هو أنا ماشفتش الماتش الصراحة , و ولا كنت أعرف

هو أنا ماشفتش الماتش الصراحة , و ولا كنت أعرف أساساً مين بيلعب علي إيه , .. و برضو ماعرفش مين الأستاذ اللي بيتكلم في الفيديو . .. و لكن ( بالنسبة لموضوع الكلام بالإنجليزي ) : لو إنت بتتريق عليه .. إنت يبقي عندك مشاكل كتير محتاج تتعالج منها . أنا فعلاً باحييه علي قدرته علي التواصل بكفاءة ممتازة .. و أحب إن الفيديو ده ينتشر بشكل إيجابي عشان يوصل رسالة لكل المتوهمين إنهم عشان ينجحوا محتاجين ياخدوا كورسات ( إنجليش أميريكان , ولا إنجليش بريتيش ) و يدفعوا فيها مبالغ ضخمة . .. أنا علي مدار ال16 ساعة اللي باكون صاحي فيهم يومياً .. باتكلم إنجليزي فيهم تقريباً أكتر ما باتكلم عربي .. و مع لكنات من مختلف بقاع العالم .. هندي و أسباني و فرنساوي و أمريكي و أسترالي و روسي كمان .. عقدة الخواجة اللي بتتربي عند معظم الشباب اللي باشوفهم إنهم لازم يبقوا شبه خريجي مدارس اللغات .. و لكنتهم أمريكي صرف .. بتمنعهم إنهم يخبطوا و يتعلموا بالممارسة مع الأسواق الضخمة المفتوحة أونلاين . … … المستوي اللي الأستاذ بيتكلم بيه ده … ممتاز جداً .. و كافي جداً إنك تمارس حياتك العملية أونلاين و أوفلاين في 99% من المواقف اللي شفتها فحياتي . … ماتتكسفش … و ماتخليش حد ( محتاج يتعالج من أمراض نفسية كتير ) يتحكم فيك .