حاعلّم إبني إنه مايمشيش أكتر من 3 خطوات و هو

حاعلّم إبني إنه مايمشيش أكتر من 3 خطوات و هو ماسك الكورة من غير ما يخبطها في الأرض مرة واحدة عالأقل !!! .

( البوست الأول عن التربية ) .

أنا باحب كرة السلة ( الأمريكية ) جداً .. مسلسلات أنيمي زي ( سلام دانك , كوروكو نو باسكت ) خلتني أعشق كرة السلة , و أتعرف علي عوالمها , و أتعلمها . و بعدين علي مدار السنين شفت كمية محتوي ضخمة عن مهارات لعيبة أسطوريين زي ( مايكل جوردان , ليبرون جيمس , كوبي براينت , ستيف كوري , … و غيرهم ) .. و طبيعي جداً إني ألاقي نفسي سرحان لمدة 30 دقيقة في عدد من الفيديوهات عن كرة السلة ظهر لي في التيكتوك مثلاً .. أو يوتيوب .. و أكتشف إني ( سعيد و فرحان و منتشي ) جداً جداً جداً .. و أنا باتفرج عليهم . … في كرة السلّة .. في قواعد كتير مايعرفهاش غير اللي متابع كويس و فاهم اللعبة كويس .. الموضوع مش مجرد إنك تحدف الكورة و تستناها تدخل السلة .. إطلاقاً .. و أحد القواعد دي هي : ممنوع إنك تفضل ماسك الكورة و تمشي بيها أكتر من 3 خطوات .. ده بيبقي فاول إسمه ( traveling foul = خطأ سفر ) . لازم تخبط الكورة في الأرض مرة واحدة علي الأقل بعد 3 خطوات ( dripple ) . … كرة السلّة بتعتبر واحدة من الأربعة الكبار في أمريكا , الأربع رياضات الكبار يعني : ( كرة السلة NBA , كرة القدم الأمريكية ( rugby ) NFL , كرة القاعدة ( baseball ) MLB , الهوكي NHL ) . و أى حد ( مُحترف ) في أى واحدة من الرياضات الأربعة دول .. بيكون ضمن لنفسه و لعيلته و حبابيبه و حاشيته و مجتمعه و ناسه .. مستقبل و فلوس و نفوذ و إستقرار مادي زي الفل . .. ببساطة .. لأنه وجوده ذات نفسه بيكون عبارة عن وسيلة دعاية ممتازة جداً بتدور عليها كل الشركات الإستهلاكية .. و بمجرد ما بيبدأ نجم أى محترف في رياضة من الرياضات دي يلمع .. عروض الرعاية (Sponsorship deals ) بتنهال عليه من كل حدب و صوب . … نتيجة لكده .. التنافسية في ( تفريخ ) اللاعبين المحترفين دول .. أصبح أمر واقع و حقيقة في عقل و وجدان المجتمع الأمريكي .. أحد أنجح التيمات اللي بيتم إنتاجها في أمريكا علي مدار القرن اللي فات بالكامل .. هي أفلام و مسلسلات و قصص كتيير أوي عن نفس التسلسل : الطفل اللي بيطلع عنده موهبة في رياضة معينة , و بعدين بيواجه شوية ظروف صعبة , و بعدين يكبر و موهبته تكبر و يتحول يبقي نجم رياضي مشهور ناجح تنين , ناجح أوي , ناجح جداً أوي خالص .. … و بعد إنتشار الكاميرات الفيديو في أواخر التمانينات و التسعينات .. و بعدين إنتشار الموبايلات اللي بتصور فيديو في نهايات الألفينات و حتي يومنا هذا .. بقي في تيمة أخري مشهورة جداً و مميزة جداً جداً جداً .. و هي الفيديوهات اللي بيسجلها آباء و أمهات لأطفالهم .. من أيام ما بيبدأوا يتعلموا يمشوا .. و إزاي إن الأب و الأم بيحطوا ( كرة سلة , كرة قدم , مضرب بيزبول , .. أو أى آداة رياضة تانية ) قدام الطفل .. و بيبدأوا يدربوا الطفل علي الرياضة دي من لحظة ما الطفل بيبدأ يتعلم يمشي أساساً .. … و أبطال رياضيين كتير مشهورين جداً في يومنا الحالي .. قصصهم كلهم بتشترك في نفس التسلسل ده .. أهاليهم قرروا إنهم يكرسوا حياة الطفل لرياضة معينة من أول ما بيبدأ يمشي .. و بتكون النتيجة إن علي ما الطفل بيوصل لمرحلة ثانوي عام .. بيكون مهاراته متقدمة جداً جداً جداً جداً .. عن أطفال كتير تانيين عاشوا طفولة عادية نسبياً مقارنة بيه . … و بعدين ؟! .. و بعدين بيتحول الطفل ده ل ( Asset = ممتلك ) .. بتمتلكه شركات مختلفة ,

• شركات الدعاية و الإعلان .
