1- إمتي آخد كورس في مجال ما ؟
2- إزاي أقدر أفرق بين النصاب اللي بينصب علي الناس في الكورسات .. و بين اللي حياخدني من إيدي و يشغلني عند بيل جيتس شخصياً ؟
1- إمتي آخد كورس في مجال ما ؟
لما ألاقي إني مش قادر بأى شكل و أى صورة و أى طريقة إني أوصل للمستوي اللي أنا عايز أوصل له بالمذاكرة و البحث لوحدي .
2- إزاي أقدر أفرق بين النصاب اللي بينصب علي الناس في الكورسات .. و بين اللي حياخدني من إيدي و يشغلني عند بيل جيتس شخصياً ؟
مش حتقدر تفرق إطلاااااااااقاً .. لأن الفرق مش بيعتمد عليهم هما .. بل بيعتمد عليك إنت .. يعني : في ناس مآمنتش بالرسل و الأنبياء عليهم أفضل الصلاة و السلام .. و آمنت بمسيلمة الكذاب و السامري و عبدت العجل اللي بيصفر من مؤخرته . و العكس .. في ناس صدقت الرسل و الأنبياء عليهم أفضل الصلاة و السلام بكل سلاسة .. و إحتقروا كل الحقراء من أمثال مسيلمة الكذاب و السامري بكل سلاسة برضو . .. فبالتالي .. في شخص ممكن يقعد في حفلة لمغني مايسواش تلاتة مليم .. و يستفيد .. و شخص ممكن يقعد فمحاضرة لعالم حائز علي أربعة نوبل فنفس الوقت .. و مايستفيدش . .. الموضوع بيعتمد عليك إنت بس .
3- قصدك إن أى حد يطلع يعمل كورسات و يمشيها سبوبة بقي ؟
أيون .. فعلاً .. و بالفعل .. و لو ماعملش كدة يبقي غلطان .. أو مش فاهم .. أو مالوش مزاج .. ببساطة الحياة كلها عبارة عن عرض و طلب .. أنا مش أحسن حد فمجالي إطلاقاً .. بل إني شايف نفسي بطيخة كبيرة جداً فمجالي .. و مع ذلك .. أنا حاطط تسعيرة لوقتي و مجهودي و خدماتي غالية جداً .. أنا حر .. ده تقديري لوقتي و مجهودي .. في اللي إتعامل معايا و كسب و عجبه شغلي .. و في اللي إتعامل معايا و خسر و إتضايق .. البشر مابيتفقوش علي حاجة ..أو حد . و هي دي الحياة .
4- يعني تقصد إن مافيش حاجة إسمها ” نصب ” .. و الحياة عادي بقي كل حد يعمل اللي علي مزاجه ؟! .
لا طبعاً … النصب أو الخداع هو : إني أبيع لك نحاس علي إنه ذهب .. مع علمي إنه نحاس . لكن لو حطيت قدامك معدن .. و قلت لك إنه نحاس .. و بعدين حطيت لك تحته سعر يساوي لسعر الذهب .. أنا حر .. إنت دلوقتي عندك معلومة إنه ” نحاس ” .. و عندك حرية إنك تشتريه بسعر الذهب أو لا .
5- طيب ده فالحاجات اللي سهل الإتفاق علي ماهيتها و كنهها و نوعها زي المعادن .. لكن في الحاجات اللي ماينفعش الحكم علي طبيعتها زي ال ” علم ” و ” الكورسات ” .. الموضوع بيمشي إزاي ؟! .
