البوست الرابع عن التربية ... ( إبن الوز .. مهندس

البوست الرابع عن التربية … ( إبن الوز .. مهندس ؟! ) …

• ممكن ترشح لي كورس برمجة كويس عشان إبني !! .
• أفضل مكان إبني ياخد فيه كورس إنجليزي .. فين ؟!! .
• عايز إبني يتعلّم جرافيكس / مونتاج / بيزنس / طيران / تصنيع عقاقير / … !!! . … الجُمل اللي فوق دي أمثلة لرسائل و طلبات بتوصل ليا من أصدقائي و معارفي بشكل مستمر .. … و دايماً ردودي علي الرسائل اللي من النوعية دي هي :
• أفضل مكان يتعلم فيه إبنك البرمجة هو : بيتك .
• أفضل حد ممكن يشرح البرمجة لإبنك هو : إنت .
• أفضل مكان يتعلم فيه إنجليزي : بيتك .
• أفضل حد يشرح له إنجليزي : إنت . .. و هكذا . … و بيكون رد فعل الأب / الأم اللي باقول له حاجة زي كده .. هو نظرة فيها خيبة أمل .. ممزوجة بشوية سخرية .. و يرد يقول : ” ما هو أنا مابعرفش الحاجة دي , أعلمها له إزاي ؟! ” .. أقول له :
• إتعلم إنت , و بعدين علمه .. يرد عليا بسرعة :
• أنا كبرت خلاص , ماعنديش وقت , ماعرفش , … … … في خبر إنتشر من شهر بسرعة كده و بعدين إختفي تاني .. و هو : إن فترة الدراسة في كلية هندسة ( مش متذكر أنهي جامعة ) حتبقي 4 سنين بدل 5 سنين .. و شفت تعليقات كتير أوي علي الموضوع ده أيامها .. و بعدين إختفي الموضوع ده تحت تريندات تانية .. … لكن في دماغي .. الموضوع ده دايماً كان مسبب ليا تساؤل ضخم .. ” هو مين اللي قال إن فترة الدراسة اللازمة عشان آخد رخصة مزاولة مهنة الهندسة .. لازم تكون 5 سنين ؟! … أو 4 سنين ؟! ” .. مين اللي يحدد الموضوع ده ؟! .. و بناءاً علي إيه ؟! . … … في كلية هندسة … و بالذات قسم إتصالات و إلكترونيات ( اللي أنا كنت فيه ) .. بتكتشف حقيقة معينة في السنة الأخيرة .. و هي ( إنك غير مؤهل إطلااااااااااااقاً لأى شغلانة في سوق العمل ) .. يعني .. إنت كل اللي درسته بيكون مجرد علم نظري بحت .. و قشور القشور من التطبيقات العملية .. لكن سوق العمل محتاج مهارات تانية كتير جداً .. جداً .. و دورك إنك بعد ما تتخرج .. تحاول تتعلم المهارات دي بأى وسيلة تقدر عليها ..
• تروح تدّرب في شركة و تتفحت و تتردم لحد ما تفهم هما عايزين إيه ..
• تروح تدخل معهد ITI عشان تدرس هناك أى حاجة من اللي ليها سوق شغل .
