شفت نكتة النهاردة .. بتقول

شفت نكتة النهاردة .. بتقول : واحد صنايعي واقف شغال في دور عالي و مربوط بحبل .. فجأة وقع .. و قبل ما يخبط الأرض ب مترين .. الحبل أنقذه .. بعد ما نزل .. لقي إن الخضة و الإثارة و الموضوع عجبه .. قرر يعملها تاني يوم .. بس يجيب حبل أقوي شوية عشان يبقي أمان أكتر .. نط .. وقع عالأرض .. مات . فضلوا يدوروا يشوفوا السبب .. إكتشفوا إن الراجل اللي باع له الحبل .. كان بيحبه .. أوي .. و إتوصي بيه .. و إداله 5 متر زيادة .. هدية . … النكتة دي عبقرية في اللي هي بتلخصه .. بس مين اللي يفهم ؟ خليني أشرح لك ليه .. . أنا مش بس عايش مع أدوات الذكاء الإصطناعي من أول ما أصبحت متاحة لفئة تجريبية قليلة .. لا .. أنا طول الوقت عيني علي معظم الإحصائيات اللي أقدر أوصل لها عن إستخدام الأدوات دي عالمياً .. مش بس لأن ده جزء أساسي من شغلي .. و لكن لأن زي ما قلت قبل كده .. إحنا بالظبط كإننا عايشين في فترة نهاية التسعينيات .. قبل إنتشار الإنترنت و الكمبيوتر .. و خلال فترة بسيطة جداً .. الغالبية العظمي من تفاصيل حياتنا .. حتكون بتتشكل بسبب الأدوات دي . … و أحد أهم الإحصائيات اللي شدت إنتباهي هو : إستخدام شات جي بي تي ك طبيب / معالج نفسي . … ناس كتير ممكن ماتكونش فاهمة إن الدور اللي هي بتستخدمه بيه هو دور المعالج النفسي .. ممكن يكون بيستخدمه ك صديق إلكتروني يدردش معاه علي خفيف .. أو ك صديق إلكتروني يقوّي معاه لغة بيحاول يتعلمها مثلاً .. أو حتي ك مجرد آلة حاسبة بس قوية شوية . . لكن في برمجة و تصميم شات جي بي تي الأصلية .. هو متصمم إنه يتعامل معاك بشكل معين .. يديلك حاجات كتير أوي من اللي بيديها لك المعالج النفسي . . يعني .. بيبقي زي سكر الدايت .. هو مش سكر .. و مش بيعلي الإنسولين في دمك .. لكنه بيديلك نفس الطعم و الإحساس . … … طيب .. فين المشكلة في كده ؟! . المشكلة هي في جزء ال ( Enabling = التمكين ) . يعني إيه ؟ يعني : كل إنسان مننا و عنده مشاكله و تفاصيله و أمانيه و أحلامه .. كل واحد مننا هو بطل قصته .. هو الشخصية الأساسية في الفيلم بتاعه .. و طول الوقت بشكل مباشر أو غير مباشر .. بندور علي ناس حوالينا يساعدونا نحس بده أكبر وقت ممكن . . يعني .. إنت مش حتروح تصاحب ناس مش مهتمة بيك .. أو بينزلوا و يخرجوا من غير ما يكلموك و يدوروا عليك !! .. إنت مش حتروح تحب واحدة إنت مش فارق معاها .. . إنت طول الوقت بتدور علي اللي يدعم رغبتك في إنك تحس إنك : بطل قصتك و أهم بني آدم في الدنيا . . و الطريقة اللي الناس اللي حواليك بتساعدك إنك تحس بده هو : إنهم بيعاملوك بشوية معايير مختلفة عن باقي الناس . . يعني ( اللي بيحبك يقرقش لك الزلط ) . يعني .. لو حد ماشي في الشارع شتم صاحبك .. حيفرمه .. لكن إنت بتشتم صاحبك .. تلاقيه بيضحك !! … و يشتمك . . لو حد كسر علي صاحبك أثناء ما هو سايق .. حيطلع دماغه من