عن ( الزعفران ) .. و ( اللبان الكلورتس )..

عن ( الزعفران ) .. و ( اللبان الكلورتس ).. و ( علي كافيه بالجنسنج ) .. و مشاوير المصالح الحكومية .

لما بافتكر المرات اللي فحياتي اللي شربت فيها فنجان قهوة حسيت بعد أول رشفة منه إني فهمت الحياة كلها فجأة , و إني لو حبيت أطير دلوقتي حالاً ممكن أطلع جناحات و أطير .. أكيد حافتكر الفنجان اللي عمله ليا عسكري صعيدي من أسوان في الجيش . بعد 45 يوم مركز تدريب مادقتش فيهم الكافين ( لا قهوة ولا شاي ) .. في حين إني كنت قبلها مدمن قهوة و باشرب 4 فناجين يومياً تقريباً .. أول يوم وصلنا فيه القوة الأساسية عشان نستلم خدمتنا .. و بنتعرف علي زمايلنا العساكر .. و بنتكلم إن إزاي مش مصدقين إننا حنرجع بيوتنا بعد 45 يوم .. شاركتهم إني شامم ريحة بن و قهوة .. و أكيد دي مشاعري بتلاعبني .. لاقيت عسكري من هناك بيقولي إنه لا .. و إنه فعلاً بيعمل قهوة للعميد .. و بعدين عزم عليا و قال لي تحب أعمل لك فنجان ؟ . وافقت و أنا حاسس إني باعمل حاجة غلط و إني حاشرب مخدرات مثلاً و خايف حد يشوفني .. عمل ليا فنجان .. و مجرد ما شربت رشفة … إحساسي في اللحظة دي ( و بعد 10 سنين تقريباً دلوقتي ) لسة مش قادر أنساه . … عدد الرسائل اللي جات لي تسألني علي موضوع ( القهوة بالزعفران ) اللي باشربها .. و فوايدها بالنسبة لل ADHD .. تخطوا 80 رسالة خلال أقل من 3 أيام . طيب .. أنا أساساً عرفت عن الزعفران إزاي ؟! … { أنا عرفت عن الزعفران من خلال تيكتوك } .. ده الملخص .. تيكتوك , زيه زي الفيسبوك و يوتيوب و إنستاجرام و جوجل و كل وسائل السوشيال ميديا عموماً .. لو حتبين له إنك مهتم بشيء ما .. حيفضل يوريك محتوي عن الشيء ده . أنا قدر إستطاعتي حذر جداً في إستخدامي للسوشيال ميديا و التكنولوجيا من أكتر من 15 سنة .. و باحاول إني أخلي بالي جداً أنا باهتم بإيه .. و باضغط علي إيه .. و باتفرج علي إيه .. لأن لو نسيت للحظة .. و إتفرجت علي فيديو من بتوع ( شاهد قبل الحذف فضيحة الممثلة أو المطربة الفلانية ) .. بابقي متأكد إني حالاقي بعده مباشرة 10 فيديوهات تانيين من نفس النوعية .. و تدريجياً حاتحول لخنزير بيترمي له زبالة المحتوي اللي من النوعية دي طول الوقت . لكن بمجرد ما باتجاهل النوعية دي من الفيديوهات .. و لما تظهر قدامي با ( سكرول ) بسرعة جداً .. و أتفاعل مع الفيديوهات اللي فعلاً تفيدني .. ساعتها بيظهر قدامي محتوي مفيد .. زي اللي عرفت عن طريقه الزعفران و فائدته بالنسبة لل ADHD . … كنت في دبي في الوقت ده , و هناك في سوق كامل إسمه سوق التوابل ( جنب سوق الدهب مباشرة ) , حتلاقي محلات كتير جنب بعض فيها كل أنواع التوابل .. و عدد من المحلات بتبيع زعفران بس .. أغلبهم إيرانيين . أنا جربت عدد منهم .. و ممتازين جداً . … طبعاً قبل ما أروح و أشتري … لما