مراتي سألتني فجأة " شايف الدوشة اللي حاصلة علي الصور

مراتي سألتني فجأة ” شايف الدوشة اللي حاصلة علي الصور اللي معمولة بالذكاء الإصطناعي و ملت الفيسبوك حرفياً ؟! .. مش عايز تكتب حاجة عن الموضوع ده ؟!” . رديت عليها فجأة برضو 🤣 : أيوة عايز أكتب .. عايز أكتب عن ال ( manure = يعني روث الأحصنة ولامؤاخذة = يعني فضلاتهم .. و مش حاكتب معاني مقرفة أكتر من كدة 🤣 ) . … زمااااااااااااااااااااااااان .. من 150 سنة تقريباً أيام ذروة الثورة الصناعية ( 1890 ) .. حصلت الهجرة الضخمة من الريف للمدن .. عشان الناس تشتغل كموظفين و عمال في المصانع . . و خلال الفترة دي .. كانت وسيلة المواصلات الأولي و الوحيدة هي : الأحصنة .. و الحناطير .. و العربيات الكارو .. و أي حاجة بيجرها أى حيوان . . فالنتيجة هي : إن الشوارع إتملت ( Manure - روث ) بشكل غير طبيعي .. و متزايد جداً .. . فلما المفكرين و المثقفين و الناس اللي بتحب تكتب بوستات زيي كده أيامها علي السوشيال ميديا (الجرانين يعني و المنشورات 🤣 ) شافوا اللي بيحصل ده .. إتكتبت أبحاث كتير جداً عن خطورة المستقبل ده .. لأن الثورة الصناعية حتجذب ناس أكتر للمدينة .. فتكون النتيجة إن المواصلات ( المعتمدة علي الأحصنة ) حتزيد بشكل فظيع .. و إن النتيجة حتبقي إن ال ( manure - روث الأحصنة ) حيوصل في الشوارع لإرتفاعات تعدي المترين و التلاتة متر .. يعني من الآخر .. الناس حتعوم في بحر من ال %#&# إحم . … اللي ماحدش من الباحثين و المفكرين و كتاب البوستات دي أيامها خد باله منه .. هو تكنولوجيا جديدة .. تكنولوجيا الكل راهن ضدها .. لأنها خطر جداً .. و مش مضمونة .. و لأن .. لآلاف السنين و السنين .. الناس عاشت مع الأحصنة كوسيلة مواصلاتها الأولي و الوحيدة . . التكنولوجيا دي كانت ال : العربية = السيارة = the car = الأوتومبيل . . و فجأة .. أصبحت كل الأبحاث و الجهد اللي الناس بذلته عشان تشوف إزاي تحل مشكلة ( بحر الروث ) اللي حنعوم فيه … إختفت .. و أصبح المستقبل بتاعهم .. هو ماضينا إحنا .. اللي مليان ذكريات عن العربيات و صناعة السيارات و تطورها . … … لحد النهاردة بالمناسبة .. و في شوارع القاهرة القديمة .. أو لندن القديمة .. أو أى مدينة عريقة من المدن القديمة اللي لسة محتفظة بذكريات ال 200 سنة اللي فاتوا و ماتهدش منها كتير .. تلاقي الشوارع و سلالم البيوت فيها قطع معدنية عجيبة !! .. ماتفهمش هي محطوطة ليه ؟! .. القطع دي كانت ( مساحات لقعر الجزم ) ولامؤاخذة .. . اللي هو و إنت ماشي .. طبيعي إن الشوارع بتبقي مليانة ( روث ) .. و لما تدوس فيها و عايز تدخل بيتك .. تمسح رجلك الأول في (مساحة الروث ) دي .. و تدخل تعيش حياتك . … … أحد أكتر هواياتي في الحياة من طفولتي .. هو إني أقف بعييييييييد .. و أشوف الصورة من بعيد أوي .. يعني لو في ماتش كورة في الإستاد بيتلعب مثلاً .. طول عمري كنت بالاقي نفسي مش مركز مع الكورة .. ولا اللاعيبة .. ولا الجمهور اللي بيتفرج علي اللاعيبة .. ولا المؤسسات الإقتصادية اللي من مصلحتها إن يكون في ماتش كورة شغال عشان يعملوا إعلانات و يكسبوا فلوس .. و عشان كدة بيشتروا فرق كورة .. و عشان كدة الكورة سبوبة عايشة بقالها 100 سنة . .. تركيزي كان بيبقي مع خط الزمن .. مع الصور المشابهة للي أنا شايفه ده في الماضي .. .. نفس تجمع البشر في