تيخاااااااااااااااااه 😆😆

تيخاااااااااااااااااه 😆😆

(1) : زماااااااااااااااااان .. و أنا صغير ( إبتدائي و إعدادي ) .. كنت باحب العلوم و الرياضة جداً .. و لحد ما دخلت إعدادي هندسة .. كانت كل الصور اللي باتخيلها عن حياتي بعد ال30 .. إني غرقان في علوم الفيزياء و الرياضة و الهندسة .. و إني حيبقي عندي معملي الخاص في بيتي .. و إني حاقضي معظم وقتي باذاكر مسائل رياضية متقدمة . … كبرت .. و أصبح عندي 32 سنة حالياً … و أينعم أنا عندي علم بسيط يوهم أى حد غير متخصص بيتكلم معايا إني فتاك في علوم الرياضة و الفيزياء .. و لكن لو إتكلمت مع أى حد متخصص بعض الشيء ( كمل ماجستير مثلاً في أحد المجالات المتقدمة شوية ) .. حيتضح له إني بطيخة كبيرة جداً .. و مش حيكون كفاية بالنسبة له إني ” شغوف ” بالعلوم دي .. أو ” باتفرج علي فيديو أو إتنين في العلوم دي أسبوعياً ” .. أو ” إني عارف شوية عناوين كتب علي شوية أسامي مؤلفين ” و قريت من كل كتاب فيهم جزء من الملخص مثلاً … كل ده مش حيكون كافي إني أناقش أى حد متخصص .. أو أدرس أو أدي نصيحة لحد بيحاول ” يتخصص ” … لو حاولت .. حيبقي شكلي محرج جداً مع أول سؤال حيتوجه ليا فأساسيات أى مسئلة مثلاً .. و ححاول بكل الأشكال إني أكلفت الموضوع و أتوه اللي قدامي و أدخله فحوارات تانية توهمه إني ” فتاك ” .. بس قدام أى متخصص … حيفهم إني بطيخة .. كبيرة . أنا أصبحت في المجالات الفيزيائية و الرياضية ” للأسف ” .. مجرد هاوي .

(2) : زمااااااااان … في بدايات دراستي للبرمجة في الكلية .. و فآخر سنتين فيها .. حبيت المجال ده جداً .. و إتعلقت بيه .. و بدأت أدرس بشغف كل اللي أقدر عليه من لغات برمجة .. و بعدين بدأت أدرس شبكات ( ccna و ccnp ) .. و بعدين بدأت أحمل بنهم كل الكورسات التقنية اللي أقدر عليها .. و وصلت إني أقدم في شركات كتير علي شغل فمجالات ال(development) .. و كنت في المرحلة دي متخيل إني حياتي بعد ال 30 حابقي مبرمج و مطور مخضرم لا يشق ليا غبار .. و إني حيبقي مهاراتي التقنية حاجة تتحاكي بيها الأجيال في مايكروسوفت و أوراكل و سيسكو و … … كبرت و أصبح عندي 32 سنة .. و إكتشفت علي مدار الزمن إني ماعنديش المؤهلات اللي توصلني إني ” أحترف ” المجال ده .. أينعم أنا عندي علم كافي في مجالات ال(development ) و البرمجة و الشبكات يوهم أى حد غير متخصص إن مارك زاكربيرج بيلجأ ليا لما تقف معاهم مشكلة و الفيس يهنج معاهم مثلاً .. .. لكن لو إتكلمت مع أى حد متخصص بعض الشيء .. و بيكتب كود بمعدل نصف أسبوعي حتي .. حيتضح له إني : برضو بطيخة كبيرة .. اوي .. .. ببساطة أنا عدي عليا أكتر من 4 سنين تقريباً دلوقتي .. كل اللي كتبته من كود بإيدي مش حايعدي 15 سطر بالكتير .. مجرد أوامر بسيطة كل فين و فين باحتاج أدور علي السينتاكس بتاعها عشان أنفذها فحاجة هنا أو هناك .. و لكن كل اللي متبقي فعقلي من علوم البرمجة و الشبكات .. مجرد أشباح عناوين و أساسيات للأسف .. .. و حتي أيام ما كان ده هو كل اللي كنت باعمله فحياتي ( برمجة و شبكات ) .. كان مستوايا برضو أقل من ال ( mediocre = متوسط ) بكتير .. و أحرجت نفسي عدد محترم من المرات في إنترفيوهات في شركات كتير جداً قدمت فيها أيامها .. … حالياً .. في البرمجة و الشبكات .. للأسف برضو .. أصبحت أقل من ” هاوي ” . و أصبح أسهل بالنسبة ليا بمراحل إني أعين ديفيلوبر مختلف لكل مهمة بمرتب .. حتي لو كانت بسيطة .. عن إني أعملها بنفسي .

