بمناسبة تريند ال (Sapiosexual = الإنجذاب الجنسي للذكاء ) ..

بمناسبة تريند ال (Sapiosexual = الإنجذاب الجنسي للذكاء ) .. اللي .. إحم .. هاج فجأة . … 1- حاجة زي لم الأُجرة في الميكروباص .. كفيلة إنها تخليني أضرب لخمة و أعرق و أتلخبط و تفكيري يتشل .. و لكني لحد النهاردة ما زلت باستمتع بحل مسائل رياضة و هندسة مُعقدة في أوقات فراغي … و باحل أصعب مستويات (سودوكو ) خلال أوقات قياسية ( عالمياً ) … بسهولة . ( ده مالوش علاقة بالذكاء ) . .. 2- لو حد قال قدامي عدد كبير من المعلومات اللي مالهاش علاقة ببعض فجأة .. بانسي كل حاجة هو قالها .. و بانساه هو شخصياً .. ( زي إن حد يوصف ليا نظام شغل ماعرفوش مثلاً .. أو يوصف ليا إتجاهات في مكان ماروحتوش قبل كده ) .. و لكن فنفس الوقت مادة زي ( الرسم و الوصفية ) في إعدادي هندسة .. من أعقد المواد المُعتمدة علي التخيل و بتعقد ناس كتير جداً … جبت فيها إمتياز بكل سهولة و بدون مذاكرة تقريباً . ( ده مالوش علاقة بالذكاء ) . … 3- ماعرفش أى لعيب في الدوري المصري لكرة القدم من أيام ما كان حسام و إبراهيم حسن بيلعبوا في الأهلي .. و معلوماتي عن الممثلين و المغنيين المصريين في نفس المستوي تقريباً .. و لكن في نفس الوقت ممكن أسمّع من الذاكرة .. شخصيات مسلسلات شغالة بقالها أكتر من 20 سنة زي ( ناروتو , وان بيس , بليتش , …) بتفاصيل أسامي حركاتهم و سيوفهم و هدومهم … ( ده مالوش علاقة بالذكاء ) . … 4- تفاصيل أجزاء كتير من شغلي نفسه ( بيانات كتير جداً عن أسعار .. و عمولات .. و أسامي شركات .. و مواعيد دفع .. و مواعيد قبض .. و هري كتير جداً ) لو سألتني عنها فأى وقت .. حتلاقيني باستأذنك أعمل شوية مكالمات كتير .. و أرجع لبيانات متخزنة كتير .. لحد ما أجاوبك .. و غالباً إجابتي حتكون غلط و مش كاملة . و لكن فنفس الوقت بنسبة كبيرة جداً لو أى جهاز أو ماكينة في بيتي مثلاً عطلت فجأة .. خلال دقائق بسيطة باكون فهمت العطل حصل ليه .. و إزاي .. و هل هو عطل ميكانيكي ولا عطل كهربائي .. و غالباً بيكون عندي في دولاب العدد بتاعتي الحاجة اللي محتاجها عشان أصلح العُطل ده .. و باصلحه . مثلاً .. عندي علبة ضخمة ( موجودة عند أى حد زيي ) مليانة مسامير و صواميل فيها .. مئات الأشكال و الأنواع المختلفة .. أنا عارفهم كلهم .. و بمجرد ما باحتاج أى مسمار أو صامولة معينة .. باكون عارف هي فين و إزاي أجيبها . ( ده مالوش علاقة بالذكاء … إطلااااااااقاً ) . … 5- أنا باحب سماع الأوبيرا و الموسيقي الكلاسيكية من زماااان أوي .. و عندي مكتبات كاملة ل من أول (موتزارت , بيتهوفين , باخ , … و علي رأسهم طبعاً البرنس الكبير أوي أوي ” باجينيني ” .. ) لحد ناس زي ( كايجا ساارياهو , ستيف رايخ , ماسون بيتس , … و غيرهم ) .. .. و إشتريت إتنين ( كمانجا = فيولين ) .. و آخري بازيّق عليهم .. و ماعرفش أطلع لحن أكتر من 3 أو 4 حركات بالقوس بالكتير .. و عايز ( أو ناوي إن شاء الله ) أشتري جيتار .. و عارف إني برضو حاركنه جنب الكمانجات و مش حاعمل بيه حاجة .. ( و ده .. مالوش أى علاقة بالذكاء إطلاااقاً ) .

