واحد ( x ) واحد = إتنين 😁😅 .. صح

واحد ( x ) واحد = إتنين 😁😅 .. صح ؟! .. صح ؟!!!!!!!!!!! و الجدول الدوري غلط و ناقص .. و مافيش حاجة إسمها جاذبية .. و يلا ياض من هنا مش عايز دوشة 🤣😁 … … اللي في الصورة ده لو ماتعرفوش .. إسمه ( تيرانس هاوارد ) .. و ده اللي قام بدور صديق ( iron man ) في الجزء الأول , و عدد تاني من الأدوار المشهورة علي مدار السنين . .. لكن اللي ماتعرفوش تقريباً .. هو إنه معاه شهادة في الهندسة الكيميائية .. و مخترع .. و عبقري .. و تنين مجنح .. و الراجل اللي حيغير مفهوم الرياضة و الهندسة و الفيزياء و العلوم .. و غالباً كمان حصص الألعاب و الرسم .. في العالم كله . .. خليني أشرح : .. الحاج ده بقاله فترة طويلة ( سنين ) بيلف و يدور علي الجامعات و العلماء و المؤتمرات و قعدات القهاوي و البلايستيشن .. و بيتكلم عن إن الرياضة و الفيزياء زي ما إحنا نعرفهم … غلط . و إن دي مؤامرة كبيرة فحت بتتلعب علينا من سنين طويلة .. و إن مافيش حاجة إسمها جاذبية .. و إن نيوتن كان مستعجل و مافكرش كفاية في القوانين اللي كتبها زمان .. و لو كان إستني شوية .. كان زمانه فهم إن مافيش حاجة إسمها جاذبية أرضية .. و إن الرياضة بتاعتنا اللي درسناها في المدارس زمان دي ( بتاعت واحد في واحد بيساوي واحد ) .. غلط .. و إن الصح هو رياضة تانية خاااااااالص .. بتبتدي إن ( واحد في واحد بيساوي إتنين ) .. و حاجات تانية كتييييييير فحت ..
… … المهم .. أنا علي مدار السنين اللي فاتت .. سمعت له هري كتير فأماكن مختلفة .. و ماوجعتش دماغي إني أدور وراه .. لأسباب كتير حاشرحها في الآخر .. .. لكن .. علي مدار الشهور القليلة اللي فاتوا .. بدأ ينتشر له فيديوهاته و مقاطعه بشكل كبير علي تيكتوك و يوتيوب و غيرهم من وسائل السوشيال ميديا . .. و هنا كانت نقطة التحول .. إنه خلال فترة قصيرة .. بقي ” تريند ”. .. يقوم ييجي ( joe rogan ) و يعمل معاه بودكاست مدته 3 ساعات .. و لو ماتعرفش مين ( joe rogan ) .. ده أكبر و أشهر بودكاستر في العالم .. و اللي أكل عيشه هو إنه يستضيف الناس اللي بتطلع تريند .. و يديلهم الحديدة ( المايكروفون يعني ) .. و يسيبهم يتكلموا . .. و البودكاست ده أنا فاتح التاب بتاعه من أسبوعين ( من أول ما نزل ) .. و كنت مستني أفضي له شوية و أتفرج عليه .. و قد كان .. و لسة ماخلصتوش ( فاضل لي 45 دقيقة ) .. بس مش قادر ماكملش قبل ما أكتب التالي : … … 1- زماااااااااااااااااان و أنا صغير ( بتاع 6 أو 7 سنين ) .. كنت باشوف أفلام يوسف منصور .. زي ( قبضة الهلالي ) .. و غيرهم .. و أنبهر إنبهار إبن ستين في سبعين .. كنت باتنطط قدام التيليفزيون .. و أتخيل نفسي زيه .. و مصدق إنه جامد فحت السنين و إنه ممكن يضرب إحم تسعة 😅 بكل سهولة . .. 2- بعد ما كبرت .. و إتمرنت شوية كاراتيه و كونغفو .. و وصلت سن 20 سنة مثلاً .. بقيت شايفه زي ما كلنا شايفينه دلوقتي .. ( ميم , نكتة , كرينج , … ) و غيرهم من مسميات بنطلقها علي أى حاجة زي كده . و لكني كنت شايف تانيين زي ( جيت لي , جاكي شان , سكوت أدكينز , دوني يين … و غيرهم من الممثلين الجامدين فحت في الأكشن ) .. كنت شايفهم هما الجامدين أوي .. و اللي يقدروا يضربوا إحم تسعة 😅 بكل سهولة . .. 