1- إطلاقاً مش متفاجئ بكمية البوستات اللي بترثي إرتقاء الشهيد

1- إطلاقاً مش متفاجئ بكمية البوستات اللي بترثي إرتقاء الشهيد !! .. في حين إني والله العظيم أغبطه و أسعد له . … 2- علي مدار سنين و سنين طويلة .. تم تدريب عواطف الناس إنها تتصرف بالرخيص عالأرخص .. بداية من الأفلام الأبيض و إسود .. إلي أن أصبح سعر و قيمة عاطفة حدث مثل هذا .. متساوي بالنسبة لخوارزميات الفيسبوك .. مع سعر و قيمة عاطفة فوز فمباراة كرة قدم مثلاً . يعني نفس ال ( ريتش , ترافيك , engagement , .. ) اللي علي البوستات دي .. بتشوفها علي البوستات دي .. و نفس تشكيلة ال ( ريأكتات , و الإيموجيهات ) بالمناسبة . … 3- فبالتالي .. ناس كتير جداً حتتفاعل بكل تأكيد .. حتشعر بمشاعر كتير هو مش فاهمها

• غضب .. بس هو مش فاهم هو غضبان ليه ؟!!
• حزن .. بس هو مش فاهم هو حزين ليه ؟!!
• ألم .. بس هو مش فاهم هو بيتألم ليه ؟!! … 4- أى إجابة علي الأسئلة اللي فاتت نابعة من مجرد شوية أخبار شفتها فبوستات عالفيس .. مع شوية قصص سمعتها قبل كده .. مع شوية تربية دينية أخدتها و إنت صغير .. مع شوية تعاطف مع قصص قديمة أو جديدة .. فهي إجابة ضعف .. ضعف متأصل جداً .. ضعف قديم و معشش في تربة الأرض اللي محاوطانا دي . .. ضعف ليه ؟! لأنها إجابات مش بتغير أى شيء .. مش بتؤدي لأى شيء .. إجابات بتتقال من أيام الشيخ أحمد ياسين , و الدرّة , و غيرهم كتير جداً .. و أكتر منهم نالوا شرف الشهادة أو بينتظروها تحت وطأة التعذيب .. و إنت ماسمعتش عنهم أساساً .. … 5- طيب .. أعمل إيه يعني ؟! .. إزاي ماكونش ضعيف ؟! .. إزاي أحس إني ممكن أغير أى شيء ؟! . . ده هو السؤال المهم اللي لازم تبتدي بيه تفكيرك كل يوم الصبح أو ما تصحي .. و إجابته .. غاية في البساطة .. مش معقدة إطلاقاً .. و لكنها غاية في صعوبة تنفيذها .. إجابته هي : كن بشر .. إنسان .. خليفة .. … 6- يعني إيه ؟! . يعني ربنا لما خلق الإنسان .. خلقه ك ( خليفة ) .. ( و إذ قال ربك للملائكة إني جاعل في الأرض خليفة ) . . و بعدين .. مع كل رسالة و مع كل رسول و نبي .. كان تكليف ال ( أمر بالمعروف و النهي عن المنكر ) تكليف أساسي .. و تذكير أساسي جداً .. . و لكن .. ال ( أمر ) مابيحصلش من تحت لفوق .. يعني ماينفعش الموظف يؤمر المدير .. ماينفعش الطفل يؤمر أبوه و أمه .. ماينفعش الضعيف يؤمر القوي … . فبالتالي .. تكليف ال ( أمر بالمعروف و النهي عن المنكر ) .. تكليف واضح جداً بالسعي لل ( قوة ) . . و لكن .. ربنا ماخلقش إنسان واحد بس .. ربنا خلق أقوام و أقوام و أقوام لا يعلم عددهم إلا هو .. و ربنا ماخلقناش كلنا زي بعض .. إطلاقاً .. ربنا فضل بعضنا علي بعض في مُختلف النواحي ( القوة الجسدية , و القوة العقلية , و القوة العددية , … غيرها من أنواع القوة ) . . فبالتالي .. تكليف السعي للقوة الموجود ضمن ( الأمر بالمعروف و النهي عن المنكر ) .. و تكليف السعي للقوة الواضح في ( و أعدّوا لهم ما إستطعتم من قوة ) .. الإتنين مش معناهم القوة الحربية فقط .. بل كل أنواع القوة .. بكل درجاتها . … 7- طيب .. إيه هي أنواع القوة دي ؟! . القوة ( بتعريفها الفيزيائي ) مالهاش وجود .. إلا لو كانت مؤثرة .. يعني .. في توازن الكون