سكرين شوت من جوة عقلي حالياً فلحظة صمت أثناء ما

سكرين شوت من جوة عقلي حالياً فلحظة صمت أثناء ما داونلود فيلم ( صمت الحملان - The silence of the lambs ) يخلص لأني مش فاكر إني عمري شفته 😁 … كنت باتغدي إمبارح .. و باسكرول علي التيكتوك سريعاً سريعاً .. و ظهر قدامي فيديو طويل شوية لمتخصص بيشرح ( أنواع العبقرية - Genius types ) .. و بيشرح إزاي إن أحد التعريفات للعبقرية دي هي : ( المعرفة بدون التعلم - Knowing without learning ) . .. مثلاً زي إنك تكون قادر علي عمل عمليات حسابية بسرعة في عقلك بسهولة ( جمع , ضرب , طرح , قسمة ) .. و ده شيء عمري ما كنت شاطر فيه إطلاقاً . . أو إنك تكون قادر علي فهم الأشخاص اللي حواليك و حالتهم المزاجية و النفسية .. و تستخدم ده إما لمصلحتك أو لمصلحتهم ( أحد مكونات الكاريزما ) .. و ده برضو شيء عمري ما كنت شاطر فيه إطلاقاً . … و إن كل إنسان عنده إستعداد لنوع معين من أنواع ال ( عبقرية ) .. أو ما يسمي بال ( Aptitude ) .. و إن أحد أهم عناصر النجاح و السعادة في الحياة .. هي إنك تعرف إنت إيه عبقريتك في إيه .. و تسعي لبناء حياتك و مهاراتك في المجال ده . … … شخصياً .. علي مدار حياتي .. عمري ما إحتجت أبداً أذاكر ( هندسة مستوية ) .. الحاجات اللي زي ( قاعدة فيثاغورس , إقليدس , الزوايا , الأشكال , و غيرها من كل تفاصيل الهندسة المستوية ) .. عمري في حياتي علي مدار إعدادي و ثانوي .. ما إحتجت إني أذاكرها .. إطلاقاً .. … كان يكفي بالنسبة ليا إني أقراها مرة ( أعلم عنها ) في كتاب .. أو أشوف مدرس بيشرح مبادئها لأول مرة .. و ألاقي نفسي قادر علي حل أعقد المسائل الهندسية المتعلقة بيها .. بسهولة .. جداً !. .. اللي كان بياخد وقت بس هو إني أعرف أعبر عن اللي بابقي شايفه في عقلي .. باللغة اللي المفروض أستخدمها ( البراهين الرياضية , و بما أن , و إذن , .. ) . .. و فاكر كويس جداً .. إن علي مدار ثانية ثانوي مثلاً .. كان معظم اللي مقبلين علي إختيار علمي رياضة .. بيتكلموا إن أحد كوابيس علمي رياضة هي ( الهندسة الفراغية ) .. و إنها من أصعب المجالات ,و تتطلب قدرة أسطورية علي التخيل .. .. و حتي يومنا هذا .. أعتقد إن من أسهل المجالات اللي درستها علي الإطلاق كان ( الهندسة الفراغية ) .. و صورها المتطورة اللي درستها في إعدادي هندسة زي ( الوصفية و الرسم الهندسي ) .. . و دي كانت المادة الوحيدة اللي جبت فيها إمتياز في إعدادي هندسة 🤣 . … … بالنسبة ليا .. و من طفولتي .. كنت باقدر بسهولة جداً إتخيل إزاي أى حاجة بتركب في أى حاجة .. و أقدر أشوف تفاصيلها الميكانيكية و الهندسية بكل بساطة . .. النوع ده من الذكاء إسمه ( Spatial intelligence ) . .. و طبعاً لأني ماكنتش أعرف كل الكلام ده زماااااان أيام ما قررت أتخصص في الكلية .. قررت إني أختار أصعب قسم بالنسبة لحد زيي .. اللي هو ( هندسة الإتصالات و الإلكترونيات ) .. و أحد أكبر أسباب إختياري للتخصص ده كان ” والله العظيم قلت كده ساعتها ” : ( أنا كل الأقسام التانية سهل بالنسبة ليا أتعلمها برة الكلية , أنا عايز أتعلم عن أكتر شيء ماعرفش عنه حاجة , و اللي هو كل ما له علاقة بالإلكترونيات و الموجات الكهرومغناطيسية 😆😁 ) . . و طبعاً ده كان من أبعد ما يكون عن مجال ذكائي الطبيعي .. لأنه إطلااااااااقاً ماتقدرش تتخيله ميكانيكياً أو تشوفه جوة عقلك .. .. يعني مثلاً .. إنت سهل إنك تتخيل العالم الثلاثي الأبعاد مكانياً اللي إحنا عايشين فيه .. لكن تقدر تتخيل عملية تعامد رياضي ل 24 بعد مختلفين ؟!! ( زي اللي بتحتاجه إشارات ال 3G للمحمول ) ؟!! . تقدر تتخيل مفاهيم رياضية زي ( تعامد مصفوفات , و لاجرانج , و مفكوك باسكال و فوريير ) ؟!! 