• شركة النادي اللي الطفل ده بيلعب فيه .
• شركة الملابس الرياضية اللي الطفل ده لابس برانداتها .
• و غيرهم .. … و كل شركة من الشركات دي .. بيكون عندها شركة تانية بتشتغل فيها أو معاها .. محترفة في مجال ال ( PR = Public Relations = الإعلام ) . … و أحد أهم وظائف الشركة بتاعت الإعلام دي .. هي :
• إن مكنة التفريخ تفضل شغالة . … يعني : إن مافيش أى خبر عن معاناة أو مشاكل أو خلل الطفل ده بيتعرض له يطلع برة … و إن أى خبر ينتشر عن الطفل ده .. لازم يكون خبر ( نجاح , فلوس , سعادة , … و غيرهم ) .. و السبب .. ببساطة عشان يفضل الآباء و الأمهات أحد أهم أحلامهم هو إنهم : يطلعوا أطفال تانيين ( محترفين ) . و تفضل المفرخة شغالة .. و تفضل الدايرة شغالة .. . و تفضل الشركات … تكسب . … … بعد إنتشار الإنترنت .. إخرام كتير أوي في الأسوار اللي كانت مبنية حوالين ال ( محترفين ) دول .. بدأت تنتشر .. و بدأ الناس يشوفوا و يعرفوا أخبار كتير عن ال ( محترفين ) دول .. ماكانوش يتخيلوها قبل كده .. أخبار كتير و تفاصيل كتير كلها بتشير ل ( خلل ) ضخم جداً في عقلية و تكوين ال ( محترف ) ده .. … و ده منطقي للغاية .. تقدر تفهمه لو فكرت فيه شوية .. … إنسان .. كل اللي تم تدريبه و تربيته عليه من طفولته .. هو حاجات مالهاش أى قيمة إطلاااااااااااااااقاً .. مجرد قواعد وضعها شوية بشر بدون أى ” منطق ” إطلاقاً .. .. يعني تقدر تقول لي :
• إيه منطق / قيمة إنك ماتطلعش أوفسايد في كرة القدم ؟
• إيه منطق / قيمة إنك ماتتحركش أكتر من 3 خطوات بالكرة في كرة السلة ؟
• إيه منطق / قيمة إنك تتعلم إمتي و إزاي تقع في منطقة الجزاء عشان تاخد ضربة جزاء ؟! . … ببساطة .. كل دي عبارة عن مهارات بيقضي فيها ( أطفال ) سنين و سنين من عمرهم .. فقط عشان يحوزوا علي رضاء ( شركات ) عنهم .. و ياخدوا منهم ( فلوس ) . … … لكن :
• أخلاق ؟! .. دي مش مهمة عشان تحترف .
• منطق ؟! .. ده مش مهم عشان تحترف .
• علم ؟! .. ده مش مهم عشان تحترف .
