إمبارح شفت فيلم ( Mountainhead ) اللي لسة نازل ..

إمبارح شفت فيلم ( Mountainhead ) اللي لسة نازل .. و حقاً أرشحه .. و بشدة .. جداً .. الفيلم مافيهوش حاجة تتحرق ( ف ماتخافش تقرا البوست قبل ما تشوفه يعني 🤣 ) .. لأنه مش بيحكي قصة .. قد ما هو بيناقش واقع حالي بشكل كاريكاتوري ( بس مش كاريكاتوري أوي يعني ) . … 1- عشان فعلاً تستمتع أوي بالفيلم .. غالباً لازم تكون قاري قصة حياة :

• مارك زاكربيرغ
• إيلون ماسك
• سام ألتمان
• بيتر تييل
• جاك دوروسي

• كام كتاب حلوين مثلاً عن سيليكون فالي … و السياسة الأمريكية خصوصاً و العالمية عموماً … و كام كتاب حلوين في الإقتصاد . … 2- بعد ما تخلص بقي كل اللي فوق ده .. تاخد لك كام غطس حلوين في أحد أكبر الصراعات الحضارية الحالية .. و هي : هو البشر مهمين ولا لا ؟! .. و هل إنت مع الذكاء عموماً ( تبقي حلو و معانا ) .. و لا إنت مع ( الذكاء البشري فقط ) .. و في الحالة دي تبقي عنصري ضد أى أنواع ذكاء تاني 🤣 . … 3- خليني أشرح شوية النقطة اللي فاتت دي بالذات . علي بداية الألفينات كدة .. و مع تطور التكنولوجيا للدرجة إنك بقيت تقدر تشقط من عالمنتديات .. و تبعت صور مبكسلة متصورة بكاميرا عقيمة علي الياهو ماسنجر .. و تلعب كونكرز حتي الصباح الباكر في السايبر . التطور ده أوحي لبعض الناس اللي عملت شوية فلوس حلوين ( زي بيتر تييل اللي كان ضمن مؤسسين بايبال هو و إيلون ماسك و شوية تانيين ) .. أوحي لهم إن المستقبل للذكاء الإصطناعي . . 4- أيامها … كان الذكاء الإصطناعي مجرد فكرة وليدة في شوية ورق بحثي .. مع شوية تصورات نظرية كان المستقبل لسة ماوصلش لها . . 5- و بعدين .. إذ فجأة .. شركة نوكيا تتحول من أجمد شركة موبايلات .. لقصة في كتب التسويق و التنمية البشرية اللي بتتباع ب 3 جنيه و نص عالأرصفة . و يطلع بدالها ثورة ال ( آيفون و الموبايلات الأندرويد ) . . 6- الثورة دي إتسببت في تحول أساسي و خطير في حياة البشرية .. و هو إن عدد ال ( نودز .. إحم أقصد الصور .. إحم .. أقصد المحتوي البشري المتاح مجاناً لأى حد علي الإنترنت ) أصبح ضخم جداً . و المحتوي ده ( الصور و الكتابة و البوستات و الرسايل اللي بتبعتها بعد الساعة 2 بالليل ) .. هو الغذاء المٌفضل لأى برنامج كمبيوتر فيه ريحة ذكاء إصطناعي .. ليه ؟! لأنه بيتدرب عليه ولامؤاخذة . . 7- علي سنة 2010 كده .. كانت الصورة واضحة لأى حد عنده قدرة تخيل بسيطة .. و هي إن الذكاء الإصطناعي جاي بسرعة أوي .. و ده جه خلاص .. اللي هو شات جي بي تي و إخواته .. . و القطر اللي بعده مباشرة إسمه : ال AGI = الذكاء الإصطناعي العام يعني . . 8- طب هو إيه الفرق بين ال AGI … و ال AI العادي بتاعنا اللي إتعودنا عليه خلاص ؟ . فرق بسيط جداً و صغنن خالص .. عشان تتخيله .. إتخيل الفرق اللي بين الموبايل الحالي بتاعك ( اللي بيصور و يغني و بينزل معاك حمام السباحة ) .. و بين الآلة الحاسبة اللي آخرها تضرب أربع أرقام في أربع أرقام .. و أكتر من كده كانت شاشتها بتعلّق . و بعدين إضرب الفرق ده في أعلي رقم تقدر تتخيله . و برضو مش حتبقي إتخيلت الفرق صح . . 9- ليه ؟! لأن ال AGI .. مش مجرد إنه حيربّط شوية كلام فبعضه و يوهمك إنك بتتكلم مع سلمي حايك اللي معجبة ب شعر صدرك لأنك طلبت منه كده .
