عندما طلبت منها " البلانجر " .. #تتعلم_إنجليزى؟
عندما طلبت منها " البلانجر " .. #تتعلم_إنجليزى؟...
عندما طلبت منها ” البلانجر ” .. #تتعلم_إنجليزى؟…
طيب بما إن معظم الردود و الرسايل اللى جاتلى على البوست اللى فات كانت عن الإنجليزى و إزاى نتعلمه و كده .. ححاول أفتكر هنا كام طريقة من الطرق اللى إستخدمتها زمااااااان .. أيام ما كنت لسة فأولى كلية و إكتشفت ” فجأة ” إن الإنجليزى بتاعى لا يساوى بتنجانة .. مقارنة بإنجليزى أقرانى خريجى مدارس اللغات .
1- على أيامى ( 2006) كان لسة ماعنديش نت فى البيت .. و القواميس الكتيبات زى ” إلياس” كانت هى المصدر الأساسى للترجمة .. و بعد شوية تقدم فى الكمبيوتر .. بقت حاجات زى ” الوافى ” .. و “الكافى” .. و أيام السيديهات و كده .. المهم .. أنا بدأت أحاول أترجم إسم كل حاجة حواليا فى الأوضة .. و بعدين فى الشقة .. و بعدين فى حياتى اليومية .. و أيامها كانت ذاكرتى لسة بخيرها .. فماحتجتش إنى أستخدم اللى حانصح بيه دلوقتى .. ألا هو ال “ستيكرز ” . هات ستيكرز .. و إلزق على كل حاجة حواليك إسمها بالإنجليزى (أو أى لغة تانية حابب تتعلمها ) .. و إبدأ إتمرن على تمرين بيعمله نسبة ضخمة من الأطفال فى معظم العالم .. إنك تصبح و تمسى على كل حاجة حواليك .. يعنى : صباح الخير يا سرير = bed صباح الخير يا فيشة = socket , power outlet و هكذا .. ده حيساعدك بشدة إنك تنمى ” حصيلتك اللغوية - المصطلح ده بابا ربنا يبارك فيه دايماً كان بيستخدمه معانا و إحنا أطفال لما يعلمنا أى كلمة جديدة .. عربى أو إنجليزى” ..
2- الجزء اللى فات ده كان عشان “حصيلتك اللغوية ” .. اللى جاى عشان النطق و عشان الناس تفهمك . أول ما جبت موبايلى الأول فحياتى ” سونى إريكسون ك 300 آى” سنة 2006 برضو .. كنت فرحاااااان إنه فيه ذاكرة 12 ميجا بالكامل .. يعنى كنت أقدر أسجل صوت لمدة نص ساعة كاملة .. بإمتداد amr … فبدأت إنى أقرا كتب “هارى بوتر” .. بالإنجليزى .. و أسجل لنفسى .. و بعدين أسمع نفسى تانى و أنا باقرا نفس الكلام .. و أشتم و أقول مين الجاهل اللى بيقرا ده .. فبدأت أكتشف النقط اللى محتاج إنى أظبطها فنطقى و كلامى و لغتى .. و بدأت أتقن الكلام بالإنجليزى لفترات طويلة .. تقدر إنت كمان دلوقتى .. بموبايلك اللى ممكن يسجل لمدة أيام متواصل .. و إمتداد mp3 .. إنك تعمل كده على مستوى أعلى بكتير .. لا و ممكن تقرا عليه كمان .. (أيوة أنا باحسدك) ..
3- الجزء اللى فات ده كان عشان تتجرأ على اللغة .. اللى جاى ده عشان تتعود عليها بقى ..
زمااااااااان .. ف 2006 برضو .. كنت بدأت أحب مسلسل ” friends ” .. و كان عندى 3 سيزون منه بس مترجمين عربى .. و 3 من غير ترجمة .. و فضلت لمدة سنتين كاملين ( لحد 2008 ) فاكر إن مسلسل فريندز 6 سيزون بس .. و إنه خلص على كده !! .
و كنت دايماً أتفرج على الحلقات المترجمة عربى .. و التانيين أحس إنى حمار لما الجمهور يضحك و أنا مش فاهم هما بيضحكوا علي إيه !! .
لحد ما حد إبن حلال إدانى على هارد 40 جيجا .. ( ماكنتش أعرف يعنى إيه فلاشات لسة ف 2006 .. و أول مرة شفت فلاشة ف 2006 و لقيت بنت بتحطها فى الكمبيوتر من ورا .. حسيت إنها جاية من مايكروسوفت و إن أبوها بيل جيتس !! ) … إدانى الحلقات بس مترجمة إنجليزى .
