كرامة الجذر التكعيبي ... للواحد
- " يا عم روح خيط هدومك المقطعة الأول و بعدين إبقي تعالي إتكلم .. إنت عارف الراجل ده مشغل كام واحد و فاتح كام بيت ؟! "
كرامة الجذر التكعيبي … للواحد .
في شوية أخبار و بوستات متداولة علي الفيسبوك النهاردة .. عن كائن ما معاه شوية فلوس كتير .. ” أوي ” .. عملهم من الشهرة و تمثيل البلطجة .. تم إستضافته كرائد أعمال في مؤتمر لريادة الأعمال . و طبعاً كالمعتاد .. يعلو صوت الخناقة المشهورة بتاعت :
- ” هو عشان بقي معاه فلوس يبقي رائد أعمال و يتكلم ؟! ” . و يتم الرد علي الزعيق ده من الطرف التاني ب
- ” يا عم روح خيط هدومك المقطعة الأول و بعدين إبقي تعالي إتكلم .. إنت عارف الراجل ده مشغل كام واحد و فاتح كام بيت ؟! ” … علي مدار ال10 سنين اللي فاتوا تقريباً منذ تخرجي من هندسة .. و أنا باشوف الخناقة دي بشكل مستمر .. المهندس اللي قضي 5 سنين أو أكتر في كلية هندسة بيدرس علوم معقدة جداً … و بذل مجهود و وقت و فلوس و مشاعر و دموع و آلام و أحلام .. بذلهم عشان يقدر يتحصل علي شوية درجات تثبت إنه جدير بدراسة العلوم المعقدة دي .. بذلهم عشان يقدر يحصل علي شهادة تثبت إنه ذكي .. شهادة تثبت إنه … مهندس . و بعد التخرج .. يكتشف إن الشهادة دي .. يادوب .. تخليه يقدر يحصل علي لقب مهندس في البطاقة .. لكن قيمتها المادية محدودة جداً جداً .. جداً .. … الصراع اللي بيخوضه المهندس بعد تخرجه .. صراع مش سهل .. صراع عشان يتخلي عن ال … كرامة … مش كرامته الشخصية … لا .. و لكن كرامة الجذر التكعيبي .. للواحد . … خليني أشرح : … الجذر التكعيبي ل 8 مثلاً معناه .. إنك تلاقي الرقم .. اللي لما تضربه فنفسه 3 مرات .. يساوي 8 … و النتيجة دي بتساوي 2 .. لأن : 2 * 2 بيساوي 4 .. و بعدين 4 * 2 = 8 . يعني 2 * 2 * 2 … = 8 . … فبالتالي .. لما أسأل .. إيه الرقم اللي تضربه فنفسه تلات مرات … فتكون النتيجة ( 1 ) … الإجابة السهلة البسيطة هي : ( 1 ) . دي معلومات بسيطة عارفها أى حد وصل تالتة إعدادي . .. لكن بمجرد دخول الطالب ثانوي عام رياضة .. و بعدين كلية زي هندسة .. بيبدأ يدرس حاجة إسمها ( الأعداد التخيلية ) .. و ده فرع من فروع الرياضة .. معقد شوية . … و بيبدأ الطالب يكتشف إن الجذر التكعيبي للواحد .. مش ( 1 ) بس .. و إن في نتيجتين تانيين كمان .. بس معقدين شوية .. و إنه دلوقتي لازم يفهم إزاي يحسبهم .. و إزاي يفكر بيهم .. و يعتاد … يعتاد إن الحياة خلاص مش سهلة و بسيطة زي زمان .. لأ .. دلوقتي عقلك لازم يبقي بيفكر بالمستوي ده من التعقيد .. عشان تحصل علي لقب .. ال .. مهندس . … و بيتم تدريب الطالب علي التفكير بالمنظر المعقد ده .. علي مدار 5 سنين أو أكتر من عمره .. عشان يقدر بعد التخرج إنه يتعامل مع تعقيد المكن و الأجهزة و البرامج المختلفة اللي بتشكل التكنولوجيا اللي عايشينها كلنا .. .. لكن بعد التخرج .. الطالب بيكتشف إن في مسافة ضخمة بينه و بين المكن و الأجهزة و البرامج دي .. مسافة ضخمة مليانة عقبات و مطبات و محطات .. محطات إسمها :
- وظائف إدارية .
- مبيعات .
- موارد بشرية .
- إقتصاد .
- طباع بشرية .
- … و أكتر .
…
محطات كتير بتفصل بين الطالب اللي دماغه كلها هندسة … و بين الهندسة الحقيقية ( بتاعت المكن و الأجهزة و البرامج ) .
..
كل المحطات اللي في النص دي بقي .. في أماكن كتير في العالم .. و في مصر بالذات … مافيهاش مهندسين ..
و مالهاش علاقة بالهندسة من الأساس أغلب الوقت ..
فبالتالي ..
مش عارفين أى شيء أو أى حاجة عن الجذر التكعيبي للواحد … غير إنه بيساوي ( 1 ) .