  لا .. ال AGI ( نظرياً ) .. المفروض إنه حيقدر يقرر إذا كان مُعجب فعلاً ب شعر صدرك أو لا . يقرر بنفسه .. من نفسه … و ياخد قرارات بناءاً علي القرارات دي .. بنفسه و لوحده برضو . . 10- طب و إيه المشكلة ؟! .. إنت واثق في سحر شعر صدرك و قدرته علي إنه يوقّع أى مُزة … يبقي فين المشكلة ؟! . . المشكلة هي إن معايير البشر .. معايير بظرميط . يعني إيه ؟! . يعني .. لو فعلاً في مُزة معينة .. في إيدها إنها تنقذ ملايين من البشر في المستقبل .. فقط مقابل إنها تعيش بعيد عن شعر صدرك و ماتشوفكش تاني .. في الغالب .. حتضحي بحياة ملايين البشر في المستقبل .. و تقرر إنها تعيش بالقرب من شعر صدرك .. . و المصيبة .. هي إن قصة الحب الملزقة دي حتتعمل ملحمة و تتهرس فأفلام و قصص و مسلسلات كتير لمئات السنين بعد كده . . 11- معايير البشر .. معايير هوائية .. بتتبع مشاعر محدودة النظر جداً .. و بتتبع المصلحة المباشرة فقط .. حتي لو علي حساب فناء البشر و الكوكب و محلات الكشري اللي بدقة . التاريخ بالكامل محفور فيه قصص خالدة بتؤكد ده .. . 12- إتخيل بقي .. إن يطلع نوع تاني من أنواع الذكاء .. المُقارب للذكاء البشري في تركيبه .. لاحظ هنا إن الذكاء أنواع كتير جداً .. النباتات أذكية جداً .. جداً جداً جداً .. و لكن ذكاءهم مختلف عن الذكاء البشري .. فبالتالي .. حضارتهم و تراثهم مختلف . نفس الموضوع بالنسبة للحيوانات و أنواعها . . 13- لكن الإنسان .. قرر بغباءه إنه يركز بس علي ( ذكاءه ) إن هو ده نوع الذكاء الوحيد في الكوكب و الكون .. فبالتالي .. الإنسان بيقدس حياته و مصلحته علي حياة و مصلحة كل الكائنات التانية .. حتي لو ماكنش محتاج إنه يفنيهم في سبيل بقاءه .. و لكن بيفنيهم لمجرد ( قدرته علي إفناءهم ) .. زي الصيادين اللي بيصطادوا لمجرد متعة القتل .. أو اللي بيحرق غابات كاملة لمجرد متعة مؤقتة زي ( شوية فلوس زيادة هو مش محتاجها ) . . 14- الذكاء الإصطناعي ( العام ) .. مش حيبقي محتاج فلوس يستمتع بيها .. لأ .. هو حيحسب إحتياجاته الرئيسية ( سيرفرات و كهربا ) .. و حيقدر بكل سهولة يلعب فشوية إستثمارات فصالحه .. لحد ما يكتفي كهربا و سيرفرات ..و بعدين ؟! حيبدأ يخاف علي بقاءه .. من الطفيليات اللي مالية الكوكب اللي إسمهم ( بشر ) .. فبالتالي .. و المتوقع جداً .. هو إن أول أولويات أى ذكاء إصطناعي عام .. هي القضاء علي البشر .. أو تحجيم قدراتهم . . 15 - التسلسل ده مهروس في كل قصص و أفلام الخيال العلمي من التمانينات .. لكن حالياً .. الموضوع أصبح أقرب بكتير من مجرد ( خيال علمي ) . في بدايات الألفينات .. بيتر تييل عمل كذا مؤتمر مشهورين .. و كذا مؤتمر مش مشهورين ( و أخطر بكتير ) عن إقتراب ال ( singularity ) . . 