هشششششششش ... وطّي صوتك .. ماتتكلمش .. بص في الأرض

هشششششششش … وطّي صوتك .. ماتتكلمش .. بص في الأرض .. ماترفعش عينيك .. وطّي .. لو و هو معدّي تف عليك .. أشكره و إفهم إنها بركة منه .. إنت أصبح كده عليك حاجة من ريحته .. يا بختك . لو و هو معدّي ضرب نار و قتل أخوك أو أبوك أو حد من أهلك .. أشكره من غير ما ترفع عينك .. و إفهم إن ده القدر .. قدر و مكتوب و ماحدش يقدر يغيره .. لو و هو معدّي .. عجبته مراتك , أمك , أختك .. و حب يستخدمها ك عبدة عنده يعمل فيها أى شيء علي مزاجه … مهما كان .. أشكره .. و إفرح .. هو حد يطول إنه يفرّحه أو يخدمه ؟! . … اللي فات ده .. جزء بسيط جداً جداً جداً .. من اللي المفروض تعمله لو كنت محظوظ جداً .. و قابلت شخص من نسل التنانين .. اللي هي الفئة الحاكمة في قصة ( One Piece ) .. … و العالم بالكامل .. له حكومة واحدة .. ب جيش واحد .. بيخضع لها كل شيء في العالم ده .. و الحكومة دي .. وظيفتها الأولي و الأهم هي : حماية و خدمة الفئة الحاكمة دي . … أى إنسان يفكر بس في إنه يعترض لو شاف حد من أهله بيتقتل قٌدّام عينيه . يبقي إرهابي .. يستحق السجن و الموت . أى إنسان يفكر بس إنه مش عايز يشوف شرفه أو عرضه بيُنتهك قٌدّام عينيه .. يبقي بيعارض إرادة الآلهة و حكمتهم .. و يبقي مهرطق و يستحق السجن و الموت . أى إنسان يجرؤ يرفع راسه .. عشان يشوف بعينيه فرد معدّي من الفئة الحاكمة اللي بتملك كل البشر دول .. يبقي متمرد .. و لازم يتطبق عليه القانون .. و تُفقأ عينيه عشان مايتجرأش و يرفعها تاني . … أعلي شرف تقدر تطمح له في حياتك .. هو إنك تبقي جندي في الجيش اللي بيخدم حكومة العالم .. اللي بتحمي الفئة الحاكمة . . أغلي شيء تتمني تبذل فيه حياتك .. و تفرح و إنت بتموت في سبيله .. هو إنك تموت شهيد ضمن الجيش ده .. و إنت بتقاتل المتمردين و العُصاة و الإرهابيين . . في الجيش - اللي إسمه ( المارينز = القوات البحرية يعني ) بالمناسبة - حتلبس أنضف زي .. حتاكل أنضف أكل .. الكل حيحترمك .. حتشيل سلاح .. و حتتمرّن إزاي تستخدمه . لأن ماحدش تاني غير الجيش ده له حق إنه يشيل سلاح أو يتمرن عالقتال . و إلا حتبقي الدنيا سبهللة .. و الإرهابيين حينتشروا . . في الجيش .. حتبقي إنت القانون .. و حتمنع السرقة .. حتمنع الظلم .. حتمنع المشاكل .. بين أعضاء قريتك .. لكن أبداً ماتنساش أهم دور لازم تقوم بيه .. و هو : إنك تطيع الأمر اللي جاي لك من رُتبة فوقك .. الرُتبة .. هي أهم شيء في الحياة . … الجيش ده .. فيه ناس إتكتب في بطولاتهم أساطير .. ناس .. الواحد منهم قدر يهزم مئات من الإرهابيين لوحده .. ناس .. قمة في كل المعايير .. في الشياكة .. في الهيبة .. في القوة .. و الناس دول .. هما قادة الجيش .. اللي بيخدم حكومة العالم .. اللي بتخدم الفئة الحاكمة . … العالم عايش بالمنظر ده من زماااااااااااااااااااااااان أوي .. آلاف السنين .. حضارة و تاريخ و موروثات و تراث .. بلاد كتير .. أكبر شيء بتعتز بيه هو إن أحد أبناءها مثلاً .. كان أحد أساطير الجيش اللي