بلاش أنانية .... يا أناني

بلاش أنانية … يا أناني . … لسة قايل كلام معين لأحد الأشخاص ” اللي عارفين نفسهم كويس 😎” و نازل من مكتبي حالاً .. و حاعيده هنا كمان مرة .. لأن كتير من اللي كلمتهم محتاجين يقروه . .أكتر من مرة .. و لأني أنا شخصياً كنت من أكتر الناس اللي كانوا محتاجين يسمعوا الكلام ده زمان .. … الخلاصة بتاعت الكلام ده : أطلب فلوس مقابل شغلك .. و حط سعر لكل دقيقة بتقضيها في شغل . … زماااااااااان .. و أيام ما كنت شايف إني ك ( مشروع مهندس ) المفروض إن يبقي في نوع من أنواع الإعتراف الضمني بقيمتي العلمية و العقلية 🤣🤣 في السوق عموماً .. و إني بمجرد ما حاتخرج حالاقي شغل علي مزاجي بمرتب محترم 🤣🤣.. كنت أى شيء باعرف أعمله .. أو معلومة أعرف أشتغل بيها .. كنت باطلع الشغل ده مجاناً .. بالكامل .. … أصدقاء كتير .. و معارف كتير .. كانوا بدأوا يطلبوا مني حاجات معينة ( في الأدوات اللي كنت بدأت أعرف أتقنها ) … و كنت باقضي وقت محترم مع كل حد عشان أخلص له طلبه .. و بعد كده كان يبقي كرامة لو عزمني حتي علي كانزاية بيبسي ساقعة . … … و فضلت علي كده فترة محترمة بعد التخرج كمان .. يمكن لحد ما دخلت الجيش .. و فهمت إن في الجيش .. لو حتعمل النهاردة حاجة زيادة مجاناً .. و بدون مقابل .. بكرة الحاجة دي حتبقي واجب عليك .. و حتتعاقب لو ماعملتهاش 😅 … كان لازم تتعلم من بدري في الجيش .. إن كل مهارة عندك .. لازم تعرف تحط لها سعر .. و تطلب ليها مقابل .. … … و بعد الجيش .. فضلت فترة محترمة برضو .. مش باسعي إني أجيب فلوس .. أكتر من إحتياجاتي الشخصية جداً ( لبان و بن و إشتراك النت ) .. و كنت دايماً باتبرع بالجزء الأكبر من وقتي و طاقتي بعد كده بدون مقابل .. مجاناً بالكامل .. لأي حد يطلب . … المشكلة هي إني بالتدريج فهمت إن ده كان أنانية مني .. مش كرم .. أيون … أنا كنت باعمل شغل مجاناً كتير .. و باتبرع بمجهودي كتير .. لأني كنت أناني .. … … خليني أشرح : … ربنا خلق الناس بقدرات مختلفة .. في ناس ربنا خلقهم طوال .. و ناس قصيرين .. في ناس مولودين عندهم مواهب معينة .. و ناس لا .. .. بفضل الله .. ربنا وهبني شوية حيلة في مجال الكمبيوتر و الهندسة و التكنولوجيا .. و رزقني إني أتقن الإنجليزي بإمتياز .. فبالنسبة ليا .. كان سهل إني منين ما أحتاج أجيب فلوس .. كنت بالاقي مشروع بسهولة .. و أشتغل عليه .. و آخد مقابل ليه .. كنت صنايعي شاطر يعني . … و لكن ناس كتير تانيين .. بالنسبة ليهم حاجات كتير من اللي ربنا سهلها ليا .. صعبة . بالنسبة ليهم الإنجليزي معضلة .. و حلم بعيد جداً .. بالنسبة ليهم التكنولوجيا ألغاز .. و ماعندهمش من الحيلة ما يكفي إنهم يدوروا علي شغل بنفسهم .. .. الناس دي منهم كتير عندهم نعم تانية ربنا مأنعمش عليا بيها .. زي نعمة الصبر مثلاً علي الشغل المتكرر .. أو التركيز .. أو الهدوء العقلي .. أو المجهود الوفير المتركز .. … … اللي فهمته بالتدريج .. إني لما باتبرع بشغلي مجاناً .. و بدون مقابل .. و ماكبرش الشغل بتاعي أكبر من ( مجرد نفسي ) .. إني باستخدم الحيلة اللي ربنا رزقني إياها … غلط .. .. إني باكون أناني جداً .. و باستفيد لوحدي بس من المهارات اللي ربنا رزقني إياها .. … … في حين إن الصح هو إني أبذل مجهود كتير جداً .. عشان أطلب فلوس .. و مقابل .. مش ليا .. و لكن عشان أقدر أكبر شغلي .. عشان أقدر أدي مرتبات .. مرتبات لناس كتير ربنا رزقهم أنواع مختلفة من النعم … … … الصح هو إني ألاقي الشجاعة فنفسي أواجه السوق .. و أحط سعر لخدماتي .. و كل شيء أنا أقدر أعمله .. عشان أقدر أستخدم الفلوس دي بعد كده عشان أساعد بيها غيري .. … … لكن طول ما أنا واهم نفسي إني باشتغل مجاناً كتير و باتبرع بخدماتي كتير .. عشان أنا كريم مثلاً أو قلبي كبير .. طول ما أنا حافضل مستمتع بأنانيتي … و معيش نفسي في الوهم .. و أتناسي دوري و الواجب اللي عليا .. فإني ربنا رزقني بمهارات معينة و قدرات معينة .. مش عشان إستمتاعي الشخصي و بس .. و لكن عشان أقدر أساعد غيري … و أساعد غيري إنه يساعد غيره . … … … و لو إنت شخص ما .. أو هيئة ما .. و محتاج شغل معين .. بس ماعندكش القدرة علي دفع مقابل مادي للشغل ده .. إفهم كويس يعني إيه : pre profit و إنك تقدر تعلن للناس إنك لسة ماحققتش أى أرباح من شغلك .. و محتاج متبرعين بمجهودهم … و ناس تتبرع ليك بفلوس .. و أطلب فلوس .. أطلب مساعدة من الناس .. عشان تكبر .. و تقدر بعد كده تساعد ناس تانيين .. .. لكن إنك تفضل عايش علي مجهود كتير من الموهوبين اللي شغالين بدون مقابل هما كمان .. ده حيفضل يديك صورة غير صورتك و حجمك الحقيقيين .. فعمر ما حد حيساعدك عشان تكبر .. لأنك مبين ليهم إنك أساساً كبير .. .. و مع أول إمتحان حقيقي لحجمك الحقيقي … حتتإذي فعلاً .. … … … طلب المساعدة مش غلط .. طلب الفلوس مش غلط … و شغل العشم و بالحب اللي معشش فمفاصل المجتمع الظريف بتاعنا ده .. بيموت ناس كتير بالغباء … قبل ما بيموتهم بالفقر .. … … لو إنت مش حاطط سعر لخدمتك و لوقتك … يبقي إنت أنااااااااااااني . … … و الله أعلم .