في لعبة مشهورة فحت في العالم حالياً .. إسمها (

في لعبة مشهورة فحت في العالم حالياً .. إسمها ( Elden Ring ) . بقالي كتير .. كتيير أوي أفتكر .. كنت مبطل لعب ( فيديو جيمز ) غير ( ليج أوف ليجيندز ) .. و أنا في دبي المرة اللي فاتت .. قررت إن كده كفاية .. و إني محتاج أرجع ألعب تاني و أشوف الدنيا دي حصل فيها إيه من آخر مرة قفلت جيم كامل ( زي assassins creed مثلاً .. أو حتي batman arkham ) . .. المهم .. جبت بلايستيشن 5 .. و قررت أجيب معاه أسطوانتين لعبتين أجربهم فوقت الفراغ 🤣🤣 .. اللعبتين دول كانوا : spiderman miles moralis ELDEN RING … المهم بعد ما جبته .. صديقي نصحني إني أنجز أسهل و أشترك في ps+ .. عشان كل مزاياها .. و الجيمز المجانية بتاعت كل شهر .. و باكدج الجيمز الشديد اللي في الأول .. الباكدج ده كان فيه ( God Of War ) .. و اللعبة دي بالذات ليها قصة معايا من أيام مراهقتي في السايبرات في ثانوية عامة .. فمافتحتش غيرها خلال أول أسبوعين .. و قفلتها .. و بكل أمانة كانت سهلة .. سهلة زيادة عن اللزوم .. بالرغم من إني كنت معلي الصعوبة للآخر . … و بعدين قررت أشوف بقي موضوع ( Elden Ring ) اللي عليها كل الدوشة العالمية الحالية .. .. أنا ماكنتش لعبت أى حاجة مشابهة ليها من قريب من زمااااااان .. ( ولا أى حاجة من الستوديو بتاعها اللي إسمه from software .. زي دارك سولز أو ما شابه ) . آخر حاجة كنت لعبتها بالشكل ده كانت : Skyrim .. و الكلام ده كان سنة 2012 لو أفتكر تقريباً .. … المهم .. أول أسبوع بالكامل أنا مش فاهم أيتها حاجة فأى بتنجان .. يا جدعان .. منين يودي علي فين ؟! .. حتي الإنجليزي .. إنجليزي شكسبيري فصحي من اللي هو ( thy ) بدل ( you ) ده .. عارفه ؟! .. ولا فاهم أى أسلوب لعب .. أو تفاصيل .. أو كمية المعلومات اللي أنا محتاج أحطها فدماغي عشان بس أبدأ ألعب .. .. زائد إن كل ما أخطي خطوة .. ألاقي حد قتلني !! .. و مش بيقتلني عادي لا .. هو بيمثل بجثتي حرفياً .. و غالباً بعد ما الشاشة بتسود بيعمل حاجات تانية فجثتي بس اللعبة مش عايزة توريني 🤣🤣 .. أسبوع كامل .. كل شوية أتخنق .. و أقفل أم اللعبة و البلايستيشن كله .. أو ألعب جيم فيفا .. و أروح أشوف الشغل الللي ورايا .. و بعدين أرجع ألاقي بوستات بتتكلم عن الموضوع .. أقول لنفسي ما هو إنت أكيد مش أغبي من كل دول .. و أرجع أفتح البلايستيشن و أحاول .. طب يا جدعان .. أى معلومة أى حاجة طيب .. … … عارف إن في شرح علي اليوتيوب لكل شيء في الحياة حالياً .. و إن عدد الفيديوهات اللي شارحة كل تفاصيل اللعبة كتير جداً .. بس مش حاكدب عليك و أقولك إني ماكنتش عايز مساعدة .. لا … أنا فعلاً ماكنتش فاهم الفيديوهات بيشرحوا فإيه .. … أنا ملوووووووووووول جداً .. و كل ما أدور علي حاجة علي اليوتيوب .. و ألاقي الفيديو وقته أكتر من 5 دقايق .. بيبقي لسان حالي هو ( مش عشان لعبة يعني حاقضي 5 دقايق فرجة ) .. و أروح أعمل حاجت تانية .. و حتي لما كنت باشوف الفيديوهات الصغيرة .. ماكنتش بابقي فاهم اى بلح . … … دلوقتي عدي أكتر من أسبوع .. غلبت أول إتنين ( Boss ) في اللعبة ( عديت margit the fell omen ) .. قفلت عدد ضخم من المهام الجانبية .. ليفيل الكاراكتر بتاعي وصلته ل 49 🤣🤣( و دي حاجة نسبياً مش قليلة ) . … امبارح بالليل صحيت الفجر و أنا باحلم باللعبة .. و بتفاصيلها .. … كنت باكلم صديق ليا النهاردة .. في وضع مشابه ليا من أسبوعين .. و عايز يجرب اللعبة .. لقيتني باشرح له كمية تفاصيل .. و معلومات .. و تكنيكات .. و خرايط .. ضخمة . .. بعد المكالمة .. فضلت أقارن بين مستوايا الحالي .. و مستوايا من أسبوعين . و إزاي إن من أسبوعين كنت باطلع أجري مرعوب أول ما أشوف أحد أنواع العمالقة في اللعبة .. حالياً باقيت باقتله أثناء ما أنا ماشي بضربتين تلاتة .. عشان بس أكمل عشرتلاف ( rune = عملة اللعبة ) .. و أعلي الليفيل بتاعي . … … … ماعتقدش إن الهدف الرئيسي من البوست مش واضح .. صح ؟ كل حاجة في الحياة بنفس الطريقة .. .. أول ما جبت عربيتي كنت كل مرة بانزل أفتح باب الجراج عشان أطلع بيها .. بطني بتقلب من الخوف و التوتر .. و قبل ما أجيب عربية .. كانت السواقة بالنسبة ليا سر كهنوتي يمتلكه كهنة التاكسي و لا يبوحون به لأمثالي .. .. من يومين و أنا راجع من مشوار طويل شوية .. لقيت نفسي باقفل العربية و أنا مش فاكر أى حاجة من الطريق .. الطريق بالكامل سرحان و سايق بال( muscle memory = الذاكرة اللي بتتخزن في جسمك و مش بتحتاج تركز بعقلك عشان تستدعيها ) . … … … في راجل طيب كان إسمه : david foster wallace .. كتب روايات كتير مهمة .. ليه مقولة عمري ما نسيتها : If you are immune to boredom there is literally nothing you cannot accomplish … يعني : لو عرفت تستحمل الملل .. مافيش حاجة في الدنيا مش حاتعرف تنجزها .