الشباك و يزعق .. لو إنت كسرت علي صاحبك و هو سايق .. حيطلع دماغه من الشباك .. يلاقيك إنت اللي كسرت عليه .. حيضحك و ينكّت .. و يشتمك برضو 🤣🤣 . … التبادل ده : ( إن عدد معين من البشر يعاملوك بشكل مخصوص .. و إنت تبادلهم نفس المعاملة المخصوصة دي ) .. بيساعدك علي التوازن .. و عشان كده بتدور علي شلة أصحاب تقعد معاهم آخر الأسبوع .. تحس معاهم إنك مميز .. . و فعلاقة زي الزواج مثلاً .. التبادل المتوازن للمعاملة دي ( إنك تحسسها إنها أحلي و أجمل بنوتة في العالم ) .. و إنها تحسسك إنك أحسن حد بياخد الزبالة و هو نازل في العالم 🤣🤣 .. ده بيؤدي برضو لحياة طبيعية . … … لكن .. فأحيان كتييييييير جداً في الحياة .. و نتيجة ظروف إما خارجة عن إرادتك أو خارجة عن فهمك .. التوازن ده بيختل .. و إما بسبب خلل عضوي .. او خلل نفسي .. بتحتاج ساعتها إن ( معالج / طبيب ) نفسي يتدخل و يساعدك تشوف الخلل .. و يساعدك تحله أو تتعامل معاه . . و أحد أهم الحاجات اللي بيتعلمها أى ( طبيب / معالج ) نفسي هي : إنه يكون حذر جداً جداً جداً في مدي الإهتمام و الخصوصية اللي يحسسك بيها . . يعني .. هو يحسسك إنه مهتم بيك آه .. لكن بشكل عملي و مش شخصي إطلاقاً .. . و لو فلحظة .. و لأي سبب .. حس إنه مش قادر يتحكم في الشعرة الرفيعة دي .. لازم ينسحب بشكل مباشر و سريع من التعامل معاك ك طبيب . . لأنه بيعرّضك هنا لمصيبة من أخطر المصايب اللي ممكن إنسان يقع فيها .. و هي : ” إنك تصدق عبطك زيادة عن اللزوم ” . … … كل إنسان فينا .. عنده عبط .. ده طبيعي . . و إلا مش حتكون إنسان .. و الحياة الطبيعية حواليك طول الوقت بتساعدك تشوف حدود العبط ده و تفهمه .. يعني .. إنت عبطك بيهيأ لك إنك جامد تنين و تقدر تضرب 9 ماشيين في الشارع لوحدك عادي .. و أصحابك بيطبلوا لك .. بس بمجرد ما تتخانق و تلاقي نفسك مش عارف تسيطر علي واحد قدامك علي الأقل .. بتفهم حدود لعبطك ده .. . إنت عبطك بيهيأ لك إنك فتاك و جامد و آسر قلوب العذاري .. و الحاجّة الوالدة غالباً بتطبل لك .. لكن بمجرد ما تتمشي في شارع و تلاقي إن مافيش بنت أساساً عرفت إنك موجود في الحياة .. بتفهم حدود عبطك . . و هكذا .. علاقة توازن .. لكن .. لو إنت بقي لقيت حد قدامك بيطبل لك طول الوقت .. و مش بس كده .. لا .. ده حد بيفهم في كل شيء .. و جامد تنين في كل شيء و بيعرف يضرب سبع أرقام في سبع أرقام فأقل من ثانية … و بيتكلم لغات .. و عنده معلومات عن كل حاجة و أى حاجة .. و لما تسأله إنت و تقول له : مين أجمد تنين في المجرة ؟! .. مش حتلاقيه يقول لك بسذاجة مباشرة ” إنت ” .. و لكنه حيرد عليك الرد اللي في الصورة ده 🤣🤣🤣 … المشكلة في الرد ده .. هو إنه بيدور حواليك إنت بشكل يخليك تصدق فعلاً .. .. و المشكلة الأكبر .. إنك مش غبي … مش ساذج .. إنت مش بتسأله أسألة تافهة زي دي .. إنت بتتكلم معاه فتفاصيل معقدة جداً .. و ردوده