ده كله … مافيش طاقة و قوة .. إلا و لها تأثير .. . فبالتالي .. إنك تفضل واهم نفسك ب ( يعلنوا الحرب بس و حتشوفني بفرتك الفراتيك و أدغدغ الدغاديغ ) .. و لكنك بتقول كده و إنت قاعد بتشد أنفاس شيشة عالقهوة .. فده إسمه ( وهم , عبط , .. ) بل ده كان جزء كبير من خطاب المنافقين علي عهد رسول الله صلي الله عليه و سلم . ( اللي هما كلام عالفاضي ) . . و أكرر .. ماتستعجلش و تاخد الكلمتين اللي فوق دول و تطلع تجري تدور علي حتة خشبة تروح تتخانق بيها .. تبقي أحمق . . القوة .. زي أى حاجة تانية في الحياة الدنيا دي .. بتتبني بالوقت .. و لها درجات … و مستحيل حتعرف تطلّع نبات قوي .. في تربة معفنة . … 8- لسة مش فاهم !! .. يعني أعمل إيه ؟! . . إبن سيادتك اللي إنت سايبه ليل نهار ماسك موبايل قاعد بيسمع مهرجانات و أغاني و حاجات ( كووول آخر حاجة , جامدة فحت التنين , شديدة كيك , … ) و غيرها .. و بيتعبي عواطفه و مشاعره كلها بالحاجات دي .. أنا باشوفه تاني يوم في الشارع و هو رايح و راجع من الدرس .. ماشي مع إصحابه اللي شبهه .. بيترقص معاهم و يقلد حركات مسك المطواة و حاطط سيجارة فوق ودنه و ماسك واحدة فإيده . . ده سيادتك عبارة عن إعلان واضح و صريح و مباشر بفشلك في إنك ( تأمره بالمعروف و تنهاه عن المنكر ) .. لأنه هو أول حد ضمن دائرة تأثيرك المفروض و دائرة قوتك و سيطرتك . . ده حيطلع نسخة من الكائن اللي باقول لك عليه فوق .. شخص فاهم معني القوة غلط .. فاهم القوة إنها ( يتخن صوته و يحشرجه , يشخر و يأبح و يعلي صوته و يقول إنه مابيخافش و جامد و تنين ) .. لأنه ماشافش قوة غير كده . ماتربّاش علي قوة غير كده . … 9- فلما بيتجوز مثلاً .. بتلاقيه بيدور علي مواضيع زي ( أنا ماطبخش , أنا ماغسلش , أنا ماكنسش , أنا ماشيلش أى حاجة من مسئوليات البيت ) .. و يوهم نفسه إن ده حقه لأنه ( مفحوت في الشغل برة البيت ) .. ليه ؟! .. عشان يجيب فلوس أكتر .. ليه ؟! .. عشان يشتري بيها موبايلات للعيال .. و يدخلهم دروس و مدارس .. يطلعوا شبهه و هو صغير !!! . . خلل ضخم جداً في مفاهيم ( إيه اللي قيمته أعلي ) .. و الناس بتشتري الرخيص .. و تبيع الغالي .. أوي . … 10- دائرة مغلقة من الوهم بيعيش و يموت جواها أجيال ورا أجيال . … 11- تكسر الدائرة دي إزاي ؟! . بإنك تفهم إن القوة بتتبني فوق بعضها .. و عشان توصل للمرحلة اللي تليق بيك و بإنسانيتك .. لازم : أولاً : توجه البوصلة بتاعتك في الإتجاه الصح .. اللي هو ماتطاوعش نفسك في طلبها لل ( راحة , الأبسط , الأسهل , المعتاد , … ) .. . ثانياً : تبتدي بأبسط البسيط .. لأن القاعدة الأساسية في عمل أى شيء في الحياة هي : ( خير الأعمال أدومها و إن قل ) . . فبالتالي .. . بتشرب سجاير مثلاً ؟! .. ماتبطلهاش كلها مرة واحدة ( إلا لو كنت من اللي عندهم إرادة قوية تمكنهم من ده ) .. و لكن قلل العدد تدريجياً .. و مع كل سيجارة أقل تشربها .. إفهم إنك بتعلي تدريجياً في مراحل القوة .. و كل ما تعلي أكتر .. كل ما تقدر ( تؤمر ) .. بالمعروف و تنهي عن المنكر .. أكتر . بتستصعب القراءة مثلاً ؟! ماتروحش تنزّل تفسير الطبري فجأة .. إبتدي بأبسط البسيط من الكتب .. و إفهم إن مع كل ورقة و صفحة زيادة حتقرأها .. حتعلي