و لأنى باحب المسلسل جداً .. فبدأت أتفرج على الحلقات مترجمة إنجليزى .. و أوقف الحلقة فكل مشهد .. و أفتح قاموس “إلياس” .. أدور على الكلمة اللى مش فاهمها .. و بعدين ملاقيهاش .. فكنت أفتح إسطوانة مترجم الوافى .. و بعدين ملاقيهاش فأفتح إسطوانة مترجم الكافى .. و بعدين ملاقيهاش فأكتبها فورقة .. و أقرر أدور عليها على ” الياهوو ” المرة الجاية اللى أروح فيها سايبر أحجز نص ساعة نت .
و بعدين أكمل الحلقة .. بنفس الطريقة .. و الحلقة ال 20 دقيقة كانت بتاخد معايا ساعتين عشان أشوفها .. و أفهم 50% منها .
و بعد ما أترجم كل الكلمات الجديدة .. أشوفها تانى .. و تالت ..
4- الجزء اللى فات ده كان عشان ماتفتكرش إن في سر .. أو طريق مختصر عشان تتعلم أى حاجة … اللى جاى ده هو الطريق المختصر و السر بقى .. .. على سنة 2008 كنت بقيت صايع كفاية فى الإنجليزى إنى أشوف مسلسلات كاملة مترجمة إنجليزى .. و أحياناً ماكنتش باحتاج ترجمة خالص .. و 2008 كانت أول سنة أدخل فيها إنترنت dsl بسرعة 256 ميجا .. و كنت فيه أنا و واحد صاحبى .. فكان سرعة التحميل عندى بتوصل ل 15 كيلو فى الثانية لو هو شغال معايا فنفس الوقت .. و 29 كيلو كاملين فى الثانية لو هو طافى .. و عشان كده كنا بنقسم اليوم أنا 12 ساعة و هو 12 ساعة .. و إتخانقنا بالسبب ده لأنى ساعات كنت بافتح فوقته .. و لحد النهاردة مابيطقنيش :) :) … و بعدين فبداية 2009 … إبتديت أتعلم بجد .. و سجلت فى ال open courses بتاعت MIT .. و نزلت كتب كتييييييير .. فمجالات مختلفة .. و إكتشفت أحد أفضل الحاجات اللى إكتشفتها فحياتى … (((((((((( الكتب الصوتية ))))))))))))) عاااااالم ضخم من كتب فكل المجالات .. و متسجلة صوت .. و جاهزة للتحميل .. و ده كان الوقت اللى إشتريت فيه nokia n95 8giga مستعمل من أحد أصدقائى .. و حسيت إنى أمتلكت كل مفاتيج التكنولوجيا و إن ال 8 جيجا دى حتسع كل أحلامى .. فأصبح دائماً معايا 5 جيجا كتب صوتية على الموبايل .. فى الكومنت الأول ..حاحط محتوى الجزء اللى من مكتبتى الصوتية اللى على ديفيديهات .. و بدءاً من سنة 2012 كنت بطلت أعمل ديفيديهات .. مما يعنى إن آخر ست سنين من مكتبتى بالكامل على الكلاود درايف بتاعى .. مش هنا .
5- لو وصلت للمرحلة دى فإنت حتقدر تكمل بنفسك خلاص .. أتمنى أكون أضفت ليك ولو معلومة واحدة على الأقل .
ال plunger دى تبقى السلاكة اللى بتستخدم ضغط الهوا لتسليك بلاعات الأحواض .. و لما إحتجت واحدة لشقتى سنة 2012 .. ماكنتش عارف إسمها إيه بالعربى ! .. و كنت متوقع إنى لو قلت سلاكة للراجل فى المحل .. حيدينى سلك تسليك بلاعات ( حاجة تانية ) .. فلما رحت المحل .. فأحد الأسواق الشعبية .. لقيت ست كبيرة قاعدة .. و وقفت قدامها لثوان مش عارف أقول لها إيه ! … و بعدين قلت لها :
- لو سمحتى عايز بلانجر .. = نعم ؟!
- حضرتك هى عصاية فآخرها قطعة جلد بتضغط الهوا فتنفخ فى البلاعة و تسلكها .. = سلاكة يعنى ؟!
- أيون تمام يا فندم .. = أمال إيه اللى إنت قلته ده ؟ ..
- لا دى ماركة يا فندم .. ماتقلقيش نفسك .. أى ماركة عندك تنفع .
ححاول أكتب بوست عن لو حابب تتعلم رياضة (math) فى البيت إن شاء الله .. ححاول أتذكر فيه إزاى إتعلمت محصلات القوى من المشابك و ستارة البلكونة .. و الله أعلم .