قصة ال ( K-pop ) و الدراما الكورية .. من
هو إحنا ليه بنتكلم عن كوريا أساساً ؟! .
قصة ال ( K-pop ) و الدراما الكورية .. من البداية خاااااااااااااالص .. بالحلمنتيشي المُلخص جداً .. الجزء التالت .
…
هو إحنا ليه بنتكلم عن كوريا أساساً ؟! .
…
لأن .. لما تبقي بتتخانق مع واحد سرقك .. و إنت مسكته .. و كنت خلاص بتعجنه و حتاخد اللي سرقه منك … و بعدين فجأة تلاقي حد جه من بعيد و قال لك خلاص سيبه ..
و لما تيجي ترد و تقول ( بس ده سرقني ) .. تلاقي اللي جه من بعيد ده بيقول لك ( أيوة سرقك .. بس هو يخصني .. و حاجتك مش حترجعلك ) .
يبقي لازم أوي قبل ما تكمل الخناقة .. تفهم هو مين اللي جه من بعيد ده ..
خصوصاً .. إنه مش جاي لوحده ..
ده جاي .. و جايب معاه أهل البلد كلهم واقفين في صفه ..
حتي لو واقفين في صفه و هما مطاطيين راسهم و عينيهم في الأرض .
…
اللي جه من بعيد ده ( لو كانت لسة دماغك ماجمعتش ) .. هو أمريكا 🤣 .
…
و كوريا .. تبقي أحد أكبر ضحاياها ..
و اللي هو إنت أتولدت و عشت و كبرت و إنت تسمع عن ( كوريا شمالية و كوريا جنوبية ) … و ماتعرفش إن في الأساس كوريا اللي قسمها إتنين عساكر أمريكان قاعدين في أمريكا و هما بيشربوا كوبايتين سحلب فتلة ..
آه والله .. ( مش باقسم علي السحلب الفتلة 🤣 .. و لكن علي إن اللي قسّم كوريا كان إتنين أمريكان .. قاعدين في أمريكا .. عمرهم ما سمعوا عن كوريا غير في نشرة الأخبار .. و قرروا يقسموها .. بناءاً علي منظر خط في الخريطة شافوا إنه حيبقي حلو كده .. اللي هو كإنك بتقسّم بسبوسة بالظبط ) ..
الخط ده إسمه بالمناسبة ( الخط المتوازي ال38 ) .
.
الموضوع لا كان له أسباب دينية مثلاً .. ولا ألوان بشرة مختلفة .. ولا حتي أهلي و زمالك ..
الموضوع قسماً بالله بالتفاهة دي .. إتنين ( عقداء بالمناسبة يعني مش عساكر .. بس ما علينا ) .. و قسموها .. و شكراً ..
.
و فجأة يا مؤمن .. تصحي إنت من النوم .. تلاقي إن العالم كله بيقول آمين ..
طب إزاي ؟!
طب ليه ؟!
طب المواطن الكوري ده ماقالش لا ليه ؟!
طب وافق و لعب معاهم ليه ؟!
.
طب بلاش الأسئلة المحرجة دي .. خلينا في سؤال تاني …
ليه بقي كوريا الجنوبية بتطلع لنا سامسونج و إل جي … و كوريا الشمالية بتطلع لنا ميمز نشيرها و نتريق عليها ؟! ..
إيه اللي حصل ؟!
…
كوريا بالنسبة ليا .. عاملة بالظبط كإنك وقفت في الدور اللي فوق فمحطة رمسيس بتاعت القطر .. و قعدت تتفرج عالناس .. اللي رايح و اللي جاي .. كل واحد منهم له قصته و حياته اللي ممكن تتعمل فيلم لوحدها ..
لكن في النص كده ..
بتلاقي واحد واقف لوحده .. مختلف عن الباقيين .. لأنه شبههم كلهم …
اللي هو فيه من كل واحد فيهم .. لحد ما أصبح متميز عنهم كلهم ..
..
كوريا .. علي مدار ال100 سنة اللي فاتوا .. تقريباً حصل فيها و معاها .. زي ما حصل مع كل مكان تاني في العالم ..
..
عايز شيوعية .. تمام .. تعالي حتلاقي
عايز رأسمالية .. حبيب قلبي .. عندك جوة إتفضل ..
عايز تفرقة دينية .. تعالي يا باشا ..
عايز بروباجاندا إعلامية غيرت وعي شعوب 180 درجة .. معانا ..
عايز تاريخ عريق جداً لناس مسالمين و فحالهم .. إتفضل ..
عايز بلد كل شوية حد يعدي يحتلها شوية .. هنا برضو ..
…
و بالرغم من إني لما قررت احكي القصة دي عن كوريا .. كنت ناوي إني أركز علي البعد النفسي للشخصية .. و ليه بقي فيه ( كي بوب و دراما بالمنظر ده ) …
إلا إني بعد ما رصّيت الرصة الفكرية قدامي .. لقيت إني أبقي حرامي لو سرقت منك ( القارئ يعني ) .. شوية أبعاد غاية في الأهمية ..