• تروح تطلب من واسطة إنه يحشرك فأى شغلانة فأى شركة .. و تفضل عايش هناك لحد ما تتعلم الشغلانة ( من البداية ) .. و أمثلة تانية كتير علي كده .. … لما إكتشفنا الحقيقة الجميلة دي في آخر سنة في الكلية .. ( و المُعيدين بالمناسبة كانوا هما اللي بيشرحوا لنا الواقع المرير ده ) .. بدأنا كلنا نسأل .. ” أُمال مين اللي قرر المناهج اللي إحنا بندرسها في ال5 سنين بتوع الكلية دي ؟! ” .. ” و قرروا المناهج دي بناءاً علي إيه ؟! ” .. .. ماحدش جاوب لنا علي الأسئلة دي . … … لما بدأت رحلة دراستي الخاصة مع نفسي ( لما شلت سنة تالتة كلية أول مرة ) .. تدريجياً فهمت إن العالم الحقيقي إطلاقاً مش زي ما بندرس في الكليات , و إن ناس كتير بتعيش حياتها و تموت .. بدون ما تفهم إنها كان عندها إختيارات كتير جداً .. و لكنهم كانت عينيهم متغمية عنها . … خليني أشرح : … الإنسان في تربيته و تعليمه مش زي الحيوان .. الإنسان بيحتاج مدة طويلة من العناية و الرعاية .. لحد ما يبدأ يعرف يعتمد علي نفسه في حاجات كتير .. حيوانات كتير بعد شهر أو شهرين من ولادتهم .. بيبدأوا يتحركوا للصيد لوحدهم .. أو يعيشوا حياة كاملة نسبياً لوحدهم .. الإنسان لا .. الإنسان بيحتاج يفضل ملازم أُمه فترة طويلة .. لحد ما يتفطم .. و بعدين بيفضل ضعيف جداً , و محتاج حماية .. أول 10 سنين في حياته تقريباً .. … و لكن .. الإنسان مميز عن الحيوان .. بحاجات كتير .. أهمها عقله .. و قدرته علي تكوين أسرة و مجتمع .. … علي مدار التاريخ .. كان الطفل بيتولد في أُسرة .. و يفهم إنه له حقوق في الأُسرة دي .. و عليه واجبات .. و كان من الواجبات دي هي : مساعدة رب الأُسرة في شغله و حرفته .. .. كنت تلاقي إن الأب .. بيورث علم و مهارات و أسرار صنعته .. لإبنه .. صعب جداً كنت تلاقي حداد مثلاً إتعلم الحدادة في ( مدرسة ) حدادة خلال 4 سنين !! .. نادراً لو كنت لاقيت نجار / مزارع / صانع / … أو أى حرفي ماهر في حرفته .. إتعلم الحرفة دي في مكان مخصص خلال مدة معينة .. … اللي كنت بتشوفه هو :
• إما إن الإبن قعد مُلازم لأبوه .. و شرب منه الصنعة و الحرفة من صُغره .. لحد ما أصبح ماهر جداً فيها علي سن 15 سنة مثلاً .. أو
• إن الطفل .. راح و عاش ك ( تلميذ مُلازم - Disciple ) لشخص عنده الصنعة و الحرفة .. و فضل معاه يشرب و يتعلم من الصنعة .. لحد ما وصل إن علي سن 15 سنة برضو .. أصبح ماهر جداً .. و بتكون علاقته باللي هو إتعلم منه .. مشابهة جداً لعلاقة الإبن بأبوه . … … و بتكون نتيجة حاجة زي كده هي .. إستمرار ال ( حرفة / صنعة / مهارة / … ) خلال الأجيال .. و وصول كل (طفل ) لمرحلة الإستقرار ال ( مادي / إجتماعي / عملي ) .. عند سن طبيعي قريب جداً من سن البلوغ ( 15 سنة ) .. و بالتالي بيبدأ حياته الكاملة ك ( إنسان بالغ ) .. في سن طبيعي .. و يتجوز .. و يخلف .. و هكذا .. … لكن , علي مدار ال200 سنة اللي فاتوا بالأخص .. تدريجياً .. إتحول العالم في إتجاه ال ( موظف ) اللي شغال عند صاحب المصنع .. .. الموظف اللي ماعندوش ( حرفة / مهارة / صنعة ) يقدر يشتغل بيها لوحده .. لا .. الموظف ده بيكون شغال شغلانة مالهاش وجود غير في إطار كيان كبير .. زي معظم الشغلانات اللي إنت شايفها حواليك دلوقتي في ( شركات / مصانع ) .. شغلانات .. لو الموظفين اللي شغالين فيها سابوها .. حتلاقي حد تاني ييجي يشتغلها بسهولة .. لكن الموظف نفسه .. مايعرفش يشتغل نفس الشغلانة فأى مكان تاني !! .. لأنه .. ماعندوش أى مهارة حقيقية .. ببساطة .. هو إنسان باع و تخلي عن آدميته و تميزه .. مٌقابل ( مرتب ميري مضمون ) . … … الإنسان ال( موظف ) ده .. بيتجوز علي سن 