شفت الفيديو اللي كان فيه دكتور متخصص بيشرح فوايد الزعفران .. فتحت جوجل و قضيت فترة محترمة أعمل سيرش علي كل الكلام اللي شفته في الفيديو . بعدها بس خدت قرار الشراء . … و لكن البوست ده مش عن القصة المملة دي .. البوست ده عن ( هل الزعفران حل سحري ؟! ) . الإجابة : بكل تأكيد لا . … أنا ( زي معظم اللي عايشين بال ADHD) بنبقي في عرض أى شيء يحسسنا إننا فايقين , و إن الدنيا منورة . و لأن ( بالنسبة لنا معشر ال ADHD) ماعندناش وسط .. و عايشين طول الوقت بين أقصي التشتت و إنعدام الطاقة .. و أقصي التركيز و كل الهيبرة اللي في الدنيا . لحظات الفوقان و التركيز و إن الدنيا تنور دي .. بتبقي كإننا ضاربين مخدرات و عايزين العالم كله فايق معانا . فبالتالي .. إحنا بنبقي من أكتر الناس اللي بتدمن بكل سهولة للأسف .. و اللي بيجرب بس أى مخدرات فعلاً ( سجاير , حشيش , … أنواع أشد ) .. بيبقي من أكتر المتطرفين في إدمانه .. و بيأفور طول الوقت في الجرعات .. و بيعاني أشد المعاناة لو حاول يبطل . … اللهم لك الحمد و الشكر .. بفضل الله أنا ماحطتش سجارة واحدة في فمي علي مدار حياتي لحد النهاردة . و لكني متأكد إني لو فأى لحظة جربت .. خلال أقل من شهرين مثلاً حابقي باشرب 3 علب يومياً علي الأقل . لأن في علاقة مباشرة بين النيكوتين و الهرمونات اللي فيها خلل عند ال ( ADHD) . …

• و لكني أدمنت القهوة .. و فترات كتير في حياتي كنت باشرب 4 فناجين قهوة مركزين يومياً .. غير الشاي .. و طبعاً عانيت بسبب الأعراض الجانبية لحاجة زي دي .
• و أدمنت اللبان ( الكلورتس و الترايدنت ) .. و طول الوقت أثناء ما أنا باشتغل أو بالعب أو باعمل أى شيء .. كنت بابقي بامضغ في 8 لبانات علي الأقل فنفس الوقت .. و ده سبب ليا آلام فظيعة في فكي و مشاكل في سناني . و بطلت 6 شهور .. و للأسف رجعت له تاني من شهر 🥲 .
• و لما نوع قهوة معين بيعجبني .. باشتري منه كراتين كاملة خوفاً من إني أبقي عايز أشربه و مالاقيهوش في السوبرماركت . و عشان كده آخر مرة ( علي كافيه بالجنسنج ) فضل سنة كاملة ماينزلش مصر .. آخر مرة كنت في دبي رجعت معايا كراتين كافية لإستهلاكي 4 شهور علي الأقل 😅 . *علي مدار حياتي .. ادمنت السكريات بشكل فظيع أكتر من مرة لحد ما وزني تخطي ال120 كيلو أكتر من مرة .. السكريات ( و خصوصاً الشوكولاتة ) بتؤدي بشكل مباشر برضو لإفراز هرمونات الفوقان و السعادة و الهيبرة اللي كمعشر ADHD عندنا خلل فيهم ( و علي رأسهم الدوبامين ) . … و مع ذلك .. حالياً .. لو فأى يوم إحتجت إني أروح أخلص مشوار في مصلحة حكومية مثلاً .. و أشوف بيروقراطية أو غباء بشري أو عشوائية كتير .. مافيش كمية من الزعفران و اللبان الكلورتس و القهوة اللي بالجنسنج بتكون كفاية إني ألاقي عقلي منور و مقبل علي الحياة و شايف الدنيا زاهية 😅. إطلاقاً .. بابقي محتاج إني أرجع أنام .. أتفرج علي فيلم ساعتين مثلاً .. أنزل الجيم ساعة أفحت نفسي و أرجع .. … ببساطة .. بابقي محتاج إني أعمل ( baseline reset = يعني أرجع عقلي لنقطة التوازن ) اللي هو معتاد عليها يومياً .. و ده بيحصل لما ( بتنام , بتدي لنفسك وقت تفصل فيه بشكل غير واعي .. زي الفيلم الساعتين , أو بالمجهود الشديد اللي جسمك بيدي أولوية الطاقة فيه لعضلاتك مش عقلك ) . … اللي حصل في القصة اللي حكيتها أول البوست .. هو إن بعد الإقلاع عن البن و القهوة لمدة 45 يوم .. حصل ( Baseline offset = نقطة التوازن بتاعت عقلي إختلفت ) .. و بعد ما كان عقلي عشان يحس بالفوقان و الإنتشاء محتاج 4 فناجين قهوة عشان يحركوه .. دلوقتي رشفة واحدة من فنجان .. كانت كفاية إني أحس بنقاء و فوقان و تركيز ماحستش بيه فحياتي . … الزعفران مش حل سحري .. و تأثيره عليك حيختلف علي حسب متغيرات كتير جداً .. علي حسب إنت عقلك ال (Baseline = نقطة التوازن ) بتاعته فين .. علي حسب إنت بتعرف تتحكم أو تحس بال ( Baseline ) بتاعك أساساً ولا لا .. علي حسب روتين حياتك و أنواع الضغط العصبي و النفسي اللي بتتعرض له .. كل حاجة من الحاجات دي .. و حاجات تانية كتير .. كلها بتتحكم و بتتدخل في كيمياء مخك .. وعيك و إدراكك هما المتغيرين الأساسيين اللي لازم تحاول تتحكم فيهم . … … علي مدار السنين اللي فاتت .. أنا جربت طرق كتير عشان أقدر أتحكم في أفكاري و ال ( Baseline ) اللي باتكلم عنه ده . . جربت ( يوجا , تأمل , mindfulness , .. ) جربت معظم أدوات تنظيم الوقت و المشاريع .. جربت بعض الأدوية .. و عانيت من أعراضها الجانبية .. و بطلتها بالكامل . جربت أكتر من روتين تغذية مختلفين .. … اللي كان بينفع معايا أحيان كتير ماكنش بينفع مع أصدقاء ليا ( ADHD برضو ) بنتشارك مع بعض أحياناً نتائج تجاربنا دي . و العكس .. أحياناً كان بينفع معاهم حاجات مابتنفعش معايا . .. و لكن الأكيد هو إن طول الوقت عقلك فيه ( neuroplasticity = مرونة الشبكة العصبية ) .. يعني اللي بيتكرر فيه .. بيعتاد عليه .. و يغير من شكله و تكوينه بناءاً عليه .. و عشان كده .. لو جربت مثلاً يوجا و تأمل لمدة معينة .. حتلاقي إنك بعد فترة مابقتش تحس بنفس التأثير .. و محتاج تغير الطريقة اللي بتمارس بيها اليوجا .. و هكذا .. .. مش معني كده إنك تحبط و تفقد الأمل .. إطلاقاً .. دلوقتي بفضل الله أنا شايف إن كل ده نعمة ربنا أنعمها عليا .. دفعتني إني أتعلم عن أهم عضو ربنا أكرمني بيه كإنسان و ميزني بيه عن باقي المخلوقات .. عقلي . .. و عشان كده أختم البوست الطويل أوي أوي ده .. ب ( إتعلم ) ماتاخدش مني أى معلومة بدون ما تبحث ورايا و تتأكد منها بنفسك .. و صمم العالم حواليك بحيث إنه يقدم لك معلومات مفيدة رجاء .. مش شاهد قبل الحذف .. … و الله أعلم .