😂🤣😂 . . اللي قلته فوق ده شوية تعويذات يفهمها المهندسين فقط ( و مش كل المهندسين كمان .. لا .. ده لازم مهندس دارس رياضيات متقدمة شوية ) . . و حالياً .. أنا بكل تأكيد فاهم التعاويذ دي بشكل أمهر من أى إنسان عادي … لكن إطلاقاً مش أفضل من 99% من المهندسين المتخصصين فيها .. … … المهم .. البوست ده إطلاقاً ماكنش عن الكلام اللي فوق ده والله .. البوست ده بسبب إن في أكثر من فكرة متواجدين في عقلي بقالهم فترة .. و زي ما كنت باعمل و أنا طفل صغنن .. و كنت باقلّب أشلاء لعبي المكسورة و الأجهزة القديمة .. و أشوف إيه ممكن يركب علي إيه .. و يطلع في الآخر شكله إيه .. . علي مدار الأيام اللي فاتت .. عقلي قاعد بيركب الأفكار دي فبعضها .. و باحاول ألاقي لها حالة مستقرة لها بداية و نهاية أقدر أكتبها ك ( بوست ) مفهوم . . الأفكار دي منها :

• بوست منتشر مكتوب فيه ( بدون تريقة , إيه المجال اللي لو إجتهدت فيه لمدة سنة أقدر أعمل مليون جنيه ؟! ) .
• معظم البوستات عن هادية غالب و الهري المنتشر عليها .
• معظم الهري المنتشر عن ( Diddy, beyonce, … ) و غيرهم من اللي بيتفضحوا حالياً .
• مجلة إلكترونية تواصلت معايا مؤخراً لكتابة بروفايل عني لأني ” ناجح ” 🤣😅 .. و المفروض إنهم حينشروه قريباً .. و أنا عندي تحفظات كتييييييير جداً علي مفهوم ال ” نجاح ” في الوعي العام أساساً .
• مشاكل الزواج و العنوسة و الإرتباط في مجتمعنا المصري .
• و طبعاً القاعدة الأساسية اللي الأفكار دي كلها فعقلي بتركب عليها .. أو المحور الأساسي اللي بيدور حواليه تروس الأفكار دي كلها هو : الدين . … … فعقلي .. كل الأفكار دي موجودة كأشكال هندسية ثلاثية الأبعاد .. بتسبح في الفراغ قدام عينيا .. و كلهم ليهم علاقة ببعض .. كلهم واضح جداً فعقلي إزاي راكبين علي بعض .. بالظبط زي مسائل الهندسة بتاعت إعدادي و ثانوي اللي كنت بابقي شايف حلها بكل وضوح و سهولة … و لكن مش عارف أترجمه بسرعة ك ( برهان ) .. . و فأى لحظة صمت بابعد فيها عن المُثيرات العقلية ( جيمز , شغل , مسلسلات أو أفلام باتفرج عليها , حوار مع شخص في شيء ما … ) .. بالاقي عقلي بيكتب عشرات و عشرات البوستات .. . و عند لحظة معينة .. فوران الأفكار الداخلي ده فعقلي بيتفوق في حدته علي حدة المُثيرات الخارجية .. و أبدأ أكتب بوست هنا علي الفيسبوك .. .. و بعد ما أكتب من الأفكار دي ما يكفي .. و أرجع أقراهم .. و أحس إنهم مفهومين نسبياً لأى عقل غير عقلي .. باسأل ثلاث أسئلة مهمين جداً .. 1- هل حد فعلاً حيكون مستفيد من الهري اللي كتبته ده ؟! . 2- هل أنا حاستفيد بأى شكل ( مادي , معنوي , … ) من إن حد يقرأ الهري ده ؟! 3- هل شكل الأفكار دي كده مجتمعة .. مستقر منطقياً ؟! .. ولا حيقعوا مع أول نسمة نقض فكري .. و ألاقي نفسي كنت فقط متوهم إستقرارهم ده في عقلي لوحدي ؟! … … و الله أعلم .