المجاري طفحت , و المية إتسممت , و الكهربا قطعت

المجاري طفحت , و المية إتسممت , و الكهربا قطعت , و السكان ماتوا , و المباني ولعت , و الجريمة إنتشرت … و المدينة بتاعتي أعلنت إفلاسها 🤣🤣 … من 3 شهور أو أكتر تقريباً .. أثناء بحثي عن لعبة جديدة علي ال (playstation5) لقيت لعبة إسمها ( Cities skylines) . و بعد مطالعة سريعة لشكل اللعبة و تفاصيلها .. قررت إني أعمل لها داونلود و ألقي عليها نظرة بعدين . بعدين ده ماجاش غير من أسبوع 😅 . بالصدفة لقيت أحد الأصدقاء مشير بوست عن اللعبة , فكرني بيها و إنها بتشغل مساحة علي هارد البلايستيشن المحدود . فقررت إني أعيد إلقاء النظر عليها . … للوهلة الأولي أول ما بتفتح اللعبة و تبتدي فيها من الأول .. تحس إنك تايه و مش عارف أى بلح فأى بتنجان . فكرة اللعبة ببساطة هي إنك : تبني مدينة . من البداية . و بالتدريج جداً .. … و الهدف إنك تكبر المدينة دي .. من عدد سكان بيبتدي من 10 أفراد مثلاً .. لحد ما إنت و شطارتك . بتبدي بإنك تمتلك قطعة أرض مساحتها 2 كيلومتر * 2 كيلومتر .. و معاك 70 ألف دولار . تبدأ بإنك تبني محطة الكهرباء الأساسية .. و بعدين محطة المياة .. و بعدين محطة الصرف .. و بعدين الطرق ( أشكال كتير و أنواع كتير .. من أول الترابي .. لحد الطريق السريع ال8 حارات ) . و بعدين تبدأ تخصص المناطق المسموح بالبناء فيها .. و البناء أنواع ( سكني , تجاري , صناعي ) .. و بعد كده ( لما مدينتك تكبر شوية ) تقدر تخصص أنواع أكتر من البناء ( زي مكاتب مثلاً .. أو أبراج و ناطحات سحاب ) . .. و بعدين لما مدينتك تكبر .. تبقي محتاج تبني خدمات أساسية زي :

