هو مين ممكن يعمل إيه فإيه ؟!

هو مين ممكن يعمل إيه فإيه ؟! … الصين طلعت ذكاء إصطناعي ( Deepseek ) جامد فحت التنين و بتكلفة كام مليون أثناء ما أمريكا إنهارت فيها البورصة بمقدار تريليون دولار ( يا تري يجيبوا كام بيتزاية تشيكن رانش دول ؟! 🤣 ) . . و فنفس الأثناء كانت سوريا بيحصل فيها حاجات عشان تشرح عناوينها بس محتاج تفضي نفسك 4 سنين تدرس فيهم تاريخ و جغرافيا علي نضيف . و فنفس ذات الوقت روسيا لسة مثبتة أوكرانيا تحت مطوة قرن غزال ( أو قرن دب قطبي 🤣 ) و ده له تداعيات لا حصر لها علي منظومة الطاقة في أوروبا بالكامل . . منظومة الطاقة فأوروبا بالكامل بتؤثر بشكل مباشر علي شكل الأسواق العالمية .. و جزء ضخم من لعبة ال ( ai ) عموماً مش لعبة برمجة علي قد ما هي لعبة طاقة ( اللي هو حرفياً مش لاقيين كهربا نشغل كروت الشاشة ) .. و عشان كده مايكروسوفت ( اللي هي واخدة open ai تحت حضنها ) بتبني مفاعل نووي خاص بيها ( آه والله العظيم ) . . و فنفس ذات أم اللحظة ترامب ماسك أمريكا مسكة البلطجي اللي عرف إن المنطقة مالهاش كبير و صاحب .. فبدأ يعلي اللعب و الصياعة و يشوف آخر آخره اللي ممكن يجيبه إيه .. فبالتالي معظم حركات الأسواق ( الفلوس يعني ) الأمريكية بقت بتتمرجح مرجحة ماحصلتش من بتاع حاجة و عشرين سنة ( من أيام البرجين إياهم 🤣) . المرجحة دي يعني إيه ؟! يعني ماينفعش يسيب البلد و يمشي .. لأنه بيبيع فيها و لسوقها .. و فنفس الوقت مش عارف يفهم هو بكرة الدنيا ماشية إزاي .. فمش عارف يحدد توقعات للأربع ( ال quarters ) يعني .. فبالتالي معظم مجالس إدارات الشركات دي = boards .. مش عارفين هما كمان يرموا فلوس في أنهي إستثمارات . ( ال5 سطور اللي فاتوا دول هما تلخيص بالحلمنتيشي للمحرك الرئيسي للفلوس العالمية و البورصة و الهري ده كله ) . . و فنفس ذات اللحظة .. و علي كرسي جيمينج أثير .. و أمامي كباية شاي ( فيها كيسين عشان يتقل ) بالزعفران و القرنفل .. أجلس أنا و كل اللي فات ده و أكتر بكتير بيدور في عقلي .. و لكن .. في الخلفية عقلي مشغل ( رمضان جانا ) لسيد مكاوي ( repeat ) .. و قاعد بافكر .. . يا تري يا هل تري .. اللي فات ده كله ( بما فيها أغنية رمضان جانا ) .. من منظوري الإسلامي اللي معتنق تمام الإعتناق الآية 32 في سورة الأنعام . ﴿ وَمَا الْحَيَاةُ الدُّنْيَا إِلَّا لَعِبٌ وَلَهْوٌ ۖ وَلَلدَّارُ الْآخِرَةُ خَيْرٌ لِّلَّذِينَ يَتَّقُونَ ۗ أَفَلَا تَعْقِلُونَ﴾ محله إيه من الإعراب ؟! . … … أحد أكبر أسباب كتابتي للكلام ده .. هو كمية التعليقات ( اللي مليانة شتائم ) علي البوست قبل اللي فات مباشرة ( بتاع أفكاري عن فيلم الهوي سلطان ) . . اللي هو كل بتاع 15 تعليق بيشتم مثلاً .. بتلاقي حد إبن حلال داخل يقول كلمتين كويسين أو يشكر في الكلام 🤣 . . أنا ماعنديش مشكلة مع النسبة دي إطلاقاً .. بل إني أخاف والله لو كتبت حاجة و لقيت إن ” أكثر الناس ” متفقة معايا أو بتمدح فيا .. ** ك قاعدة عامة .. حاول دايماً تبعد عن ” أكثر الناس ” .. و لو مش فاهم ليه .. ممكن أشرح ده بعدين . . لكن اللي بيثير تفكيري دايماً هو .. هل ” أكثر الناس ” بتفكر أو عندها علم باللي بيحصل في العالم ؟! . و مش بس باللي بيحصل في العالم دلوقتي .. لا .. باللي بيحصل في العالم علي مدار التاريخ .. و باللي هو أكبر من العالم ( الكرة الأرضية يعني ) .. اللي هو النفس البشرية عموماً .. ** النفس البشرية أكبر من الكرة الأرضية .. لأن الكرة الأرضية محدودة بالحياة الدنيا .. و لكن النفس منتهاها إلي الآخرة ( و الآخرة خير و أبقي ) .. . هل ” أكثر الناس ” بتفكر في : مين المفروض يعمل إيه في كل اللي فوق و اللي حصل و اللي بيحصل ؟! . . و لا الحياة هي