(3) : الشطرنج .. الفنون القتالية .. اللغة /الثقافة اليابانية .. اليوجا , الرسم .. حتي الحاجات اللي عملت فيها كورسات ( موشن جرافيكس , فوتوشوب , تصميم ثري دي , ميديا , … ) .. حتي الأنيمي و المانجا و ال( pop culture ) .. اللي فوقت من الأوقات كنت شايف إني قاموس متحرك فيهم .. و غيرهم .. … كل الحاجات دي .. فوقت من الأوقات .. كنت شايف إنها حتكون كل حياتي .. و المجال اللي حاكون محترف فيه .. و الحاجة اللي حاوصل فيها لمرحلة ال ( mastery = الأستذة يعني ) . … كبرت و أصبح عندي 32 سنة .. و أينعم .. أنا عندي فكل حاجة من الحاجات دي .. معلومات أو مهارات توهم أى حد غير متخصص فيهم إني فتاك في كل مجال من المجالات دي .. و لكن .. عند اللحظة اللي باقابل فيها أى حد متخصص فأى مجال من المجالات دي .. بيتضح ليه .. و ليا .. إني : بطيخة كبيرة أوي أوي .. … و إني مجرد .. هاوي ..

(4) : أكتر من مكالمة علي مدار الأسبوع اللي فات .. إضطريت أرد فيها علي الطرف اللي كان بيسألني أسئلة ( تقنية نسبياً ) .. بإن معظم الحاجات اللي باعملها عشان شغلي حالياً .. و علي مدار ال4 سنين الأخيرة تقريباً .. أصبح 90% منها ( إدارة) .. مش ( تنفيذ ) .. فبالتالي .. حتي و لو كان عندي العلم التقني اللي يخليني أعرف إجابة سؤاله فين .. حابقي مخادع لو إدعيت إني الأصلح علي الإجابة .. لأني ماوصلتش في الجزء اللي باتسأل فيه لدرجة ال ( تخصص ) اللي تؤهلني للإجابة . .. و حتي في جزء ال( إدارة ) ده .. في مجالات ال( e-commerce و integrated solutions و الميديا ) .. اللي بنشتغل فيهم .. اللي باعمله فيهم .. لا يؤهلني إطلاقاً إني أدعي ال (تخصص ) .. او ال ( أستاذية ) .. و عارف ما يكفي عن مستوايا .. و مستوي ال( أساتذة ) الحقيقيين في المجالات دي .. إني أكون واعي و “راضي ” بمستوي ال ( بطيخة ) اللي أنا فيه حالياً .. لأني عارف إني ماعنديش الشغف بالمجالات دي زي المجالات السابق ذكرها فوق ..

