فوجهة نظري .. عايز تفهم جزء كبير من الحياة الدنيا

فوجهة نظري .. عايز تفهم جزء كبير من الحياة الدنيا ؟ .. بص علي أخبار النهاردة .. ” ماثيو بيري - تشاندلر بينج ” مات النهاردة .. في البانيو بتاعه .. عنده سن 54 سنة .. … بالنسبة لجيلي بالذات ( مواليد التمانينات ) .. مسلسل (friends ) ده كان يُعتبر جزء أساسي في تكوين شخصية الشاب الكووول المُعاصر .. المسلسل نزل من سنة 1994 ل سنة 2004 .. يعني من سن 6 سنين بالنسبة ليا .. ل سن 16 سنة .. يعني ذكريات طفولتي و مراهقتي بالكامل .. … شفت المسلسل كذا مرة .. بالكامل .. و لسنين كتير لما كنت عايش لوحدي .. مجرد تشغيل المسلسل ده علي شاشة ما في الخلفية .. كان بيكون كافي إنه يحسسني بالدفء نسبياً و يملي فراغ وحدتي بكفاءة . و لسنين كتير .. لما كنت باحب أهرب لشيء آمن .. مافيهوش خوف ولا مسئوليات ولا توتر .. كنت باشغل المسلسل ده بالرغم من إني حرفياً حافظه .. أنا فعلاً حافظ المسلسل ده بالمشهد و اللقطة .. … و ده مش أنا لوحدي .. كتير جداً من جيلي في مصر و الوطن العربي و العالم .. عاش نفس الأحاسيس و المشاعر دي مع المسلسل ده .. … جزء كبير جداً من أفكارنا تم تكوينها من المسلسل ده .. و جزء كبير جداً من إعجابي و تعلقي بالمجتمع الأمريكي و الحياة الأمريكية .. بدأ من المسلسل ده .. … و أخدت وقت طويل .. جداً .. لحد ما قدرت أعيد التفكير فكل فكرة و كل شعور حسيت بيهم و أخدتهم من المسلسل ده .. و فهمت قد إيه أذاني و كان بالظبط زي الألوان الصناعية و المواد الحافظة و الدهون المشبعة اللي مليان بيها ال ( fast food ) و البورجر و الشيبسي و البيبسي و غيرهم . … تحليلات فلسفية كتير جداً إتعملت علي مسلسل ( فريندز ) أثناء عرضه و بعد إنتهاءه علي مدار السنين اللي فاتوا .. و إزاي إنه فعلاً أدي لتشوه فكري ضخم في المجتمع الأمريكي ذاته .. فما بالك بتأثيره علي مجتمع مسلم شرقي ؟! .. … إعوجاج فكري ضخم , و خلل عميق جداً في الوعي .. رغبة دفينة بيتم تغذيتها جوة الإنسان بإنه يعتنق الصورة الوهمية اللي في المسلسل دي .. و يعيشها .. سراب دور عليه أجيال و أجيال .. و حاولوا يعيشوه بكل جهد .. وهم حياة الشباب الكووول اللي العلاقات بينهم سهلة , و شغلهم سهل , و مشاكلهم سهلة , و ضحكهم سهل , و عياطهم سهل , و كل شيء و أى شيء سهل . .طالما في آخر اليوم بنتجمع حوالين بيتزا و قهوة . .. كل اللي سعي و جري ورا السراب ده … عاني معاناة ضخمة في حياته .. و ما زالت مستمرة لحد النهاردة .. … و أكبر دليل علي المعاناة دي .. هو ( ماثيو بيري ) نفسه .. حياة مثالية علي شاشة .. مصنوعة .. وهمية .. و لكن معاناة ضخمة مع الإدمان و الإعوجاج الفكري طول حياته .. أدت بيه للموتة دي .. … … و مع ذلك .. مش ده مقصدي من عنوان البوست .. مقصدي أكثر إيلاماً .. … ( ماثيو بيري ) مات .. رجل أبيض أمريكي مليونير عاش من الملذات ما عاش .. و عاش من المجد ما عاش .. و مات عنده 54 سنة .. و مع ذلك .. بوستات و أخبار التعاطف تنهال عليه من الصبح .. مع إن التعاطف و المشاعر دي كلها نتيجة شخصية وهمية .. مكتوبة .. منسوجة .. مصنوعة .. تعاطف و مشاعر ل ( تشاندلر بينج = إسم شخصيته في مسلسل فريندز ) .. و إطلاقاً مش مع شخص عاش حياته بالكامل بالطول و بالعرض .. .. و لكن برضو مش ده المستفذ .. المستفذ هو إن بوستات و أخبار التعاطف دي طالعة من أشخاص ماكتبوش حرف واحد متعاطف مع أطفال ماعاشوش ربع المدة اللي عاشها ماثيو بيري علي الأقل .. أشخاص ماكتبوش ( و الله أعلم هل حسوا أساساً ولا لا ) حرف عن أطفال و شباب ماتوا تحت القصف … مش ماتوا في بانيو حمام بيتهم .. … … عايز تعرف جزء كبير من حقيقة الحياة الدنيا ؟! .. 1- الأغلبية من البشر ( أكثرهم ) لا يعلمون و لا يفقهون .. 2- الأغلبية من البشر .. بيتعاطفوا و بيتأثروا بالوهم .. 3- الأغلبية من البشر .. بيتبعوا اللا شيء و بيعيشوا حياتهم بيجروا ورا سراب . 4- السراب اللي البشر بيجروا وراه ده .. اللي بيوصل منهم له .. بيكتشف اللي إكتشفه ( ماثيو بيرري ) و غيره من اللي وصلوا له .. بيكتشفوا إنه لا شيء .. فارغ .. و بيؤدي بيهم للإدمان و المعاناة و الدمار ده . 5- الحقيقة واضحة رأى العين قدام البشر .. و الأطفال بيموتوا تحت القصف .. و مع ذلك .. ماحدش من الأغلبية دول حيهتم أو يتحرك .. لأنهم متشبعين بالوهم . 6- شاب فلسطيني صدق الله و صدقه الله .. تحت القصف .. تحت الحصار .. حيكون من جواه أسعد و أقوي و أكثر فرحاً .. من ألف ( ماثيو بيرري ) تحت الأضواء الوهمية دي . … … أنا ما زلت حافظ فريندز بالحرف .. للأسف .. حسيت بحزن لما عرفت خبر موت ماثيو بيرري النهاردة .. للأسف .. و للأسف مش لأني مش المفروض أحس بحزن تجاه وفاته .. و لكن لأني لقيت نفسي إتأثرت بده .. أكتر ما إتأثرت بأخبار مئات الأخوة اللي بيتقتلوا يومياً في غزة .. .. اللهم أرني الحق حقاً .. و أرزقني إتباعه .. و أرني الباطل باطلاً .. و أرزقني إجتنابه .