فى قصص كده عرفتها فحياتى .. مكتوبة بالجاف .. و

فى قصص كده عرفتها فحياتى .. مكتوبة بالجاف .. و متغلفة .. و معمول منها باك أب فأكتر من صفحة فكتاب حياتى ( كنت باكتب شعر زمان على فكرة :P ) … المهم .. .. الحرب العالمية التانية كانت الطيارات إختراع لسة طالع طازة .. و بريطانيا كان عندهم مشكلة صعبة شوية .. الطيارات بتاعتهم كانت بترجع من الغارات متغربلة و مليانة خروم من ضربات الطلقات و المدافع المضادة .. و لو حاولوا إنهم يصفحوها بمعادن تقيلة و قوية .. وزن الطيارة حيبقى عبئ عليها و مش حتطير أو تناور أو تلعب زى ما هما عايزين .. قالوا خلاص .. نجيب واحد بتاع رياضة يحلها .. راحوا لواحد إسمه “إبراهام والد ” .. ما علينا من تاريخه و قصصه دلوقتى .. الباشمهندس إبراهام قالهم هاتولى فرخ كرتون .. و رسم عليه طيارة .. و قالهم كل طيارة ترجع تعملوا ليها فرخ كرتون زى ده .. و تخرموا عليه أماكن الطلقات اللى فجسم الطيارة .. و بعد ما جمع عدد 100 فرخ تقريباً .. حطهم على بعض .. طلع إن تركيز الطلقات بيكون عند منطقة الديل و الجناحين .. فى حين إن الماتور و المقدمة تقريباً مافيهمش خالص .. راح سائل الجنرالات اللى قاعدين .. إيه رأيكم ؟ قالوله إنت برنس .. كده يبقى كل اللى محتاجينه هو إننا نصفح عند الديل و الجناحين .. و لسة حياخدوا بعضهم و يمشوا .. قالهم إنتوا ولا مؤاخذة مالكوش فيها .. .. ببساطة ال 100 طيارة اللى إحنا درسناهم دول هما ال 100 طيارة اللى رجعم .. من أصل كل الطيارات اللى طلعوا .. ده معناه إن أى طيارة إنضربت فأى مكان غير الديل و الجناحين .. لا مؤاخذة خيشت ( لفظ بريطانى أصيل) .. .. و بالتالى .. إنتوا محتاجين تصفحوا عند الموتور و المقدمة .. و تسيبوا الديل و الجناحين زى ما هما .. … الموضوع ده إسمه Survivorship Bias أو selection bias … سيادتك أى معلومة إنت بتشوفها .. أو بتسمعها .. فأى مكان … لازم تهدى خاااااالص .. و تفكر بشكل counter intuitive يعنى مضاد لحدسك .. يعنى ماتستفتيش فيه قلبك .. و إستفتى عقلك .. بس بعد ما تفكر مش قبل .. حتلاقى إن حقايق كتير من اللى إنت مصدق فيها .. ما هى إلا نتيجة إنك بتحكم على عينة ناقصة جداً من البيانات .. e.g لو قلتلك إن 4 من أصل 5 دكاترة أسنان بيشجعوا على إستخدام المعجون الفلانى .. لازم تتأكد إن ال5 دول نفسهم مش 5 من أصل 100 دكتور بيقولولك إن مافيش فرق … أو إن المعجون التانى هو اللى أحسن .. … كلمة السر فى الباراجراف اللى فات هى : كاونتر إنتويتيف .. الحدس البشرى .. أو الإنتويشن .. اللى هو إنك لما تسأل حد ( ليه؟ ) .. يقولك : عشان كده !! مش دايماً بيطلع صح .. خصوصاً إنه فى آخر 100 سنة .. ناس كتير شغلانتها الأساسية بقت إنها تلعب فأساسات الحدس البشرى ده .. و من أهم الناس دول (بس مش أهمهم ) .. الناس بتوع الماركتنج .. أجدع ناس بتلعب فحدسك ولامؤاخذة .. … و مع ذلك .. حاجات كتير فحدسك ممكن تكون غلط من غير ما حد يلعب فيها .. ده لأسباب تانية كتير ممكن نتكلم عنها بعدين .. … الطريقة الأمثل عشان ماتقعش فى المصيدة اللى الجنرالات دول وقعوا فيها .. هى إنك تقرا كتير .. و تقرا صح .. و تفكر أكتر .. و تتكلم أقل .. أوى .. … أول مرة كنت سمعت القصة دى كانت من 4 سنين تقريباً ف ted talk تانى مرة قريتها ف How Not to Be Wrong: The Power of Mathematical Thinking Book by Jordan Ellenberg جميل .. إقراه