تحديث : الفيديو ده بارد فيه علي بعض التعليقات المتضايقة

تحديث : الفيديو ده بارد فيه علي بعض التعليقات المتضايقة .. و باشرح وجهة نظري بعض الشيء : https://www.facebook.com/korionx/videos/510704681703583/ … …

هي مشكلة عمو الهندي اللي خدوه و شغلوه راعي للغنم في الصحرا إيه ؟! .. … 1- هل المشكلة إنه طول الوقت كان مش فاهم اللغة و مش عارف يتواصل مع اللي حواليه ؟! . .. هل أغلبنا عارف يتواصل مع اللي حواليه ؟ هل إنت فعلاً فاهم مين بيودي علي فين و منين و ليه معظم الوقت ؟ هل إنت فاهم معظم القرارات المصيرية اللي بتأثر علي حياتك إتاخدت ليه ؟ .. أو مين أخدها ؟! .. أو أخدها فين ؟! 🤣 … 2- هل المشكلة إنه ماكنش لاقي مياه يشرب ؟! .. يعني لو كان متوفر له تلاجة مياه ساقعة طول الوقت براحته .. كانت كده المشكلة إتحلت ؟! ماكنش حيزعل ساعتها ؟ .. و كان حيراعي الغنم بسعادة و هو حاطط شاليمو الكوكاكولا المثلجة فبقه ؟! كان حيتصور جنب كوباية الفرابتشينو الساقعة من ستارباكس و هو بيحلب المعزة ؟! … 3- طيب .. يبقي المشكلة إنه كان واحشه مراته و أمه … صح ؟ .. خلاص .. هاتهم يسكنوا في الخيمة اللي جنبه .. و أقول لك .. تعالي نحل مشكلة التكييف بالمرة .. و بلاش يبقي تكييف في الخيمة و بس .. لا .. كيّف الصحرا كلها يا حاج تكييف مركزي .. و بلطها سيراميك سوبر لوكس .. و بلاش الشمس المزعجة دي .. حط لمض نايلون تدي إضاءة بيضا .. حلو كده ؟! … 4- غالباً برضو لسة في مشاكل .. أصل رعي الغنم مهنة مزعجة جداً .. صح ؟ .. خلاص .. مبروك يا عم ال ” هندي ” .. إنت إترقيت .. و حتلبس بنطلون جبردين لونه بيج علي قميص لبني مكوي .. و جزمة كلاسيك من غير شراب عشان دي الموضة دلوقتي .. و مش بس كده .. لا .. حتحلق كمان .. و تدرّج الجناب و تحدد الدقن .. و حيبقي المسمي الوظيفي بتاعك حاجة من تلات حروف زي ( GMS = Goat Milking Supervisor ) .. يعني ( مشرف حلب المعيز 😅 ) . و حتبطل تشتغل بإيدك .. و حييجي تحتك فريق من ال ( GMs = Goat Milkers ) يشتغلوا هما .. و إنت تشرف عليهم . تمام سيادتك ؟! . … 5- شكلك لسة مش مبسوط .. شكلك لسة متضايق إن ال (Owner = مالك المزرعة ) بييجي كل شوية ينظّر عليك و يطلب منك ( Targets = أهداف وظيفية ) أعلي .. و حاطط لك و للمعيز ( KPIs = Key Performance Indicators ) إنت مش قادر تحققها . .. طيب .. عندي الحل .. أنا حادّيك قرض .. و روح إشتري مزرعة جنبه .. و إبقي إنت ال ( Owner ) الجديد .. و كده إتحلت مشاكلك … صح ؟! . .. غلط .. ببساطة لأنك محتاج عمالة .. ما إنت مش حتعرف تعمل حاجة لوحدك .. و لو عيشت لوحدك حتبقي بتضحي بكل الرفاهية اللي إنت واخدها دي .. رفاهية التكييف و الستارباكس و البنطلون الجبردين البيج و القميص اللبني المكوي .. كل الحاجات دي ليها تمن .. و تمن غالي أوي .. و محتاج إنك تبيع لبن المعيز بتاعتك .. عشان تعرف تشتري لبن متبستر من الهايبرماركت اللي جنب الخيمة .. .. يبقي تعمل إيه ؟! . الحل ساهل .. إنت تعمل إعلان إنك محتاج موظفين .. في جميع المناصب و الدرجات .. من أول ( Junior Goat Milking Associate = مساعد حلب معيز مبتدئ ) .. لحد ( Senior Goat Milking Manager ) . .. و حتلاقي ألف واحد مقدمين عالوظائف .. بالذات من ال ” هنود ” 😅 … … … لو إنت مفكر إن ( العبد - Slave ) هي الصورة الكاريكاتورية اللي كانت بتيجي في الأفلام العربي زمان .. و إنت بينضرب بالكورباج لو جاب لسيّده القهوة من غير وش .. يبقي للأسف إنت مش فاهم كويس يعني إيه ( عبودية ) … علي مدار التاريخ .. و العبودية كانت موجودة .. و ما زالت موجودة لحد يومنا الحالي .. حتي و إن كانت المسميات إتغيرت . .. العبد .. هو اللي مالوش قدرة إنه يقرر أو يتحكم في مصيره أو نفسه . .. و ( إنتزاع ) القدرة دي من البشر .. ممكن بطرق كتيييييييير جداً .. آخر واحدة من الطرق دي بيلجأ لها ال ( سيد ) .. هي ال( إذلال ) و ال ( إجبار ) . .. و أسهل الطرق دي .. و أكثرها نجاح علي مدار التاريخ .. هي إنك ماتحسش أو تفهم أساساً إنك : ( عبد ) . . يعني .. مش دايماً حتلاقي كورباج بينزل علي ضهرك يجبرك إنك تبطل تتعلم حاجة مهمة .. و لكن ممكن جداً بكل سهولة تلاقي الناس بتقول لك إن العلم اللي إنت كنت حتدرسه ده مابقاش بينضاف للمجموع .. تقوم إنت بكل بساطة تبطل تهتم بيه أو تحاول تتعلمه صح !!! .. .. طب إنت كنت فاهم حتتعلمه ليه في الأول ؟! .. طب إنت فاهم المجموع ده إتحدد ليه و إزاي ؟! .. طب إنت أساساً فاهم إنت عايز تعمل إيه في حياتك ؟! .. .. غالباً الإجابات دي كلها .. لا .. .. و غالباً إنت عايش بنفس الطريقة اللي بطل الفيلم عاش بيها بعد فترة .. ك ( معزة ) ضمن ال ( معيز ) .. بيتحرك ضمن ال ( قطيع ) . … … هل الأهرامات وحشة ؟! .. إطلاقاً … دي من عجائب الدنيا السبعة .. دي السياحة .. دي أهم حاجة بعد الجبنة البراميلي .. .. هل كنت تقبل تشتغل في بناءها ؟! هل تقبل إن إبنك يكون من العمال اللي إشتغلوا علي بناءها ؟! هل كنت تحب إنك تحط في السي في بتاعك إنك شلت حجارتها علي ضهرك ؟! . … الأسئلة دي مش هدفها إنك تكره الأهرامات مثلاً .. أبداً .. و لكن هدفها إنك تفكر … هل كان الآلاف و الآلاف اللي إشتغلوا علي بناءها .. كلهم ( هنود ) و مخطوفين في الصحرا ؟! ولا كتير منهم كانوا شايفين إنهم فعلاً باللي بيعملوه ده .. بيرضوا “ربهم ” .. اللي قال لهم : ” مَا أُرِيكُمْ إِلَّا مَا أَرَىٰ وَمَا أَهْدِيكُمْ إِلَّا سَبِيلَ الرَّشَادِ ” … … مفهوم الحرية و العبودية .. مفهوم أساسي و رئيسي و محوري في عقل الإنسان .. و أي قصة أو فيلم أو مسلسل باشوفه بيتعرض للمفهوم ده من قريب أو من بعيد .. بيخليني دايماً أفكر في حالي اليومي و حال البشرية عموماً .. .. هل إنت حر ؟! .. هل فاهم يعني إيه الحرية ؟! .. .. هل كل مشاكلك تتحل لما تشرب مياه ساقعة و تاكل رغيف عيش و تتجوز البنت اللي بتحبها ؟! .. … و الأهم من كل ده .. هل فاهم اللي حواليك ؟! .. ولا بتتكلم جوة عقلك و مع اللي منك لغة … و العالم كله حواليك بيتكلم لغة تانية خااااااااااااااااااااالص ؟! .