زي ما باعمل أحيان كتير , أثناء ما باتغدي ..

إحلوّت . … زي ما باعمل أحيان كتير , أثناء ما باتغدي .. موبايلي بيكون قدامي و مشغل تيكتوك .. تيكتوك بتاعي من النادر جداً إن يظهر ليا حد بيرقص أو بيغني أو أى هري من اللي ماليه ده .. ( شرحت في بوستات قبل كده إزاي ممكن تعمل ده ) .. تيكتوك بتاعي بفضل الله .. عبارة عن نافذة مفتوحة دايماً علي أحدث ما يحدث في عوالم البيزنس و التكنولوجي و العلوم عامة .. و كثير من أخبار الأنيمي و الجيمز 😅 .. المهم .. ظهر ليا فجأة أكثر من خبر عن ( مايورانا 1 - Majorana 1 ) .. و من إمبارح .. ده التريند اللي أنا عايش فيه … مش مين قتل مين إزاي و الكلام القديم ده 🥹 . … خد نفس عمييييييييييق معايا .. أنا ححاول أشرح بالحلمنتيشية الفصحي قدر المُستطاع .. و ماعقربش الكلام بالتفاصيل التقنية قدر إمكاني . … … زماااااااااااااااااااااااااان .. في علوم إبتدائي .. بعد حصة زراعة البسلة في القطنة المبلولة في علبة الزبادي .. كان في حصة بتتكلم عن صور المادة .. فاكر ؟! اللي هي ( سائل .. أو غاز … أو صلب ) … أكيد فاكر .. صح ؟! . . تمام .. لو كنت ذاكرت شوية و دخلت علمي في ثانوية عامة .. كنت حتتفاجئ إنهم خبوا عليك صورة رابعة من صور المادة .. إسمها : بلازما . مش بلازما الدم .. لا .. . عارف إعلانات الشاشات و التيليفزيونات اللي إنتشرت من 2006 ل 2012 .. كنت تلاقي كل الإعلانات علي التيليفزيونات دي بيقول لك إنه تيليفزيون ( بلازما ) .. أهو ال ( بلازما ) دي بقي كانت حالة المادة اللي بيتم إستخدامها في الشاشات دي .. اللي هي عبارة عن مادة لما ولامؤاخذة تحط الفيشة في الكهربا .. البلازما تهيج .. أقصد يحصلها إثارة .. أقصد تنتعش 🤣😅 .. و تتفاعل و تنور و تديك قناة ميلودي .. العربي أم الأجنبي … فاكر الفترة دي ؟! … … لحد من يومين بقي .. ده كان حال البشرية .. أربع حالات للمادة و كافيين خيرنا شرنا .. .. مايكروسوفت طلعت من يومين .. و قالت مبروك .. بقوا خمسة .. و إنهم عملوا حاجة إسمها ( مايورانا 1 = majorana 1 ) .. دي عبارة عن حالة للمادة .. إسمها ( موصل خارق طوبولوجي = topological superconductor ) .. أو بالحلمنتيشية الفصحي يعني : موصل كهربا سريع فحت أوي .. شكله حلو و راكب علي بعضه . … كلمة ( طوبولجيا = topology ) كلمة ترجمتها غتتة شوية .. لأنها معناها ( أشكال بتركب علي بعضها أو لها خريطة ) .. اللي هو زمان في أولي ثانوي في الجغرافيا .. كان أول فصل في الكتاب كان إسمه ( طوبولوجي ) .. و كنت بتدرس فيه إزاي تقرأ الخريطة و تعرف الجبل من السهل من الهضبة من عمرو دياب ل محمد فؤاد .. فاكر ؟! … المهم .. لأن حالة المادة دي معتمدة علي أشكال الذرات ( أو للأدق الجزيئات المكونة للذرات =subatomic particles ) .. فبالتالي .. و لإستسهال التسمية .. بتتسمي علطول ( toplogical = طوبولوجية ) . … … الحالة الجديدة دي بقي من المادة .. بتعمل إيه بالصلاة علي النبي ؟! .. بتعمل حاجة إسمها ( topological qubits 🤣 ) … أو .. بالحلمنتيشية الفصحي : لمض كهربا ملونة بتنور بالريموت كونترول .. … … بص .. الموبايل أبو شاشة مكسورة و جراب قديم متهالك اللي إنت بتقرا البوست بتاعي ده عليه حالياً .. هو و الكمبيوتر اللي بيهنج لما بتفتح مايكروسوفت وورد عليه .. و غيره من أنواع التكنولوجيا الحالية كلها … كلهم بلا إستثناء بيشتغلوا بحاجة إسمها ( bit - بت ) . .. ال ( bit ) دي .. ببساطة عبارة عن لمبة .. يا تنور .. يا تطفي .. مالهاش وضع تالت .. يا منورة .. تبقي 1 .. يا طافية .. تبقي صفر .. ده اللي إسمه الحساب الثنائي ( binary algebra ) .. و اللي قائم عليه كل علم البرمجة و الكمبيوتر علي مدار القرن اللي فات . … و علي حسب عندك كام مليار ( بت ) .. علي حسب قدرة الكمبيوتر بتاعك .. يعني كل ما كان عندك أكتر .. كل ما كان جهازك أقوي .. و يقدر يعمل حسابات معقدة أكتر . … حسابات معقدة بقي زي إيه ؟! لعبة قوية تلعبها من غير ما جهازك يهنج ؟ … ممكن .. . و لكن في حسابات أقوي و أعقد .. زي : . كل ما له علاقة بالتشفير .. و كلمة سر الفيس اللي نفسك تهكرها لصاحبك 🤣 . كل ما له علاقة بعلوم الجينات .. و لامؤاخذة البروتينات لما تنتني .. لو مش فاهم موضوع البروتينات اللي بتنتني دي ولامؤاخذة .. ممكن أشرحه فبوست تاني .. بس ده حوار كبير معتمد عليه صناعة الأدوية خلال آخر 20 سنة . . و حاجات تانية كتيييييييييييييييييييييير .. الكمبيوتر الحالي بكل قوته و جبروته بيقف قدامها مبلول و عاجز .. … … لكن .. لما أقول لك .. طيب .. بلاش اللمضة أم حالتين دي ( يا تنور يا تطفي ) .. و تعالي خد لمضة جديدة بتنور بالريموت كونترول .. و لها ألوان كمان .. يعني ( Quantum bit = qubit ) .. .. متخيل شغل الكهارب بقي ؟! .. دي حتبقي ديسكو و فرح العمدة .. بالظبط .. .. ليه ؟! .. لأن بدل ما كنت محتاج مليار لمبة عادية مثلاً عشان تحل مسئلة معينة .. ممكن تستخدم 100 لمبة من الجداد بس … عشان تحل مسئلة أعقد منها بكتييييير جداً .. الطريقة اللي ده بيتم بيها .. نوع جديد بالكامل من الرياضة غير ال جبر الثنائي ده .. حاجة إسمها ( Quantum algebra = جبر كمي ) .. … إنت عارف أساساً ( جبر ) يعني إيه ؟! .. … جبر دي كلمة بدعها علماء المسلمين .. و معناها تظبيط .. اللي هو إنت بتظبط المسائل و ( تجبرها ) الله يجبرك .. لحد ما تطلع اللي إنت عايزه . … ال ( كوانتام = quantum ) بقي معناها إيه ؟ . .. معناها إن اللمبة الواحدة ممكن تنور .. أو تطفي .. أو تنور و تطفي فنفس ذات اللحظة .. و مش بس كده .. لأ .. دي ممكن تأثر في اللمض اللي جنبها .. و إنت ليك كل الحرية تتحكم في ده بيحصل إزاي .. . مش باقول لك فرح العمدة ؟.. … … الكوانتام ده .. هي العالم اللي بتتواجد فيها ال ( Subatomic particles = الجزيئات اللي أصغر من الذرة ) .. زي الإلكترونات . . و الإلكترونات دي عشان تتخيلها .. إتخيل البلي اللي كنت بتلعب بيه زمان في الشارع .. و لكن ماتقدرش تمسكه .. كل ما كنت تيجي تمسكه .. يهرب منك و ينط فحتة تانية .. و لما تيجي تبص عليه .. يستخبي منك .. أو تلاقيه غير مكانه !! .. و لو ركزت عليه أوي .. يعمل فيها ميت و مايتحركش ك ( موجة ) .. . بس أنا كده داخل بيك في عالم فيزياء تالتة ثانوي .. و إنت حتهنج مني .. و أنا عايز أنزل أروح الجيم .. … … الخلاصة .. شفت ( the avengers ) ؟! .. لا .. تمام .. روح شوفه .. هو حلو .. المهم .. الكمبيوترات العادية لحد النهاردة كانت زي : أيرون مان .. اللي هو مهما رحت أو جيت .. إنت في الآخر سلكتين و شوية كهربا .. .. اللي مايكروسوفت عملته إمبارح .. هو إن بقي في دكتور سترينج .. اللي هو إنت مش محدود خلاص بحدود إمبارح .. لأ .. بقي في ساحر ممكن حرفياً يحل كل المسائل اللي كنت مفكر إنها مابتتحلش … و لحد من يومين بس .. ده كان مستحيل .. و النهاردة لا 😆 … … و الله أعلم .