نٌكتة تانية بابا ربنا يحفظه فكّرني بيها من شوية تعقيباً

نٌكتة تانية بابا ربنا يحفظه فكّرني بيها من شوية تعقيباً علي البوست الأخير ( بابا و ماما ربنا يحفظهم بيقروا البوستات اللي باكتبها و التعليقات بالمناسبة ☺️😅 ) … و هي : مجموعة من الأصدقاء اللي حبّوا يبتدوا مشروع مزرعة كتاكيت .. إشتروا 1000 كتكوت .. و حتة أرض كبيرة .. و غرسوا 100 كتكوت أول يوم .. رجليهم في الأرض .. و راسهم لفوق .. و رووا الأرض .. و … ال100 كتكوت ماتوا .. راح واحد منهم قال لهم يا حمير .. الزرع مش كده .. و راح جايب 100 كتكوت تانيين .. و غرسهم راسهم لتحت .. و رجليهم ل فوق .. و رووا الأرض .. و … ال 100 كتكوت ماتوا .. بعد مٌعاناة .. و بعد ما فضل معاهم 100 كتكوت بس .. و لسّة مش عارفين المشكلة فين .. قالوا إحنا حنكلّم قريبنا الخبير المتعلّم اللي عايش برّة و بيحضّر دكتوراة .. و بعد مٌكالمة طويلة .. و بعد ما سمع منهم كل حاجة .. خد نفس عميق .. و تنهّد ثم قال : إبعتولي عينة من التٌربة . 🙂 … في قاعدة منطقية ظريفة بتتعلمها في هندسة .. و خصوصاً الرياضة المٌتقدمة الخاصة بهندسة الإتصالات .. و هي : ( الإرتباط مش معناه السببية = Correlation doesn’t equal causation ) . … البوست اللي فات .. حاولت أشرح فيه الموضوع ده .. و لكن يبدو إني ماقدرتش أوضّح الفكرة كما ينبغي .. خليني أحاول مرّة تانية : … إنت برجك إيه ؟! قول ليا إنت مولود في يوم إيه و شهر إيه .. و حاقول لك تفصيلياً أدق أسرار حياتك و شخصيتك .. اللي إنت تعرفها عن نفسك .. و أسرارك المٌستقبلية اللي إنت كمان ماتعرفهاش . .. هل ده منطقي ؟! بالرغم من عبثية و عدم منطقية موضوع الأبراج ده .. إلا إنه أحد أقدم الأمراض المتأصّلة في الوعي البشري .. و السبب ؟! السبب هو إن الناس بتدوّر علي ( قوالب = patterns = إرتباطات ) فأى شيء و كل شيء … عشان تفسّر أى سؤال ذهنا بيوصل له . .. يعني .. بيطلع حد لابس سلاسل و حاطط كٌحل و ضارب تاتتو .. و يقول لك بثقة ضخمة : ” مش إنت شفت إن كل مرة بترتبط ب حد من برج الجوزاء .. بتحصل مشاكل بينكم و بيفهمك غلط و مايقدرّكش ؟! … و هو ده سبب الحزن اللي في عينيك ” . . تقوم إنت راجع مفكّر في علاقاتك المتعددة الكتيييييييير أوي .. و تكتشف إن فعلاً .. إنت دايماً كنت ضحية في كل علاقاتك ( العاطفية و الأسرية و العملية ) مع اللي من برج الجوزاء . . إذن .. عمو أو طنط اللي لابسين سلاسل و حاطين كٌحل و ضاربين تاتتو .. صح 100% .. 🤣🤣 … كل اللي تعرفهم مؤمنين بعوالم الأبراج .. ف هما ضحايا ل مٌغالطتين منطقيين مشهورين جداً .. الأولي زي ما وضحت هي : الإرتباط مش دايماً معناه السببية .. و مش معني إن حاجات مٌعينة بيتكرر حدوثها مع بعضها .. إن الحاجات دي سبب في حدوث بعضها . . و المٌغالطة التانية هي : الحياد للإنطباعات الدفينة = confirmation bias .. يعني .. لو عندك 100 شك مٌختلفين .. و إتحقق منهم 10 .. بتركّز علي ال10 دول و تزعّق في كل مكان إن كل شكوكك إتحققت تماماً .. و بتنسي ال90% اللي إنت كنت غلط فيهم . … البوست اللي فات .. و اللي حاولت أشرح فيه إن موضوع التحرّش مش فارق فيه إطلاقاً لبس الست أو البنت .. مش معني كلامي إطلاقاً إني باقول بقي إن الست أو البنت تلبس من غير هدوم و تمشي في الشارع .. .. و لكن ده بالظبط زي لمّا أقول لك إن مزرعة