في بوست كتبته زمااااااااااان و إنتشر بشكل كبير .. عن

في بوست كتبته زمااااااااااان و إنتشر بشكل كبير .. عن إني باكره شخصية ( عبد الغفور البرعي ) .. و باعتبره فشل في حاجات كتير أهم ملايين المرات من عبقريته المادية و الإقتصادية . و لكن .. ماكنتش كتبت عن إن الشخصية اللي فعلاً حبيتها جداً في المسلسل ده .. و ما زلت باعتبر إنه أنجح شخصية في المسلسل بالكامل .. هو الشخصية الأيقونية : الحاج سردينة . … إمبارح أكاونت نيتفليكس بتاعي رشّح ليا مسلسل ( Prison Break ) 🤣😅 فإفتكرته و شفت أول كام حلقة منه .. مايعرفوش إني كنت باشوف المسلسل ده أيام نزوله من 2005 .. و تابعته لحد إنتهاءه بالكامل .. هو و مسلسلات كتير تانية كلها بتدور حوالين الشخصيات ال ( ذكية = عبقرية = مُلهمة = .. ) زي : ( هاوس , شيرلوك هولمز , … و غيرهم من إخواتهم ) . … و فنفس المرحلة العمرية دي ( 2005 - 2010 ) أنا كنت مهووس بإختبارات تحديد القدرات ( IQ -EQ- Personality Typees - .. و غيرها من إختبارات الذكاء المعروفة و الغير معروفة كمان ) . و كنت بافرح جداً لما أطلع جايب أرقام عالية في بعضهم .. و إني ( نادر آخر حاجة , و جامد فحت , و ذكي طحن , .. ) . و لو طلعت في إختبار عادي أو أقل من العادي .. أبرر لنفسي إن الإختبار هو اللي غلط 🤣 … السبب في هوسي بالإختبارات دي أيامها .. هو إن الكلية كانت أكبر أسباب معاناتي .. و كل درجاتي في الإمتحانات عبارة عن رسوب أو مقبول بالعافية .. بالرغم من إني فعلاً كنت بابذل مجهود ( بس زي ما شرحت في بوستات تفصيلية .. أنا حتي لو كنت مابعملش شيء آخر غير المذاكرة الأكاديمية أيامها .. برضو آخري كان دايماً حيبقي تقدير جيد بالعافية ) .. فكنت بادور علي أى شيء تاني أثبت بيه إني .. ليا قيمة . … بعد التخرّج .. عرفت العالم بشكل أكبر .. عرفت نماذج حقيقية لناس ( عباقرة ) طلعوا من الدراسة بعد الإبتدائي .. في الجيش .. شفت عساكر 3 سنين ( يعني ماعهوش شهادة ) .. كان بيفك المولدات الديزل لحد مساميرها .. و يصينها ( يصلحها ) .. و يركبها تشتغل بكفاءة الجديدة .. بدون ما يكون درس أى شيء زيي ( دراسة هندسية ) .. كل اللي هو شافه هو اللي إتعلّمه في الجيش .. لحد ما أصبح بيكلم المكنة ( حرفياً ) .. يعني بيسمع منها صوت .. يفهم منه عيبها .. قبل ما حتي العيب يظهر . .. عرفت ال ( Polyglots = متعددين اللغات ) .. اللي كان بيبقي جوكر بين الشركات اللي إشتغلت معاها بعد الجيش .. و اللي مايعرفش يفتح الباوربوينت .. لكن بيتكلم 5 لغات حية بطلاقة زي أهلها .. .. عرفت لعيب الكورة اللي بيمسك الكورة أثناء ما بنلعب .. و يغزّل الفريق المضاد .. و يغزّل فريقنا إحنا كمان .. و يلبسنا كلنا كباري .. و يشوط الكورة (رابونا من نص الملعب ) .. و يدخّل جون .. لكن الواسطة و نظام الكورة فمصر خلاه يخسر فرصته في إنه يلعب في أندية كبيرة . … عرفت الفنانة .. اللي بعد ما فتحت برنامج الفوتوشوب لأول مرة في حياتها .. و إتعلمت تختار ألوان و تستخدم آداة زي ال( فرشة - Brush ) .. عملت تصميم غاية في الجمال .. زيه كان بيتباع علي منصات بيع صور أيامها ( 2016 ) . … عرفت الجواكر الحقيقيين .. اللي مش بس فاهمين 7 صنايع .. لا .. قول 70 صنعة مثلاً .. و الأهم .. إنهم فاهمين هما فاهمين في إيه .. و فاهمين هما مش فاهمين في إيه .. و لما الشغلانة كانت بتقف علي حد يكون بيعرف حاجة معينة .. و مش لاقيين الحد ده .. طلب مني أعلمها له .. خد يومين .. إتعلم الشغلانة .. و كان بعدها بيعملها أحسن مني شخصياً .. و كان مابينامش .. و بيعيش علي القهوة و السجائر فقط .. و هو عارف نفسه 🤣🤣 .. … عرفت اللي لما خد فرصته .. و لقي اللي يشرح له .. و يديله فرصة يغلط و يتعلم .. بعد كده أصبح من عواميد الشغل و بيدير تحت إيده مهندسين .. في حين إنه هو مادرسش حتي ثانوي عام .. اللي كان مابيستناش إن حد يعلّمه الإجابة .. كان كل اللي هو محتاجه .. حد