أنا ... مابكملش أى حاجة .. للآخر .. أبداً

• أنا … مابكملش أى حاجة .. للآخر .. أبداً . …
• حاولت كتييييير إني أتعلم لغة جديدة ( إنجليزي , ألماني , سنسكريتي , … ) .. و كل مرة أزهق و ماكملش .
• كل شهر باشترك في سبعة و تلاتين كورس مختلفين في مجالات زي ( برمجة , بيزنس , تطريز تيريكو , … ) .. و مابفتحش منهم حاجة .
• عملت داونلود لأربعة و خمسين مسلسل مختلفين .. و تمانية و سبعين فيلم .. كلهم أجمد من بعض .. و مش عارف أبتدي فأي واحد منهم .
• كل يوم باعدّي جنب الجيم و أقول بكرة حاروح أشترك و أبتدي .. و بكرة ده عُمره ما جه .
• …
• أنا ( فاشل , كسول , علق , تايه , خايف , غضبان من نفسي , … ) ..
• السنة دي , زي السنة اللي قبلها , زي من عشر سنين فاتوا .. .
• أنا … مابكملش أى حاجة .. للآخر .. أبداً . … الجمل اللي فاتوا دول .. أنا واخدهم نسخ لصق ( مع تغيير بعض التفاصيل ) من رسائل وصلتني خلال الفترة اللي فاتت . … … ( قصة رقم 1 ) . و أنا في أولي كلية , و أنا عندي 19 سنة .. سنة 2007 .. فجأة و بدون أى مقدمات إطلاقاً .. قلت لماما .. أنا نازل أجيب سمكة في حوض سمك !!! 🤣😅 .. .. أمي ربنا يبارك لها .. كانت خلاص بطلت تستغرب من أى حاجة أقولها من زماااااان .. و لكنها سألتني … إشمعني فجأة ؟! .. .. ردي كان : (( محتاج أحس إن في أى حاجة حواليا في الأوضة بتاعتي .. بتتحرك بشكل عشوائي )) .. .. أمي سابتني أعمل الموضوع ده بسهولة الصراحة أنا متذكر .. ببساطة ( من وجهة نظرها ) .. مافيش أى سبب مقنع للرفض .. و سعر سمكة زينة في حوض سمك صغير .. كان أقل من 30 جنيه متذكر .. … نزلت .. جبت سمكة زينة في حوض سمك صغير .. و جبت لها كيس أكل بتاعها .. و بدأت أعتني بيها .. و أذاكر .. و أبص لها .. و أذاكر .. و أراقبها .. و أكمل مذاكرة في المواد المملة اللي كنت باذاكرها في الوقت ده .. و بعدين كام يوم رجعت من الكلية لقيتها ماتت 🥲 . … نزلت سألت الراجل اللي جبتها منه عن السبب .. قال لي أسباب كتير .. قررت أجرب مرة تانية .. و جبت سمكتين المرة دي .. لأنه قال لي إنها ممكن تكون حست بالوحدة 🥲 . .. إعتنيت بيهم .. ذاكرت .. راقبتهم .. ذاكرت مواد مملة أكتر .. و بعد كام يوم .. الإتنين ماتوا 🥲😢😭😭 . ماكررتش الموضوع .. و حسيت إني مابيعيشليش سمك زينة .. و بدأت أفكر .. أنا عايز أجيب عصفورة .. أو بغبغان .. او قطة .. أو كلب .. في أوضتي .. عشان أعرف أذاكر 😅 . بس ماجبتش ولا حاجة من دول طبعاً . … … ( قصة رقم 2 ) . في ثانوي عام ( 2004 - 2005 ) .. منين ما كان أى حد من أقربائي يسأل أمي عني .. كانت تقول له ” داير في البيت بفورريرة .. أنا متوقعة له يجيب 70% بالكتير ” 🤣🤣 . أمي ماكنتش بتقول كده عشان تخزي العين أو خوف من الحسد .. إطلاقاً .. أنا فعلاً كنت طول تانية ثانوية عامة .. ماشي في البيت ماسك في إيديا ” فورريرة = نحلة بي بليد 🤣 ” .. و كنت عملتها بنفسي من شوية لعب مكسرة قديمة .. و كنت كل شوية .. أروح راميها تلف علي الأرض .. و أثناء فترة الدوران بتاعتها دي .. هي دي المدة اللي كنت باذاكر فيها .. و بعد ما تقف و تبطل دوران … أسيب الملزمة أو الكتاب اللي ماسكه .. و أمسكها أرميها تلف تاني .. و هكذا . .. في تالتة ثانوي .. بقيت ماسك فورريرة فإيد .. و في الإيد التانية ” يويو ” 🤣 … عشان كنت بدأت أشوف ( سوبر سونيك سبينر ) 🤣😁 . … … ( قصة رقم 3 ) . أول مرة بدأت أذاكر بنفسي كورسات برمجة و تصميم بشكل مستقل .. بعيد عن الكلية .. كان سنة ( 2009 ل 2011 ) .. سرعة النت اللي كنت مشترك فيه في الوقت ده .. كان 512 🤣.. اللي هو نص ميجا .. يعني سرعة الداونلود بتاعتي كانت يوم ما تبقي عالية : 52 كيلوبايت في الثانية . يعني الفيلم اللي إمتداده DVD اللي مساحته 700 ميجا .. كان بينزل في تلات ساعات و نص .. ده لو مافتحتش خلال ال3 ساعات و نص دول .. أى شيء تاني علي الإنترنت . … متذكر كويس جداً جداً جداً .. إن قمة إستيعابي و تركيزي مع المحاضرات اللي كنت منزلها و باتفرج عليها .. كان بيبقي أثناء ما عيني مركزة مع شريط التحميل الأخضر .. أثناء ما كنت باحمل حلقات أنيمي .. حلقة الأنيمي الواحدة كانت بتنزل في نص ساعة تقريباً ل 45 دقيقة .. و أثناء مشاهدتي و مراقبتي لشريط التحميل ده .. كان أكتر وقت فحياتي أتذكره .. كنت مركز فيه في المحاضرات اللي كنت باشوفها 😁 . … … ( قصة رقم 4 ) . أنا كنت باكره النحو في العربي كُره العمي .. لحد بداية تالتة إعدادي .. سنة 2002 .. و أى سؤال / حصة / إمتحان … ليه علاقة بالنحو .. كان كافي إنه يقلب بطني و يوترني .. و يخليني مرعوب و خايف .. .. في بداية تالتة إعدادي .. أخدت درس عند مدرس العربي ( أستاذ ياسر عبد العاطي ) ربنا يبارك له .. في أول حصة خالص .. طلع من شنطته كمية من إربع الجنيهات الجديدة اللي لسة طازة دي و ماتكرمشتش .. و كمية تانية من إنصص الجنيهات .. و حطهم قدامه علي الترابيزة .. .. و بعد ما شرح شوية نحو .. بدأ يسأل المجموعة .. و اللي يجاوب صح .. يديله رُبع جنيه .. أو نص جنيه … علي حسب صعوبة السؤال .. .. و ماكنش في أى عقوبة إنك تجاوب غلط … مهما كانت إجابتك غلط .. بل كان بيضحك و يهزر لما الإجابة تكون غلط .. … … خلال أقل من شهرين .. النحو كان أكتر مادة باحبها في الحياة بعد الرياضة .. و كمية الإربع و إنصص جنيهات اللي أخدتها منه .. كنت باطلع ألعب بيها بلايستيشن في المحل اللي قدام الدرس يومياً .. و إداني سكيتش هدية لونه أخضر … فضل من أعز مقتنياتي و ممتلكاتي لحد ما إتجوزت و ضاع للأسف في نقل حاجتي