( عن حلالين مشاكل الأسرة , و خبراء العلاقات الزوجية

( عن حلالين مشاكل الأسرة , و خبراء العلاقات الزوجية ) إيه الفرق بين الطباخ و الصيدلي ؟!

الإتنين بيدولك حاجة يا تاكلها يا تشربها ..

• الطباخ بتروح له و إنت عندك رغبة ( في الطعم ) أكتر من الإحتياج ( الجوع ) .
• الصيدلي بتروح له و إنت عندك إحتياج ( للعلاج ) أكتر من الرغبة ( الدوا طعمه مر ) . … علي مدار سنين كتير في التطور البشري .. كان مافيش ( دكتور ) أو ( صيدلي ) .. كان في حاجات تانية زي ( ساحر القبيلة ) , ( وصفات جدتي و جدتك ) , ( حلاق الصحة ) . و لكن .. لأن الأمراض الجسدية واضحة و سهل إنك تلاحظها ( زي رشح عالجلد مثلاً , تغير لون عينين , دم بينزف من أماكن مختلفة , …) .. البشر فهموا سريعاً إن مش معني إن ال ( طباخ ) بيقدم لهم إحساس ممتع .. إنه بالضروري حيبقي مفيد لهم . و علي مدار مئات السنين .. تطور علم قائم علي التجربة و الملاحظة و العدييييييييييد من الإختبارات .. إسمه ( الطب و الصيدلة ) .. و أصبح من النادر إنك تلاقي في مجتمع متقدم و متحضر .. حد بيمارس المهنة دي ( يقول لك تحط إيه في معدتك لما تكون تعبان ) .. غير لما يكون معاه رخصة مزاولة المهنة . … مشاكل النفس و الإجتماع بقي علي الصعيد الآخر .. صعب جداً إنك تلاحظها بسهولة .. يعني مهما كان في واحد بيتألم في مشاعره .. و لكنه مبتسم .. حتلاقي الناس اللي حواليه أغلب الوقت مش عارفين إنه مريض أو تعبان أو عنده مشكلة نفسية ضخمة . .. و عشان كده .. أغلب الناس ( حتي في مجتمعات راقية و متقدمة جداً ) لسة بتتعامل مع المشاكل النفسية .. بنفس الطريقة اللي كان بيتعامل بيها البشر مع المشاكل الجسدية و العضوية قبل مئات السنين .. و بيدوروا علي ال ( طباخ ) .. اللي بيدي لهم طبخة تخليهم يحسوا بإحساس ممتع مريح لفترة قصيرة من الزمن .. حتي لو كان اللي بيقدمه لهم ده .. مميت و قاتل علي المدي البعيد .. .. الطباخ هنا باقصد بيه : كل من تعرض للمشاكل النفسية و الإجتماعية بدون دراسة كافية و بدون ما يكون معاه رخصة مزاولة المهنة . … أقصد بيه :
• صاحبك المثقف اللي بيحب يسمع مشاكل الناس و ينصحهم بحلول من وجهة نظره .
• صاحبتك أم قلب كبير و اللي بتسمع لك و بتحسي بالراحة لما تتكلمي معاها .
• صاحبك علي القهوة اللي سمع قصص كتير جداً , و عنده مثال و قصة مشابهة لكل مشكلة ممكن تعرضها عليه .
• الإنفلونسر اللي بيكتب كام بوست منهم الديني و منهم الإجتماعي و يبان فاهم في علم النفس لأنه بيحط شوية مصطلحات شافها في شوية فيديوهات علي اليوتيوب .
• الشخص اللي مربي دقن و يبدو عليه بعض مظاهر التدين و بيستشهد في بعض كلامه بالقرآن و الحديث .. و لكنه لم يدرس فقه أو شريعة أو أى علم شرعي بشكل منهجي .. و لكنه برضو بيتفرج علي فيديوهات يوتيوب كتير .
• و أمثلة تانية كتير .. و لكن أعتقد إن وجهة نظري وصلت . … الفئات اللي فاتت دول كلهم مجرد ( طباااااااااااخين ) .. ممكن جداً يصادف و الصنف اللي يطبخوه لك يريحك فعلاً .. و لكنك لو سألته عن التركيب الكيميائي للعناصر المكونة للطبخة .. و كيفية تفاعلها مع أسباب المرض جوة جسمك … مش حتلاقي عنده رد .. أو الأخطر .. حتلاقيه بيفتي و يهري بدون علم . … و لكن ممكن ( و ده الأغلب ) .. إنه يتسبب في مصيبة .. و وصفته اللي طبخها لك ( من نصائح و كلام حلو مريح للأعصاب ) يخليك بعد ما تحس إنك مستريح شوية .. تلاقي نفسك بعد كده تعبان أكتر .. و عند مرحلة معينة المسكنات اللي بتحس بيها لما بتتكلم معاه بتبطل تعمل مفعول .. و بتوصل لأسوء سيناريو ممكن تتخيله لمريض . … … ال ( طباخين ) دول .. إطلاقاً مش أشرار .. مش ناس عايزة تإذيك .. بالعكس .. معظمهم نواياه طيبة و كويسة .. و لكنهم هما كمان مريضين بمرض خطيييييييير جداً .. و هو ( حب الإعجاب بالنفس ) . … اللي هو لما تقعد كده و تحس إن حد بيشتكي لك من حاله .. و بيحكي لك تفاصيل معاناته و مشكلته .. و تبدأ إنت تقول ( هممممم ) كل شوية .. و ( سامعك ) … و ( كمل ) .. و بعدين تبتسم إبتسامة المحنك الواثق من نفسه .. و تدي له ( طبخة ) من النصايح و الحكم و الكلام اللي عقلك قاعد بيطبخه ..