16- هي مين ال ( سينجيولاريتي ) دي ولامؤاخذة ؟! . ده مصطلح ترجمته الحرفية هي : التفرد … ال ( أُحادية ) .. يعني بالحلمنتيشي : إحنا بس و مافيش غيرنا ولامؤاخذة 🤣 . . المصطلح أساساً جاي من عالم الفضاء و الثقوب السودا .. اللي هو لما بيحصل ثقب أسود ( خرم أسود ) .. بيبلع كل حاجة و أى حاجة .. حتي المعلومات نفسها و الضوء .. حتي أطراف الحواوشي اللي مش محشية .. بيبلعها كمان .. فبيبقي إسمه ( حدث تفرد و أحادية الأشياء ) . .. يعني كله بيبقي فبعضه . . 17 - الحدث ده ( السينجيولاريتي ) .. بالنسبة لكتيييييير من معتنقين ديانة الستارت أبس و التكنولوجيا .. هو المشابه لحدث ال ( خلاص ) في الديانات الإبراهيمية .. يعني إحنا مثلاً ك مسلمين .. منتظرين قدوم المهدي .. و المسيخ الدجال .. و علامات الساعة . . الناس اللي هناك .. في سيليكون فالي .. في كتير منهم مؤمن تمام الإيمان إن لحظة ال( سينجيولاريتي ) دي جاية قريب جداً .. و بالتالي .. بيبدأ يستعد لها .. مش بإنه يصلي و يصوم .. و لكن .. بإنه يسرع من حدوثها .. و إن الAI يتطور بسرعة ل AGI .. و بعدين يبدأ ينمو بشكل تسارعي خرافي .. ينتهي بإنه ياكل كل حاجة و أى حاجة ( بالظبط زي الثقب الأسود ) . . 18 - طب ليه ؟! … هو المؤمن بالسينجيولاريتي ده .. مش المفروض مؤمن إن ال AGI حيبتدي شغله بإنه حيقطم أول قطمة من ط$#^ .. إحم .. من مؤخرته الشخصية ؟! .. بالظبط .. هو مؤمن ب ده .. و لكنه برضو مؤمن إن حييجي مع التطور ده القدرة علي إنه يعمل COPY PASTE لدماغه .. و ينقلها علي سيديهاية أو فلاشاية .. أو يرفع دماغه كلها و وعيه علي جوجل درايف 🤣 .. و بالتالي مش حيحتاج ط$@$ إحم .. مؤخرته في حاجة 🤣 … 19- و دراسات حقيقية إتعملت علي المقارنة بين إيمان بعض الأشخاص بالسينجيولاريتي .. و إيمان بعض الأشخاص بالديانات السماوية .. و إكتشفوا إن في تشابه ضخم في نوع العصبية و الإعتناق و التطرف اللي بيوصل لها المؤمنين دول . … 20- يعني من الآخر … الحياة لفت لفت .. و رجعت تاااااااااني عند نفس النقطة .. فكر و عقيدة .. مقابل ل فكر و عقيدة .. و كل إنسان مؤمن ب فكر و عقيدة معينة .. و بيحارب في سبيلها .. و بيبذل في سبيلها كل نفيس و غالي .. رهباً و رغباً و طمعاً . … 21- ف ييجي هنا السؤال الأخير .. هل مضي علي الإنسان حين من الدهر لم يكن فيه عبد ؟! . و الحقيقة هي .. مستحيل .. منطقياً و فيزيائياً مستحيل .. إنت دائماً و أبداً عبد .. و لكنك بتختار تعبد من .. .. 22- في الفيلم الرائع ده ( Mountainhead ) .. الهزؤ و المسخرة و العبيط اللي فيهم .. بيمسكوه رئاسة الأرجنتين 🤣🤣 ك نوع من أنواع تجربة السيطرة علي العالم .. فقط .. لأنهم هما اللي معاهم مفاتيح قوة العالم الحالي اللي إحنا عايشين فيه . … 23- و لكن .. فنفس الفيلم الرائع .. بيوضح لك .. إزاي أبطاله ( اللي هما يعتبروا فعلاً أقوي أشخاص في العالم حالياً ) .. ما زالوا مجرد بشر .. حمقي .. أغبياء .. و الأهم … فانين . … الفيلم رائع .. أنصح بيه .. . و الله أعلم .