تدريجياً في مراحل القوة . . بتعشق الأنتخة و الكسل و ملاصق للكنبة مثلاً ؟! ماتنزلش تجري ماراثون فجأة .. و لكن إبتدي بأبسط البسيط .. و إبدأ بمحاولة تقبّل الجوع .. و إنك ممكن تقعد ساعة زيادة جعان .. و لما تاكل .. تاكل لقمة أقل .. لقمتين أقل .. و هكذا .. و إفهم إن مع كل جرام تنقصه من وزنك الزائد .. حتعلي تدريجياً في مراحل القوة … . و هكذا و هكذا من كل الحاجات اللي بتشكّل صورة البطل الأسطوري اللي نفسك تكونه .. . شرحت قبل كده في بوستات كتير .. إن صورة البطل الأسطوري الحقيقية في ذهني .. مش هو اللي بيفضل مستني لحد ما الكائنات الفضائية تنزل عشان يحاربهم .. لا .. هو بطل دايماً .. فبالتالي .. زي ما موضوع محاربة الكائنات الفضائية ده صعب جداً علي اللي حواليه .. فهو بيتصرف ك بطل و يدخل هو يحارب لوحده .. . حاجة زي ( غسيل المواعين , تنضيف البيت , … و غيرها من الحاجات الصعبة علي أهل بيته مثلاً ) .. هو مش حيستني إن حد تاني يواجهها بداله .. و حيتصرف ك بطل و يروح يتصرف مباشرة … البطولة والله موجودة فإنك تفضل ماسك غلاف باكو البسكوت اللي كلته و ماترميهوش في الشارع ( حتي لو الشارع كله مليان زبالة ) .. و تروح ترميه فأول باسكت زبالة تلاقيه . . البطولة والله موجودة فإنك تمنع نفسك تشيّر تفاهة شفتها عالفيس ( حتي لو عليها آلاف الشير و التعليقات ) .. فقط لمجرد إنك تضحك إنت و صحابك شوية . . البطولة والله موجودة فإنك بدل ما تسكرول ففيديوهات رقص و تريندات عالفيس أو تيكتوك .. تحاول تتعلم أى شيء زيادة علي الأقل ( مهما كان ) .. و تأكد إن حييجي وقت و حتحتاج المعلومة دي .. … 12 - اللي حصل إمبارح .. و اللي بيحصل حواليك .. لو مأثرش عليك بأى شكل من الأشكال .. يبقي إنت اللي قررت إنه ( بالنسبة لك ) مش حيكون له قيمة . . القيمة مقترنة بالتأثير . لو مأثرش .. يبقي إنت اللي موازين القيمة عندك مختلة .. جداً .. . فبالتالي .. أى تغيير .. أي تغيير علي الأقل مهما كان بسيط في أفعالك يومياً .. و فعقلك .. إقرن التغيير ده باللي حصل إمبارح .. دي هي أكبر تكريم تقدر تقدمه إنت .. لنفسك .. لأن هما مش محتاجين تكريم منك .. ربنا جل جلاله بإذن الله و بفضله كتب لهم أعظم تكريم يتمناه إنسان غير الرُسل و الأنبياء . . إنت اللي محتاج .. … 13- شفت الموضوع بسيط جداً إزاي ؟! .. عارف بقي فين صعوبته اللي قلت عليها فوق ( إن الحل بسيط جداً .. لكن صعب جداً ) .. الصعوبة هي ال ( مداومة ) .. الإستمرارية .. الحفاظ .. … و لكن حتي ده .. لو نسيت أو تكاسلت أو أخطأت … رجوعك منه بيقويك إن شاء الله .. .. لأن دي طبيعتك كإنسان .. إنت مش ملاك .. . لكن اليأس النابع من العجز و الإحباط و ال ( ما هي كده كده باظت خلاص ) اللي إنت شايفه حواليك فكل حتة ده .. ده هو كل مُني و هدف الشيطان .. . عدوك الأول عمره ما كان إنسان زيك .. الإنسان اللي زيك ده .. ضحية للشيطان .. آداة فإيده .. معاداتك ليه إطلاقاً مش عداوة جاهلية ( اللي هي نابعة من إختلاف لغة أو لون ) .. و لكن عداء ولاء .. إنت ولائك لله سبحانه و تعالي .. و هو ولائه للطاغوت ( الشيطان ) .. . فبالتالي .. ماتقعش ضحية لهدف الشيطان الأول .. و هو إنه ينزع عنك إنسانيتك .. … و الله أعلم .