أهمهم .. هو خناقة العالم علي مدار ال100 سنة اللي فاتوا .. و اللي ما زالت بتأثر علي الخناقة اللي شرحتها فأول البوست ده .
..
اللي هو :
ليه أمريكا ماسكة العالم من ولامؤاخذة مناطقه الحساسة ؟!
إشمعني ؟! .. حصل إمتي و إزاي ؟!
..
الخناقة دي إسمها ( خناقة الشيوعية ضد الرأسمالية ) .. و دي أكبر خناقة في العالم لحد دلوقتي .
…
المهم .. تعالي نكمّل القصة ..
لو ماكنتش متابع لحد دلوقتي .. فإحنا شرحنا بسرعة فحت أوي خالص ..
إن أوروبا كانت عبارة عن ( شوية ملوك قليلين بيحكموا شوية فلاحين كتير و بيدفعوا لشوية قساوسة و رجال دين عشان يفضلوا مسكتين الفلاحين دول بأمر الدين و الكنيسة ) .
و إن فوسط الهم ده كله .. إتولد كارل ماركس فألمانيا .. و اللي فقعدة روقان مع كوباية شاي نعناع .. كتب ( الشيوعية ) ..
..
و إزاي إن أفكار عمك ماركس .. طارت من ألمانيا ل روسيا .. و روسيا قرروا يتبلشفوا ( الثورة البلشيفية ) .. و بعد شوية خناقات و زعيق و ( عيش حرية عدالة إجتماعية ) .. فلاديمير لينين مسك الحكم .
…
و شرحت إن روسيا فوق الصين .. و الصين كانت مشدودة فسكة المزاج و الكيف مع بريطانيا و ماشية في الشمال ..
و إن لما حبت تفوق لنفسها و ترجع الجيم و تشيل حديد و تبطل الشمال .. إتلمت علي جارها الروسي اللي فوق منها في الخريطة ..
و حطوا إيديهم في إيدين بعض و قالوا بصوت عالي مرة واحدة ( شيوعيااااا ) ..
و ماو تسي تونغ مسك الحكم في الصين .
…
أثناء ما كل ده كان بيحصل بقي ..
كانت اليابان فين ؟! ..
…
طيب .. تعالي أحكي لك قصة اليابان ..
…
زمااااااااااااان .. بعد أيام الفراعنة بشوية ( 300 بعد الميلاد ) .. كان في ناس ولاد حلال قاعدين في حتة أرض حلوة فيها أنهار و عالطريق مباشرة .. اللي هو تاخد توكتوك من علي أول الشارع تلاقي نفسك عالسريع مباشرة ..
الجماعة دول كان إسمهم ( ياماتو ) .. و ده إسم مهم جداً لحد النهاردة بالمناسبة .
…
الجماعة الحلوين دول .. لأنهم كانوا فمنطقة إستراتيجية .. عيلتهم كبرت بسرعة .. و بقي عندهم إكشاك و محلات في كل حتة ..
فقرروا يحكموا ..
طب يعملوها إزاي ؟! ..
..
عارف إنت لما بيقولولنا في المدرسة إن ( مينا زمان وحد القطرين ) ؟! ..
ده حصل إزاي ..
ده حصل لو تفتكر لما مينا قال للجماعة اللي حواليه ( إوعي ياض .. الشنطة فيها كتاب دين ) 🤣..
..
آه والله .. ( ماقالش الشنطة فيها كتاب دين ) .. و لكن إستخدم الدين ك وسيلة لحماية ملكه .. و قال إنه بيكلم الآلهة بالليل قبل ما ينام ..
…
الجماعة اليابانيين عملوا نفس الكلام …
ياماتو الكبير أوي .. قال أنا الإله بتاع الشمس ( أماتيراس ) بيقعد معايا بالليل عالقهوة و يرسيني عالحوار ..
** لو الكلمة علّقت معاك عشان عارفها من ناروتو .. برافو عليك .. ناروتو أساساً واخد كل الكلمات اللي فيه من تاريخ اليابان الديني ..
..
يعني .. عقيدة اليابان الأصلية ( الشينتو ) ..
فيها فعلاً :
- أماتيراس = إله الشمس و كبير الآلهة .
- تسوكيومي = إله القمر .
- سوسانو ( أيون بتاع ساسكي 🤣 ) = ده إله العواصف و الفوضي و البحر .
- إيناري = إله الرز 🤣 … و لو طولت شوية .. حتلاقي إله الكشري كمان ..
