في مقولة مشهورة جداً .. و إتكتبت بصيغ كتير علي

في مقولة مشهورة جداً .. و إتكتبت بصيغ كتير علي مدار التاريخ .. هي : ” إقتل شخص واحد .. تبقي مٌجرم .. إقتل مليون .. تبقي بطل غازي و أسطورة و يتكتب عنك مهرجانات و أوبريتات ” . أو بصيغة أخري : ” مقتل شخص واحد .. شيء محزن و مؤلم .. مقتل مليون شخص .. مجرد إحصائية ” . 🙂 … أنا ماشوفتش غير كام دقيقة من مسلسل ( ورد و شيكولاتة ) اللي مٌسيطر علي التريند المحلّي حالياً .. و باقي معلوماتي عنه من خلال البوستات اللي بتظهر قٌدّامي طول الوقت … و ده كان كافي إني أعرف إنه عن الحادثة ( إن شخص ذو سٌلطة و نفوذ قتل مذيعة مشهورة ) . … لكن فنفس ذات الوقت .. في مسلسل تاني مٌسيطر علي التريند العالمي .. و هو ( Last Samurai Standing ) .. و ده هو اللي لسّه مخلّصه النهاردة الصٌبح 😅. مسلسل أكشن و ساموراي و سيوف رائع بكل أمانة … و قتل .. قتل كتير .. أوي .. اللي هو في أحد شخصيات المسلسل أساساً بيقتل أى حد حواليه لأنه زهقان .. لحد ما بيزهق من القتل 🤣🤣 … و السؤال هو : إيه الفرق ؟! مش ” إيه الفرق بين زينة أو محمد فراج وبين الساموراي أكيد ” 🤣🤣 .. و لكن .. إيه الفرق اللي بيعمله تعاطف البشر .. في كتابة التاريخ ؟! خليني أحكي … … مسلسل ( Last Samurai Standing ) بيحكي عن أحد أكتر الفترات العجيبة في اليابان .. و بما إني من 5 شهور تقريباً .. كنت بدأت سلسلة بوستات باتكلم فيها عن تاريخ الصين و اليابان و كوريا من البداية خااااااالص بالحلمنتيشي .. فحاستغل الفرصة دي .. و أحكي شوية عن اليابان بقي .. بالتلخيص المٌخل الحلمنتيشي كالمعتاد . … اليابان من زمان أوي .. و هي لها حاكم واحد فقط ( إمبراطور ) .. و كل الشعب بيعتقد إن الإمبراطور ده .. من نسل إله الشمس مباشرة ( أماتيراس 😁) .. و من بداية تاريخ اليابان ( من قبل الميلاد ) .. لحد يومنا الحالي .. نسل الإمبراطور الياباني ممتد لحد باشمهندس ( ناروهيتو ) اللي ماسك الإمبراطورية حالياً . .. و لكن .. علي مدار تاريخ اليابان .. ماكانش دايماً الإمبراطور هو اللي بيحكم بنفسه .. هو كان إمبراطور تمام و كل حاجة .. لكن أحيان كتير كان بيبقي علي نفسه .. اللي هو بيطلعوه من النيش في الإحتفالات يلفّوا بيه حوالين قلعته شوية .. و يرجعوه تاني جوة 🤣 . . مين بقي اللي كان بيحكم فعلاً ؟! بالظبط زي ما توقعت .. علي مدار التاريخ .. دائماً و أبداً .. المطوة قرن الغزال هي اللي بتحكم .. و الخناقة كلها بتبقي .. مين اللي حيمسكها ( إحم المطوة أقصد ) . .. و اللي ماسك المطوة ده ( الحاكم العسكري يعني ) .. كان بيبقي إسمه ( شوجون -Shogun ) .. و الدلع ( شوشو 🙂 ) .. … و اليابان .. كانت عبارة عن مناطق كتير .. كل منطقة و لها حاكم محلي ( دايميو ) .. و له شوية بلطجية بتوعه ولاءهم بالكامل له هو ( الساموراي ) .. . و الساموراي دي كانت بتبقي حاجة بالوراثة .. يعني أغلبها أبناء عاملين 🤣 .. و زي أى منظومة قوة علي مدار التاريخ .. لما بتبقي عبارة عن ( توريث ) .. بتكون النتيجة هي : شباب ماسك سيف بالقانون .. له سلطة و قوة علي أى حد مش ماسك سيف .. ف بيبرطع .. و يعيش حياته بالطول و بالعرض .. . خصوصاً لما بيبقي في قانون ( حقيقي بالمناسبة ) للساموراي .. في نصه إن : لو إنت ساموراي .. و حد قل أدبه معاك في كمين أو كارتة مثلاً .. إقتله وقتي و سيب جثته تتعفن عادي .. و ماحدش له عندك حاجة 🤣🤣🤣 . … علي مدار فترة 250 سنة تقريباً قبل المرحلة اللي المسلسل بيحكي عنها .. كانت مرحلة إسمها :

