يعنى إيه تاخد " إنشياتيف " ؟!!
يعنى إيه تاخد " إنشياتيف " ؟!!
يعنى إيه تاخد ” إنشياتيف ” ؟!!
لما بدأنا ( Hand-is ) من سنة و نصف تقريباً .. كان التركيز على حاجات كتير .. و ماكنش من ضمنها اللوجو إطلاقاً ..
و بعد مرور الوقت ده .. كان إننا نغير اللوجو أو الفيجوال أيدنتيتى “الهوية البصرية ” فآخر 5 نقط فأولوياتنا و جدول الحاجات اللى محتاجين نعملها ..
و بعدين من ما يقرب من شهر تقريباً .. كنت كتبت إنى بدأت AGENCY ل (هندس) على أبوورك .. و إنى حاتابع الإشراف عليها بنفسى ..
و ناس كتير رائعين كلمونى ..
منهم Ahmed Fawzi و فأول مكالمة تيليفون رجعلى ذكريات كتيير من أيام الميكروكونترول و تالتة و رابعة كلية ..
و إتفقنا إنه تبدأ خطوات إنضمامه لينا هو فريقه ..
..
و بدأوا فعلاً و خدوا خطوات جد فإنهم يبدأوا يقدموا على شغلانات و يحطوا رجليهم على بداية الطريق ..
و بدون أى مقدمات أو ما يبلغونى أو يسألونى …
لقيته باعتلى إعادة تصميم كاملة للوجو و الهوية البصرية .. من تصميم Maher Fayad كإقتراح ..
و كان ردى هو ” واااااااو .. أنا عايز الصايع اللى عمل الشغل ده ”
…
…
فاكر زمااااااااان من أربع سنين تقريباً فأول سيمينار عملته عن الجرافيكس و برامج أدوبى ..
إتكلمت عن مثال ل ( بارتون سميث ) .. الراجل اللى لقى نفسه فاضى فقرر إنه يعيد تصميم الهوية البصرية ل( فيسبوك ) .. و حط التصميم ده على بيهانسه و على reddit .. سنة 2011 ..
و بعد سنتين و هو بيقدم على وظيفة ui designer ففيسبوك .. اللى كان بيختبره عرفه و إفتكره بسبب التصور اللى كان عمله ..
…
كتير فآخر محاضرة فكورساتى اللى ليها علاقة بالتصميم (جرافيك أو فيديو).. لما الناس كانت بتبدأ تسألنى ” و ماذا بعد ؟! ” .. إيه الخطوة اللى بعد كده ؟ …
كنت باشرح لهم ..
كل أسبوع .. إختار أى براند أو شركة .. و عيد تصميماتها !
و حط ده على البورتفوليو بتاعك كمثال على شغلك ..
اللى كان بيكلمنى بعد إنتهاء الكورس بتلات شهور مثلاً .. و يقولى إنه لسة مالقاش شغل .. كنت باسأله .. “عملت إعادة تصميمات ؟! ” …
يقولى ” لا ” ..
أسأله “ليه ؟! ”…
يقولى ” يعنى حاشتغل من غير ما حد يدفعلى فلوس ؟!!!!!” .. إفرض عملت التصميم و عجبهم و سرقوه ؟!!!
…
شغلانات كتير من اللى خدتها .. خدتها لأنى ماستأذنتش قبل ما أعمل الشغل .. و مانتظرتش صاحب الشغلانة إنه يكلمنى قبل ما أعمل ولو جزء من الشغل .. و مافضلتش أسأله 100 سؤال عن الفلوس و التفاصيل و التأمين و …
أنا كتير عملت شغل .. و بابعته .. و معاه رسالة صغننة “لو عجبك حاسبنى :) ” ..
السيستم ده إسمه “honor system” بالمناسبة .. و بيستخدم فأماكن كتير جداً ..
و الطريقة دى بفضل الله أحد الطرق اللى مخليانى مستمر و ناجح كفريلانسر .
…
Maher Fayad
أنا كلمته و شكرته و بلغته إنى حاذكره بالإسم هنا ..
و حاسبته على شغله ” حساب خاص جداً ;) ” ..
أنا معايا مصممين ممتازين فعلاً .. و عندهم خبرة عالية فى الشغل .. بس ماهر دلوقتى أنا بقيت فاكره .. بالإسم ..
و منين ما حيبقى قدامى شغلانة محتاجة حد يعمل تصميم لوجو أو ما شابه ..
تتوقعوا مين اللى حفكر فيه الأول و أفتكره ؟!
…
take initiative
معناها ماتنتظرش الإذن إنك تبقى نفسك ..
…
و الله أعلم .
…
** اللوجو الجديد اللى بالألوان بالمناسبة , و تم بالفعل وضعه على موقع الشركة .
www.hand-is.com