3- و بعدين كبرت شوية كمان .. و إتمرنت شوية ملاكمة علي مصارعة علي تايكوندو .. و دخلت شوية قتالات أكثر شمولية من مجرد قتالات الكاراتيه البسيطة المحدودة بقواعد صارمة . و بدأت أفهم إن في عوالم القتال الحقيقية اللي مش محدودة بقواعد ( قتالات الشوارع و غيرهم ) .. العالم مختلف بالكامل عن عالم التيليفزيون أو الأفلام اللي شكل قتالاتها حلو و متنظم و شبه الرقصات دي . و إن أى حد دخل كام قتال حقيقي أكثر شمولية .. زي ( MMA ) مثلاً .. حيكون عنده من الخبرة إنه يفهم مدي هزلية اللي بيتم تمثيله في الأفلام دي .. … … المثال اللي باستخدمه هنا للشرح .. مثال بسيط جداً .. لكن فكل المجالات بلا إستثناء .. بيظهر بوضوح .. .. أى شخص عنده 10% من علم في مجال ما .. يقدر يضحك علي مئات الأشخاص اللي علمهم عن المجال ده 0% .. و يوهمهم إنه تنين مجنح . .. و كل ما زاد علم الشخص النصاب ده .. كل ما كانت قدرته علي وهم الناس اللي ماعندهاش أى علم أكتر .. .. و لكن .. أى إنسان بيمتلك أساسيات أى علم بشكل واضح و قوي .. بيبقي صعب جداً إنك تنصب عليه .. لأن أدوات البحث و التفكير العلمي ثابتة و مشتركة بين كل العلوم .. بلا إستثناء . .. فبالتالي .. سهل إن طالب في أولي هندسة مثلاً .. ينصب علي شخص جاهل ماعندوش أى علم .. لكن صعب جداً إن طبيب متخصص في جراحة العيون مثلاً .. ينصب علي إنسان متعلم عنده مبادئ أى علم .. حتي لو كان أدبي .. أو بيدرس آداب سينسيكريتي . … … … و مع إنتشار وسائل السوشيال ميديا و اليوتيوب و غيرهم .. أصبح الميكروفون متاح لأى نصاب إنه يهري و يظرب زي ما هو عايز .. و لأن الجاهل بطبعه فضولي و لكن كسول .. بيبقي فريسة سائغة جداً للنصابين اللي من النوعية دي .. .. لأنه بطبعه البشري .. فضولي و عايز يعرف .. لكنه كسوووووووول … و مش عايز يتعب عشان يتعلم العلم بمنهج صح و مترتب و محتاج بذل مجهود . .. فبيقوم سايب عقله لأى نصاب زي تيرانس هاوارد ده .. و يسمع ظرب جميل جداً .. ظرب مليان مصطلحات علمية و فلسفية و لغوية معقدة .. مصطلحات تحسسه إن الموضوع كبير .. خصوصاً إنه النصاب ده فعلاً حيقول كلام كتير حقيقي .. بس كلام أكتر و أهم غلط و نصب .. فلما تيجي تفكر .. تلاقيك متلخبط .. لأنك كل ما تيجي تغلطه .. تفتكر إنه برضو قال كلام حقيقي و صح . … … … نفس اللي بيعمله تيرانس هاوارد ده .. عمله رائد الفكر و التنمية و الكفتة .. صاحب جهاز الكفتة الشهير .. و عمله و بيعمله مئات من المتكلمين و المتحدثين في الدين .. … … فأى مجال .. مهما كان .. حتلاقي النصابين دول .. ليهم نفس الصفات المشتركة دايماً : 1- إنهم متحاربين من الكل . 2- إنهم بيثوروا علي مؤامرات ماحدش يعرف عنها حاجة .. 3- إنهم ليهم إنجازات ضخمة .. بس ماتدورش وراهم عشان مخبيينها عشان الحسد . 4- إنهم حلوين أوي و مافيش إلا هما . … … و دايماً و علطول حتلاقي ليهم أتباع و دراويش و محبين و مؤمنين بيهم … لأن اللي هما بيقدموه ممتع جداً .. لذيذ جداً .. بالظبط زي اللي كان يوسف منصور بيقدمه في أفلامه .. إنتصارات وهمية شكلها حلو و ممتع .. بيفرح بيها الجبان اللي قاعد بكرش طالع من فانلة بحمالات مقطعة وبيشرب سيجارة حشيش قدام شاشة تيليفزيون . .. نفس المشاهد ده .. بنفس الدماغ و السيجارة و العقلية و الفانلة المقطعة .. هو اللي بيتفرج علي برنامج ديني و يحس إنه متدين و بيعمل اللي عليه دينياً .. لما بيلاقي النصاب اللي بيظرب بإسم الدين بينصب عليه و علي دينه . … نفس المشاهد ده .. بنفس الدماغ و السيجارة و العقلية و الفانلة المقطعة .. هو اللي بيكون فريسة ممتازة لأى حد ينصب عليه بإسم تريند جديد ( بيتكوين , تسويق شبكي , … و غيرهم ) . … … … … اللي في الصورة ده .. بنسبة كبيرة مصدق نفسه .. و دي مرحلة تانية من النصب بيوصل لها النصاب … و هو إنه يصدق نصبه هو شخصياً .. و لما بيوصل لده .. بيكون أخطر بكتير .. لأن ساعتها بيحس إنه صاحب رسالة .. و تصديقه لنفسه ده .. بيوصل للي بيتفرج عليه .. و كل ما كان اللي بيتفرج عليه أضعف عقلاً و وعياً .. كل ما بيتأثر بمشاعره دي .. و يصدقه هو كمان . .. في ناس كتييييييييير حتشوفهم نصابين و مصدقين نفسهم .. ربنا يحمينا منهم .. و من نفسنا .. و من الدراويش اللي بيصدقوا الهبل ده كله … .. لينك البودكاست التلات ساعات في أول تعليق ..