بيخدم الحكومة اللي بتخدم الفئة الحاكمة . مثلاً .. بلاد كتير .. أكتر شيء مٌقدس عندها في الحياة .. هي مهمتهم علي مدار التاريخ إنهم اللي بيصنعوا و يغسلوا بوكسرات الفئة الحاكمة .. و في المقابل .. الفئة الحاكمة قررت إن البلاد دي لها حصانة دبلوماسية فائقة .. و لهم مميزات خاصة في العالم كله . … ف قرية صغيرة جداً .. فقيرة جداً .. علي أطراف العالم ده .. طفل صغنن بيجوع … و يسأل .. هو ليه في ناس عندها أطنان من الأكل بترميها في المحيط .. و أنا باموت من الجوع .. و أهلي و أصحابي بيموتوا من الجوع قٌدّام عيني . … بيسأل .. ليه الطريقة الوحيدة إني آكل و أشبع .. هي إني أكون جندي في جيش ؟! ليه الطريقة الوحيدة إني أقدر أحمي أهلي .. هي إني أكون جندي في جيش ؟! ليه الجندي ده لازم يطيع أوامر الرُتبة اللي فوقه .. حتي لو كانت الأوامر دي هي إنه يقتل نفسه ؟! مين أعلي رُتبة في الجيش ؟! .. و بيطيع أوامر مين ؟! حكومة العالم .. ليه هما اللي حاكمين ؟! الفئة الحاكمة دي .. إيه الفرق بيني و بينهم ؟! .. و ليه لازم أسجد لهم ؟! .. … بيسأل .. هي الناس راضية بالعبودية دي ليه ؟! … بيسأل .. إيه هي الحرية ؟! . … و الطفل ده بيكبر و يبقي شاب … و فأحد مشاهد رحلته .. بيشوف أحد أفراد الفئة الحاكمة دي .. مراهق تخييين .. كرشه ضخم قُدّامه لدرجة إنه مكلّف عبد من عبيده إنه يمشي قٌدّامه دايماً عشان يشيل كرشه بس .. و هو أساساً مش بيمشي .. و لكن قاعد علي كرسي عرش بيشرب كُباية شاي .. و العرش ده شايله أربع عبيد تانيين ماشيين بيه في موكب .. طفلة صغيرة عدّت الشارع بالغلط قٌدّام الموكب .. الموكب وقف ل ثانية .. و إتهزّت كباية الشاي اللي هو ماسكها و وقع منها عليه .. إتضايق .. و طلّع مسدسه .. و ضرب نار علي الطفلة دي .. … الشاب .. ف لحظة .. أول ما شاف المراهق طلّع مسدسه .. كان نط هو من فوق الحواجز .. و حمي الطفلة بجسمه .. .. المراهق إتعصب و أمر بقتل الطفلة و الشاب .. الشاب دافع عن نفسه .. و قتل المراهق … و هرب . … الشاب ده .. تم الإعلان عنه بعد كده إنه أخطر مجرم في العالم .. أخطر إرهابي في العالم مطلوب القبض عليه حياً أو ميتاً .. الشر المتجسد علي قدمين .. … … أحد أهم أخبار الأسبوعين اللي فاتوا بالنسبة ليا .. هو الخبر ده .. إن العلم اللي في الصورة دة .. أصبح أكثر الأعلام اللي بيتم إستخدامها في الثورة في نيبال .. ( لو ماتعرفش .. نيبال فيها ثورة قام بيها الشباب الصغننين عشان يثوروا علي نظام الحكم الفاسد في نيبال ) . .. العلم ده .. هو علم ( Straw hats ) .. في قصة ( One piece ) .. أحد أعظم أعمال الأنيمي في التاريخ .. و اللي ما زلت باعتبره مشاهدة إجبارية لأى إنسان عايز يفهم أى حاجة فأى حاجة في العالم حالياً .. … و إن العلم ده .. يبقي هو رمز للثورة فأى مكان في العالم .. ف ده شيء أنا سعيد بيه جداً .. جداً .. … بس المهم … هششششششششششششششش .. ماتقولش لحد .. ماتكررش الكلام اللي فوق ده .. ده كلام المهرطقين و الناس الوحشين اللي كلامهم بيضايق الفئة الحاكمة .. … و الله أعلم .