…
و مهما حاولت تشرح لهم .. إن في نتايج تانية موجودة .. بس لازم يدرسوا شوية علوم معقدة عشان يفهموا يعني إيه ( أعداد تخيلية ) ..
بيكون الرد اللي بتواجهه هو ( ما معناه ) :
فكك مني .
…
…
الصدمة اللي بيواجهها طالب الهندسة في اللحظة دي مش سهلة ..
صدمة إنه فضل لمدة 5 سنين أو أكتر .. يحترم و يحافظ علي كرامة الجذر التكعيبي للواحد ..
و دلوقتي .. شايف الكرامة دي بتتبعتر قدامه ..
شايف ناس بتقول بكل بساطة و سهولة إن اللي هو بذل فيه مجهود ضخم علي مدار 5 سنين أو أكتر ..
مالوش لازمة .
…
و بيبدأ في اللحظة دي يختار ..
هل أرمي اللي قضيت فيه 5 سنين أو أكتر في درج مكتب قديم .. و أقول أنا كمان مع اللي بيقولوا إن ( الجذر التكعيبي للواحد ) .. ب ( واحد ) بس ..
عشان أستسهل و أنجز و أريح نافوخي ؟ .
..
ولا أفضل أحاول أشرح لكل اللي يقابلني منهم ( يعني إيه أعداد تخيلية ) .. و قيمة ال( أعداد التخيلية ) .. و أهمية النتايج التانية للجذر التكعيبي للواحد .
؟!!
… … أنا فضلت أفكر في السؤال ده .. و الإختيار ده كتير .. أوي .. .. ليه ؟ - ليه بيبان كتير إن الأسلوب اللي تم تربيتنا و تدريبنا إنه غلط .. حالياً باين أوي إنه صح ؟
- ليه اللي تم تدريبنا و تربيتنا عليه إنه صح .. حالياً بيطلع الناتج غلط ؟! .
- ليه الأغلبية و المجتمع شايفين النواتج الغلط .. اللي طالعة من طرق حل غلط .. إنها بتنجح صاحبها ؟
- و ليه كتير مهما كان طريقة حلك صح .. و بتستخدم القواعد و القوانين الصح .. النتيجة بتاعتك معظم الوقت مش بتكون كفاية تنجحك ؟! .. … ليه ؟ … اللي وصلت له .. هو إني لما باسأل ( ليه ) أساساً .. يبقي باغلط جداً .. و باقع في الغلطة اللي تم تدريبي عليها علي مدار سنين ( هندسة و علمي رياضة ) .. إني ماغلطهاش . .. غلطة إني ( باستعجل ) و أبطل تكملة الحل بمجرد ما أشوف النتيجة السهلة . و بتكون النتيجة كده هي إن الحل … ناقص . .. لكن في الحقيقي هو إن المسئلة حلها مابينتهيش بمجرد ما تشوف مين معاه فلوس ” كتير أوي ” .. و مين مش معاه . المسئلة حلها مابينتهيش بالسهولة و البساطة و ال ( تفاهة ) دي … مش معني إن غيرك وقف تفكيره في مسئلة ( الجذر التكعيبي ) للواحد عند ال ( واحد ) .. إن باقي حلول المسئلة مش موجودة . و لكن معني كده فقط إن غيرك ده … وقف لحد كده .. و قبول المجتمع و اللي حواليك بكده … مش معناه إنك غلط .. و لكن معناه إنك لازم تتغلب علي الإحساس ده .. لازم تكمل حل .. لازم تكمل بذل مجهود .. لازم تقاوم رغبتك فإنك تسيب المسئلة و تقوم إنت كمان بمجرد ما تكتب الحل الساهل التافه ( الفلوس ) . … … لازم تدور علي الحلول اللي فاضله للمسئلة .. .. حفاظك علي كرامة الحلول الإتنين التانيين للجذر التكعيبي للواحد .. مش فإنك تقنع اللي حواليك بإن الحلول دي موجودة .. .. و لكن بإنك إنت تفضل تدور عليهم .. و تدرس علوم أعقد و أكثر صعوبة .. عشان تقدر تفهم إزاي تطبقهم بشكل مادي … ده كان الغلط فوجهة نظري .. .. إن تعليمنا الهندسي بيؤدي إن معظم طلبة الهندسة و الخريجين منها … لو سألتهم عن الجذر التكعيبي للواحد .. غالباً حيفتكر إنه فعلاً كان تلات نتايج مختلفين .. مش مجرد ( واحد ) .. و منهم جزء صغير كمان .. حيرد عليك و يقولك النتايج الحقيقية : 1 , −½ + i √(3/ 2) , −½ – i √(3/ 2) … بس فعلاً أهنيك … أهنيك لو لقيت مهندس .. يقدر يقول لك الإستخدام و التطبيق .. إستخدام و تطبيق النتايج دي .. بيتم فإيه . … … عايز تحافظ علي كرامة الجذر التكعيبي للواحد ؟! .. .. كمل حل … . . و الله أعلم .