9 أفكار عن تريندات النهاردة كانوا شاغلين عقلي .. قلت

9 أفكار عن تريندات النهاردة كانوا شاغلين عقلي .. قلت أكتبهم 😅

AR 12 د

9 أفكار عن تريندات النهاردة كانوا شاغلين عقلي .. قلت أكتبهم 😅 … { الفكرة رقم (1) } … 1- أبرقي أرعدي أبطالاً و عدوك أنبل وعد .. جاؤوك بصوت الحق الهادر كهزيم الرعد . 2- رأيت الحقيقة خلف البصر , رسمت الحروف بعمق الحجر , أنرت الطريق , وجدت اليقين, رفعت الجباه و الهمم . 3- نادانا نسيم الصباح في مشوارنا للنجاح .. هيا للعمل .. كي نصنع المستقبل … لا يسعنا الإنتظار .. لا وقت للإختيار .. و كلنا أمل .. في رسم غد أفضل . … الكلمات اللي فوق دي ( لو ماتعرفش ) فهي كلمات شارات البداية ( أغاني المقدمة يعني ) بتاعت تلاتة من أشهر و أجمل إنتاجات سبيس تون .. قناة شباب المستقبل . بالترتيب هما ( هزيم الرعد , دراجون بول , أبطال الديجيتال الجزء الرابع ) . … و لولا إن بوستاتي بتميل إنها تكون طوييييييييلة للغاية ( و ده غالباً حيكون من البوستات الطويلة جداً ) كنت كتبت الشارات دي بالكامل .. و باقي شارات المسلسلات التانية اللي حافظهم .. بالكلمة . ( كونان , سلام دانك , القناص , أبطال الديجيتال الجزء التالت , أجنحة الجاندام , … و غيرهم كتير جداً ) … جميع إنتاجات سبيس تون دي .. حفظتها .. و كانت أحد أكبر العناصر الأساسية في تشكيل وعيي خلال تانية و تالتة ثانوي ( 2004 - 2005 ) . يعني لما كنت من سن : 15 ل 17 سنة . ( سن المراهقة ) .. اللي بيتبني عليه جزء كبير من شخصية الإنسان بعد كده . … … { الفكرة رقم (2) } … 1- أندرو تيت 2- تريند محمد صلاح الشهيد 3- محمد صلاح لعيب الكورة 4- تييم وسيم .. ولا تييم ماظو . 5- إنفلونسرز التيكتوك و السوشيال ميديا عموماً . 6- محمد رمضان 7- كيف تكسب آلاف الدولارات من الفريلانس علي الإنترنت . 8- أفضل 10 طرق عشان تهاجر بعد ثانوية عامة . 9- سناب شات , و برامج التعارف و المواعدة . 10-برنامج الأكيل , إنفلونسرز الأكل , محلات الفاست فود , محلات تريندات الأكل . 11- نيتفليكس , و مدرسة الروابي , و الرينبو … الحاجات اللي كتبتهم فوق دول .. بيشكلوا ( من وجهة نظري ) الجزء الأكبر من الحاجات اللي بتأثر علي وعي أى شاب مراهق حالياً . .. و ماقدرش غير إني أحاول أفتكر .. يا تري الحاجات الأساسية اللي كانت بتشكل الجزء الأكبر من المؤثرات علي وعي عموم مراهقة جيلي .. كانت إيه ؟! .. يعني تعالي نرجع بالزمن لسنة 2004 - 2005 .. و أحاول أفتكر .. جيلي كانت ترينداته إيه ؟ … 1- تامر حسني و شيرين في بداياتهم .. و طبعاً عمرو دياب
2- ريال مدريد في عصره الذهبي ( الجالاكتيكو ) . 3- عمرو أديب أيام الدش المركزي و قناة اليوم . 4- MBC2 أيام ما كانت هي المصدر الأكبر للأفلام الأجنبي . 5- عمرو خالد في أوج عصره و مجده و إنتشاره . 6- محلات تجميعات الكمبيوتر , و مجلات رنات المحمول و النغمات البوليفونك , و كتب الرسايل ال sms . 7- ميدو ( أيام أياكس أمستردام ) , و أبو تريكة , و بيبو و بشير , و بيبو و التابعي . 8- الوجوه الجديدة الشباب في التمثيل و السينيما و التيليفزيون زي ( منة شلبي , أحمد عز , هاني سلامة , بسمة , … ) و إزاي بيقدموا مشاهد جريئة خادشة للحياء العام , و إزاي كانت المشاهد دي هي حديث الساعة و كل ساعة في فصول ثانوي زمان … و بمناسبة الجزء التاني اللي جاي بعد 18 سنة ده .. فيلم حريم كريم . 9- الإنتفاضة الفلسطينية الثانية . … … {الفكرة رقم (3) } … سبب إن عقلي ثارت فيه الأفكار دي من شوية .. هو إني بقالي شهور تقريباً بيظهر قدامي بشكل متكرر آخر تطورات حركة ال ( woke ) في أمريكا و بريطانيا خصوصاً و العالم الغربي عموماً . .. حركة ال ( woke = مصطلح جاي من ماضي كلمة wake يعني صاحي أو فايق ) دي حركة بتشمل أكتر من نشاط أو فكر أو توجه إجتماعي .. زي :