الإستاد بالمنظر ده .. هو نفس تجمع الناس في الكولوسيوم و هما بيتفرجوا علي العبيد بيصارعوا و يقتلوا بعض أيام الإمبراطورية الرومانية . .. و لما باشوف الصور دي جنب بعضها علي مدار الزمن .. بابدأ أفهم أكتر عن البشر و الحياة .. و أتخيل .. .. أتخيل منظر الحياة كمان 100 سنة ممكن يبقي عامل إزاي ! . … … تعامل البشر مع ثورة الذكاء الإصطناعي حالياً … مثير جداً لإنتباهي .. . أنا زي ما وضحت في بوستات سابقة .. إطلاعي علي عالم الذكاء الإصطناعي من زمان شوية .. من أكتر من 15 سنة .. كان أول مرة أعرف عن يعني إيه ( تصميم شبكات عصبية - neural network design ) .. كان فمكتبة الكلية .. و دي كانت حاجة مش علينا في المنهج إطلاقاً أيامها .. و مع ذلك قضيت تقريباً أغلب وقتي باذاكرها 🤣 .. و بعدين مشروع تخرجي بعدها بسنتين .. كان جزء محترم فيه عن تصميم موديل ذكاء إصطناعي يقدر يتنبأ بحدوث الأزمات القلبية أو المشاكل الطبية .. من رسم القلب العادي للإنسان . الكلام ده كان سنة 2012 🤣🤣 . . أنا مش باتنطط أو أتمنظر والله بالكلمتين اللي فوق دول .. . أنا بس عايز أوضح إني نسبياً امتلك بعض المعلومات اللي تؤهلني إني ( أفتي ) في الليلة دي . . و وجهة نظري هي : الكباري 🤣🤣 … … التشبيه اللي إستخدمته فأول البوست ( بتاع تأثير تطور السيارات في إنتهاء أزمة إنتشار الروث ) .. مش الهدف منه إنك تبدأ تفكر من دلوقتي في المشروع اللي يخدم أهدافك المادية البسيطة خلال ال 5 سنين اللي جايين . . يعني .. لو إنت رجعت في الزمن بمعلوماتك بتاعت دلوقتي .. و رجعت للحظة اللي فيها الناس قاعدين بيتخانقوا علي الإستثمار في الشركات اللي بتنتج ( ماسحات الأحذية من الروث ) .. و قررت إنت تفتح أول ( Circle K = بنزينة و كافيه للشقط أقصد 🤣🤣 ) . يبقي إنت نظرتك محدودة و ضيقة جداً . . أنا عايزك تبص علي المنظر بشكل أوسع و أشمل بكتيييييييير .. . المواصلات من بداية التاريخ دورها ماتغيرش .. قدرتك إنك تنقل ( منتج , إنسان , جيش ) من مكان لمكان .. أهميتها ماختلفتش علي مدار التاريخ . لكن القدرة هي اللي إختلفت . . فبالتالي .. فائدتك الحقيقية اللي تخدم بيها نفسك و البشرية اللي تهمك كلها .. هو إنك تشرح لهم من بدري .. أهمية إن الطرق اللي تتبني تبقي واسعة .. عشان تستحمل النمو و الضغط و الزحمة اللي حتحصل في المستقبل … و بنفس الطريقة .. . أولويات الحياة الأساسية كمان 5 سنين .. أو 10 .. أو 100 ..مش حتختلف . إنك تتعلم من دلوقتي إزاي تكتب (برومبتات = Prompts ) .. ده مش أولوية أساسية .. ده مجرد إكسسوار بسيط لمرحلة قصيرة جداً .. . بالظبط زي الناس اللي كانت محترفة في إنها تصمم نغمات بوليفونيك علي التيليفون النوكيا ال 3310 سنة 2003 .. الناس دي عملت كارير أيامها و إشتغلت في محلات الموبايلات و إتجوزوا و فتحوا بيوت .. من ال5 جنيه اللي كانوا بياخدوها مقابل إنه يكتب لك أو يحمل لك نغمة علي موبايلك . . حد فاكرهم دلوقتي ؟! مدي الجهد و المهارة اللي إستثمروه في الموضوع ده زمان .. له أهمية دلوقتي ؟! … أنا مثلاً .. سنة 2009 كنت إشتريت موبايل نوكيا N95 8G .. كان أسطورة أيامها .. و بذلت مجهود أسابيع و شهور .. لحد ما إتعلمت أعدل في برمجياته بإستخدام لغة إسمها (Symbian ) .. إندثرت بعدها ب3 سنين بالظبط 🤣.. و العالم أصبح عايش بالأندرويد و ال آيفون . … … اللي بدأ يبني