• مستشفيات
• مدارس
• مراكز شرطة , و مراكز إطفاء . .. و بعدين لازم تأنتخ مواطنين مدينتك عشان يأنتخوك في دفع الضرايب .
• فتبدأ تبني ملاهي , و جناين , و وسائل ترفيه . و آه إنت أحد أكبر وسائل دخلك هي الضرايب . .. و بعدين تقدر تحدد سياسات مختلفة في مدينتك .. زي :
• سياسة وجود حيوانات أليفة فين .
• سياسة منع التدخين أو السماح به .
• و حاجات و تفاصيل تانية كتير جداً … … … أول مرة دخلت في اللعبة بكتفي ( كالمعتاد بالنسبة ليا ) بدون ما أقرا أى معلومات عنها أو أشوف أى ( tutorials = شروحات ) .. و عملت مدينة وصل عدد سكانها ل500 .. و بعدين أعلنت إفلاسها 😆😆. .. حاولت تاني يوم .. و قررت أصلح أخطائي … و وصل عدد سكان مدينتي ل 1500 .. و أعلنت إفلاسها 🤣🤣🤣 . … علي اليوم التالت .. بقيت خبير فشل😎😎 .. .. أصل شايف كل المعلومات اللي كتبتها فوق دي عن تفاصيل اللعبة .. أنا ماكنتش عرفت أى حاجة عن ده قبل ما أبتدي .. و لا كنت فاهم أى حاجة فأى حاجة أثناء ما حاولت أبني أول مدينتين .. .. و لكن لما فشلت مرة .. و تانية .. و تالتة .. و أكتر .. بدأت أعرف أنا مش عارف إيه ..
• أعرف إن في مباني مش عارف أبنيها .. و مش عارف ليه ..
• أعرف إن في مصايب بتحصل لما أخلي السكان يشربوا مية مجاري .. و عرفت إني مش عارف أظبط الموضوع ده إزاي .
• أعرف إني مش عارف أرتب المباني بتاعتي في المدينة إزاي
• و هكذا . … … فقط عند المرحلة دي .. لجأت ل(يوتيوب) .. و كالمعتاد .. لقيت عدد ضخم من الفيديوهات الممتعة جداً و بتشرح كل شيء بالتفصيل .. و لما شغلت كل فيديو منهم .. أصبح مع كل دقيقة بتحصل لي حالة ال ( آهاااا ) .. يعني حالة ال ( فهمت !!! ) .. .. لأن دماغي كانت إتملت أسئلة علي مدار الأيام اللي فاتت .. و لما شغلت اليوتيوب .. أصبحت مستعد إني أحط الأجوبة فمكانها الصح . … … النهاردة ( و قبل كتابة البوست ده مباشرة ) .. مدينتي الخامسة أعلنت إفلاسها … بعد ما كنت وصلت ل 45,000 ساكن 😎😆. .. و أصبح عندي أنواع أكتر بكتير من الأسئلة .. اللي عمري ما كنت حاعرف إني محتاج إجابات ليها .. غير لو كنت فشلت الفشل ده . … … … اللي فهمته عن عقلي بعد مرور السنين الكتير اللي عشتها .. و بعد العشرات من المهارات اللي حاولت أتعلمها … و العشرات من البرامج و التطبيقات اللي حاولت أشتغل بيها .. هو إن : ( تعلمي للإجابة قبل إدراكي للسؤال … عبارة عن وقت و مجهود مرميين علي الأرض ) . … … يعني : . أنا أفشل الأول .. و بعدين أتعلم إزاي أصلح فشلي ده .. مش أتعلم أبني صح إزاي الأول .. و بعدين أبني .. . بالمنظر ده .. عقلي دايماً بيبقي مستعد يتقبل و يفهم و يستوعب المعلومات اللي بتتشرح ليا و بادرسها . … … فبالتالي .. إجابتي عللي السؤال التاني هي : الموضوع مش نسبة معينة .. لا .. و لكن ترتيب بالنسبة ليا .. أنا باطبق الأول … و بعدين أفشل .. و بعدين أتعلم . . و لو مافشلتش .. أو نجح الموضوع معايا من أول مرة .. يبقي أنا محتاج أطبق أكتر .. و أجرب أكتر .. لحد ما أفشل . . يعني : لو حاتعلم لغة زي ( swift ) مثلاً .. و دي عمري ما فتحت فيها معلومة واحدة من ساعة ما عرفت عنها .. حابتدي بإني أقضي النهاردة بالكامل باحاول أكتب برنامج بسيط جداً بيها .. يكفي إني أحاول أطلع ( hello world) مثلاً .. و لما يطلع عيني و أحس إني بدأت أجيب جاز … بس ساعتها أجرب أفتح فيديو بيشرح أول جزء فيها . … … أما بالنسبة للإجابة علي السؤال الأولاني ( بتاع الإستمرارية ) . .. فالإجابة عليه كانت مشروحة ضمنياً خلال كل اللي كتبته فوق ده .. ألا و هي : البحث عن الفشل الدائم .. و الإعتياد عليه .. و فهم كيفية التعامل معاه . … ببساطة :
• كل مرة تحس إنك فشلت في بناء أو تنفيذ شيء ما .. ده المفروض تحتفل بيه .. إحتفالك يكون بإنك تسأل نفسك .. لو حتعيد العملية من الأول .. حتعمل إيه مختلف ؟! لو إجابتك كانت : حاعمل كل حاجة زي ما عملتها أول مرة .. يبقي إنت لسة مافشلتش صح .. جرب و إفشل تاني .. لحد ما توصل ل : ( مش عارف ) . ( مش عارف أنا باعمل إيه ناقص أو غلطان فإيه ) . بس لما توصل عند المرحلة دي إنت كده فشلت صح فعلاً . . طيب تعمل إيه بعدها ؟ . تبدأ تلف و تبحث فكل مكان و أى مكان عن أى متغير جديد .. معلومة جديدة .. طريقة جديدة .. حاجة جديدة تعملها عشان لما تعيد التجربة .. ماتبقاش مجنون . ( في مقولة مشهورة بيُقال إن أينشتاين هو اللي قالها .. لكن مافيش دليل علي ده .. لكن المقولة حلوة و تنفع هنا : الجنون و الحماقة هي إنك تعيد نفس التجربة بنفس التفاصيل .. و تستني ناتج مختلف ) … طيب فرضاً إنت لفيت الإنترنت بالكامل و جربت كل حاجة و سألت فكل حتة .. و برضو مش عارف إيه جديد ممكن تعمله .. أمثلة شهيرة زي :
• جربت كل طرق الدايت و التمرين .. و برضو مش عارف تخس . أو
• جربت كذا مرة أذاكر إنجليزي .. و برضو مش عارف أدرسه . أو
• جربت كذا مرة الشغل أونلاين .. و ماعرفتش أجيب مليم . … ببساطة كل مثال من الأمثلة اللي فوق دول .. بيشرح بشكل واضح مشكلة ضخمة بيعاني منها اللي بيقولوا الجمل دي .. و هي : مشكلة فهم المشكلة ذاتها .. … يعني : اللي جرب كل طرق الدايت و التمرين و فشل ده .. ده مافشلش في الدايت و التمرين .. لا .. هو أساساً فاهم التمرين و الدايت غلط .. و إنهم حاجات بتتعمل لمدة شهرين و شكراً .. فبالتالي … هو لازم يفهم إنه ( فشله ) الحالي .. ما هو إلا جزء من التجربة الحقيقية … اللي مدتها بتكون علي الأقل سنتين .. لأن الدايت و التمرين دول روتين حياة كاملة .. مش مجرد شهرين و خلاص . .. و بالنسبة للي جرب يذاكر إنجليزي و بيفشل . هو أساساً مش فاهم إن اللغة مش ( بتتذاكر ) … اللغة بتتعاش .. و مافيش حد راح درس لغة .. و قدر يستخدمها كوسيلة تواصل بمهارة .. بدون ما يعيش بيها . فبالتالي .. هو لازم يفهم إن التجربة هنا مش المفروض تكون تجربة ( دراسة ) .. و لكن تجربة ( حياة ) . و عندها بس يقدر يبني التجربة صح . … و بالنسبة للي جرب يشتغل أونلاين و بيفشل . هو غالباً طول الوقت بيحاول يحصد قبل ما يزرع .. و ده مستحيل . الزراعة معناها إنك تبذل وقت و مجهود كتير .. بدون إنتظار عائد .. و لما العائد ييجي .. إنت بتكون قاعد بتبذل وقت و مجهود تانيين أساساً .. . الشغل أونلاين معناه : شغل .. بعد ما تشتغل أونلاين ( و تنفذ شغل , و تاسكات ) كتير .. ساعتها بس تدخل علي التجربة اللي إسمها ( الربح من الشغل أونلاين ) . . لكن الدخول علي مرحلة ال ( ربح ) .. مباشرة . . دي تجربة مستحيلة . … … … خلاصة البوست .. .. طول ما ال (فشل) في ذهنك ليه معني سلبي .. طول ما السؤالين اللي موجودين في الصورة حيفضلوا بلا إجابة . . و الله أعلم .

*** لينك صراحة في أول كومنت