دليلك ل تنجو من الإتهّام بالتحرّش ( فوجهة نظري )

دليلك ل تنجو من الإتهّام بالتحرّش ( فوجهة نظري ) : … معلش .. أنا فعلاً مع ( نصدّق الناجيات ) .. و مع إن لو أى واحدة ست ( مهما كانت لابسة إيه أو شكلها إيه ) فأى وقت إتهمت أى راجل .. إذن هي علي حق .. و الراجل علي خطأ .. و هنا مش بيكون القاعدة ( المتهم برئ حتي تثبت إدانته ) … لا .. القاعدة هنا تكون ( المتهم متهّم .. و مجرم .. و سيء و متحرّش و إبن ستّين في سبعين كمان .. إلي أن تثبت برائته ) . … و ده هنا مش ذنبك إنت ك راجل .. و لكن ذنب مٌجتمع كلنا عارفين كويس ( ك رجال من طفولتنا .. خصوصاً لو مدارس حكومي ) .. مدي إنحطاط المٌنحطّين فيه . … معلش .. أنا عارف إن ده معناه إن أى واحدة ست .. ممكن فأى لحظة تدمّر حياة و مستقبل أى راجل .. أنا عارف .. و فاهم ده .. و عشان كده .. التحرّي وجب .. و لازم تتعلّم تاخد إحتياطاتك عشان لا قدّر الله لو إتعرضت لموقف مشابه .. تكون بعض الظروف فصفّك . … أولاً : الحذر : حاول طول الوقت تخلّي بالك جداً و إنت ماشي .. تكون حذر جداً لو في أى بنات أو ستّات حواليك .. و يٌفضّل ماتمشيش بالليل في شارع لوحدك مافيهوش حد غيرك مثلاً .. أو مافيهوش كاميرات .. و إلا حينها حتبقي عٌرضة لأى واحدة إنها تتهمّك . . ثانياً : تصرّفاتك : حاول لو حصل و تواجدت فمكان زحمة .. طول الوقت تخلّي إيديك ظاهرة و واضحة لكل اللي حواليك .. شبّك صوابعك في بعض قٌدّام وشّك .. و إستأذن بصوت عالي مسموع لكل اللي حواليك .. و إنتظر ثواني .. قبل ما تعدّي بين أى ستّات . . ثالثاً : سٌمعتك : قدر المٌستطاع حاول إن سٌمعتك تشفع لك .. عشان لا قدّر الله لو حصل حاجة . يعني إيه ؟! يعني تخلّي بالك جداً في كلامك مع البنات أو الستّات أونلاين أو في التعليقات و الرسائل علي السوشيال ميديا .. لأنك مش عارف فأى لحظة ممكن أى حد يشوف لك سكرين شوت .. و يتفهم حينها كلامك غلط .. و يبقي دليل إتهام عليك .. ف معلش .. حاول تكون رسمي علي قد ما تقدر .. و ماتشيلش الألقاب نهائي .. و بلاش أى هزار . . رابعاً : لبسك : حاول إن لبسك يكون حماية ليك .. يعني حاول دايماً ماتستخدمش جيوب بنطلونك في الزحمة .. و موبايلك يكون في جيب عالي في قميصك أو الجاكت بتاعك .. أو تمسكه في إيدك فوق فمستوي صدرك . لأن فأى لحظة لا قدّر الله و إنت بتحاول تاخد حاجة من جيب بنطلونك مثلاً .. ممكن إيدك أو جزء من إيدك يكون عٌرضة إن يضايق أى بنت .. . خامساً : بصرك : تخلّي بالك جداً جداً جداً من نظراتك و عينيك بتبص فين و علي إيه .. حاول طول الوقت إنك تغض بصرك عن البنات أو النساء المٌحيطين بيك .. لأن أى كاميرا ممكن ترصد نظرتك .. و يتم ترجمتها علي إنها نظرة حمدي الوزير . . سادساً : ماتخضعش بالقول : إنت مش عارف إنت مين بيحاول يرتّب لك إيه .. ف مهما حد ( تساهل معاك .. ضحّك معاك .. هزّر معاك .. قالت لك كلام حنيّن إنت محتاج جداً تسمعه 😅 .. حسستك بالإهتمام .. مدحتك و فضلت تقول فيك أشعار … ) . معلش .. خلّي ردودك رسمية و مباشرة بدون تجريح .. و إهرب من الموقف .. و إلا ممكن يكون بيتسجّل لك .. و إنت مش عارف النوايا فيها إيه . … القواعد اللي فاتت دي .. مش عشان تقيّد حريتك .. و لكن عشان تكرّمك .. عشان تعزّك و ترفع من شأنك .. و ماتخليش أى حد في قلبه مرض .. يلاقي فرصة أو مبرر إنه يإذيك أو يضايقك .. . فاهم كويس جداً جداً إن ممكن تاخد كل إحتياطاتك .. و برضو حد يتربص لك و يحاول يإذيك .. فاهم كويس جداً جداً إن اللي عايز يإذي .. مش حيفرّق بين راجل واخد إحتياطاته .. و بين راجل مش واخد إحتياطاته إطلاقاً .. و لكن .. علي الأقل تصعّب الأمر شوية علي ذو النفوس المريضة . … فاهم كويس جداً جداً إن في دول كتير في العالم .. ممكن تمشي فيها براحتك علي الآخر .. منزّل إيديك جنبك براحتك .. تدخّل إيديك في جيوب بنطلونك براحتك .. تبص فأى حتة براحتك .. تنزل بالليل من بيتكم و تتحرّك في الشوارع و إنت مش قلقان .. .. ده مش معناه إن المشاكل دي مش موجودة هناك .. بالعكس .. هما عندهم مشاكل تانية أكبر بكتير أحياناً .. . و لكن .. كل مكان … و له مشاكله … و له ظروفه .. و له الإحتياطات اللي المفروض تحاول تلتزم بيها قدر المٌستطاع عشان تبقي عملت اللي عليك .. … فهمت حاجة ؟! معلش .. فهمت فعلاً حاجة ؟! .. ولّا أنا ماوضحتش بما فيه الكفاية ؟! … و الله أعلم .