( السؤال اللي في الصورة ده غير كامل .. و

( السؤال اللي في الصورة ده غير كامل .. و بيستفزني دايماً .. عشان كده حاشرح قدر إستطاعتي طريقة تفكيري في التعيين بشكل عام ) . . الناس في الشغل بتنقسم لعدة أقسام أساسية : … الأول : ( أغلبية الخريجين الجداد خلال أول 25 سنة بعد التخرج تقريباً )

• أنا مش عارف أنا مهاراتي إيه ( درس كلية مانتفعش بيها مثلاً , أو ماكنش حابب دراسته من الأساس )

• و مش عارف حاوظفها إزاي ( أجيب منها فلوس )

• فبالتالي مش حاعرف محتاج إيه عشان أوظفها ( موارد إضافية ) . … الثاني : ( أغلبية الخريجين الجداد خلال أول 25 سنة بعد التخرج برضو .. بس دحيحة و كانوا بيذاكروا كتير ) .

• أنا عارف ( أو شاكك إني عارف ) أنا مهاراتي إيه ( درس كلية قمة مثلاً , أو خد كورس تمنه غالي فأكاديمية فيها تكييف في كل كلاس روم مثلاً 😅 )

• و لكني مش عارف أوظفها إزاي ( أجيب منها فلوس يعني )

• و بالتالي مش حاعرف محتاج إيه عشان أوظفها ( موارد إضافية أقصد ) . … الثالث : ( أغلبية الخريجين الجداد خلال أول 25 سنة بعد التخرج .. بس كان معاه واسطة فاشتغل بسهولة بعد التخرج ) .

• أنا عارف مهاراتي إيه ( واحد إشتغل حاجة و حبها )

• و عارف أوظفها إزاي ( معاه خبرة شغل ضمن مجموعة أو شركة .. أو حتي بشكل فردي مثلاً )

• و لكني مش عارف أطور من نفسي إزاي ( مش عارف إيه الموارد الإضافية اللي محتاجها عشان المستقبل مثلاً ) . … الرابع : ( العملة النادرة اللي بيتنافس عليهم الشركات و هما اللي ممشيين 90% من الشغل في المعتاد ) .

• أنا عارف مهاراتي إيه ( واحد إشتغل حاجة و حبها )

• و عارف أوظفها إزاي .

• و عارف المفروض أطور من نفسي إزاي .

• و كويس شكراً أنا زي الفل في المكان اللي أنا فيه مش عايز من حد حاجة .😎😆😆

---

---

الإجابة علي السؤال بالتالي :

• لو إنت من الفئة الرابعة ..

إنت بتبقي عارف سكتك دوغري أغلب الظن : يعني في الأغلب إنت مش بتبعت تسأل سؤال زي ده .. لا .. إنت لو عايز تشتغل في مكان ما .. بتعمل سيرش بنفسك علي المكان ده .. و تشوف اللي بيقدمه المكان .. و تخمن بينك و بين نفسك إحتياجات المكان .. او إنت ممكن تكون مفيد ليه إزاي .. و بعدين بتبعت رسالة أو خطاب موجه .. أو إيميل .. أو حتي حمام زاجل .. توضح فيها إزاي ممكن يكون في إستفادة متبادلة من الشغل بيننا .

و حتي لو ماكنش في فرصة شغل أو تعاون مباشرة بيننا … دايماً بيكون في علاقة مفيدة للطرفين بعد كده .. لأنك بتكون وضحت إنك من العملة النادرة اللي بندور عليها وسط آلاف السيفيهات . …

• لو إنت من الفئة التالتة … . في الحالة دي إنت قدامك طريقين : . 1- إنك تبعت ليا رسالة تفصيلية بمهاراتك و خبراتك الحالية .. و بتسيب ليا إني أقرر أوظف المهارات و الخبرات دي إزاي بما فيه مصلحة ليا و لشركتي أولاً .. و لو أنا باتقي الله و أمين .. المفروض إني أوضح ليك ( من وجهة نظري ) كل اللي ممكن أقدمه ليك من خبرات أو إستفادة ( غير مرتب الشغل ) . و بعدين إنت تقرر تقبل أو لا . . 2- إنك تبدأ تتعلم ( business ) , و تتعلم إزاي تفكر في نفسك ك ( business ) مش مجرد فرد .. و تفكر في كل ما تملكه علي هيئة موارد . و بعدين تبدأ تختار أى طريق من الطرق الكتير اللي ممكن تكون مفتوحة قدامك فإنك تعمل لنفسك خطة تطوير . و بعدين تحاول تدرس الشركة اللي إنت حتعرض عليها ( شراكة ) بينك و بينها .. و تشوف ممكن يكون في إستفادة متبادلة إزاي .. و بعدين تمشي زي الناس اللي في الفئة الرابعة . .

