اللى تعامل معايا بشكل شخصى أو لفترة أطول نسبياً من

اللى تعامل معايا بشكل شخصى أو لفترة أطول نسبياً من مجرد التعارف البسيط .. بيتعرف على (عيب-خاصية-ميزة-…) مميزة فيا .. و هى إن غالباً لما يستخدم “إفيه” مشهور أو جملة مشهورة مقتبسة من فيلم أو مسلسل أو مسرحية مشهورة … إلا و يكون ردى عليه هو نظرة مزبهلة خاوية من أى تعبير .. و السبب بسيط .. هو إنى فعلاً قلما لما باكون عارف الإفيه ده أو الجملة دى .. لأنى فأغلب الظن عمرى ما شفت الفيلم أو المسلسل أو المسرحية .. و فى العادة باهرب منهم لو لقيتهم شغالين فأى مكان .. هرب السليم من الأبرص . . بعد تكرار الموقف ده أكتر من مرة .. بيتم النظر لى بنظرة الأجنبى .. اللى مش من هنا .. الخواجة .. اللى كان عايش برا .. . مع إنى مش أجنبى .. و من هنا .. و مش خواجة .. و ماكنتش عايش برا .. . و لكن .. . أحد القصص اللى قريتها فطفولتى هى قصة نهر الجنون .. و بتعتبر من القصص اللى علمت فتكوين شخصيتى .. بلد فيها نهر .. كل من فى البلد بيقوم الصبح يشرب من النهر ..من أكبر كبير .. لأصغر صغير .. فيوم من الأيام النهر إتلوث .. و بقى اللى يشرب منه يتجنن .. كل الناس قامت شربت من النهر .. من أكبر كبير .. لأصغر صغير .. إلا إنسان واحد عادى خالص .. راحت عليه نومة فى اليوم ده .. كل الناس بقت مجنونة و بتتعامل مع بعضها بجنان فبيشوفوا نفسهم عاقلين .. إلا الإنسان العادى ده .. هو الوحيد اللى بقى بالنسبالهم .. مجنون .. يشرب ولا مايشربش ؟ . . كل ما ألقى القصة دى على مسامع حد .. يقوللى .. إنت بقى اللى عاقل و الناس كلها مجانين ؟!! .. ام الغرور يا أخى .. . و أقسم له إن المغزى من القصة مش إنى أقول إنى عاقل إطلاقاً .. و لكن إنى أسأله .. لو إنت مدرك إن النهر ملوث .. و لسة فيك شوية عقل .. حتشرب عشان تتجنن بالكامل .. ولا ؟ . . أعتقد إنى بقالى 14 سنة مابتفرجش على تيليفزيون مصرى أو عربى إطلاقاً .. 14 سنة مابسمعش أى أغنية مصرى أو عربى إطلاقاً .. و لو حصل و شفت أو سمعت .. مش باعلق ولا حتى بالسلب .. لأن القاعدة الذهبية هى : there is no bad publicity > . . مش حاقول إن العالم بيبان مكان أجمل و أعقل بكتير .. و لا إن مثلاً مش حاتحس بحموضة تانى أو إنك لو بطلت إنت كمان حتعرف تطير مثلاً … و لكن .. جرب تقاطع النهر شوية .. و إشرب من أى مكان عالنت أى مشروب تانى … إنت بنفسك حتحس بالفرق