رد سريع علي أحد أكثر الأسئلة و التعليقات تكراراً علي

رد سريع علي أحد أكثر الأسئلة و التعليقات تكراراً علي البوست اللي قبل ده مباشرة حتي الآن : … 1- إيه يا ياض الحلاوة و خفة الدم دي ( بصوت حسن حسني الله يرحمه 😅) .. أو بمعني آخر .. ليه أغلب اللي باكتبه بيكون فيه قلش كتير و إستخدام الإيموجي ( 🤣😅 ) .. و مش بالتزم مثلاً بمجرد سرد تاريخي له رونق و لابس كرافتة 🤣 ؟ .. في إجابتين علي السؤال ده .. إجابة خاصة ب موضوع ( تاريخ اليابان ) بالذات .. و إجابة عامة عموماً عن أى موضوع تاني باتكلم فيه . . بالنسبة لتاريخ اليابان بالذات .. ف أنا أحد أول مراجعي و مصادري في العالم ده هو ( Gintama 🤣🤣🤣 ) .. أعظم و أفضل و أكثر عمل كوميدي عبقري عرفته في حياتي بالكامل حتي الآن .. . ف مثلاً … معركة ( سيكيجاهارا ) .. و اللي بتٌعتبر أحد أشهر و أكبر معارك اليابان في التاريخ بالكامل .. و اللي فيها بينتصر ( لياسو توكوجاوا ) .. و يبتدي عصر إيدو ( ال 250 سنة ) اللي اليابان بتقفل علي نفسها فيهم . . فأول مرة في حياتي أعرف عن الموضوع ده .. كان سنة 2010 تقريباً .. من الحلقة رقم ( 147 ) في جينتاما .. و اللي فيها بيناقشوا بسخرية .. إن سبب فوز لياسو توكوجاوا في معركة سيكيجاهارا .. هو إن رجليه كانت أقوي .. لأنه كان لما بيدخل الحمام .. ماكنش بيستخدم قاعدة أفرنجي 🤣🤣 .. و كان بيستخدم قاعدة عربي ( اللي هي نفس القاعدة الياباني المحلية بالمناسبة ) .. و نتيجة كده .. و علي مدار سنين من ( دخوله الحمام بالمنظر ده 🤣🤣 ) و قرفصته ( Squatting ) … بيبقي أقوي .. و ينتصر علي عدوه ( المتأثر بالحضارة الغربية و اللي بيستخدم القاعدة الأفرنجي ) 🤣🤣🤣🤣🤣🤣 .. . أنا لحد النهاردة لما بافتكر الحلقة دي .. باضحك بهيستيريا زي أول مرة شفتها بالظبط . . ف بعد ما شفت الحلقة زمان .. خدت غطس عميق في الجزء ده من التاريخ .. و ده اللي خلاني فهمت المرحلة دي أكتر .. و ضحكت أكتر بكتييييييييير . . و باقي أغلب تاريخ اليابان بالمناسبة .. مكتوب و مرسوم في عقلي بنفس أسلوب ( جينتاما ) .. فماقدرش أتكلم فيه .. بدون ما أقلش و أنكّت 🤣 … 2- أما عن الإجابة العامة ( عن ليه عموماً باستخدم أسلوب حلمنتيشي بيقلش لما باتكلم عن أغلب المواضيع … ما عدا المواضيع الدينية بكل تأكيد ) . . ف صدّق أو لا تصدّق .. من سنيييييييييييين طويلة كتبت عن ده تفصيلياً .. و أنا باشرح ( هو يعني إيه كوميديا ) أساساً . . الكوميديا هي : تضاد … بين واقع غير منطقي بالكامل .. و منطق غير واقعي إطلاقاً . . يعني مثلاً .. لو حنستخدم أحد أشهر الممثلين الكوميديين في مصر ( إسماعيل ياسين ) .. ف الكوميديا بتظهر في عالمه إزاي ؟! . إن إسماعيل ياسين بيدخل الجيش ( بشكله و هيئته و شخصيته ) الغير منطقيين إطلاقاً في عالم الجيش . و بعدين .. بنشوف تضاد ده .. مع منطق معضلة الفيلم .. اللي بيكون غير واقعي إطلاقاً ( زي إن شرير الفيلم يتهزم ب شاكوش لعبة مثلاً ) .. . أغلب أنواع الكوميديا اللي تعرفها و بتشوفها … هي نفس المبدأ .. مع بعض التغييرات البسيطة . . و العالم حواليك .. لو فهمت شوية مبادئ منطق و علوم بسيطة .. حتكتشف إنه كوميدي جداً .. كوميدي للغاية .. كوميدي خالص .. . بعض فيديوهات المٌرشّحين للإنتخابات مثلاً اللي كانت منتشرة .. كلام 99.999999% من الأغاني اللي الناس بتشغلها في كل مناسبة .. تصرفات أغلب البشر فأغلب المواقف .. . كل دي أمور غير منطقية إطلاااااااااااااقاً .. و لكنها واقع .. لو حتشوفها من منظور ( دون كيهوتي ) مدمن وهم العالم المثالي و الأبيض و الأسود بس .. يبقي حتعيش حياتك زيه .. و تموت مضروب من ريش طواحين هوا 🤣 . . لكن .. لو حتشوفها من منظور منطقي بسيط .. حتلاقي الأمور دي أغلبها كوميدية .. و بتضحّك جداً كمان . … التاريخ أغلبه مش حقائق .. و لكن وجهات نظر .. و أغلب المنتشر بيكون وجهات نظر كتبها أصحاب القوة ( المادية و العسكرية و السياسية ) .. . ف لما تقرأه أو تتعلمه .. لازم قبل ما تسأل ( هو إيه حصل ) .. لازم تسأل ( هو اللي حصل ده .. حصل ليه ؟! .. و إزاي ؟! ) .. . ساعتها حتفهم إن الإنسان في أصله .. ماتغيرش و ماختلفش إطلاقاً .. مهما إختلفت قشور ( اللغة , الزمن , المكان , .. ) . . اللي حصل في اليابان من 1000 سنة .. دوافعه و أسبابه و مٌحركاته .. هي نفس اللي حصلت في لوكسمبورج من تلات أيام مثلاً .. أو كفر طهرمس من 5 سنين .. أو الشارع اللي وراكم من 4 ساعات .. 🤣 . و لما نقرأ أو نفهم تاريخ ( أو أى علم دنيوي تاني عموماً ) .. نفهم منه ده ك ( قصص الأولّين ) .. عشان لو قدرنا .. قدر المٌستطاع .. بإذن الله .. لما نتعرّض لإختيار .. . نبقي عارفين .. نختار ( بين قاعدة عربي .. أو قاعدة أفرنجي ) .. 🤣 . و الله أعلم … . ** صورة من الحلقة 147 من جينتاما فأول تعليق 🤣