بالظبط زي أى نوع من أنواع الإبداع العقلي زي الفنون و اللوحات .. فنانين كتير عظماء ماحدش عبرهم ولا إهتم بيهم زي بيكاسو مثلاً .. و بعدين بعد ما بقوا مشهورين .. كل الناس بقت بتهتم بإنتاجهم و تقدره بمبالغ خرافية .. الكورسات نفس الموضوع بالظبط فوجهة نظري .. عمل إبداعي عقلي بحت .. زي إني رحت راسم لوحة فنية لقرص شمس أصفر و شوية لون أزرق … و رحت مسميها رحلة الشروق فمحيط الواقع المؤلم … ليا مطلق الحرية إني أسعره بالسعر اللي علي مزاجي .. و إني أدعي إنها بتصحي فإحساس اللي بيشوفها راحة أكتر من اللي بيحسها و هو مزنوق في الحمام . … إنت بقي تشتري الكورس أو العمل الفني ده .. و تحس بالراحة أو ماتحسش .. دي بتاعتك إنت .. مشكلتك إنت
6- ثانية واحدة ثانية واحدة … إيه الهري اللي بتقوله ده ؟! .. يعني أى حد يظرب أى ظرب فأى حاجة .. و عادي .. نعتبره عمل فني ؟! .. يغني أى عبط بأى صوت أنكر من صوت الحمير … و نعتبره مطرب ؟! يكتب أى عبط فأى ورق .. و يبقي إسمه كاتب و ليه كتب منشورة ؟! يعمل أى عبط قدام أى كاميرا .. و يبقي إسمه مخرج سابق عصره ؟! . ؟! .. ؟! ..
مالك ؟! سكت ليه ؟ .. كمل أسئلتك .. ولا إفتكرت المهرجانات اللي إنت قاعد بترقص عليها فأفراح إصحابك ؟! ولا إفتكرت الفراخ المقلية اللي كلتها فمطاعم الكتاب اللي ماليين معرض الكتاب ؟! ولا إفتكرت الأفلام اللي دخلتها في السينما العيد اللي فات ؟!
7- بس الكورسات حاجة تانية .. دي العلم .. دي اللي بتأهلنا عشان نشتغل و ناخد فلوس … إزاي مايبقاش في رقابة عليها ؟!
آآه .. عشان الكورسات اللي درسها عشرات الأجيال علي مدار ال30 سنة اللي فاتوا فجامعات مختلفة كلها ليها مكانتها .. إتعلموا ؟! إشتغلوا بيها ؟! خدوا فلوس منها ؟! . شهاداتهم الجامعية … حطوها .. إحم … ولا مؤاخذة .. فين ؟! .
8- يعني عشان أكسب و أنجح .. أعمل زيهم أنا كمان .. و أبيع الهوا فأزايز ؟! .
أيون .. و لو عرفت تبيع أزايز فاضية كمان مافيهاش هوا .. إعمل ده .. و بعد ما تنتج أو 100 إزازة فاضية .. و 100 تانيين ماليانين هوا .. و سميهم أزايز ألترا بلس .. نزل لهم إعلانات عالفيس و اليوتيوب .. و بعدين سجل فيديوهات لناس إشترت الأزايز الألترا بلس و خليهم يعملوا ريفيوهات عن إزاي حياتهم إتغيرت .. و بعدين أقعد إنتظر المبيعات .. و بعدين أقعد إنتظر الريفيوهات الحقيقية من الناس اللي إشترت و ماعجبهاش المنتج .. و بعدين أقعد إنتظر الريفيوهات اللي حيشكرولك فمنتجك و يحلفوا بجودته ( حتلاقي كتير منهم صدقني ).. و بعدين إدفع مرتبات الموظفين بتوعك .. و بعدين إعمل كورس عن إزاي عرفت تبيع الهوا فأزايز .. و سعره بسعر عالي .. و هكذا ..
9- ده إيه العبط اللي إنت بتقوله ده ؟! .. و اللي ياخد الكورس ده حيتعلم إيه؟! .. يتعلم يعبي أزايز هوا و يبيعها هو كمان ؟! ..
أيون .. و حتشتريها إنت و تكسبه .. بالظبط زي إزازة الهوا اللي إنت ماسكها دلوقتي دي .. موبايلك اللي إنت مش بتستخدم 1 علي ألف من إمكانياته .. إزازة هوا .. العبط اللي إنت بتقضي ساعات بتتفرج عليه علي التيكتوك و الفيس و إنستازفت و يوتيوب … إزازة هوا .. لبسك البراند اللي بتدفع فيه أضعاف تمن اللبس العادي .. إزازة هوا .. أفكارك اللي إنت بتاخدها من مسلسل عربي مصروف عليه 3 جنيه و نص إنتاج .. إزازة هوا .. السجاير اللي إنت حرفياً بتدمر صدرك بيها … إزازة هوا ..
10 - يعني أنا المشكلة ؟! .. هو يعمل كورس و يملاه أى كلام و يسعره بسعر عالي و يعمل سبوبة و يكسب … و أطلع أنا الغلطان ؟! .