ده بيديلك إحساس (إبن $%@#) بإنك جامد أوي .. و إنك بتحل مشاكل البشر .. و إنك بتعمل خير .. و إنك و إنك و إنك ..

الإحساس ( إبن ال@$%@#) .. إحساس بيسبب الإدمان .. لأن ( حب الإعجاب بالنفس ) ده .. هو أبو و أكبر الخطايا .. دي الخطيئة الأشهر في معلوماتنا عن ( إبليس = الشيطان ) .. و هي ( إعجابه بنفسه ) . … … و للأسف .. أغلب الوقت .. الإتنين بيكونوا ضحايا .. الطباخ .. و اللي بياكل الطبخة .. و بعد عدد من الضحايا اللي بياكلوا أكلة ( الطباخ النفسي ) ده .. إما الطباخ بيدرك فاجعة اللي إرتكبه .. و يعيش في ندم .. أو يعاند .. و يعيش في كبر و عند ( و يكمل في طريق إبليس بالظبط ) . … … الطباخين دول حتلاقيهم في برامج كتيييييييييييير علي التيليفزيون .. حتلاقيهم أكتر بكتير علي الفيسبوك و السوشيال ميديا .. و حتلاقيهم وسط إصحابك .. . رجاااااااااء .. ماتفهمش كلامي إنك تعيش ماتحكيش .. و ماتفهمش كلامي إنه معناه ماتفضفضش مع إصحابك و تتكلم .. و لكن .. إفهم إن خطر جداً جداً جداً .. تكون بدأت فعلاً تحس بأعراض مرض .. و تروح لطباخ بدل ما تروح لطبيب .. .. مشاكل علاقاتك الزوجية .. مكان الكلام عنها مش مع ( خبير علاقات زوجية و أسرية واخد شهاداته من يوتيوب ) .. مكان الكلام عنها مع الطبيب الدارس المتخصص .. .. لو حاسس بمعاناة حقيقية .. و حاسس إن حياتك أصبح فيها ( إحتياج ) لطبيب نفسي .. مش ( رغبة ) فمجرد إنك تتكلم .. يبقي ماتترددش .. و حاول توصل لطبيب نفسي تتكلم معاه .. … … و رجااااااااااااء مرة أخيرة .. إهرب من نوعية الطباخ الغشيم الغير متخصص اللي مُعجب بنفسه و يلح عليك ” تعالي جرب بس و مش حتندم ” .. أنا باكرههم فعلاً .. …

**** أسباب كتابتي للبوست ده ( مع إني نادراً لما باكتب بوستين في يوم واحد ) : 1- إني لما بابدأ أكتب عن حاجة ليها علاقة بعلم النفس .. بيجيلي رسائل كتير تعرض عليا مشاكل و تطلب مني تقديم حل .. و أنا إطلاقاً مش متخصص .. و عمري ما عايز أكون ( طباخ ) .. أنا باتكلم عن تجربتي بحذر شديد جداً إني ماقدمهاش ك ( طبخة ) أو ( وصفة ) .

2- تكرار و تعدد ال ( طباخين النفسيين ) في العالم قدامي