(5) : طيب .. ماذا عن الدين إذن ؟ .. عن إسلامي ؟! أنا إتولدت و إتربيت في بيت مسلم بفضل الله .. ألتزمت بالصلاة كجزء أساسي من حياتي من تانية أو تالتة إبتدائي تقريباً بفضل الله .. حفظت من القرآن اللي كان مفروض علينا في المدارس .. و زودت عليه بعضاً ( قليلاً ) بعد كده في حياتي بالتكرار بفضل الله .. قرأت في العلوم الدينية ( فقه , شريعة , تفسير , عقيدة , حديث , سيرة ,… ) اللي يخليني أبدو لأي حد غير متخصص .. أو ماقراش أو ماحضرش محاضرات أو مادرسش .. إني فاهم و عارف .. و تنين ( بس مش مجنح لسة ) .. … لكن بالنسبة لأى حد فعلاً متخصص .. و درس و قرأ أكتر .. حيبان مباشرة إني بطيخة .. تلاوتي للقرآن مليانة أخطاء .. مقصر جداً و للغاية في دراسة التفسير .. مقصر … جداً .. جداً ..

(6) : حالياً .. و عند المرحلة اللي أنا فيها فحياتي .. فهمت إن مش بالضرورة حلم ( الأستاذية = mastery ) يتحقق في مجال ما أو أكثر .. عشان .. أكون موجود .. ال( أستاذية = mastery) .. كان طول حياتي عامل زي (الشرط =condition ) اللي بافرضه علي أحلامي و تصوري لحياتي عشان أفكر فيها .. .. حالياً .. أنا موجود .. ناجح جداً و متميز بالنسبة لعدد من الناس اللي تعرفني .. تنين مجنح . متوسط جداً بالنسبة لعدد تاني من الناس اللي تعرفني .. إنسان عادي . فاشل بالنسبة لعدد تالت من الناس اللي تعرفني برضو 😅.. بطيخة كبيرة . ماليش وجود أساساً بالنسبة لباقي البشر اللي مايعرفونيش … مجرد رقم فإحصائية 😇 .. لكن .. بالنسبة ليا ..مجرد موجود .. و بطلت أحاسب نفسي ب( ناجح أو متوسط أو فاشل ) .. و بطلت أحط علي نفسي شرط ال ( أستاذية = mastery ) عشان أتخيل نفسي فأى مجال .. … و لكن .. و ده الأهم بالنسبة ليا أعتقد .. إتعلمت ماتوهمش بحد … و إن زي ما ناس موهومين بيا و شايفيني تنين مجنح فمجالات معينة .. و أنا في الحقيقة فيها مجرد بطيخة .. إن ناس كتير جداً من اللي ممكن تتوهم بيهم ( من بوستاتهم .. من كتبهم .. أو حتي من رسائل الدكتوراة بتاعتهم ) .. هما كمان في الحقيقة .. بطيخ .. و مش بالضرورة بطيخ في المجالات اللي هما مش متخصصين فيها .. لا .. دول كتير بيبقوا بطيخ في المجالات اللي هما متخصصين فيها .. ( بطيخ بس معاه phd ) .. … و من أخطر الحاجات علي الإطلاق .. البطيخ دول .. لما يتوهموا هما نفسهم .. و يظنوا نفسهم تنينات مجنحة .. .. لأن ساعتها تأثير كل غبائهم و عيوبهم و آرائهم الغبية الغلط .. بيتم النظر ليها بنضارة الوهم دي .. و بيتم التأثير بيها علي ناس كتير .. اوي .. ناس لسة للأسف مش قادرة توصل لمرحلة الوعي و الإكتفاء بكونها ( موجودة ) .. و بيدوروا لسة علي إزاي يحوزوا علي رضا مديرهم أو رئيسهم أو الشخص اللي هما معجبين بيه .. بيدوروا إنهم ” ينجحوا ” فنظره .. بيخافوا ” يفشلوا ” فنظره .. و بيعيشوا جزء كبير من حياتهم .. عبيد … عبيد .. لنظرة حد ليهم .. … و تكون النتيجة إنهم ( و كتير بعد فوات الأوان ) بيكتشفوا ده .. و بدل ما يفيقوا من عبوديتهم دي .. بيحاولوا يستحوذوا علي عدد أكبر من ( عبيدهم ) هما شخصياً .. .. و يحاولوا يوهموا أكبر عدد من الناس حواليهم ب ( إنهم تنينات مجنحة ) .. و هكذا .. و هكذا .. و هكذا .. … و الله أعلم .