شوية تمارين إبداع .. التمرين رقم (2)

شوية تمارين إبداع .. التمرين رقم (2) ..

بعنوان : الثورة على ( الولاد الشاطرين يقعدوا ساكتين و مربعين إيديهم ) .

أنا كنت طفل شقى جداً .. جداً .. ماتصدقش اللى يقولك إنى كنت أهدى ولد فى الفصل و دايماً ساكت و مؤدب فنفسى و هادى كدة .. لا .. كنت تعالى إسأل عليا فى البيت .. كنت حاتعرف الحقيقة .. حرفياً ( و ده حقيقى 100% بالمناسبة ) .. كانوا بيلفونى فى الغطا بالليل عشان أبطل حركة و أنام . و مع ذلك .. فى المدرسة .. كنت فعلاً من أكتر الولاد هدوء و سكون .. السبب ببساطة .. إنى لما كنت باسأل فى البيت .. كانوا بيشجعونى أسأل كمان .. و لما كنت باسأل فى المدرسة .. كانوا بيضحكوا عليا و يطنشونى .. فبالتالى .. بطلت أسأل فى المدرسة .. و بقيت باسأل فى البيت بس .. و لما وصلت إعدادى .. إكتشفت إن فى حاجة إسمها مكتبة المدرسة .. و عرفت و إتعلمت إزاى أسأل اللى دايماً بيقدروا يجاوبونى .. الكتب .

*** التمرين رقم (2) :

طلع ورقة و قلم .. و إكتب 5 أسئلة .. أى 5 أسئلة فى المكان اللى حواليك .. بشرط إنك تكون مش عارف إجاباتهم . مثلاً (من أوضة مكتبى هنا ) : “أنا فعلاً ماعرفش إجابات الأسئلة دى ! ” .

1- هو إيه نوع المركب الكيميائى المستخدم فى دهان جدران الأوض ؟! 2- السيراميك بيتصنع إزاى ؟ .. و إزاى بيحطوا النقش المختلف عليه ؟! 3- اللمض الحديثة الموفرة .. كيفية تصنيعها ؟! 4- كيفية تصنيع السجاد و رسم النقوش عليه ؟! 5- المواد المستخدمة فعمل (الماج السحرى ) .. و هل ينفع تطبيقها على إستخدامات تانية ؟! … لاحظ هنا إن الأسئلة دى عامة جداً و أنا لسة مادخلتش فمجالات تانية زى ( الكمبيوتر , الموبايل , جسمى شخصياً , … ) . اللى هو كل مجال منهم فيه ملايين الأسئلة اللى ماعتقدش إنك تعرف إجاباتها . … كرر ده مرتين فى اليوم … الصبح أول ما تقوم .. وبالليل قبل ما تنام

*** السبب :

فمعظم الدراسات اللى ممكن تقراها عن الإبداع .. حتلاقى إن الأطفال بيسجلوا أعلى الدرجات فى الإبداع عن الكبار .. و أحد أهم الأسباب هو إن الطفل بطبعه مدرك إنه … جاهل .. إنه فى حاجات كتيير لسة مايعرفهاش و بيبقى عايز يعرفها .. فبالتالى .. دايماً بيسأل .. و بيسأل .. و بيسأل أكتر .. لكن عند مرحلة معينة .. بيبطل يسأل .. المرحلة دى اللى هى بيكون عدى فيها على :

• أهل عايزينه يقعد ساكت و هادى عشان يريحوا من صداع اليوم .
• مدرس غبى مفكر إن وظيفته هى قراية المنهج بس .
• ناس كبار حواليه بيتريقوا عليه فى حين إنهم هما الجهلة عن ذنب .. مش هو . … فبيبطل الطفل يسأل .. و يتحول لإنسان كبير زيك كده ..

---

الإنسان الكبير ده بقى .. لأنه وهم عقله إنه خلاص كده .. هو خلص كلية أو حتى لو لسة بيدرس .. بيوهم عقله إنه مش محتاج يسأل .. . مش لما أخلص المسئوليات اللى ورايا الأول من (شغل , مذاكرة , … ) نبقى نسأل ؟ أو بعد ( الشغل, المذاكرة , …) الواحد بيبقى عايز يفضى دماغه و مش ناقص يفكر ؟!

أكبر غلط .. لأن ببساطة راحة عقلك دايماً فى إنه يتحرك .. يسأل .. يفكر .. بس لأنك ماستخدمتش العضلة دى بقالك كتير .. فبيتربى خوف إنك تستخدمها .. و بعدين بتنسى خالص .. إنك عندك القدرة إنك بس .. تسأل .

*** لاحظ :

لاحظ إنى ماقلتش دور عالإجابات .. خالص .. بالعكس .. سيبك نفسك كده من غير ما تدور على الإجابة عالنت أو فى الكتب أو تسأل حد .. و شوف لو تقدر ؟ صعب جداً جداً .. لكن إفتكر إنك تكتب أسئلتك دى .. و شوف قد إيه من العالم الضخم اللى حواليك إنت مش شايفه .. بس مفكره مش موجود .. لأنك مابصتش عليه من الأساس .

و الله أعلم .

التمرين رقم (1) .. فى أول كومنت .

و معظم كتاباتى غالباً حتلاقيها هنا : http://eslamosama.com/blog