سريعاً عن البرمجة

سريعاً عن البرمجة : من و أنا في الكلية .. و من بدايات تعلمي للبرمجة بمُختلف مجالاتها و أنواع لغاتها .. و أنا عندي مشكلتين .. مزعجين للغاية و جداً و أوي .. هما كالتالي : .. 1- المشكلة الأولي : تربة عقلي خصبة جداً للعقد .. و بتكبر فيه و تبقي معضلات بسرعة أوي .. يعني إيه ؟! . . يعني مثلاً باتعلم لغة جديدة .. و أتحمس لها و أبقي فرحان .. و أنزل كل الأدوات و البرامج و الكورسات اللي محتاجها عشانها .. و أنضف المكتب و أعمل كوباية القهوة المتينة و آخد الدش و أغسل سناني و أشحن موبايلي و أسطر كراستي و أكوي هدومي و أستعد ل 3 ساعات متواصلة ( مش بتوع روبي .. لا 🤣.. بتوع البرمجة ) .. و أبدأ أمشي علي الخطوات زي التوتوريال أو الكورس ما بيقول .. و … و فجأة يحصل إيررور .. أى إيررور بسيط .. حتي لو في تسطيب برنامج معين مثلاً .. أى شيء مختلف عن التسلسل اللي موجود في الكورس أو التوتوريال اللي ماشي عليه .. و عندها .. شكراً .. بابدأ أدخل في ( Downward spiral - دوامة لحد البلاعة يعني ) .. ببساطة باسرح ورا الإيررور ده عشان ألاقي له حل .. أقوم أنسي اللي كنت باعمله من الأساس و أكتشف إني قضيت ساعتين باسطب ( OS - نظام تشغيل ) جديد مثلاً 🤣.. و علي ما أكتشف إني سرحت في سكة تانية خالص .. أكون نسيت أنا كنت عايز أبني إيه أو أتعلم إيه أساساً .. فأتصدم صدمة معتادة فنفسي … و أبص لنفسي في المراية بحسرة و سخرية علي عقلي المُشتت .. و أقفل كل الكلام ده .. و أفتح جيم أو مسلسل أو فيلم جديد أتفرج عليه 🤣 . … 2- المشكلة التانية : عقلي مابيشبعش أسئلة … يعني إيه ؟! . يعني في أى مادة درستها و حبيتها في حياتي من إبتدائي حتي الكلية .. ماكنتش باكتفي بإني أفضل مركز في اللي الأستاذ بيشرحه .. لا .. كنت باسبق بعقلي دايماً .. و ألاقي أسئلة كتيييييييييير بتطلع فدماغي أبقي عايز أسأل فيها طول الوقت .. . و المدرسين اللي شفتهم في حياتي تلات أنواع أساسيين .. نوع قدر يلجّم الحصان الجامح اللي فعقلي ده .. و طوّعه .. و درّبه صح .. و دخلني بيه سباقات كمان 🤣 .. . و نوع كان بيسجن الحصان الجامح ده .. و يحطه فزنزانة .. و يخوفه بكرباج لو حاول يتحرك بأى شكل غير مسموح . . و النوع التالت كان بيسيب الحصان ده يتحرك حر بدون أى قيود أو قواعد أو تدريب .. و يقعد هو علي جنب تحت شجرة يشرب كباية شاي و مايوجعش دماغه 🤣 . النوع الأولاني من المدرسين بتوعي .. ده اللي كان مش مجرد مدرس مادة بيقول كلمتين متدرب عليهم و يخلص حصته و يمشي .. لا .. ده كان برنس و أستاذ و رئيس قسم في مادته أو العلم اللي بيدرّسه .. فبالتالي .. كان عنده القدرة مش إنه بس يجاوب علي أسئلتي .. لا .. ده بيفهم الدماغ اللي وراها .. و يعلمني إزاي أسأل صح .. و مابيخافش من أسئلتي ولا بيزهق منها . دول أنا فاكرهم بالإسم و بادعي لهم لحد النهاردة واحد واحد … بمجرد دخولي الكُلية .. أصبحت العلاقة بيني و بين اللي بيدرس بالنسبة ليا علاقة بعييييييدة أوي .. يعني ماقدرش فوسط