الدقيقة 89 في الماتش .. و مغلوب 5 - 0

الدقيقة 89 في الماتش .. و مغلوب 5 - 0 .. تعالي إمسك مدرب و حلها .

بقالي فترة طويلة .. كل ما أكتب البوست ده .. أوصل لحد منتصفه .. و بعدين أمسحه .. عملت كده بتاع 4 مرات تقريباً دلوقتي .. و كل مرة .. بيبقي بسبب إني عارف إنه بيضايق ناس كتير مش عايزين يقروا الكلام اللي فيه .. خليني أشرح : .. مشاكل و مواقف كتير من اللي باشوفها حواليا أو علي السوشيال ميديا .. بالاقيها مشابهة جداً لعنوان البوست .. صاحب / صاحبة المشكلة .. بينزل مشكلة غاية في الصعوبة و التعقيد .. و اللي حرفياً بتبقي محتاجة معجزة إلهية عشان تتحل .. و بيطلب من الناس ( أو من فرد معين ) إنه يساعده و يحلله المشكلة . .. بالظبط كأنك بيتعرض عليك إنك تنزل تدرب فريق مغلوب 5- 0 .. في الدقيقة 89 من الماتش .. و المدرب اللي بيعرض عليك كده واقف باصص لك .. منتظر إنك تتصرف بشكل إعجازي عشان تساعده . … أمثلة مشابهة جداً للموضوع ده : …

• زوج / زوجة في علاقة متدمرة مع شريك/شريكة حياته .. و مصايب داخل فيها أهل الطرفين مثلاً .. و مشاكل كبرت علي مدار سنين .. و بيسأل دلوقتي علي حل ” سريع و مباشر و قاطع ” يريح جميع الأطراف !!!! . ..
• إنسان مقتدر جسديا و عنده وقت كتير .. و كان عنده وقت كتير علي مدار السنين .. و قضي سنين بيدور علي حل سريع لمشاكله المادية الصغيرة .. و بيسأل دلوقتي برضو علي حل ” سريع و مباشر و قاطع ” لمشاكله المادية اللي كبرت و كترت !!! . ..
• أب / أم .. ولادهم أو بناتهم وصلوا سن المراهقة ( 12 - 20 سنة يعني ) .. و بدأوا يلاحظوا كتير من التصرفات الغلط و المدمرة .. و بيسألوا دلوقتي .. عن ( اساليب التربية الصحيحة .. و إزاي يتعاملوا مع ولادهم ) !!! ..
• و أمثلة تانية كتير .. … … كل مرة باشوف مشاكل من النوعية دي … بافتكر مدي حماقتي الشخصية في أول سنة ليا في الكلية تقريباً .. إني كنت معتمد إني حافضل فاكر المعلومات و مش محتاج أذاكر زي أيام ثانوي .. و إني لما حاقعد في الإمتحان حابقي أتصرف .. و إني ذكي بما فيه الكفاية إني أقدر أتعامل مع الأسئلة في الإمتحان بمجرد ما أشوفها لأول مرة . .. و لما كنت فعلاً باقعد في الإمتحان .. و أكتشف إن عقلي مش قادر يفتكر أبسط المعلومات .. كنت بافضل أتخيل إن موسيقي تصويرية حماسية حتبدأ تشتغل فجأة ( زي مسلسلات الأنيمي اللي كنت باتفرج عليها ) .. و إني حلاقي عقلي بدأ يفتكر كل حاجة تاني بسهولة .. و أقفل الإمتحان قبل نص الوقت و أطلع جايب إمتياز .. .. طبعاً بلح .. ولا أى حاجة من ده كانت بتحصل .. و شلت مواد كتير .. أوي . … … و دلوقتي .. و بعد أكتر من 13 سنة من أيام الإمتحانات دي .. لقيت إن أكتر الحاجات اللي فعلاً قادر أعتمد عليها فحياتي … هي الحاجات اللي بذلت عليها مجهود ( بمداومة ) .. و ( مثابرة ) .. و ( صبر ) علي مدار سنين و سنين … مش مجرد شهور حتي . .. بالظبط زي الجيم مثلاً و بناء العضلات .. عمرك شفت حد وزنه أوفر أوي … و دخل الجيم و طلع بعدها بأسبوع عامل سكس باك و عضلات ؟! . أو العكس ؟ .. حد جلد علي عضم .. و بعد أسبوع … طلع الشحات مبروك فنفسه ؟! … … … … الفيس قدامك حتلاقيه مليان مشاكل من نوعية معضلات اللحظة الأخيرة دي .. و حتلاقي كومنتات كتير .. أوي .. بتتخانق علي إيه هو نوع الحل اللي المفروض يتعمل في اللحظة الأخيرة دي .. . نصيحتي ليك .. ماتشغلش بالك بكل ده .. طنش .. و لو حياتك فيها مشاكل من النوعية دي … اللي هو خلاص إنت منتظر صفارة النهاية تعلن هزيمتك بشكل فظيع .. أنصحك تسأل نفسك كويس أوي .. إنت كنت بتعمل كل اللي عليك من بداية الماتش أساساً ؟
• ( ذاكرت عشان الإمتحان ؟ , ذاكرت عشان شغل معين ؟ , إتقيت ربنا في علاقتك باللي حواليك ؟ , … ) إنت عملت اللي عليك ؟! .. لو كانت الإجابة أيوا .. و إنك فعلاً شايف إنك عملت كل اللي عليك من بداية الماتش … يبقي نصيحتي ليك هي إنك تحارب لحد آخر لحظة … حتي لو خلاص مافيش أمل .. … …
• لو بتحارب عشان رزق .. و إنت فعلاً سعيت بكل ما أوتيت من قوة و وقت .. يبقي خليك متأكد إن رزقك حييجي .. حتي لو ماجاش علي هيئة فلوس دلوقتي .. ربنا حيرزقك .. و حيرزقك الحكمة إنك تفهم معني رزقك ده بعدين . ..
• لو بتحارب عشان علاقة .. و إنت فعلاً إتقيت ربنا في شريكك في العلاقة دي من أول لحظة .. خليك متأكد من آية معينة .. و إفهمها كويس .. لأنها كتير بتتفهم غلط … اللي هي : ( هَلْ جَزَاءُ الإحْسَانِ إِلا الإحْسَانُ ) ناس كتير للأسف بتستشهد بالآية دي .. و بينتظروا إنهم لما يحسنوا لبشر زيهم .. البشر دول يحسنوا إليهم بالمقابل .. ده مش حقيقي .. و غلط .. ( لأن أكثر الناس دائماً لا يعقلون ) .. و لكن الصح هو إننا بنحسن إلي البشر اللي حوالينا ( و شريكنا في العلاقة ) .. في الله .. و ماتنتظرش من البشر اللي زيك .. إنهم يحسنوا إليك … و لكن تنتظر من الله سبحانه و تعالي .. .. يعني .. علاقتنا بالناس اللي حوالينا .. جزء من واجبتنا و إيماننا و علاقتنا بالله سبحانه و تعالي .. لما بنحسن للي حوالينا .. مش بنحسن ليهم عشانهم .. و عشان مشاعرنا تجاههم … و لكن دايماً بيكون نابع من إيماننا باللي خلقنا و خلقهم .. .. فبالتالي .. دايماً مسئولية أى علاقة في وجهة نظري .. بتقع علي اللي بيفهم الآية دي .. .. يعني لو إنت بتسألني عن ليه دايماً إنت اللي بتقدم تنازلات في علاقتك .. و شايف إنك دايماً مهزوم .. و بتسألني إزاي تبطل تحس بالإنهزامية دي في علاقتك .. حيكون ردي هو : إنك شايف كده لأنك مركز طول الوقت علي علاقتك بالبشري اللي زيك زيه .. و أى علاقة بشرية فقط بالمنظر ده .. مهما بدت مستقرة .. حتوصل لنقطة الإختلال .. إما إختلال في أحد اطراف العلاقة ( إنه يفضل دايماً منهزم و يقبل بده ) .. أو إن الطرف التاني ( يفضل دايماً أناني و يقبل بده ) .. أو إن العلاقة نفسها تنتهي .. … و لكن علاقة قائمة علي إيمان كل طرف ( أو أحد الطرفين ) إنه بيتقي الله و بيحسن لشريكه .. في الله … حتفضل مستمرة مستقرة .. فإذا أحد الطرفين أساء العشرة .. و بدأ يرد علي إحسانك ده .. بتصرفات سيئة مثلاً .. و إستمر فده .. عدم إنتظارك لإحسان منه .. و لكن إيمانك بإن الإحسان من الله سبحانه و تعالي .. حيخليك قادر علي إنك تشوف الصورة بوضوح أكبر بكتير جداً .. و إنك تتعامل معاه بهدوء مش ( بعدوانية لأنك شايف إنه بيحاول يإذيك لأنه كارهك مثلاً ) .. علي عكس رد فعلك لو كنت منتظر دايماً حساب مساوي فوجهة نظرك للي إنت بتقدمه في العلاقة … ... ... و لكن .. لو إنت في الوقت الحالي ماعندكش بقي أى مشاكل .. و عايش حياتك منتظر اللحظة اللي حيتم إختبارك فيها .. عشان تبدأ تتصرف بشكل مثالي .. أحب أحذرك .. إنك ممكن جداً ييجي عليك الوقت اللي فيه تكتب إنت كمان مشكلتك علي الفيس و تطلب حل ” مباشر و سريع و إعجازي ” ليها . … يعني .. …
• لو إنت أب أو أم لطفل لسة بيرضع … إبدأ من دلوقتي إستعد و إفهم و ذاكر … و إعرف كويس جداً الصورة اللي إنت تتمني إنه ينمو و يكبر عليها .. و دورك في تكوينها .. مش تنتظر لحد ما يوصل لسن المراهقة و تبدأ تكتب علي الفيس عن مشاكل عصيانه . ..
• لو إنت لسة مارتبطش … إبدأ إفهم كويس جداً من دلوقتي يعني إيه تتحمل مسئولية علاقة كاملة .. و إنك مش بتقتني مجرد جزء أو إكسسوار في حياتك كان نفسك فيه مثلاً … و لكنك بتبدأ حياة جديدة بالكامل .. فيها عليك من المسئوليات و الواجبات أضعاف ما كان عليك قبل كده .. يعني لو كنت قبل كده مسئول عن سعادة شخصية ليك لوحدك .. بس . إنت دلوقتي لازم تبقي مسئول عن سعادتك .. عشان الطرف التاني في العلاقة مايضايقش لما يشوفك متضايق .. و مسئول كمان عن سعادة الطرف التاني في العلاقة .. و مسئول كمان عن سعادة كل اللي بيأثروا علي سعادة الطرف التاني في العلاقة 😆😅. …
• و لو إنت لسة مافيش عليك مسئوليات مادية كتيرة … او حتي لو كان عليك دلوقتي مسئوليات كبيرة .. إعرف إنك معاك من الوقت و المجهود ما يكفي إنك تبتدي تستثمرهم عشان تحصل علي مقابل مادي . .. و إنك لما بتشتغل دلوقتي و تتعب دلوقتي و تذاكر دلوقتي و تزهق و تتخنق من ملل المذاكرة دلوقتي … إنت بتعمل كل ده .. عشان تبقي مستعد لحاجة معينة مثلاً لسة حتحصل كمان فترة طويلة .. جداً أحياناً … .. و إن كل ثانية إنت حتقضيها بتتعب و تعرق في التمرين … حتوفر عليك دقائق في الماتش من الندم . … … … طول ما إنت بتستني لحد ما يدخل فيك جون .. عشان تكتشف إنك فماتش و تبدأ تدور إزاي تتمرن عشان تلعب عشان إزاي ترجع تاني لنقطة التعادل … طول ما حتفضل تخسر ماتشات .. كتير .. أوي … حضرتك بالفعل في ماتشات كتير دلوقتي ..
• ماتش فلوس .
• ماتش علاقة .
• ماتش تربية .
• ماتش دين .
• … … حاول دايماً إنك تكون متقدم بهدف … عشان تلاقي وقت تحتفل . حاول تذاكر عشان شغل .. حتي لو مادياً مش محتاج دلوقتي . حاول تشتغل علي نفسك .. حتي لو مش في علاقة دلوقتي . حاول تقرا عن التربية .. قبل ما تبقي مشغول بالفلوس عن التربية . و حاول تفهم مكانك في الدنيا .. قبل ما تسيبها و تلاقي إنك خسرت الماتش الأهم فيها . … … و الله أعلم .