الكتاكيت بتاعتك مش حتنجح طول ما إنت بتحاول تزرع الكتاكيت بنفس طريقة زراعة شجر المكرونة .. و مش معني إنك نجحت في زراعة شجر مكرونة سباجيتي .. إن نفس الطريقة حتنجح في زراعة الكتاكيت .. .. مش معني الكلام ده .. إنك تقول ليا : يعني إنت شايف إنّي أعطّش التربة و مارويهاش و ماعتنيش بيها و … ؟!!!! إطلااااااقاً .. … الهمجية .. و التجرّد من الإنسانية .. مرض كل الناس بلا إستثناء عندها إستعداد تتعدي بيه .. و كل واحد له مناعة مٌختلفة عن غيره . . و زي ما في ناس مناعتها ضعيفة جداً .. و بمجرد ما تتواجد في بيئة فيها ناس بتكح .. تلاقيها تاني يوم مزكمّة و محتاجين يركبوا محاليل و بيموتوا من دور برد . . في ناس تانيين .. ممكن ياخدوا دش سٌخن جداً .. و يطلعوا في البلكونة فعز التلج في الهوا من غير هدوم .. و ياخدوا ناس مريضة و عيانين و بتكح بالحضن .. و مع ذلك .. تلاقيهم ولا البلح .. ولا يتأثّروا إطلاقاً .. مش معني كده إنهم مستحيل يمرضوا … لا .. و لكن مناعتهم أقوي نسبياً فقط . . و كل واحد .. له مرحلة .. و بيمرض .. لكن .. في وقاية .. و الوقاية .. خير من العلاج . … الهمجية و التجرّد من الإنسانية .. أسهل طريقة تجهّز بيها إنسان إنه يمرض بيها .. هي بإنك تحطّه في بيئة حرمان .. حرمان من حقه في الأمان .. حرمان من حقه في أساسيات الحياة ( مأكل , مسكن , مشرب , تزاوج , .. ) . . و حتي لو كان هو شخصياً مش محروم .. لكنه ممكن بكل بساطة يصيبه العدوي من المحرومين اللي حواليه .. . و بمجرد ما بيصيبه العدوي .. بيتحول ل إنسان مؤذي .. همجي .. بيستمتع بالغلط .. و بيسعي له .. لأسباب كتير جداً .. غير مجرّد الشهوة الجنسية المباشرة الناتجة عن إثارة من لبس كاشف أو فاضح أو مثير . … و بالتالي .. الخطاب المتكرر مع كل حادثة تحرّش أو إعتداء .. بتاع ( شوف هي لابسة إيه ) . ده خطاب هزلي .. و عبثي .. و بالظبط زي موضوع إنك تحاول تركّب سماعات لضفدعة مقطوع أرجلها الأربعة عشان تسمعك و إنت بتقول لها ( إقفزي ) .. أو إنك تحلل التربة عشان تعرف مزرعة الكتاكيت بتفشل ليه 🤣 . . و مرّة تانية .. قسماً بالله مش معني كلامي إن : إنت قصدك إنك مع إن الضٌفدعة تعيش طرشة ؟! يعني : إنت عايز الأرض تبور و ماتترويش ؟! يعني : إنت مع إن الستّات تمشي في الشارع عرايا ؟! . التلات أسئلة السابقين دول .. بنفس المعني بالظبط . . و لكن .. كلامي معناه : المٌتحرّش مريض و موجود .. و مش معني إن ست أخذت إحتياطاتها و لبست لبس مٌحتشم .. ف المتحرّش ماخترهاش هي ك ضحية .. و اليوم عدّي علي خير .. إن إذن التحرّش مش موجود .. و إن المريض مش خطر و موجود . … أمّا عن الكلام بالشرع عن جزء مٌقتطع بس في القصّة دي ( لبس الأنثي ) .. بدون دراسة و فهم و مٌعالجة وافية و شمولية لطبيعة المٌجتمع اللطيف اللي إحنا فيه .. ظناً إن ( لو تحجبّت النساااااااااااااااااااااااااااااااااااااااااء .. لانتهي الغلاااااااااااااااااااااااااااااااااء ) 😅 . ف ده .. للأسف .. بيؤدي إن ( مرضي .. و ناس مؤذيين جداً جداً ) يستخبّوا في الزحمة .. و يلاقوا مبرر ل أذيتهم .. و يقولوا : شوف هي لابسة إيه … زي لما تسألهم ( الكتاكيت بتموت ليه ؟! ) يقولوا ( شوف الأرض ناشفة إزاي ؟! ) .. أو ( الضٌفدعة اللي من غير رجلين مش بتنط ليه ؟! ) .. يقولوا ( شوف سمعها ضعيف إزاي ؟! ) . … و الله أعلم .