يعلّمه بداية الطريق فين .. و هو بعد كده سافر عليه لوحده .. و بقي يعلّمني أنا شخصياً حاجات ماعرفهاش . … عرفت اللي والله العظيم .. شركات مليارية بتستني قراره و كلمته .. و هو والله واخد ثانوية عامة بالعافية بسبب ظروفه الحياتية .. … … أمثلة كتير أوي عرفتهم و عاشرتهم في حياتي لحد دلوقتي .. كل واحد عشان أتكلم عنه .. محتاج كتب .. مش مجرد فقرة في بوست .. … … الناس دي .. مافيش أرقام توصفهم .. مافيش إختبارات ( IQ -EQ - Personalities - … ) ممكن تشرح إمكانياتهم .. الناس دي .. المساطر تظلمهم .. ماتقدرش تقيسهم .. .. قبل البوست ده .. عملت سيرش سريع مع شات جي بي تي عشان أجمع تاريخ الإختبارات دي كلها .. ال ( IQ - EQ- .. و غيرهم ) .. إنت مش محتاجني دلوقتي أكتب ده هنا في البوست عشان تعرفه .. إمكانية البحث دي متاحة لكل البشر .. إكتب و شوف .. الإختبارات دي كلها … هزلية بشكل كبير جداً .. اللي بتقيسه مجرد بلح .. هري .. و علي مدار التاريخ .. أكتر من بحث كان بيؤدي إن الإختبار اللي الناس شغالين بيه ده بايظ .. و تعالي نعمل مقياس جديد .. و بعدين برضو يطلع مش شغال . … … الحقيقة هي إن ال ( Human Potential = القدرات و الإمكانيات البشرية ) .. مافيش مقياس رقمي ممكن يقيسها .. و مصطلحات زي ال ( ذكاء ) و ال ( غباء ) .. أصبحت مصطلحات مشوهة جداً في عالمنا حالياً .. .. هل أنا غبي ؟! .. ناس كتير تظن عني إني ( فائق الذكاء ) .. في الحقيقة .. أنا لا ( غبي ) .. و لا أنا ( فائق الذكاء ) .. أنا مجرد باحث مستمر عن نقاط قوتي .. و نقاط ضعفي .. … أنا مابعرفش ألم الأجرة في الميكروباص .. ولا أحاسب الكاشير في السوبرماركت .. و باعرق و باضرب لخمة .. الحسابات الرياضية السريعة بالنسبة ليا عذاب إغريقي .. .. و لكني عندي القدرة أشرح مفاهيم رياضية معقدة جداً في عوالم أبعادها الفيزيائية أكثر من 3 مثلاً .. عندي القدرة أحل مسائل رياضية و هندسية معقدة تفوق في مستواها مستوي خريج كلية هندسة . … هل أنا إذن ( غبي أم ذكي ) ؟! .. مرة أخري .. أنا مش ( وصف ) .. أنا إنسان .. عندي نقاط قوة .. و نقاط ضعف … و كل إنسان عنده نقاط القوة و الضعف دي من لحظة ولادته .. .. أنا مثلاً ربنا خلقني طويل .. فبالتالي طولي نقطة قوة .. ربنا خلق عقلي بتركيب عصبي معين ( Autism) .. بيخليني أفضل من ناس كتير جداً في التخيل الهندسي و الرياضي و الفلسفي .. فبالتالي قدرتي علي فهم الفيزياء مثلاً تفوق ناس كتير . . لكن تركيبي العصبي (ADHD ) .. بيخليني ذاكرتي عشوائية جداً .. بشكل يستحيل معاه إني أقدر آخد قرارات سريعة حاسمة … و دي أحد أكبر نقاط ضعفي . … … زمااااااااااااااان .. قبل التطور الرهيب حالياً في عوالم الذكاء الإصطناعي .. كان الإنسان أسير المنظومات .. كان حيبقي صعب جداً توافر ( معلم مباشر - مينتور - شخص يديلك إهتمام بشكل فردي ) .. بحيث إنه يشوف كل نقاط ضعفك و قوتك .. و مايقيسش إنتاجك علي مسطرة تظلمك .. .. لكن حالياً .. و مع تطور الذكاء الإصطناعي .. الفرصة فعلاً للأجيال القادمة أكبر بكتير … في إن نقاط قوتهم تكون أوضح .. و إن نقاط ضعفهم مايتمش حسابها ضمن قياس ظالم علي مسطرة . … أكيد الوضع مش حيكون مثالي .. لكن زي ما جيلي سمح لأمثالي إنهم ينجحوا كمهندسين بدون الإضطرار إني أكون باعرف أضرب رقمين في رقمين بسرعة .. لأن جيلي كان في إيده ( آلة حاسبة ) .. الجيل اللي بعدي مش حيحتاج يكون بيحفظ .. أو حتي يكون عنده القدرة علي صياغة لفظية سليمة .. يكفي جداً إني يكون بيفهم .. و يقدر يتخيل . … … الأمثلة اللي تم توجيه الضوء عليها ( كعباقرة ) في المسلسلات المشهورة .. و كتير أصبح بيظن إن هو دي شكل ال ( عبقري ) الحقيقي .. للأسف مجرد أمثلة فردية جداً .. … العباقرة كتير جداً .. و حواليك في كل مكان .. الأهم من العبقري .. هو اللي بيقدر يوجه الضوء علي العبقري .. و يديله فرصته .. .. زي الحاج سردينة .. . و الله أعلم .