لشقتي 🥹 . … و علي مدار السنين بعد كده .. النحو كان و ما زال .. من أكتر الحاجات اللي فاكر إني كنت باستمتع بيهم في الحياة .. و كان عندي إستعداد و أنا في تالتة ثانوي انافس أى حد بكل ثقة … و بدون خوف .. في النحو . … … كل الأمثلة اللي أنا كتبتها فوق دي .. ( و لو مش هاممني إني أقصّر البوست ده .. كان زماني فضلت أكتب أمثلة لحد بكرة 😅 ) … كلها عن نفس الشيء .. نفس الشيء اللي مافهمتوش عن نفسي .. إلا لما فهمت يعني إيه : ADHD . .. عقل أى إنسان ( عادي ) .. عشان يشتغل /يركز فأى شيء .. بيفرز بشكل مستمر / تلقائي .. هورمونات و مواد كيميائية معينة مسئولة إنها ( تخليه منتبه … تخليه مركز .. تخليه فايق … تخليه متحفز ) . … عقل الإنسان ال ADHD .. الهورمونات دي .. مابتتفرزش عنده تلقائي .. أبداً .. … بدون ( تحفيز خارجي ) … الإنسان ال (ADHD) .. بيكون شغال بجزء بسيييييييييط و صغيييييييييير جداً من قدراته العقلية الحقيقية .. و بيسرح .. و بيزهق بسرعة و ملوووووووووول جداً .. و بيحس إنه غبي .. أوي .. … … بمجرد ما بيتوجد ( تحفيز خارجي ) .. الإنسان الADHD ده … بيتحول لشخصية مختلفة 100% .. فجأة بيكون واعي جداً , سعيد جداً , مهايبر , مركز , … ذكي جداً جداً .. لمااااااااح لأقصي درجة . … … لما كنت عايز أجيب سمكة ( في القصة رقم 1 ) .. عقلي كان بيدور علي أى طريقة يلاقي بيها تحفيز خارجي .. لأن المواد اللي كنت باذاكرها كلها كانت صماااااااااء جداً .. مملة جداً … و الأوضة حواليا حرفياً كانت بتبقي زي السجن .. و طول الوقت باسأل نفسي ( مش إنت بتحب الرياضة و الهندسة ؟! .. طب زهقان ليه ؟! ) . … لما كنت ماشي بفورريرة في البيت ( في القصة رقم 2 ) .. كنت كإني قاعد بازق عقلي كل شوية عشان يطلع أى هورمونات تحفيز و إنتباه .. و كل ذكرياتي الحالية عن مرحلة ثانوي عام بتاعتي .. هي عن ال( فورريرات و اليويو و اللعب بتاعتي 🤣 ) … و جبت 96,5% في تانية و تالتة .. و بعد سنيييين طويلة .. عرفت إن ال (Fidgeting = لعب بحاجة فإيدك ) طول الوقت .. أحد أكتر العلامات المتكررة فأى حد ADHD . … سرعة الإنترنت بتاعتي حالياً فمصر 70 ميجا .. سرعة الداونلود 6 ميجا في الثانية .. و لا تسأل يا بُني عن سرعة الإنترنت برة مصر أساساً كام 🤣 . لكن اللي أقصده إن .. مُتعة ال( ترقّب ) .. اللي كنت باحس بيها أثناء مراقبتي لشريط التحميل .. إنتهت من زماااان .. و أصبحت فأحيان كتير والله العظيم .. بادور علي أى لعبة ضخمة علي الPC أو البلايستيشن ( حجمها فوق ال50 جيجا مثلاً ) .. عشان أقعد أراقبها أثناء ما بتحمل .. و أشتغل أو أذاكر حاجة خلال الوقت ده . … علي مدار ال6 سنين اللي فاتوا .. بقيت باستخدم ال ( أكل ) و ال ( قهوة ) ك نوع من أنواع المحفزات