الكام لٌقمة اللي حناكلها .. عالكام نومة اللي حننامها .. عالكام عملة اللي حنستخدمها و نشتري بيها .. عالكام جيم بلايستيشن اللي حنلعبه .. و شكراً علي كده خلاص ؟! … … الكلام ده كله عشان أكتبه .. و مش بس أكتبه .. لا .. عشان أفكر فيه عموماً .. باحتاج أكون رايق .. و شبعان .. و مش مزنوق عشان أدخل الحمام .. و مش منزعج من أصوات بتضايقني .. و مش خايف من عدم إستقرار أو عدم أمان أكيد .. و مش خايف النور يقطع عليا .. أو النت يفصل فجأة .. . أنا فاهم ده .. فاهم كويس جداً إن كلامي ده مستفز جداً لأغلب اللي ممكن يقرأوه .. لأن ( و بناءاً علي الإحصائيات ) أغلب اللي حيقروا كلامي في المنطقة دي من العالم .. أقصي أحلامهم هي ال ( إنسانية و الأمان ) . . ضغط الشغل و الضغوط المادية اللي عليهم مابتديش لهم رفاهية يشوفوا أي أخبار بالليل أو تديلهم مساحة يفكروا فيها .. كل اللي بيتمنوه علي آخر اليوم هو وجبة سخنة .. و قعدة سهلة .. و نومة مُريحة . . بيصحوا من النوم مافيش وقت يفكروا فيه .. لازم يلحقوا .. يلحقوا دراستهم , يلحقوا شغل , يلحقوا يجروا , يلحقوا يكونوا نفسهم , يلحقوا يتجوزوا , يلحقوا يخلفوا , يلحقوا يكفوا العيال , يلحقوا يجوزوا العيال , يلحقوا يستريحوا من زن أحفادهم .. يلحقوا يستمتعوا لهم يومين قبل وفاتهم . … … طيب .. مين بقي اللي حيشوف الكلام اللي فوق ده إذن ؟! لما هو مافيش حد فاضي يقرا .. لما هو مافيش حد فاضي يفكر .. لما هو مافيش حد فاضي .. يختلف .. . مين ممكن يعمل أى حاجة فأى حاجة تغير أى حاجة ؟! . … … من أكبر الأساطير اللي كتير مصدقين فيها .. هي أسطورة ( باتمان = الرجل الوطواط 🤣 ) . و ماقصدش هنا إن في ناس مصدقين إنه موجود .. لا .. أقصد إن في ناس مصدقين إن ممكن يتواجد حاجة كده .. . شخص يمتلك من موارد الدنيا دي ( فلوس و نفوذ ) ما يجعله قادر علي تغيير أى شيء بنفسه .. لوحده .. ( و معاه ألفريد طبعاً 😅 ) . . الحقيقة هي إن أى حد بدأ يشوف منظر الفلوس في العالم الحقيقي و يفهم تحركاتها .. حيفهم بكل سهولة و بساطة كم القيود و السلاسل اللي مقترنة بكل مليم أحمر تظن إنه فجيبك . . اللي هو باتمان مايقدرش يكون ( باتمان ) .. إلا لو كان فعلاً مكان ترامب ذات نفسه حالياً .. و لكن حتي لما يوصل لده .. مش حيلاقي وقت يلبس الكوسبلاي ( الزي بتاعه يعني 😅 ) .. و حيبقي مضطر يصارع قيود و سلاسل كتير مختفية ورا الكواليس . . لكن تصدير الأسطورة دي ( إن الفلوس اللي عند باتمان ) ممكن تؤدي فعلاً لتغيير ما .. مهم جداً جداً عشان القيود تفضل مستمرة .. . أصلك لو رابط حد بسلاسل و مكتفة تكتيفة صح .. أفضل طريقة تضمن إنه يفضل متكتف .. هي إنك توهمه إن المفتاح للسلاسل اللي عليه في حتة معينة .. فيفضل باصص لها .. بيتمني يوصلها .. بيقرب لها جداً .. لكن كل ما يقرب و يبقي خلاص حاسس إنه حيوصل .. تبعده عنها تاني .. لكن ماتخليهوش يفقد الأمل .. عشان مايبدأش يدور في مكان تاني .. لأنه لو بدأ يدور فأى مكان تاني .. مش حيلاقي مفتاح واحد للسلاسل اللي عليه .. ده حيلاقي السلاسل بتتفك لوحدها .. … … كباية الشاي بالزعفران و القرنفل بدأت تخلص .. و فآخر الكباية عقلي دايماً بيسأل نفس السؤال بقاله فترة .. . يا تري يا هل تري … لو البعثة النبوية ( سيدنا محمد صلي الله عليه و سلم ) كانت حصلت علي أيامنا دي .. . اللي هو نفترض إن العالم كان مشي زي ما هو .. و إن ربنا كان أجل بعث سيدنا محمد حتي يومنا هذا ( و معه جيله بالكامل من الصحابة رضوان الله عليهم أجمعين ) . . يا تري يا هل تري .. كانوا حيبقوا فين ؟! .. بيعملوا إيه ؟! .. و إزاي ؟! . . و يا تري .. يا هل تري .. إحنا كنا حنبقي بنعمل إيه ؟! .. و فين ؟! .. و إزاي ؟! . … … .. و الله أعلم .