… … أنا ممكن أكتب كتير أمثلة تانية .. عن حاجات كتير الناس بتربطها بالذكاء .. و هي مالهش أى علاقة بالذكاء إطلاقاً .. .. و لكن عشان ألخّص الموضوع .. الخلاصة كالتالي : الذكاء نفسه ( زي ما هو مشهور حالياً ) .. مالوش علاقة بالذكاء ( الحقيقي ) إطلاقاً .. .. و مافيش أى إختبار ( IQ ) حقيقي يقدر يقيس أى بلح في البتنجان .. كلهم مجرد معايير بتقيس حاجات معينة .. و لو قدرت تدرّب نفسك علي الحاجات دي فترة .. حتطلع جايب درجة عالية جداً .. و لكنك في الحقيقة ممكن تكون بطيخة كبيرة أوي 🤣 . … … كل الهري اللي إنتشر خلال ال50 سنة الأخيرة في تاريخ البشرية فيما له علاقة بالذكاء عموماً .. طلع خلال آخر 20 سنة كمية ضخمة من الأبحاث بتقول عكس كل الكلام ده .. و الإتفاق الحالي في العالم أجمع هو : ماحدش فاهم حاجة ولا يعرف حاجة عن ( هو يعني إيه ذكاء ؟! ) . … … أنا أعرف صنايعية كتير ماكملوش أى تعليم غير في صنعتهم .. و كلامهم قليل جداً .. و بيتهتهوا .. و لكن أُقسم بالله كفاءة يعقدوا مهندسين في حياتهم بمهاراتهم و حرفيتهم في شغلهم . .. شفت ناس كتير جداً ( و درّست لكتير منهم ) .. اللي أنا إتعلمته في شهور .. هما إتعلموه في أيام .. و تفوقوا عليا فيه .. قدام عيني .. .. و طبعاً العكس .. دكاترة جامعة .. و بيدرّسوا .. و قعدت معاهم في مؤتمرات .. و عقلهم بالكاد يكفي لتخريط شوية فاصوليا ناشفة .. .. مديرين شركات ( ضخمة ) .. لو إتكلمت علي نوادرهم و قصصهم اللي تعبر عن قد إيه هما مهاراتهم العقلية محدودة .. ممكن ناس كتير تزعل مني 😅 . … … ببساطة .. كل الهري المنتشر عن ال ( Sapiosexuality ) ده .. جزء كبير جداً منه هو إنجذاب لل ( صورة ) اللي تم خلقها لل( ذكاء ) في المسلسلات و الأفلام علي مدار ال10 سنين اللي فاتوا .. .. صورة إن الشخص الذكي ده بيقدر ينتصر علي العضلات .. صورة إنه البنت الذكية أم نضارة دي بمجرد ما تقلع النضارة بتتحول لعارضة أزياء .. بس كانت مستخبية ورا النضارة 🤣 . صورة إن الشخص الذكي ده بيقدر يرسم خطط و يتكتك و يحل مشاكل ماحدش غيره يقدر يحلها .. .. ببساطة .. صورة ( رخيصة ) من ( شيرلوك هولمز ) … و ده مش فمصر بس .. لا .. ده منتشر عالمياً بقاله 20 سنة تقريباً .. و كمية المسلسلات و الأفلام اللي بطلها كان معتمد بس علي مهاراته العقلية .. خلال ال20 سنة اللي فاتوا .. كانت ضخمة جداً .. ك رد فعل طبيعي علي إنتشار أفلام العضلات ( رامبو , أرنولد شوارزينجير , .. و غيرهم ) … خلال الفترة اللي قبل كده . .. ببساطة .. العالم كان بيدور علي حاجة جديدة عشان يغير زوقه اللي كان عليه خلال السبعينات و التمانينات .. … و دلوقتي .. ( عالمياً ) بقاله فترة بيرجع تاني للإنبهار المستمر بالعضلات .. و الشخص البسيط اللي بيحل كل حاجة بإنه يتخانق معاها بعضلاته .. .. و أعتقد شرحت أسباب حاجة زي كده في بوست ال ( ناياليزم ) اللي نزلته من فترة . … ما علينا .. كفاية كتابة كده النهاردة .. ورايا شوية مشاوير حكومية ( أجدد رخصة عربيتي ) .. و يا رب … ياااااااااااااااا رب .. يرزقني بناس أذكياء فعلاً ينجزوني بسرعة 🤣