طبعاً إنت الغلطان .. إنت معايير التقييم عندك مش بس فيها خلل .. لا .. دي مضروبة بالنار .. و بعدين حرقوها بجاز وسخ .. و بعدين دفنوا الرماد بتاعها فمجاري مدينة مليانة ناس بتاكل كرمب . إنت عايش فأكتر جيل عدي فتاريخ الأرض .. بيتباع و بيتشري من غير ما يفهم . إنت بقيت بتشوف أفلام مجاناً .. بتسمع أغاني مجاناً .. بتاكل فراخ و لحمة و كبدة يومياً من عربية راكنة علي رصيف بيتكم .. ب 3 جنيه الساندوتش .. أطفال لسة بالغين أول إمبارح .. شافوا علي موبايلهم صور ستات عريانة أكتر من أغني أباطرة التاريخ و أكثرهم زواج و علاقات . .. خدت كل ده و أكتر .. ” مجاناً ” .. مادفعتش فده مليم .. صح ؟! .. .. بس في المقابل .. إنت ماعندكش أدني فكرة عن قيمة نفسك إطلاقاً .. أو قيمة وقتك .. او مجهودك .. أو أفكارك .. أو معتقداتك .. عارف ليه ؟! .. لأن السلعة مابتعرفش قيمة نفسها .. عشان تفضل سلعة .. .. دماغك .. وقتك .. أفكارك .. مجهودك .. علاقاتك .. كلك علي بعضك (مش حلو ) .. كلك علي بعضك بتتباع و بتتشري بين الشركات و بعضها .. و إنت مفكر إنك برنس .. .. بالظبط زي ( و أنا آسف في التشبيه ) .. الماشية اللي بتتباع و تتشري .. و هي مفكرة نفسها ملكة لأن بيتحط لها تبن تتلهي فيه .
11- يا عم إيه الغلط ده بس ؟! .. ماشية إيه و مجاري إيه ؟! .. أنا عايز أعرف دلوقتي .. آخد كورس عند مين عشان أتعلم صح ؟! .
ما أنا كنت باشرح لك .. بس جاي لك من الأول .
12- لا .. أنا مش عايز من الأول ..أنا عايز من الآخر .. عايز الخلاصة .. الزتونة .. إنجزني … تعرف ولا أسيبك و أروح أدور علي غيرك ؟!
يعني إنت مستعجل ؟! .. و شايف إن وقتك غالي لدرجة إنك تحدد أنا أكلمك إزاي و بأنهي سرعة عشان أراعي وقتك و مشاغلك ؟! .. و إنت اللي الجاي تسألني أساساً ؟! .. و بتتنطط علي اللي خلفوني و محسسني إني بترجاك تسمع ليا ؟! .. يعني إنت شايف إن وقتك أغلي من وقتي ؟! .. و شايف ده يديك الحق إنك تزهق و تتململ و تحس إنك المفروض تاخد حقك بشكل أفضل من كده ؟! .. و أنا ضيعت معاك شوية محترمين من وقتي أنا ؟! .. دول مالهومش حق عندك بقي صح ؟! مالهومش تمن ؟!
13- إنت عايز تقبض تمن الكلمتين اللي أنا باقراهم دلوقتي دول يعني ولا إيه .. مش فاهم؟!
لا يا عم إنت بتقول إيه .. الكلمتين دول مجاناً لوقت محدود .. بس عشان أشرح لك أكتر .. و أعرفك فعلاً و بالخطوات أفضل 5 طرق عشان تعرف تاخد كورس عند مين .. في سلسلة محاضرات حتنزل حصرياً خلال شهر .. بسعر رمزي 998.5 دولار .. و لأول 10 مشتركين .. حنحجز لهم مكان قدام السبورة فأول تختة عند المحاضرين .. و حتاخد شهادة معتمدة تقدر تاخد بيها خصم علي الكورس الأدفانسد … الكورس الأدفانسد بتاع إيه ؟! ما هي دي الفكرة .. الكورس الأدفانسد هو اللي حيأهلك إنك تعرف تجاوب علي السؤال ده ( الكورس الأدفانسد بتاع إيه ؟! ) . … … بادر بالحجز .