طرق و كباري زمااااااااان .. مدينته كبرت و توسعت و فتح مشاريع و بيوت و إمبراطوريات .. و إلي النهاردة مستفيد . . اللي بني علاقات و إستثمارات من الموبايلات النوكيا .. كمل و نجح .. اللي بني علاقات و إستثمارات في الموبايلات النوكيا .. فضل أسير المرحلة .. لحد النهاردة . … … القدرة الحقيقية للذكاء الإصطناعي .. هي .. قدرة تتخيل البناء ذاتها .. تخيل بناء أى شيء .. فبالتالي .. اللي حينجح .. مش هو اللي حيفضل يتعلم النهاردة إزاي ي ( برومبت ) صح .. . اللي حينجح .. هو اللي حيتعلم إزاي يتخيل صح .. و يفكر يبني إيه .. . لأن خلال أقل من سنة .. الكل حيبني .. الكل حيبقي بيعرف يمسك منشار .. بس مش الكل حيقدر يتخيل التمثال اللي بيتنحت . … … و القدرة علي التخيل و البناء دي .. قدرة ماختلفتش منذ بدء الخليقة .. مش معتمدة علي الآداة .. و لكن معتمدة علي فهم الحياة فعلاً . … إبدأ من دلوقتي شوف إحتياجات البشر الحقيقية اللي حواليك .. مش إحتياجهم الظاهري المزيف أسير المرحلة . … يعني … اللي جالك سنة 2003 عشان يحط نغمة بوليفونيك علي موبايله .. إحتياجه ماكنش إنه عايز نغمة .. لا .. إحتياجه كان إنه عايز ( يتميز ) بالنغمة دي .. . فبالتالي .. لو كنت فهمت ده أيامها … كنت حتبيع له النغمة سنة 2003 .. و تبيع له وصلة الدش المركزي .. سنة 2005 .. و تبيع له البنطلون موضة رجل الفيل سنة 2008 .. و هكذا و هكذا . . قدرتك علي إمتلاك المنتج المهم بالنسبة له زمان .. كانت محدودة بقدرتك علي ( بناءه / إستيراده / … ) . . لكن دلوقتي ؟! .. دلوقتي الكل بيعرف يركب أى تريند سريع .. . عارف الإفيه القديم بتاع ( لو الكل بقي فتوات .. أمال مين اللي حينضرب ؟! ) . … … قبل ما chatgpt يطلع بكام شهر .. كنت باشرحه لأصدقائي .. و شرحت لهم إن رهان ال5 سنين اللي جايين الحقيقي هو : علي الأطفال بالخصوص .. و علي التعليم بالعموم .. . كل مناهج التعليم حتتغير عشان تركز علي المهارة الوحيدة و الأهم .. و هي مهارة ( التخيل ) . . التركيز علي الإبداع حيكون هو شعار المرحلة .. . حتلاقي شعارات و دعاية حتملي الدنيا كمان كام شهر زي :

• تعلم مع طفلك كيف تري الأشجار فعلاً ( الشجر معجزة إبداعية ) .
• تعلم كيف تشاهد السحاب و تري الرياح ( معجزة إبداعية برضو ) .

و غيرها من الشعارات اللي تظن إنها لإمتحان قدرات في فنون جميلة .. لكن الحقيقة هي إنها إطلاقاً مش لكدة .. . ببساطة .. علي مدار ال200 سنة اللي فاتوا .. تم تجاهل القدرة دي بشكل ضخم من أغلب البشرية ( الفن و التخيل و الإبداع ) .. لأن الثورة الصناعية ماكنتش محتاجة فنانين و مبدعين كتير .. كانت محتاجة عمال و موظفين . . و كان أى حد بيبدأ يتعلم ( فن و خيال و إبداع ) .. بيتهموه إنه بيقضي علي مستقبله لأن ماحدش حيشغله … العالم خلال ال10 سنين اللي جايين .. حيستغني كل فترة عن موظفين و عمال أكتر .. لأن الذكاء الإصطناعي مش محتاجهم . . و حتكون الكلمة العليا .. و تريند المرحلة … و الإهتمام كله منصب علي : الفن .. و الإبداع .. و الخيال .. … … حتلاقي حد يقرأ كل ده .. و برضو يتسائل .. أيوا .. يعني أدخل دولارات من الخيال إزاي برضو 🤣 ؟! . إجابتي عليه هي : ركنت حصانك فين ؟! … و الله أعلم .

** الصورة من المسلسل الرائع (Silicon valley ) .. و اللي بيتم ذكر القصة اللي ذكرتها فأول البوست فيه بنفس الطريقة .