الشخصية بالنسبة ليا .. و أجوّع نفسي جداً .. و أفضل أتخيل أكتر أكل باحبه ( بيتزا ) .. و أقول لنفسي ( حاخلّص شوية الشغل دول .. و أروح أطلب بيتزا ) .. و أحيان كتير جداً .. بعد ما باخلص الشغل .. باعمل ليا شوية بيض بالموزاريلا و خلاص 🤣 . … … للأسف مش كل شغلي أقدر أعمله علي اللاب توب بتاعي لوحده فكافيه مثلاً أو مكتبة الإسكندرية ( أحيان كتير جداً باخد بعضي و أروح أشتغل هناك ) .. لأن جزء كبير من شغلي باحتاج فيه الشاشات الكبيرة .. و سرعة الإنترنت الكبيرة .. و باقي الأجهزة الكتير اللي علي مكتبي .. .. لكن منين ما باروح أشتغل من أماكن زي ( نادي المهندسين , مكتبة إسكندرية , كافيه نضيف ) .. تركيزي بيكون فأعلي حالاته .. .. و السبب .. وجود عشرات الحاجات حواليا اللي بتفضل تشد فإنتباهي طول الوقت .. ( External Stimulators ) . … … كالمعتاد … البوست بقي طويل فحت .. و ماعتقدش إني برضو قلت كل اللي عايز أقوله من أمثلة .. و لكن أعتقد إن الفكرة نفسها وصلت .. .. لو إنت بتعاني من الADHD .. أو شاكك إنك بتعاني منه ..

المحفزات الخارجية = External Stimulators , و المحفزات الإجابية الصغننة = Micro Rewards لازم يكونوا جزء من تفكيرك عن نفسك و تجرب تصمم لنفسك أنظمة مُعتمدة عليهم . … أنا ماعرفش إيه اللي ينفع مع روتين حياتك حالياً … أو إيه اللي ممكن عقلك ينجذب له .. يعني أنا مثلاً بيحفزني جداً البيتزا التشيكن رانش .. و إطلاقاً مابيحفزنيش السي فود 🤣😅😅 .. إنت ممكن تكون العكس .. .. ممكن الأكل كله مايكونش بيفرق معاك .. .. لكن الأكيد هو إنك محتاج تفهم إن ( تصميمك للحوافز دي بنفسك ) صعب جداً جداً .. و بيحتاج وقت و تدريب و مجهود .. .. لأن عقلك ( خصوصاً لو إنت ADHD ) .. غالباً عاش تجارب و تفاصيل كتير .. أصبح بسببها حساس جداً تجاه أى فشل جديد .. … عشان كده .. دايماً أى رحلة علاج لحد بيعاني من الADHD .. خصوصاً ال( كبار =Adults ) .. بتبتدي بـشرح مهم جداً لحقيقة مهمة جداً جداً :

إنت مش فسباق .. و إنت مش ( فاشل , كسول , علق , تايه , خايف , غضبان من نفسك , … ) .. .. ببساطة إنت ماكنتش فاهم إزاي عقلك بيشتغل .. لأنك مختلف .. و مش زي الباقيين . .. لكن بمجرد ما يشتغل .. و تعرف تتحكم فيه إزاي .. صدقني .. العالم بيختلف حواليك … بالكامل .

---

لمُرسل الرسالة دي علي صراحة : طبعاً في إحتمال كبير إنك تكون ماعندكش أى إختلاف في تكوينك العصبي .. و إنك تكون مشاكلك دي نتيجة حاجات تانية خالص مالهاش علاقة بال ADHD 😅 . و لكن أعتذر بقي لو كنت إستغليت و إستخدمت رسالتك ك صورة في الإجابة العامة علي باقي الناس اللي بيواجهوا مشاكل مشابهة بسبب الADHD . .. ممكن تبعت لي تفاصيل أكتر لو حابب 😁 .. لينك صراحة في الكومنت الأول.