1- تقبل كل الشذوذ بكل أنواعه ( يعني لحد لو راجل أو ست حابب إنه يتجوز كائن فضائي عايش في خياله لوحده ) .. مش مجرد دكر و دكر .. أو نتاية و نتاية بس يعني . 2- تقبل كل الإنحراف و الخلل الجنسي بكل أنواعه ( من منطلق القلب و ما يريد ) .. بس هنا مش بيبقي القلب هو اللي بيريد ولا مؤاخذة 😅. 3- تقبل إن أى حد ممكن يقرر في أى وقت إنه يكون ي ( Identify يعني ) أى حاجة علي مزاجه .. يعني راجل يقرر فجأة إنه عايز يبقي ست .. حتي لو مش حيعمل أى عمليات تغيير جنسي أو ما شابه .. و لكن هو ليه مزاج إن الناس لما تناديه .. تقوله يا أُختشي بدل يا حاج .. أو يا جدع . و عايز لما يتزنق يدخل حمام حريمي مش رجالي .. و لما يحب يلعب كورة أو أى رياضة تانية .. يلعب مع الحريم .. … و العكس .. يعني الست ممكن برضو تقرر تكون أى حاجة علي مزاجها .. و مش بس كده .. لا .. في اللي بيقرروا إنهم مش بيقرروا أساساً .. و لما تناديهم .. تنادي عليهم ب( pronouns = توصيفات ) الجمع .. يعني ماتقولش ( هو .. أو هي ) .. لا .. تقول ( دول , و دوكهما , و … هكذا ) . … … الدوشة بتاعت عالم الجماعة ال ( woke ) دي .. فيها كوميديا سوداء من أفظع ما شفته علي مدار حياتي .. و لكن .. و لكنهم بيكتروا .. بسرعة … و بيزيدوا بشكل ملحوظ .. و زي أى سرطان أو فطريات سامة .. كل ما بيتهاجموا .. بيزيدوا .. العالم ملئ الحمقي .. و ملئ بالماهرين جداً في تحويل حماقة البشر دول .. لثورات .. و ثروات ضخمة . … و بيشكلوا جزء ضخم دلوقتي من المؤثرات الأساسية علي وعي الشباب و المراهقين في العالم الغربي حالياً .. و بالتبعية .. و لأن العالم الغربي هو القوة الأكبر إعلامياً في العالم .. أصبح التأثير ده ممتد لباقي العالم كله . … … { الفكرة رقم (4) } . … صحيت النهاردة الفجر .. لقيت أحد البوستات المتكررة ( تريند ) قدامي علي الفيسبوك .. لشاب مسيحي شتم الرسول سيدنا و نبينا محمد صلي الله عليه و سلم .. و اللي فهمته من البوست إنه شتمه في رسالة خاصة ( يعني مش في بوست علي العام ) . … و معظم البوستات اللي ظهرت قدامي .. كانت بوستات تشهير بالشاب ده .. بل إن أحد البوستات اللي ظهرت قدامي كان فيها تفاصيل حياته بالكامل .. بأرقام و أكاونتات عائلته فرداً فرداً .. و أكاونتات مسئولين الجامعة اللي هو فيها .. بحيث إن الإنترنت يقوم بأكثر شيء الإنترنت ماهر فيه .. و إن الشاب ده (يتفضح ) .. و يتم نبذه أونلاين . … و الهدف من الحملة دي بالطبع هو ( ردع ) أى حد تسول له أفكاره إنه يتعدي علي رسول الله صلي الله عليه و سلم بالشتيمة بالمنظر ده تاني . … … { الفكرة رقم ( 5) } … أحد الجمل اللي عمري ما نسيتها من الفيلم الأيقوني ( the usual suspects ) بتاع كيفن سبايسي ( اللي متهم حالياً في عدد من قضايا إغتصاب الشباب الولاد ) . هي علي لسان الشخصية اللي كان بيلعبها في الفيلم : “The greatest trick the Devil ever pulled was convincing the world he didn’t exist.” يعني : ” أعظم خدعة لعبها الشيطان علي البشرية .. هو إقناعهم إنه مش موجود من الأساس ” . … أصل لو إنت إقتنعت إن عدوك مش موجود .. حتعمل إيه ؟ .. ببساطة خلاص .. حتبطل تبني دفاعات .. بل حتهدم كل الدفاعات اللي كنت بانيها أساساً.. و حتبطل تستعد .. و حتبقي لقمة سائغة جداً لأى حد يحب يعمل معاك الصح و السليمة و الجلاشة . … … { الفكرة رقم (6) } . … في سنة كام درست نواقض التوحيد ؟ طب في سنة كام درست التوحيد ؟ آخر مرة درست إسم النبي صلي الله عليه و سلم كاملاً ؟ آخر مرة درست فقه ؟ آخر مرة درست نواقض الوضوء ؟ آخر مرة درست فقه البيع ؟ آخر مرة كلموك عن الإسلام إمتي ؟! . بيقول لك العيال بتلحد أوي … طب ما هو ده الطبيعي .. دايماً باقول إن الكلام عن الإلحاد كلام معكوس علي عكس ما يتصور البعض . السؤال الحقيقي هو : إنت مسلم إزاي ؟ العجب كل العجب ليس من هلك .. و لكن العجب كل العجب .. كيف نجا ؟ . عملتها إزاي ؟ .. فعلاً عملتها إزاي ؟ يعني إنت قاعد من أول ما كبرت .. ماحدش كلمك عن الإسلام ولا العقيدة ولا التوحيد … و لسة مسلم ؟ … والله دي مفاجأة . . تعالي ناخد صورة سيلفي مع الراجل ده 🤣 … المسلم الناجي. عملتها إزاي دي ؟ …