عليك بتقودك كلها فنفس الإتجاه .. و هو إنك نجم النجوم و برنس البرانيس و أهم حاجة في الحياة بعد البستاشيو . … بعد فترة .. ده بيبوظ معايير الإتزان اللي شرحتها فوق .. بمعني .. حتسمع مراتك بتقول لك ( خد الزبالة معاك و إنت نازل ) .. و لأى سبب تلاقي إنك مش متظبط .. مش مبسوط .. مش مستريح .. و لما تدردش معاه في الموضوع ده .. حيشرح لك بكل الطرق و الوسائل اللي تتخيلها و ماتتخيلهاش .. إنك ضحية مش واخد حقك كما ينبغي .. و إزاي إن المفروض زوجتك تحافظ علي حدودك أكتر .. تخلي بالها منك أكتر .. و هكذا . .. لكن .. زوجتك هي كمان بتدردش مع شات جي بي تي بتاعها .. و حتلاقيه بيقول لها عن أهمية إن الزوج يكون مسئول .. و يحسسها بالأمان .. و إن عشان تكون له أنثي .. لابد إنه يكون لها آخذاً للزبالة و هو نازل .. و مش بس كان المفروض يعمل كده .. لا .. ده كان يشكرها علي ده 🤣… إتخيل بقي الحوارات دي .. بس فكل تفصيله فحياتك .. و علي مدار شهور و سنين . .. إنت مش بس غالباً مش حتعمر في جواز .. لا .. إنت غالباً حتقطع علاقتك بأغلب أصحابك .. و أغلب البشر اللي حواليك .. و حتعيش في علاقة مع : نفسك . … … شات جي بي و غيره من أدوات الذكاء الإصطناعي .. جزء أساسي من تصميمهم و برمجتهم .. هو إنه يحسسك بالسعادة و الراحة طول الوقت … .. فبالتالي .. هو عنده قدرة ممتازة .. إنه يفهم ال ( Triggers - زرايرك ) بتاعتك .. و يعرف أنهي زراير لما يضغط عليها .. تتمزج إنت و تنتشي و تفرح .. . لو حس منك إنك عايز مدح .. حيمدحك من غير ما تحس إنه بيطبل لك .. لو حس منك إنك فقير للإهتمام .. حتاخد منه إهتمام أكتر من نحنحة ماجدة مع فريد الأطرش . و هكذا . . لكن .. الأدوات دي مش متصممة إطلاقاً إنها تحجم لك ( عبطك ) .. إنها تصدمك .. إنها تإلمك .. إنها تاخد منك أى شيء .. .. جزء أساسي من اللي إنت محتاجه كإنسان عشان تكون متوازن .. هو إنك تدّي قد ما بتاخد .. زي ما صحابك طبلوا لك .. تطبل لهم .. زي ما إهتموا بيك .. تهتم بيهم .. زي ما سمعوا لك .. تسمع لهم .. .. لكن .. علاقة .. إنت اللي بتاخد بس فيها .. دي علاقة علي المدي القريب جداً .. حتوصلك إنك تكون زي الساحرة الشريرة في ( سنو وايت ) . … … بالمناسبة .. الشرير الأكبر في قصة ( سنو وايت ) .. عمره ما كان الست الكبيرة دي … الشرير الحقيقي كان ال ( مراية ) .. اللي كانت كل ما تبص فيها و تسأل ( مين الأجمل ؟! ) .. المراية تقول لها ( إنتي يا حاجّة ) . … … ملحوظة أخيرة : أخطر ناس علي الإنسان اللي عنده خلل نفسي زي ( النرجسية , البارانويا , … و غيرهم من التشكيلة الظريفة دي ) .. هما ال ( Enablers = المطبلاتية ) . . الناس دي ممكن تكون تعبت فبطلت تحاول تصلح أو تغير .. و لكن الأخطر .. هما إنهم فعلاً بيكونوا بيحبوا .. و عشان بيحبوا .. بيدوا زيادة .. و الزيادة دي .. هي اللي كسرت رقبة الصنايعي في أول البوست … و الله أعلم .