في الفيلم العبقري .. و المُتعب للأعصاب ( زوجة رجل

في الفيلم العبقري .. و المُتعب للأعصاب ( زوجة رجل مهم ) .. في النهاية .. أحمد زكي بيقتل أبو مراته ( ميرفت أمين ) … و بعدين يموّت نفسه .. و الفيلم بينتهي علي كده .. كأنه بيسألك ك مُشاهد .. ( فاهم هو ليه ماقتلش ميرفت أمين نفسها ؟! ) . … الفيلم بالمناسبة مش عن الأجهزة الأمنية في مصر مثلاً .. أو عن فترة الثمانينات .. او عن أى شيء من الحاجات المؤقتة دي .. الحاجات دي كلها كانت أدوات .. مجرد أدوات عشان توضح الفكرة الحقيقية للفيلم .. و اللي هي فكرة موجودة و حية علي مدار التاريخ بالكامل .. فكرة ال ( قوة ) .. ال ( Power Dynamics ) . … الصورة اللي بيقدمها ( أحمد زكي ) في الفيلم .. هي صورة ( مدمن إحساس بالقوة ) .. زي أى مدمن في الحياة .. في حاجات كتير جداً ممكن تقدم لك الإحساس اللي إنت مدمن له .. و لكن بدرجات .. … في الفيلم .. العقار اللي بيقدم ل (أحمد زكي ) القوة ده .. هو وظيفته ك ( ظابط مباحث ) .. و فسبيل وظيفته دي .. و رغبته فإنه يحصل علي أكبر كم منها و من اللي هي بتقدمه له .. بيتنازل عن أى شيء تاني في شخصيته ( زي غروره و قيمته و إحترامه لنفسه ) .. .. و بمجرد ما بيفقد وظيفته دي .. و بيعرض عليه جاره وظيفة تانية معاه في مزرعة الفراخ بتاعته .. بينفعل بجنون .. و بيطرده . … علي مدار التاريخ .. في أمثلة كتير جداً لقادة عسكريين فقدوا عقلهم بسبب تأثير نشوة ال ( عقار = القوة ) عليهم .. كتير منهم كان بيفضّل يغرق مع سفينته ( Goes down with the ship ) .. عن إنه يعيش بدون نفس إحساس القوة اللي كان عنده ده . و أثناء غرقه مع سفينته .. ماكانش بيفرق معاه مين تاني ضحايا موجودين معاه علي السفينة دي . … و زي أى ( عقار = مخدر ) تاني في الحياة .. كل البشر بلا إستثناء عندهم الشهوة له .. بدرجات .. و كل البشر بلا إستثناء .. ممكن جداً يتحولوا لمدمنين .. و يدمروا نفسهم بسبب أى إحساس بخلل ال ( Power dynamic = توازن القوة ) عندهم ده . … … في المسلسل الأيقوني دلوقتي ( لام شمسية ) .. وسام .. عبارة عن طفل إتعرّض لكمية ضخمة من القهر و الإعتداء الجسدي ( مش الجنسي ) عليه و هو صغير .. أى إنسان بيتعرض لكمية ضخمة من القهر و الإعتداء الجسدي .. بيكون قدّامه إختيار من 3 لا غير .. .. الأول و الأصعب : إنه يبني جوة نفسه قلعة غاية في القوة .. و يحتمي جواها .. و يبدأ يبني واقع مختلف تدريجياً و يقاوم تدريجياً مهما طال الوقت .. لحد ما يقدر يغير الواقع اللي هو مأذي بسببه .. و يطلع من التجربة دي .. صلب بشكل أكبر بكتير جداً من الإنسان العادي . .. التاني : إنه ينكسر جواه معيار الإحساس بالألم .. و عقله يحول تركيبه العصبي ( Hard wired ) عشان يبدأ الألم يكون مصدر المتعة بالنسبة له .. و يبدأ يكون إنسان ( مازوخي - Masochist ) بعد كده .. مايقدرش يعيش بدون ما يكون في حد بيألمه و يقهره و يسيطر عليه .. .. التالت : إنه بيتولد جواه عقدة نقص .. مابيعوضهاش غير إحساس السيطرة و القوة المٌفرطة ( الغير طبيعية و غير منطقية ) .. علي غيره .. يعني مايكفيهوش إنه يكون قائد أو حاكم .. لا .. لازم يحس إنه بياخد أكتر من المنطقي و الطبيعي .. ياخد أكتر من حقه .. ياخد أكتر من اللي المجتمع أو الدين أو الطبيعة أو القانون بيسمح بيه .. عشان يعوّض جوة نفسه إحساسه باللي إتاخد منه زمان . و دي الصورة اللي بيوضحها وسام في المسلسل .. أحد أنواع ال (سادية - Sadism ) . … … المتحرش اللي بيمد إيده علي بنت في الشارع ( زي مئات السرسجية في الأعياد و المناطق المزدحمة و غيرهم ) .. ده مش بيعمل كده من منطق شهوة جنسية فقط .. و لكن جزء كبير من تركيبته النفسية فيها ( إحساس بالرغبة في تعويض القهر اللي هو شايف إنه متعرض له ) .. و عقله بيستغل ده .. فإنه يديله مبرر للي هو بيعمله ..

