عن فيلم the platform ..... ( مافيش حرق بالمناسبة )

عن فيلم the platform … ( مافيش حرق بالمناسبة ) .

مراية قاسية الوضوح .. ده هو أول حاجة جات فدماغي أول ما بدأ يبان فكرة الفيلم بالنسبة ليا … في تشابه ضخم بين الفكرة بتاعته و بين فكرة فيلم ( snowpiercer ) اللي نزل سنة 2013 . بس يمكن هنا الموضوع مبسط أكتر .. و فيه تفاصيل فلسفية و تشبيهات مختلفة شوية عن سنوبيرسر . … أنا فعلاً مش عارف أثناء ما باكتب البوست ده .. أنا باكتبه بغرض إيه .. الفيلم مش محتاج إني أعلي عليه .. هو فيه من الروعة ما يكفيه .. و المشكلة اللي بيعرضها الفيلم ( عن حيوانية غرايز النفس البشرية ) .. مشكلة قديمة قدم التاريخ نفسه .. و إزاي إن الحياة عبارة عن مكبس ضخم .. كل ما بيضغط علي الإنسان أكتر .. كل ما بيبان معدنه الأصلي .. هل هو جاهز إنه يضحي بنفسه فسبيل آدميته .. و لا يضحي بغيره فسبيل حيوانيته . … بس الإنفعال و المشاعر اللي بيولدها الفيلم ده جوايا .. خصوصاً مع الأحداث الرائعة اللى بتمر بيها الكرة الأرضية حالياً .. أكتر من إني أحتويها جوة عقلي بدون ما أنفس عنها بشكل ما . … … لحكمة يعلمها الله سبحانه و تعالي .. نزلنا هنا علي الأرض .. خلاص .. إحنا موجودين .. مافيش جدال في ده .. هل حناكل عشان نعيش لبكرة ؟ .. ولا ماناكلش و نموت عشان نطلع من السيستم ده ؟ حناكل قد إيه ؟ حنقسم الأكل بيننا إزاي ؟ .. حنجهز أكل لبكرة إزاي ؟ مين اللي حيقسم ؟ .. و ليه ؟ نعمل إيه في المفجوعين ؟ .. و نعمل إيه في اللي قد يبدو إنهم مالهومش أى قيمة في تجهيز الأكل لبكرة ؟ مش يمكن ليهم فائدة مختلفة .. و يطلع ليهم أهمية فتجهيز الأكل للسنة الجاية مثلاً ؟ طب ده الأكل .. ما بالك بالمسكن ؟ .. و الملبس ؟ .. و الجنس ؟ .. و الذرية ؟ .. و الرفاهيات اللي بتيجي بعد ده ؟ مين حيحكم فإيه … و ليه ؟ .. و إزاي ؟ … خلال ال32 سنة اللي عشتهم لحد دلوقتي .. كل مرة بامشي علي تسلسل الأسئلة ده .. و باكمل معاه .. بالاقي نفسي وصلت لنفس الإجابة : لا إله إلا الله , محمد رسول الله . و ما تنطوي عليه الإجابة دي من شريعة و عقيدة و تفاصيل تحكم كل ما سبق . … و الله أعلم .