المُحاضرة أطلع بين مئات الطلبة أسأل كل شوية .. و علي أيامي .. ماكنش في جروبات واتساب ولا تواصل مُباشر بالمعيد أو الدكتور .. و كان إعتمادي علي مصادر خاصة أتعلم منها .. معناه إني أدور علي كورسات أو كتب ماعرفش أسألها .. و لكن أتوه ورا مصادر مختلفة لحد ما برضو أزهق و أنسي . . فبالتالي ده كان بيعمل ليا نوع من أنواع الشلل .. اللي هو عقلي ينونو عند سؤال معين أثناء ما باتعلم أى حاجة .. و ماعرفش أتخطي السؤال ده .. و يتكون عقده عنده برضو .. و ماتتحلش إلا بعد حين .. و بعد ما ألاقي إجابة السؤال ده صدفة بين عشرات المصادر المختلفة . … … أيام ما كنت في الكُلية و بدايات تعلمي للبرمجة .. ماكنتش لسة أعرف إن المشكلتين دول عبارة عن عرض أساسي و مُباشر لل ( ADHD) .. و إني اللي زيي محتاج طريقة خاصة جداً .. عشان يتعلم مجالات مُعينة زي ال ( برمجة ) .. و إني لو إتعلمت المجال ده بالطريقة الخاصة دي .. أبرع فيها براعة منقطعة النظير و أبقي تنين مجنح .. و إني لو ماتعلمتش بيها .. و حاولت أتعلم بأى طريقة تانية … أفشل فيها فشل منقطع النظير .. و مش بس أفشل .. لأ .. .ده يتكون في عقلي و نفسيتي عقدة تجاهها ممكن تفضل طول العمر . … الطريقة الخاصة دي زماااااااااااااااااااان .. ( اللي هو من سنتين تلاتة ) .. كان من رابع المستحيلات تقدر تعملها بنفسك لنفسك .. . يعني :
من سنتين بالظبط .. لو ماكنتش تعرف أى شيء عن أى شيء عن مجال زي ال ( برمجة ) .. و كانت دماغك زي دماغي ( adhd ) .. حتي لو كنت فهمت الكلام اللي كتبته ده .. و فهمت إنك محتاج طريقة خاصة عشان تتعلم .. كان من المستحيل تطبقها علي نفسك بنفسك لوحدك .. كان دايماً محتاج معاك حد متخصص هو اللي لازم يعلمك و يتابع معاك و يكون ( مُدرس خصوصي ) لك . .. لأن الطريقة دي مُعتمدة علي 3 محاور رئيسية .. هي : . أ- لازم يكون فاهم ( Gamification ) ده اللي هو يطبق عليك نفس اللي بتحس بيه جوة أى لعبة .. يعني يقدم لك مشاكل عشان تحلها .. و تكون مش صعبة لدرجة إنك تيأس و تزهق .. أو سهلة لدرجة إنك تزهق و تمل . و كل ما تحل مشكلة .. تحس بإنجاز و دوبامين .. و تشوف مدي التقدم بتاعك ك ( مستويات ) في اللعبة وصل قد إيه . . ب - لازم يكون ملازمك طول وقت تعليمك .. عشان مايسيبكش تتسوح مع أى سؤال يظهر فعقلك .. فبمجرد ما عقلك يطلع فيه سؤال .. يتعامل معاه مباشرة بالطريقة المناسبة .. إما يجاوبك عليه .. أو يحتفظ بيه ليك عشان يجاوبك عليه فوقته لو لسة ماجاش .. أو يشرح لك إنه أساساً سؤال غلط لو كان عقلك توهك بسؤال غلط . . ج - لازم يكون فاهم كويس جداً خريطة المجال اللي إنت حتتعلمه .. من بدايته لنهايته .. يعني يكون ( عارف اللي إنت لسة مش عارف إنك مش عارفه ) . … طيب .. ليه باقول إن ده كان مستحيل لحد من سنتين ؟! .. إيه اللي إتغير في السنتين اللي فاتوا ؟! .. الإجابة : ال ( AI ) . … لحد من سنتين .. كان لازم يبقي معاك حد يقوم بالدور اللي شرحته فوق ده .. و لو مالقتهوش .. كنت حتفضل عايش في توهان و معاناة .. .. علي مدار السنتين اللي فاتوا .. كل شهرين تلاتة .. كنت باخد جولة فكل ما هو له علاقة بالبرمجة و ال ( ai ) أشوف .. هل أقدر أعتمد عليه دلوقتي عشان يكون هو الأستاذ اللي مالقيتهوش زمان ؟! .. .. و مش بس بادور علي ( أُستاذ ) يشرح ليا .. لا .. بادور علي ( منفذ ) .. ينفذ اللي أنا عايزه .. و يشرح ليا أثناء تنفيذه .. .. يعني : أنا مثلاً عندي مسودات مشاريع كتير جداً علي مدار السنين .. معظمها دايماً كان محتاج ( Developers ) عشان يبنوا لها ( Mockups ) .. كل فترة علي مدار السنتين اللي فاتوا .. كنت باجرب في مسودة مشروع مختلف .. و أشوف .. هل أدوات ال ( AI ) حالياً قادرة علي إنتاج ( أبليكيشن ) كامل من البداية للنهاية .. و مُعتمدة بس علي ( إدارتي و إشرافي ) .. بدون ما أضطر أدخل في أى تفاصيل ( كود أو Platforms ) ؟! . . آخر مرة جرّبت .. كان من 6 شهور .. و وقفت عند مشاكل كتير وصلتني لنفس المشكلتين اللي فوق ( و في الآخر نسيت و زهقت ) 🤣 . . إمبارح .. جربت جديد بناءاً علي شوية أدوات لسة طالعة طازة من كام يوم .. و خلال 20 دقيقة حرفياً .. وصلت لإنتاج ( Production ) كنت إحتاجت أسابيع عشان أوصل له من 6 شهور 😆😆 . . الممتع في ده زيادة … إني مش فرحان إني بس وصلت ل ( إنتاج ) ملموس .. لا .. أنا فكل خطوات العملية كنت بادردش مع الأدوات اللي شغال بيها .. بالظبط بنفس طريقة كلامي مع أساتذتي المُفضلين ليا زمان .. عشان أفهم اللي بيحصل .. حتي لو كانت أسئلتي بتفاهة و بساطة زي : ( why did they name it like this ?! = اللي هو ليه سموا الحاجة دي بالطريقة دي 🤣 ) .. و لأن الإجابة كانت بتجيلي خلال الإطار اللي باتعلم فيه ( مش عن طريقة عملية بحث منفصلة تفتح ليا مصادر تشتت جديدة ) .. كنت باقدر مباشرة أكمل في التراك اللي ماشي فيه بدون ما أسرح و أتسوح في عشرات الأسئلة اللي كنت باتوه و أتسوح معاها زمان . … … … … اللي عملته ده كله و شرحته فوق .. باعمله لسببين أساسيين .. 1- في نوعية من ال ( product ) باحب إني أقوم عليهم بالكامل بنفسي .. و لكن لأنهم ماكنش لهم خريطة ( ROI = عائد إستثماري ) سريع واضح .. عمري ما كنت حاعيّن لهم ديفيلوبر أو أصرف عليهم ك مشروع مباشر ضمن شركتي .. فالحاجات اللي زي دي .. باحب أقعد ألعب فيها لوحدي لحد ما تطلع قماش .. و بعد كده أديها لحد يتعامل معاها ك ( منتج ) معروف خطة العائد منه بتطلع إزاي .. و يتعمل لها ( Shipping = تنزل السوق يعني ) . . 2- أى محاولة مني ل ( شرح ) أى شيء .. تركيزي دايماً حايكون علي اللي ( زيي ) .. اللي يأسوا و عانوا بسبب توهانهم و سرحانهم و عقولهم اللي مسوحاهم .. فبالتالي .. و فمجال زي ال ( برمجيات ) خصوصاً .. دايماً كنت بادور علي الطريقة الأمثل اللي لما أرشحها أو أشرحها .. أبقي عارف إنها فعلاً ساعدتني .. و لأول مرة من سنين .. أبقي متحمس إني أشرح أى شيء له علاقة بالبرمجيات من قريب أو من بعيد . … … … لكل من هم مثلي ( اللي عقولهم مسوحاهم ) .. … المستقبل مشرق بإذن الله 😅