• هي اللي لابسة كده و بتستفزني ..
• المجتمع هو اللي غلط و أنا مش عارف أتجوز .. أو غيرها من الأعذار الواهية في الحقيقة .. لكنها شماعة منطقية جداً لعقله . … لكن السرسجي ضعيف جداً في الحقيقة .. ضعيف العقل و الموارد و المنطق … و فأحيان كتير جداً ضعيف البنية الجسدية لدرجة إن أى بنت شُجاعة تخوفه .. … المرعب هو اللي مش سرسجي .. المرعب هو اللي بيعرف يلاقي مكان قوة فعلاً .. … السجّان في السجن مثلاً ( و قصص صيدنايا هنا مؤلمة جداً ) .. المخرج المشهور اللي عارف قوته بالنسبة للي حواليه .. دكتور الجامعة .. … و لكن .. أخطر الأنواع دي و أحقرها و أقذرها … هو اللي بيختل عقله للدرجة اللي تخليه يسعي للحصول علي إحساس بالقوة و السيطرة .. من أضعف ما يمكن تخيله … من الأطفال .. … … يعني مثلاً من 6 شهور أو أكتر إنتشرت فضيحة (Diddy ) .. و اللي هو من أشهر منتجين الأغاني و الموسيقي في أمريكا علي مدار ال20 سنة اللي فاتوا .. و ضحاياه كمياتهم مرعبة و تفاصيلهم مرعبة .. و كتير منهم رجال ( بشنبات ) .. و كان بيخدرهم و يغتصبهم و يصورهم .. فقط .. لفرض قوة و سيطرة .. و كان بيعمل كده فأطفال كمان .. .. و قبله كان ( جيفري إبستين ) .. و اللي قصصه تشيّب .. … … كتير من المشاكل اللي مالية محاكم الأسرة .. مشاكل جنسية .. و لكن مش بسبب مشاكل عضوية .. إطلاقاً .. و لكن عدم فهم لل ( Power dynamics - موازين القوة ) في حياة كل طرف من الزوجين .. .. لو حياة الزوج بتؤدي لخلل إحساسه بقوته أو سطوته بالشكل اللي هو يتمناه ( و غالباً مش فاهمه ) … غالباً بيرجع بيته .. و يدور علي المكان الوحيد اللي ممكن يلاقي فيه أكبر كم من إحساس ال (قوة ) اللي يتمناه ( و أكيد مش فاهمه ) .. المكان ده بيكون سرير الزوجية .. و في الحالة دي .. بيتحول المكان اللي المفروض يكون أكثر مكان آمن لشريكة حياته .. لأكتر مكان هي بتحس فيه بالقهر و الخطر و الضعف .. .. و بالنسبة لمجتمع فقير جداً في المعلومات النفسية و الجنسية زي مجتمعنا اللطيف .. تتوقع النتيجة بتكون إيه ؟! حوار ؟! طبعاً لا .. و لكن خناقات في كل مكان تاني في الشقة و الحياة .. لأنهم هما الإتنين مرعوبين يتكلموا في سبب خناقاتهم الحقيقية ( و اللي هما أكيد مش فاهمينها ) . … … عشان ماحدش يكون بس عمل سكرول لنهاية البوست هنا و يفكر إني بابرر أى شيء لأى إنسان قذر .. إطلاقاً .. ده يستحق أكثر من المؤبد .. .. و لكن .. لازم أبص حواليا و أسأل .. مين تاني ؟! .. مين ممكن يكون المرض عنده .. بس لسة ماوصلش إنه أخطر أعراضه ( إستغلال أضعف خلق الله ) .. .. مين ممكن فلحظة لو حس إن ( مصدر إحساسه بالقوة ) حيختفي من قدّامه .. يقرر إنه يقتل .. .. و الأخطر .. مين لسة عايش بيمارس قذارته بكل ثقة و أريحية و إطمئنان .. و اللي حواليه مش شايفينه غير : راجل مهم . …

و الله أعلم .