- إيزاناجي و إيزانامي = دول بتوع الحاجات البسيطة زي الخلق و الكلام ده 🤣 . … ببساطة .. عقيدة ال ( شينتو ) .. فيها إن أى حاجة في الطبيعة حواليك .. ف لها إله .. و الموضوع ملمّس بشكل كبير جداً مع الهند .. بس الهند قصة تانية ممكن أحكيها بعدين .. … المهم . الجماعة اللي إسمهم ( ياماتو ) دول .. قالوا إحنا بقي ولاد إله الشمس .. و اللي بيحكم مننا … بيكون هو و إله الشمس حاجة واحدة .. و لأنهم كانوا أجمد عيلة في اليابان في الوقت ده .. كل الناس وراهم قالت : آمين . … العملية فضلت مستمرة بالشكل ده .. لحد علي سنة 800 بعد الميلاد .. كان الجماعة بتوع ياماتو دول خلاص .. صدقوا إنهم آلهة .. و نادراً لما حد منهم كان بيتشاف أساساً .. طب مين اللي بيحكم ؟! .. كالمعتاد … اللي بيمسك دفاتر المحل .. هو اللي بيحكم .. يعني .. الموظفين اللي كانوا ماسكين الحكومة فعلاً .. كانوا برضو عائلات .. ف عيلة إسمهم ( فوجيوارا ) مثلاً .. فضلت حاكمة شوية .. لكن كانت بتتخانق مع عائلات تانية .. و شغل سياسة درجة أولي ( أغلب الدراما الياباني التاريخي بتكون عن الفترة دي ) . .. *** مركز هنا الموضوع ده مشابه ل مين ؟! .. في العالم الإسلامي في نهاية الدولة العباسية .. لما الخليفة كان بيبقي خايف أخوه يقتله و يحكم هو .. ف جاب موظفين من بلاد فارس عشان ماحدش يتكلم لغتهم و يشتري ولائهم .. و النهاية إن الموظفين العبيد بتوع بلاد فارس دول هما اللي حكموا ..و إنتهي الأمر إن العساكر بتوع الأمن ( المماليك و قطز بقي و أحمد عبد العزيز 🤣) . … و ده هو التطور الطبيعي للحاجة الساقعة .. هو إن لما الموظفين اللي ماسكين الدفاتر يتخانقوا .. مين اللي يدخل يسلّك في الخناقة ؟! .. عساكر الأمن اللي بيحرسوا المحل .. .. و بالظبط .. عساكر الأمن دول ( اللي هما الساموراي في اليابان ) .. و اللي هما ( المماليك في بلاد الإسلام ) .. … و الخناقات إستمرت بقي بالعساكر ( الساموراي ) .. و فئة خاصة من العساكر ( قوات خاصة = النينجا ) طلعت .. و أصبحت قري كاملة بتدرب عيالها من و هما صغيرين إنهم يكون نينجا .. .. و بالمناسبة هنا برضو … المملوكي كان بيتم تدريبه بنفس الطريقة .. يعني من و هو عنده 3 سنين .. بيتاخد علي المعسكر .. و زي ما كان النينجا محارب أسطوري مرعب .. المملوكي .. كان مرعب أكتر .. .. نابوليون لما دخل مصر .. قال : ” إتنين مماليك بسهولة ممكن يغلبوا تلاتة جنود فرنسيين .. و 100 جندي فرنسي مساويين ل100 مملوكي .. لكن 1000 جندي فرنسي .. يغلبوا 1500 مملوكي ” و السبب هو إن المملوكي كان بيتم تدريبه ك محارب فردي .. لكن فرنسا كانت سابقة العالم في إستراتيجيات المعارك . … المهم .. اليابان بتفضل في حوارات و خناقات و حروب و قصص و ساموراي و نينجا .. لحد ما عند مرحلة معينة .. واحد إبن حلال علي سنة 1600 تقريباً إسمه ( لياسو توكوجاوا ) .. بيغلب غريمه اللدود ( أودا نوبوناجا ) .. ( و دي لوحدها فيها كتب بتتكتب في روعة و ثراء المرحلة دي تاريخياً ) .. .. و بيقرر عمك ( توكوجاوا ) و يقول : باااااااااااااااااااااااس .. لحد هنا و ستوب .. إحنا تعبنا يابني من الحروب و الدوشة و الكلام الفاضي ده .. إقفل يابني المحل ده بالكامل .. .. و حرفياً بيجيب ضرفها 🤣 و بيقفل اليابان 270 سنة كاملين .. آه والله .. ضبة و مفتاح .. 270 سنة .. من 1600 ل 1870 .. بيقفل اليابان عن العالم .. لا حد طالع .. و لا حد داخل .. … و المرحلة دي .. أحد أكبر أسرار الشخصية اليابانية لحد النهاردة .. و اللي بسببها .. اليابان لما إتفتحت ( و مش حتصدق مين اللي فتحها و ليه 🤣 ) .. طلعت و هاجت عالعالم كله حواليه .. و دارت فيهم قتل و إ*8تصاب و تدبيح .. .. بس دي تفاصيل خليها الجزء اللي جاي عشان البوست ده طوّل زيادة عن اللزوم .. … الجزء الرابع إن شاء الله .. باقي اليابان .. و بعدين .. قبل ما نروح كوريا .. حنروح حتة تانية خاااااااالص … تاريخها إسود و منيل بستين نيلة . … و الله أعلم .