حاهبد كام هبدة سريعاً مش معتمدين علي إحصائيات إطلاقاً ..

حاهبد كام هبدة سريعاً مش معتمدين علي إحصائيات إطلاقاً .. و لكن معتمدين علي رؤيتي المحدودة خلال ال12 سنة اللي عدوا علي تخرجي للسوق .. ممكن جداً يكونوا غلط .. و لو فعلاً شايفهم غلط .. رجاء صححلي تفكيري :

الفكر المادي الإستثماري اللي بيتكلم بيه نجيب ساويرس .. أحد أكتر الحاجات اللي إكتشفت إنه ناقص فتفكيري خلال أول 6 سنين بعد تخرجي من الكلية . و خلال ال6 سنين اللي فاتوا ( اللي عملت فيهم تحول من كوني صنايعي شاطر ” فريلانسر ”.. لمجموعة تكون أكبر من فرديتي ذاتها ) إكتشفت إن خريجين كليات القمة بشكل عام .. و المهندسين بشكل خاص هما أكتر ناس فعلاً تم تدريبهم علي التفكير بشكل غير إستثماري إطلاقاً . .. و إن كتير جداً من الناس اللي ماتعرضتش للتعليم الحكومي في كليات القمة خلال فترة شبابها دي ( من 17 ل 22 سنة ) .. أو دخلت كليات أو معاهد يروح يمتحن فيها و خلاص عشان ياخد شهادة و شكراً .. كانوا أنجح من كتير من المهندسين و الدكاترة بشكل تجاري و إستثماري . .. المهندس خصوصاً .. بيتم تدريبه من هو في الكلية علي التالي :

1- مافيش حاجة ذات قيمة بتيجي بشكل سهل .. أو بسيط .. أو مباشر .. إطلاقاً . فبيتعود إن حتي لما بتيجي قدامه فرص بيزنس سانحة و مباشرة و سهلة و بسيطة .. إنه يشك فيها .. و ماياخدش أكشن .. و يتردد .. لأنه فعلاً من أيام الدراسة إتعود يدور علي ال ( تريكاية = الخدعة ) ..و يبدأ يعقد الموضوع علي نفسه بشكل مش دايماً مطلوب . .. 2- بيتم تدريبه برضو علي إنه مش زي باقي البشر .. و إنه أعلي منهم و أذكي و أكثر قيمة .. فقط لمجرد إنه تم تعبئة نافوخه بكمية ضخمة جداً من المعلومات . فبتكون النتيجة إنه لما بيطلع في السوق .. بيبدأ يعامل اللي حواليه بالمنظور ده .. و يرفض فرص شغل كتير لأنه شايف إنه أعلي منها و إنه مش متقدر صح فيها .. و بيفضل أول سنتين بعد التخرج بيعاني من الأزمة دي .. إنه ” مش متقدر ” صح .. في حين إن في آلاف فرص الشغل محتاجة مهندسين حواليه . و القليل منهم اللي بيتعلم بعد زمن .. إن قيمتك في السوق بتتقدر علي حسب السوق شايفك إزاي .. مش علي حسب إنت شايف نفسك إزاي . … 3- بيتم تدريبه علي البحث عن الضربة اللي بالمرزبة … مش العشرة اللي بالشاكوش . يعني حتي في إمتحانات الكلية الكتير .. جداً .. بيتعلم إنه يدور علي المسئلة اللي عليها درجات كتير .. عشان يحلها .. و يضمن النجاح .. و في المعتاد المسئلة دي بتبقي ضخمة .. و حلها بياخد مجهود ضخم جداً .. .. في الحياة بيعمل نفس الشيء .. و يتجاهل الكتيييير جداً من الفرص السهلة المتاحة المتكررة .. و بيفضل يدور علي ال ” Moon shot ” الضربة الكبيرة اللي حتجيبله مبلغ ضخم يفتح بيه مصنع ضخم و ينافس بيه إيلون ماسك . في حين إن العالم حواليه بيكون شغال يدق بالشاكوش الصغنن دقات بسيطة صغيرة متكررة .. و في الآخر بيلاقي نفسه بعد سنين .. لسة مالاقاش المرزبة اللي حيضرب بيها .. و أصبح مكسل يمسك شاكوش صغير يجرب بيه لأن الزمن جري بيه خلاص . … … ناوي أكتب و أتكلم أكتر عن الموضوع ده في المستقبل إن شاء الله