الإختيار بين الطريقين بيعتمد علي قدرتك علي التعلم بشكل منفرد و إنك بتعرف تدير نفسك أو لا . ( و عادي ماتزعلش لو ماقدرتش .. عدد قليل جداً من الناس اللي عنده القدرة علي إنه يدير نفسه … دي مش حاجة تقلل منك إطلاقاً ) . …

• لو إنت من الفئة التانية : . الإجابة حتعتمد بشكل كبير جداً علي مقدار إحتياجك المادي المباشر .. يعني :
• إنت بتعول أسرة ؟
• في حد بيصرف علي إحتياجاتك الأساسية ( مأكل , ملبس , مسكن ) ؟ .
• مديون ؟ . بحيث إني كصاحب شغل أحاول أستفيد من ( مهاراتك و خبراتك الحالية ) بأسرع شكل ممكن , و أدفع ليك مقابل ده مرتب يكفيك .. حتي لو أنا ك ( صاحب شغل ) عندي إحتياج لمهارات و خبرات أخري .. و مش متوفرة فيك . . فبالتالي القرار بيكون عليا أنا … بعد ما تبعت ليا رسالة تفصيلية فيها مهاراتك و خبراتك الحالية … و لكن .. لو إنت حر من الإلتزامات المادية المباشرة … و سنجل و برنس فنفسك ملك زمانك .. في الحالة دي القرار بيبقي عليك إنت .. لأنك حتعرض عليا مهاراتك و خبراتك الحالية .. و أنا حاعرض عليك المهارات و الخبرات اللي أنا محتاجها .. . و إنت بتقرر تتعلم المهارات و الخبرات دي معايا أو لا .. و علي حسب نوع الشغل .. ممكن تاخد مرتب أثناء ما بتتعلم .. او لا . . يعني : في وظائف كتير أنا دفعت و بادفع مرتبات للناس فقط مقابل إنهم يؤدوها أثناء ما بيتعلموها … زي :
• كتابة المحتوي .
• خدمة العملاء .
• وظائف تكرارية سهلة .. و لكن كتير أوي و مملة .. ( زي عمل إحصائيات معينة مثلاً .. أو تفريغ محتوي .. أو ما شابه ) . . لكن وظائف تانية ( ماينفعش تأديتها بدون خبرة كافية ) .. لو دفعت لك مرتب أثناء ما بتتعلمها .. بيكون المبلغ اللي بادفعه ليك ده مش مرتب .. و لكن ( مساعدة .. أو منحة ) . … .
• أما لو إنت من الفئة الأولي : . مافيش قدامك غير إنك تعرض وقتك .. بمقابل إنك تتعلم فقط . يعني تشتغل مجاناً مقابل إنك تتعلم حاجة إسمها ( الإنطباع الأول اللي بيؤدي للميل = aptitude ) . . يعني في حاجة مشهورة إسمها ( aptitude test = إختبار انت ميال لإيه ) دي بياخدها الناس اللي درست حاجات كتير .. و مش عارفين هما ينفعوا يشتغلوا إيه .. . أنا دايماً باقول إن ال ( aptitude test ) ده ماينفعش يتعرض علي معظم الخريجين الجداد في مصر .. لأنك بالأغلب مادرستش حاجة حقيقية .. إنت درست إزاي تمتحن في كليتك فقط .. . فبالتالي .. بانصح دايماً إنك تروح تجرب شغل لمدة سنة .. شهر علي الأقل في كل مكان مختلف .. يعني تجرب تشتغل شهر شغل يدوي متعب .. شهر تشتغل شغل ذهني مرهق .. شهر تشتغل شغل تكراري ممل .. شهر تشتغل شغل مع العميل مباشرة .. و تشوف زباين و تشوف إنت بتحب البشر ولا لا .. شهر تشتغل في الخلفية ( مخازن , backend , … ) اللي هو إنت مش بتشوف زباين ولا بشر ولا بتعرف الشمس طلعت من الأساس ولا لا .. و هكذا .. . و كل ده مجاناً .. بتروح بس تعرض علي صاحب الشغل إنك تتواجد في المكان .. مقابل إنك يتم تكليفك بأى شيء بسيط ( تعمل شاي و قهوة , تشيل ورق و تسلم ورق , … كده ) .. ده ما يُسمي بال ( intern ). . و بيكون كل هدفك في الموضوع ده هو إنك تشوف ( إنت ميال للعالم ده ولا لا ) . … … و الله أعلم .

*** لينك صراحة في الكومنت الأول