الكلام اللي فوق ده جزء بسيط من أحد محاضرات باشمهندس أيمن عبد الرحيم . .. الجزء البسيط ده كان فيديو قصير ظهر قدامي صدفة من 4 شهور علي تيكتوك . *** لينك الفيديو ده حاسيبه فأول كومنت . .. ماكنتش أعرف ساعتها مين هو باشمهندس أيمن .. ولا كنت شفت ليه أى محتوي قبلها .. .. و الكلام اللي في الفيديو ده علّم معايا جداً .. بحيث إني حبيت أشوف المحاضرة كاملة .. و فعلاً وصلت لها علي اليوتيوب .. و شفتها بالكامل .. .. أسلوبه العبقري (باشمهندس أيمن أقصد ) .. كان أحد أكتر الحاجات اللي ساعدتني إني أهتم أكمل محاضراته .. .. هو مهندس .. بيجيب كل حاجة من بدايات بدايات بداياتها .. و يبني عليها بناء منطقي واضح و مفهوم . و مُتعلم بشكل قوي جداً في مجالات كتير من الدنيا حالياً .. بحيث إنه بيشرح فعلاً للمسلم المعاصر . … علي مدار ال4 شهور اللي فاتوا .. و أنا باسمع تقريباً كل اللي أقدر أوصل له من محتوي باشمهندس أيمن علي اليوتيوب .. حتي الآن خلصت التالي :