زمااااااااان .. في مرحلة المدرسة الإعدادي و الثانوي ( 2000

زمااااااااان .. في مرحلة المدرسة الإعدادي و الثانوي ( 2000 إلي 2005 ) جزء أساسي و لا يتجزء من حياة المدرسة بالنسبة ليا كان : العركات - الخناقات .. .. مدارس الإعدادي و الثانوي اللي دخلتهم كانوا ( حكومي ) .. و أى ولد في سني تقريباً ( ثلاثينيات ) .. و دخل مدرسة ” حكومي ” في الإعدادي و الثانوي .. عارف كويس جداً جداً الخناقات كانت بتبتدي و تكبر و تنتهي إزاي . .. و بما إني فأغلب الأوقات كنت بابقي قاعد في آخر تختة .. ماسك الساندوتش بتاعي بالكيس .. و باتفرج علي العالم قدامي و باعد الثواني لحد ما أروح بيتنا .. كنت باشوف بوضوح التسلسل التالي دايماً : 1- الموضوع بيبتدي بخلاف بسيط جداً بين طرفين .. ممكن يكون علي أتفه الأسباب .. زي إنه واحد خبط في واحد و هو ماشي بين التُخت مثلاً بالصدفة . . 2- الطرف التاني بيقول للطرف الأولاني ب ” ماتحاسب يا عم ” … و غالباً بيكون بيقولها بهزار و بشبح إبتسامة . . 3- الطرف الأولاني بيحس إن التنبيه ده بينقص من رجولته ” اللي غالباً لسة ماكتملتش أساساً 🤣 ” .. و يرد عليه بصوت بيحاول إنه يكون خشن .. و يقول : ” خلاص يا جدع ماكنش كتف قانوني يعني ” .. و برضو بيحاول يبدو إنه بيهزر . . 4- الطرف التاني بيرد و هو حاسس إنه كده تم الإنتقاص من رجولته هو كمان اللي غالباً لسة مابتدتش 🤣 .. و يقول ” طاب ماشي يا حبيبي يلا عشان ماتاخدش إنذار ” .. و بيقولها و هو بيطبطب علي كتف الطرف الأول . . 5- الطرف الأول بيبص بنظرة شذر علي إيد اللي بيطبطب عليه .. و بيشيلها بعنف و يقول بلهجة بدأت تكون عدوانية ” طاب إيدك بس عشان التيشيرت ” . 6- التاني بيحس إنه كده بدأ يتهان في نضافة رجولته .. و يرد بلهجة عدوانية صريحة بس تبدو ساخرة ” خلاص بلاش نطبطب عالتيشيرت .. تعالي أطبطبلك عالبوكسر 🤣 ” . … و بعدين الخناقة تقوم 🤣😁😅.. . المثير للإنتباه هنا .. هو إن ماكنش في أى سابق عدوانية بين الطرفين إطلاقاً قبل اللحظة دي .. و لكن بمجرد ما الخناقة كانت بتقوم .. كنت بتبدأ تسمع شتايم بكل شكل و لون تتخيله و ماتتخيلوش . شتايم بالأهل .. و الأجداد .. و للأسف في أحيان كتير .. بالأديان . . و عقلي كان دايماً بيبدأ في التساؤل هنا .. ” ليه ؟! ” .. ” إمتي الكراهية دي بين الطرفين إتولدت ؟! ” . ” إمتي أصبح عند الطرفين قناعة كاملة تخليهم يسبوا أهل و أجداد و أديان بعض ؟! ” . .. و فأحيان كتير جداً .. و بعد ما الخناقة تكبر .. و تولع زيادة بعد ما يدخل فيها ناس تسلك .. فتولع أكتر .. علي آخر اليوم .. تلاقيهم كلهم بيلعبوا كورة مع بعض في الشارع .. بعد ما غالباً كل واحد فيهم عور التاني و علم عليه . .. و تاني يوم يتخانقوا تاني .. و هكذا . … … بناءاً علي تشخيصي العصبي .. أنا ” High Functioning Autistic With ADHD ” مش وقت إني أشرح دلوقتي تفاصيل السبيكترام بتاع التوحد و درجاته و إختلافاته .. ولا علاقة ده بالADHD .. و لكن يكفي إني أشرح إن معني الجملة الإنجليزي اللي فوق دي هي : ” إني كنت دايماً بابقي لابس قناع أحاول أتعايش بيه مع العالم اللي فوق ده .. و المشابه ليه بعد كده في حياتي في الكلية و الجيش و الشغل .. لكن فأى لحظة عقلي عمره ما تقبل التفاصيل الحياتية دي كشيء عادي معتاد و طبيعي .. فبالتالي .. كل تساؤلاتي و أفكاري دي .. كنت باحوشها .. لحين ما ييجي وقت أبحث و أدور علي إجاباتها .. .. و إتعلمت إن آخر شيء المفروض تعمله .. إنك لما تشوف إنسان غضبان و قاعد بيشتم زميل له بالآباء و الأمهات و الأجداد و الدين .. إنك تروح تسأله .. ” ممكن تشرح لي منطق تفكيرك دلوقتي ؟! 🤣🤣🤣🤣 ” … … لما باشوف تعليقات غاضبة أو شتائم علي بوست كتبته .. بافتكر مشاهد مدارس الإعدادي و الثانوي دي .. و عقلي بيفضل يسأل .. ( إيه التسلسل الفكري .. أو المنطق .. اللي وصّل إنسان إنه يفكر و يتصرف و يكتب كومنت فيه شتيمة أو تعليق سلبي ؟! ) . … أنا فاهم المشاعر بالمناسبة .. فاهم إن معظم الناس مشحونة تجاه ( دولة معينة ) بسبب موقفها الرسمي تجاه اللي بيحصل في أهالينا . … لكن .. هل إنت فاهم ال ( دولة ) دي .. هي إيه ؟ .. أو مين ؟! . .. يعني لما تعمم و تقول ( دول كلهم شعب كذا و كذا و كذا ) .. و في الآخر يكون كل اللي إنت إتعاملت معاهم من الشعب ده مثلاً مايكملش 10 بنى آدمين .. إنت فاهم الغلط و المشكلة اللي إنت وقعت فيها ؟! .. و فاهم حمل الكراهية اللي إنت شايله جواك ده بيلون أفكارك إزاي ؟! .. هل إنت فاهم الحدود اللي مرسومة بقلم رصاص علي ورقة .. و بتقول لك إن اللي عالناحية الشمال من الخط الرصاص ده مايبقاش أخوك .. هل إنت فاهم الحدود دي إترسمت إمتي ؟! و ليه ؟! و لمصلحة مين ؟! … … البوست اللي كتبته عن أفكاري بعد ما شفت الفيلم بتاع ( The goat life ) .. إطلاقاً ماكنتش باتكلم فيه عن دولة .. أو نظام العمل فيها .. أو حتي عن قصة الفيلم 🤣.. .. الفيلم بالنسبة ليا كان بيعبر عن قصة قاسية فعلاً لشخص إتعرض لإستعباد مباشر .. قصة مدتها 4 سنين .. إتعرضت في ساعتين زمن .. مشاعر و أفكار و أحداث حياة مدتها 4 سنين .. إتعرضت قدامك في ساعتين زمن . .. دي أحد أهم وظائف الفن عموماً .. و السينيما خصوصاً .. إنها تعرض لك بتلخيص و بلاغة رسالة معينة .. عشان تخليك تفكر في واقع أكبر و أعم … البوست اللي كتبته كان بيتكلم عن فكرة ال ” عبودية ” بشكل عام .. العبد اللي إتولد لعبد .. و ماشافش غير حياة العبودية .. صعب جداً عليه يفهم إنه عايش في عالم مختل غلط محدود بحدود رسمها له أسياد . .. و بالتالي .. و بتصرف حيواني طبيعي جداً .. بيرفض أى محاولة لتغيير العالم بتاعه .. حتي لو كانت المحاولة المعروضة عليه دي للأحسن . .. شوف أى قطة أو كلب في الشارع … و عاني من الأذي و التشرد .. جرب تقرب منه و تعرض عليه أكل أو إنك تنضفه مثلاً .. حيعاملك بكل عدوانية لأنه ماشافش غير العدوانية طول عمره في الشارع . … لكن الإنسان مش حيوان .. الإنسان عنده عقل .. يفكر بيه قبل ما يرفض .. قبل ما يشتم .. قبل ما يتخانق . … … أنا ماعرفش مين ممكن يقرأ الكلام ده .. و ماعرفش هل حتتفق مع اللي كاتبه أم لا .. و لكن بفرض إنك مش متفق .. بفرض إنك عندك وجهة نظر مختلفة .. إعرضها .. بهدوء .. فكر .. فكر في السبب إن إنت وجهة نظرك بالمنظر ده .. فكر في ” هل هي وجهة نظر إتولدت و وجدت آباءك و أجدادك عليها ؟! ” .. ولا هي ” وجهة نظر وصلت لها نتيجة موقف فردي ؟! ” .. ولا ” هي وجهة نظر وصلت لها بعد تفكير منطقي ؟! ” . و بعدين إعرضها .. مش عشان أنا مش عايز أشوف شتائم أو تعليقات سلبية مثلاً في التعليقات عندي .. إطلاقاً والله .. و لكن عشانك إنت .. لو ماتعلمتش إنك تفكر في ” أفكارك ” .. و تفهم هي موجودة ليه .. قبل ما ” تشتم ” .. حتفضل طول عمرك مفتقد جزء كبير و مهم جداً من تكوينك البشري .. الجزء اللي ربنا كرّمك بيه .. و فرّق بيه بينك .. و بين باقي المخلوقات . .. و الله أعلم .