شكراً فيسبوك .. شكراً إنترنت

شكراً فيسبوك .. شكراً إنترنت .. … في الرياضة و علوم الإحصاء .. في حاجة إسمها ( سلسلة ماركوف - markov chain) .. بيتم الإعتماد عليها بشكل ضخم فمعظم التكنولوجيا اللى بنستخدمها يومياً دلوقتي .. الآداة الرياضية دي وظيفتها ببساطة .. هي توقع المستقبل .. عن طريق الماضي .. بمعني .. إني باستخدم معلوماتي عن إيه اللى حصل إمبارح و أول إمبارح و الشهر اللى فات و كل ما سبق .. عشان أقدر أتنبأ باللي حيحصل بكرة .. سيادتك مثلاً لما بتيجي تكتب حاجة علي كيبورد موبايلك .. بتلاقيه بيطلع لك إختيارات من الكلمات اللى إنت كتبتها في الماضي .. و بيتنبأ بإنت عايز تكتب إيه .. ده إسمه ( predictive typing - التنبأ بالكتابة يعني ) .. و بيتم عن طريق إستخدام ( سلسلة ماركوف ) .. بطرق كتير تقنية مش حاتكلم عنها دلوقتي . … من شوية الفيسبوك بعت ليا ( ميموري نوتيفيكيشن ) .. اللى بيفكرني بيها ببوستات كنت كتبتها زمان فنفس هذا اليوم .. ( حد فاكر برنامج حدث في مثل هذا اليوم اللى كان بييجي علي القناة التانية الساعة 6 قبل الكارتون ؟!! ) .. ما علينا .. المهم خطر فبالي فجأة .. إني أدخل علي ال ( activity log) بتاعي علي الفيس .. عشان أشوف كل بوستاتي و نشاطي علي الفيس من ساعة ما دخلت عليه من 2007 .. ماكنتش عملت كده من زماااااااان .. أوي .. … فضلت أشوف التغير العقلي و الفكري اللي حصل ليا علي مدار الفترة دي .. و نوعية البوستات اللي كنت باعمل لها شير .. و بعدين بعد ما بدأت أ ( هندس ) التايم لاين بتاعي بنفسي .. و أشير عدد أقل و أقل من البوستات .. مقابل إني أكتب أو أضع محتوي أصلي بنفسي .. و كيفية تفاعلي مع أحداث ال12 سنة الماضية .. بما فيها من أحداث خاصة بيا .. و أحداث محلية و دولية .. … طبعاً مافتحتش كل بوست علي بروفايلي خلال ال12 سنة الماضية .. فتحت فعلاً عدد بسيط نسبياً منهم .. و سبت التاب اللى فاتح فيه اللينك ده .. عشان أرجع له كل شوية علي مدار الأيام القادمة إن شاء الله .. و أكمل مراقبة الماضي بتاعي ده علي الفيس .. … و لكن سبب إني ( باشكر الفيسبوك و الإنترنت ) .. هو إنهم بيدونا قدرة أدق بكتير علي دراسة ماضينا .. أو علي الأقل ( الجزء المدون منه علي النت ) .. و إزاي كنا بنفكر و إزاى كنا بنتفاعل مع العالم .. و ده شيء ماكنش متاح إلا لندرة قليلة من البشر اللى كانت بتقدر تعمل ( journals ) .. أو تكتب مذكراتها بشكل يومي .. و لكن غالبية البشر .. كانوا دايماً بيعتمدوا علي ذاكرتهم عشان يفتكروا ماضيهم .. و ذاكرة الإنسان أبعد ما يكون عن الدقة و العدل .. و دايماً بتورينا صورتنا بشكل متغير علي حسب حالتنا المزاجية و علي حسب نضجنا و وعينا . … بدراستنا لماضينا .. بنقدر بشكل كبير نحدد إتجاهنا في المستقبل .. و نحدد إحنا محتاجين نغير إيه فمكونات حياتنا الحالية .. عشان نتحكم بشكل نسبي فإتجاهنا ده .. و نقود حياتنا تجاه أهدافنا بشكل أفضل .. أو نكتشف إننا أهدافنا نفسها محتاجة تتغير .. أو إننا نعيد إكتشافها من أول و جديد . … زمان .. كانت نسبة قليلة من البشر اللى بتعمل الدراسة دي بشكل مستمر أثناء قعدة مع فنجان قهوة فليلة رايقة مثلاً .. و لكن دلوقتي الإمكانية دي متاحة بشكل أكثر دقة .. و أسهل .. لكتير مننا . … البوست اللى مشيره ده .. كان صديقي @[565024425:2048:Weal Khalil] إفتكره منذ فترة أثناء قراءته لبوست حديث كتبته .. و فضلنا أنا و هو نحاول نفتكر أى تفاصيل منه عشان أعيد شيره .. و للأسف ماتذكرناش في الوقت ده :) . فرحت لما شفته دلوقتي .. … أعتقد بشكل كبير إني لو حاعيد صياغة الأفكار اللي في البوست ده دلوقتي .. مش حاشيل من الأسئلة دي حاجة .. و لكن ممكن أضيف عليهم أسئلة جديدة .. .. و لكن حتي يأتي هذا الوقت .. دعني أشير الذكري دي كما هي :) ..