• دين ؟! .. ده أخطر شيء , و لازم تتعلم تفصله عن كل تفكيرك و كيانك .. عشان تحترف . … … … علي مدار الشهرين اللي فاتوا .. كمية كبيرة جداً من الرسائل اللي جات لي .. كانت كلها عن ( التربية ) .. و آباء و أمهات بيسألوني عن أطفالهم .. و إزاي يربوهم .. خصوصاً اللي تم تشخيصه من الأطفال دول ب ( ADHD ) . … و كانت ردودي دايماً هي : أنا غير مؤهل للرد في أى شيء يخص الأطفال , و ده مش تخصصي , و خطر جداً إني أتدخل في المجال ده .. و كنت بارشح أحد أصدقائي المتخصصين في المجال ده ( د محمد محسن الرفاعي ) .. حاسيب لينك لبروفايله في أول كومنت .. … و سبب هربي من الرد علي الرسائل اللي ليها علاقة بالأطفال خصوصاً .. هو : رحلة تربية الطفل طويييييييييلة جداً .. بل يمكن من أطول الرحلات اللي إنسان بيعيشها في حياته .. و مهما كان كلامي اللي حاكتبه ك رد في رسالة , أو في بوست .. يبدو حلو و جميل .. إلا إن تطبيقه هو المهم .. تطبيق الصبر لما إبنك يطلعك عن شعورك .. تطبيق التحمل لما إبنك يعاني قدامك .. تطبيق السعي .. لما إبنك يسألك أسأله .. تتطلب إنك إنت نفسك تتعلم عشان تعرف تجاوبه .. .. كل ( تطبيق ) من دول .. بياخد وقت و مجهود كتير جداً .. و الإنسان بطبعه ( بينسي , و بيتكاسل , و بيتعب , و … ) .. بيحتاج لمتابعة و رفيق .. و أنا إطلاقاً لا أصلح للقيام بدور ال( متابعة ) ده .. عقلي و ذاكرتي و طاقتي مايسمحوش ليا إطلاقاً بده للأسف .. جربت قبل كده كتير أقوم بالدور ده .. و فشلت 🥹 … … لكن … في أسس و قواعد أساسية في التربية .. تقدر تعتبرها إتجاهات أساسية .. تستخدمها لو فأى وقت خلال رحلتك حسيت إنك ( تهت ) .. بالظبط زي إتجاهات البوصلة الأساسيين ( شمال , جنوب , شرق , غرب ).. في التربية برضو .. في شوية إتجاهات و قواعد أساسية .. مش محتاجين متابعة مستمرة مني أو من غيري عشان نساعدك تعرف إنت صح ولا غلط .. إنت لوحدك ( كأب , أو كأم ) .. تقدر خلال أى وقت فرحلتك تقف .. و تسأل نفسك … إنت ماشي صح ولا ماشي غلط .. … و من أول الإتجاهات الأساسية دي … هو : أنا باربّي إبني / بنتي .. عشان يكون عبد .. ل( مين ) ؟! .. … … أى إنسان في الحياة يظن إنه ( مش عبد ) .. ده إنسان متوهم و مخدوع خدعة كبيرة جداً .. كل البشر عباد .. بلا إستثناء .. في خلقنا و تكويننا الأساسي اللي ربنا خلقنا عليه … إحنا عبيد .. محدوديتنا في وقتنا و حياتنا علي الأرض .. هو أكبر دليل .. … بس الإختيار ربنا سابه لنا .. نعبد الله وحده لا شريك له .. ولا ؟! .. ولا نعبد شركاء له ( بشر , شركات , أندية , جامعات و كليات , … ) .. … … عايزك تتخيل إنك عبد لإنسان .. متحكم فيك بالكامل .. يؤمرك تتواجد فين و إمتي , و يعاقبك لو خالفت .. يؤمرك تتجوز إزاي , و يعاقبك لو خالفت .. يؤمرك تفرح بإيه و تزعل علي إيه , و يعاقبك لو خالفت .. يؤمرك تفكر في إيه … و يعاقبك لو خالفت .. .. إحساس حلو ؟! .. مستحيل .. لأنك ربنا خلقك كريم .. و كل اللي فوق ده .. مُهين .. … سؤالي هو : إبنك / بنتك .. مُتخيل إحساسك لما اللي مستعبدك يقول لك .. حضرهولي و ربيه ليا … عشان يكون عبد / جارية مطيع ليا ؟! .. … هل حتعمل ده ؟! … خنوعك و ضعفك قدام اللي مستعبدك .. ضخم جداً .. لدرجة إنك حتبيع إبنك / بنتك زي ما بعت نفسك ؟!.. … … الخوف من و علي الفلوس … دي عبودية لبشر .. لأن ربك الرزاق هو اللي بيرزق فقط .. لما تربي إبنك علي إنه يفهم و يتعلم إن الفلوس هي أهم حاجة في الحياة … إنت بتربي عبد ل ( بشر / شركة ) … عند مرحلة معينة .. حيدفع لك ملاليم .. مقابل حياة ( إبنك / بنتك ) .. و حتبقي فرحان … بس ذليل . .. تربية إبنك / بنتك .. إنه حياته كلها أهم شيء فيها هو ( كورة !! ) ..
