي إني لازم أخلط الخرسانة مهلبية عشان البيت يطلع حلو 😆 و بعدين مين اللي عمل قوانين الهندسة دي ؟ .. مش بشر بيغلطوا برضو ؟ .. أنا كمان بشر و لازم يبقي ليا حرية إني أغلط براحتي ” .. … و كل ما يحاولوا يقنعوني إني بالمنظر ده باعرض اللي حواليا كلهم للخطر .. و يقولوا لي روح إبني في الصحرا لو عايز تجرب .. مش فوسط البشر .. أرد عليهم ب : ” مين خلاكوا أوصيا علي الجيران اللي حواليا ؟! .. مش هما ليهم هما كمان حرية الإختيار ؟! .. سيبوني أكلمهم و أعبر لهم عن مشاعري ” .. … و بعدين أروح رايح عامل كام فيديو يوتيوب جامدين فحت عن فوايد الخرسانة بالمهلبية .. و عن ظلم المجتمع علي مدار السنين لكل اللي حاولوا يبنوا بالمهلبية .. و عن كل الفئات التانية المظلومة من المفكرين الأحرار .. و إن المجتمع قاسي و بيقمع كل اللي عايزين يعملوا أى حاجة مختلفة .. .. فيبدأ كل اللي مخنوق من حاجة من الجيران يتفاعلوا معايا .. يحسوا إني باتكلم عن معاناتهم هما كمان .. مع إنهم مشاكلهم مختلفة عني بالكامل .. و لكننا بنتوحد علي فكرة واحدة .. و هي : أنا عايز أختلف .. … و بينسي كتير منهم إن : الإختلاف لمجرد الإختلاف .. بدون دراسة أو وعي أو تفكير أو منطق .. بيبقي إسمه الحقيقي إنحلال , عبط , إنحراف . لكن ماحدش بيبقي فاضي عشان يسمع عن الدراسة و الوعي و المنطق دول .. لأنهم مملين .. بيحتاجوا مجهود عشان الواحد يفكر فيهم … مش ساهلين و طعمين زي المهلبية . … … … بس فعلاً أنا مش عارف حتي البوست ده باكتبه لمين ! .. أصل اللي حيكمل بعد السطر الرابع أساساً .. ده مش الفئة اللي عايز أوصل لها .. أنا الفئة اللي معصباني .. هما اللي فترة إنتباههم مابتتخطاش ال10 ثواني بتوع فيديو التيك توك .. هما اللي مابيكملوش أى بوست أكتر من سطرين .. هما اللي تم تكوين وعيهم من إعلانات رمضان المثيرة و فوازير رمضان المثيرة و مسلسلات رمضان المثيرة و برامج رمضان المثيرة … … الفئة دي هي اللي بتتعاطف مع ( آه المدرسة ترقص و تقلع كمان .. حرية شخصية .. إنت إيه مشكلتك يعني ؟! ) .. هي اللي بتتعاطف مع ( كل واحد يعمل اللي علي مزاجه .. و إبني بالمهلبية سيادتك ) .. هي اللي بتتعاطف مع ( الحب هو كل حاجة .. و الحب من أول نظرة .. و الحب من أول شمة .. و الحب من أول هاها علي بوست .. ) . هي اللي بتتعاطف مع ( تعالي أعلمك إزاي تبقي مليونير في نص ساعة .. و تعالي إشتغل معانا في الستارت أب فوظيفة رئيس هيئة الطبطبة .. و ماتنساش تحط البادج بتاع ستارباكس علي .. إحم إحم .. اللاب بتاعك ) . … … بص .. أقولك علي حاجة … أنا داخل جيم رانكد