• عصر توكوجاوا ( فترة إيدو - Edo Period ) .. دي بإختصار إن .. كان في راجل إيده طايشة إسمه ( توكوجاوا ) .. إتخانق مع إتنين تانيين بلطجية برضو .. و قتلهم و فاز عليهم فأحد أكبر المعارك التاريخية في اليابان . . و لكن .. ( توكوجاوا ) كان مكوّن فريقه من مواهب محلية بالكامل .. ماكانش عنده محترفين أجانب يعني 🤣 .. في حين إن المنافسين بتوعه .. كانوا مستقويين بالغرب ( جايبين محترفين أوروبيين ) .. . ف لما ( توكوجاوا ) هزمهم .. قرر يقفل باب الإحتراف بالكامل 🤣 .. و حرفياً قفل كل أبواب اليابان بالمرة .. اللي هو ” إقفل يابني كل الأبواب و المواني و المطارات و مواقف التكاتك … مش عايزين دوشة .. إحنا حنلعب كله محلي فمحلي 🤣 ” . . و لمدة 250 سنة تقريباً .. توكوجاوا و خلفاءه .. فضلوا هما اللي بيحكموا بلد مقفولة عن العالم بالكامل .. لاحظ إن ال 250 سنة دول كانوا إمتي ؟! بالظبط ( من 1600 تقريباً .. ل 1850 ميلادياً ) .. اللي هو العالم كله كان عمل ( update و أبجريد ) .. و ماحدش بقي بيستخدم التيليفون الأرضي كروت ميناتل .. و الكل بقي ماشي بموبايلات و ساعات و سماعات تقليد 🤣 . . اليابان كانت قفلت أبوابها و العالم بيحترم جداً جداً السيف .. و بعد 250 سنة .. أصبح أى عيل صغير ماسك مسدس .. يقدر يعلّم علي أجدع محارب سيف من بعيد ( ساموراي ) .. … و طبيعي هنا .. لما نتكلم عن عيال ماسكين مسدسات .. يبقي لازم تفكّر في ( أمريكا ) 🤣 . … ده بالفعل اللي حصل .. أمريكا كانوا نازلين يتفسحوا بهدوم العيد و معاهم مسدسات خرز .. و مدافع خرز .. و سفن حربية بتضرب خرز .. و هما بيتمشوا في البحر .. شافوا اليابان من بعيد .. . و في الوقت ده .. لازم تفهم كويس هي أمريكا كانت نازلة تتفسح عند اليابان ليه ؟! . لأن ( بريطانيا ) اللي كانت لسة أمريكا غالباها في حرب التحرير الأمريكية من كام سنة .. كانت بتلعب سولو في الصين ( بعد حروب الأفيون ) .. و أمريكا ماكنتش عايزة بريطانيا تاخد راحتها أوي في الصين .. و إلا عند مرحلة معينة .. ممكن ترجع تقول لأمريكا تاني ( تعالي في بيت الطاعة 🤣) . . فأمريكا فضلت ماشية ورا بريطانيا .. و لما شافت بريطانيا بتركن تحت عمارة الصين .. أمريكا راحت لليابان و قالت لها .. أنا عايزة يبقي ليا ركنة هنا 🤣 .. عايزة مواني .. عايزة أتاجر .. عايزة أشوف إنتوا مخبيين إيه جوة و قافلين عليه بقالكوا 250 سنة ؟! 🤣🤣 . .. اليابان طبعاً بصّت لها من الشباك و قالت لها ( لو مامشتيش من هنا هننزّل لك شوية ساموراي من عندنا يعلموكوا الأدب ) .. . أمريكا ردت عليها بطلقتين في الجو .. . اليابان إكتشفت إن الطلقة أسرع بكتير جداً من السيف 🙂. و بدأت تفهم إن أمريكا لو فعلاً حبّت .. ممكن عند أى مرحلة الباب المقفول بقاله 250 سنة مش بس يتفتح .. و لكن اليابان بالكامل ممكن يتم إحتلالها . . يعملوا إيه ؟! … راح شوية من العقلاء اليابانيين .. و المثقفين .. و شوية شباب وسط بلد طوكيو 🤣 .. و راحوا للحاج يوشينوبو توكوجاوا الخامس عشر .. الشوجون ( شوشو ) اللي كان ماسك في الوقت ده .. و قالوا له : ” يهديك .. يرضيك .. لازم نفتح اليابان .. و نهوي الدنيا .. و نشوف الكلام برة اليابان علي إيه .” . يرد عليهم شوشو : ” إنتوا مجانين ؟! .. إحنا اليابان .. إمبراطورية الشمس .. إحنا جامدين أوي .. إحنا أى شاب من خيرة ساموراي وسط البلد بتاعنا .. ب عون أماتيراس .. يقدر يطلع علي أى سفينة حربية .. و ياخد جنودهم أسري و سبايا 🤣 ” . يردوا عليه : ” يا عم الحاج فوق .. في مسدسات دلوقتي .. و سفن حربية .. و تكنولوجيا .. و علوم .. و شكلنا حيبقي وحش أوي أوي بالسيوف الطويلة اللي ماسكينها دي بعد كده لو أعدائنا كان عندهم خيال قليل الأدب شوية 🤣🤣🤣 ” . يرد عليهم شوشو : ” نظام آبائنا و أجدادنا اللي ماشيين عليه بقالنا 1000 سنة و أكتر ؟! .. نظام الساموراي اللي بيدينا الحق بالوراثة إننا نمارس حقوقنا كلها بالسيف ؟! نظام الساموراي اللي يخلي أى ساموراي ماسك سيفه قوة عظمي .. ماحدش يقدر يرفع عينه فيه من عامة الشعب ؟! نظام الساموراي اللي مأكلنا و مشربنا ؟! كل ده .. حنعمل فيه إيه ؟! ” . يردوا عليه : ” يا عمنا .. حنجمع الساموراي دول .. و حنعمل أحلي جيش مركزي و أجدع شرطة مركزية .. و يبقوا بيشتغلوا عند حكومة مركزية .. و نفتح بقي اليابان و نشتري كل التكنولوجيا الجديدة دي .. خصوصاً إن البلاك فرايداي خلاص خلال أيام 🤣 ” . يرد عليهم :
  ” لا 🙂 ” … يروح شلة ال( مٌجددين ) دول .. واخدين أول ميكروباص من قٌدّام قصر الشوجون .. و طالعين علي مين ؟! . الله ينور عليك .. علي الإمبراطور 🙂 . . مين بقي الإمبراطور ده ؟؟! شاب عنده 14 سنة .. لسة بادئ يتعلم يمسك مكنة الحلاقة أول إمبارح 😅 . . راحوا له شلة ال ( مٌجددين ) دول .. و قالوا له ( ليك مزاج تحكم و نجيب لك بلايستيشن ؟! ) .. قال لهم ( قشطة ) . . بس يا حاج .. و تاني يوم الصبح .. كل الجرائد المحلية .. و برامج التوك شو .. و الإنفلونسرز اليابانيين .. و حتي القهوجية .. بيكرروا و يقولوا نفس الجملة : ( يلّا نرجّع قوة الحكم للإمبراطور من تاني ) .. و ( يسقط يسقط حكم الشوجون 🤣 ) . … طبعاً الشوجون سمع الكلام .. إتضايق .. قرر يحارب .. إتهزم و إتحط عليه حطّة متينة .. لأن (شلة المٌجددين ) كانوا إشتروا شوية مدافع و مسدسات جديدة . و كان بيحارب في صفوفهم ساموراي كتير طبعاً . … و علي مدار أقل من 30 سنة .. حصل التالي : كل سيوف الساموراي تم حصرها و جمعها .. و منع أى حد إنه يمشي حاطط سيف ولامؤاخذة في .. إحم .. حزامه . . مافيش حد له يمسك سلاح .. غير الشرطة أو الجيش المركزيين .. . إفتح اليابان علي البحري .. و هات تكنولوجيا .. و هات علوم .. و هات كل حاجة عند الغرب .. و بسرعة .. بسرعة أوي .. بسرعة جداً .. و لكن .. من غير ما تخسر ال ( هوية اليابانية ) . … أثناء ما كل ده كان بيحصل بقي .. كمية القتل و الدم كانت .. للركب .. . المسلسل بيبالغ طبعاً في حاجات كتير .. و بيألف حاجات أكتر .. و لكن .. سؤال .. .. في الحوارات اللي فاتت دي كلها .. تقدر تحدد تتعاطف مع مين ؟! .. مع ساموراي مفلّس .. زي بطل مسلسل ( last samurai standing ) ؟! ولا مع واحد من شلة المٌجددين ؟! .. اللي خايف علي مستقبل اليابان ؟! ولا .. ولا مع أى حد من مئات الآلاف اللي إتقتلوا ؟! … … ولا مع واحد عايز يكتب أكتر بكتير جداً جداً عن كل ده .. و لكن لما البوستات بتطول الناس بتدخل تكتب له في التعليقات ” إنت رغّاي أوي 🤣🤣 ” . … و الله أعلم . .