30 سنة مثلاً .. و يخلف طفل .. و يحلم للطفل ده .. يتمني للطفل ده .. يدور علي إزاي إن ال ( طفل ) ده حياته تكون مختلفة .. مستقرة .. أنجح .. .. و يبدأ يدور علي أفضل مدرسة .. علي أفضل حضانة .. علي أفضل نادي .. .. و ينسي .. ينسي إن أكتر وقت الطفل بيقضيه .. بيكون في البيت ( مش المدرسة أو النادي ) .. إن أكتر ناس الطفل بيشوفهم و يتأثر بيهم … هما ( أبوه و أمه ) .. مش المدرس أو كابتن التمرين .. … و علي مدار عشرات السنين اللي فاتوا .. آباء و أمهات كتير .. شافوا أطفالهم بيمشوا في نفس الطريق اللي هما مشوا فيه .. و بيتقبلوا ده .. لأنهم ( ماشافوش غير كده ) .. … لكن .. بإنتشار الإنترنت و السوشيال ميديا .. ظهرت عوالم كتير جداً ماكنتش معروفة بالنسبة للبشر زمان .. … و إكتشف ناس كتير إن ( اللي معاهم فلوس كتير فعلاً ) .. مابيبعتوش عيالهم مدارس عشان يتعلموا إزاي ( يشتغلوا موظفين ) .. و لكن ال ( مدارس ) بالنسبة لعيالهم بتكون ( مهارات مُكملة ) .. مش ( مهارات أساسية ) .. .. الطفل ( اللي مولود فأسرة غنية جداً ) .. أهله مش بيكونوا قلقانين إنه يلاقي شغل أو مستقبل ناجح لما يكبر .. لا .. أهله بيكونوا قلقانين إنه ( لازم يتعلم المهارات الكاملة اللي تساعده يدير ثروة الأسرة و مايضيعهاش ) . يعني : أهله بيدوروا إزاي إن طفلهم ( يكمّل ) و ( يبني ) علي اللي هما بنوه .. مش يروح يبدأ من أول و جديد بعد سن ال23 سنة .. … نفس الشيء اللي بتعمله الأسر الغنية حالياً .. هو اللي كانت بتعمله كل الأسر علي مدار التاريخ .. بس اللي كان الطفل بيكمله و يبني عليه .. مش دايماً كان ( إدارة الثروة ) .. و لكن أحيان كتير كان ( إدارة الصنعة , إدارة المهارة , إدارة الحرفة ) .. .. و كان نتيجة كده ( إستقرار نفسي , عملي , مادي ) للطفل . … … أنا عارف إن الكلام ده حيضايق ناس كتير لأنه مُعارض لحياتهم الحالية و اللي هما إتعودوا عليه .. و لكن سؤالي هو : لو مش حتغامر و تحاول عشان نفسك إنك تشوف الإختيارات الكتيييييييير اللي العالم بيقدمها لك … كمان مش حتغامر و تحاول عشان ولادك ؟! . … … عايز إبنك يتعلم برمجة عشان يطلع معاه مهارة تسمح له يشتغل بيها و يجيب فلوس كتير ؟! .. الإجابة : إتعلم برمجة معاه .. و إفهم إن في فرق ضخم جداً .. بين ( تعلم المهارة ) و ( إحتراف المهارة ) .. أى إنسان ممكن يتعلم برمجة ( أو أى مهارة تانية ) خلال مدة صغيرة جداً .. لكن ( إحترافه ) للمهارة دي .. بشكل يسمح له إنه ( يتميز ) فيها .. محتاج إنه يقضي فيها سنين و سنين .. و دي حاجة مش حتحصل .. إلا لو عاش فيها من طفولته .. لو مش حتقدر تقدم له ده .. إبعته يتتلمذ علي يد حد يقدر يقدم له ده .. يلازمه .. مش مجرد ساعة أو ساعتين في الأسبوع .. .. إحتراف المهارة ده شيء بيلون كل جوانب حياة الإنسان .. .. المبرمج ال( مُحترف ) مثلاً بيفكر و يتصرف كمبرمج أثناء إعداده أكله في المطبخ , أثناء إعداده لهدومه , أثناء كلامه العادي .. الحاجات دي كلها صعب إن إنسان يتعلمها إلا لو ( لازم ) صاحب المهارة في حياته كلها . . و نفس الشيء بالنسبة لكل المهارات عموماً … … لو قدرت تفهم البوست ده .. حتفهم إن العالم الحقيقي … مش العالم المُختل اللي فيه دراسة نظرية لمدة 18 سنة ده ) .. و إن العالم الحقيقي ده .. مافيهوش حاجة إسمها (فترة مراهقة ) .. المُصطلح اللي طلع عشان يسمي مرض نشأ بسبب الإختلال الناتج عن حياة مُختلة أساساً .. .. طبيعي إنك لو جبت إنسان عنده 15 سنة .. بالغ .. و المفروض يكون دلوقتي بيقود حياة كاملة .. و لكنك ما زلت عايزه يعيش ك ( طفل ) .. غير مسئول .. طبيعي حيبدأ يتصرف تصرفات مختلة .. .. و الله أعلم .