  و زرع أفكار في أعماق وجدانه .. تخليه لما يسأل نفسه ( إنت إيه ؟ ) .. تكون الإجابة ( محترف كورة ) .. إنت كده ربيت عبد .. عبد لنادي / لشركة ملابس رياضية / ل شركة دعاية و إعلان . … تربية إبنك / بنتك .. إنه ( حر ) .. يلبس زي ما هو عايز .. يرقص زي ما هو عايز .. يصاحب زي ما هو عايز .. يعمل زي ما هو عايز .. و ماحدش له إنه يكلمه أو يتحكم فيه .. إنت ماربتش إنسان حر .. إنت ربيت ( عبد ) .. حيعيش طول عمره .. عبد .. لهواه و مزاجه .. … … … عبد النادي .. بيبقي سهل إنه يُباع و يُشتري .. عبد الجامعة .. بيبقي سهل إنه يُباع و يُشتري .. عبد الشركة .. سهل إنه يُباع و يُشتري .. عبد هواه .. سهل جداً جداً جداً .. إنه يُباع و يُشتري .. … عبد الله … حر .. لا يُباع .. و لا يُشتري .. عبد الله … حر .. بوصلته واضحة و ثابته .. مش مختلة .. عبد الله … حر .. مابيخافش غير من الله .. … … … معلومة عشوائية رقم ( 1 ) : .. أحد أشهر الإتجاهات الفكرية في أمريكا و العالم الغربي حالياً هي : ( ترك حرية الإختيار في تحديد الإتجاه الجنسي للطفل ) .. و إن ممنوع علي الآباء و الأمهات إنهم :
• يربوا البنت علي إنها بنت ..
• يربوا الولد علي إنه ولد .. .. و إن المفروض ترك الحرية في تحديد الإتجاه الجنسي و الميل الجنسي .. للطفل .. .. الطفل اللي بيتم تربيته و تنشئة تفكيره علي ( سيندريلا , سنو وايت , ريبانزل , … و غيرهم ) .. … … معلومة عشوائية رقم ( 2) : .. من أشهر أنواع العبيد في زمااان .. هما ال( مخصيين ) .. و دول كانوا بيبقوا رجال ( مخصيين = مقطوع لهم أعضائهم التناسلية ) .. و ده لأنهم كانوا بيبقوا مطيعين أكتر .. و ملاكهم ماكانوش بيخافوا يسيبوا حريمهم معاهم 😅. … … معلومة عشوائية رقم (3) : التجارب الأنثروبولوجية ( علم الإنسان و حضاراته ) .. بتاخد وقت طويييييل جداً .. لأنها بتشمل أحياناً أجيال ورا أجيال .. يعني مئات السنين .. و لكن ذاكرة المجتمعات .. ضعيفة جداً و قصيرة جداً .. و أبحاث كتير بتقول إن كل ما كبر عدد المجتمع و زاد .. كل ما ذاكرته ضعفت و قصرت . … … معلومة عشوائية رقم ( 4) :
• تعداد العالم يفوق ال6.5 مليار نسمة ..
• عدد الأشخاص اللي تم الإحتفاء بيهم ك ( نجوم مجتمع , محترفين , ناجحين , قدوات … ) عالمياً … علي مدار ال100 سنة اللي فاتوا .. مايتعداش المليون نسمة علي أعلي تقديرات .. المليار يعني ألف مليون .
• ملايين و ملايين و ملايين من البشر … بيعيشوا حياة ( سعيدة ,مستقرة , أحرار ,. … ) .. بوصلتهم الأصلية ماتظبطتش علي إنهم يسعوا عشان يكونوا عبيد ل ( كليات قمة , أندية , شركات , بشر , … ) ..
• و لكن الضوء ( الإعلامي ) لا يتم توجيهه علي الملايين و الملايين دول .. لأن … قصصهم مابتجيبش ( ترافيك , و شير , و لايكات , و … ) . … … … المهم هو … ألاقيش عندك تيشيرت اللعيب المشهور , بتاع النادي المشهور .. عشان ألبسه لإبني اللي عنده 6 سنين .. عشان كل ما يمشي في الشارع .. الناس تعرف أنا عايز ( أبيعه ) لأنهي نادي لما يكبر ؟!..