فرض العين .. و فرض الكفاية .. و فرض المثلاً

فرض العين .. و فرض الكفاية .. و فرض المثلاً مثلاً يعنى …

… أحد التعليقات المتوقعة اللى شفتها على البوست اللى كنت كتبته عن #محمد_صلاح … هو اللى فى الصورة ده … و لسبب ما لقيتني بافتكر زمان فى المدارس أيام ما كنا بناخد حصة دين .. فاكر إننا درسنا على إستحياء فكرة ال ( فرض العين , فرض الكفاية ) .. و دول معناهم سريعاً و بتلخيص مخل إن : لو المجتمع بتاعك (بلدك يعنى ) 100 فرد .. فى حاجات لازم الكل يعملها بلا إستثناء = فرض العين . و فى حاجات لو واحد بس عملها .. يغنى عن الباقيين = فرض الكفاية .. … فمثلاً إنك تشيل زبالتك و تنضف مكانك و ماتقتلش و كده .. ده فرض عين .. لازم الكل يعمله . و لكن مش لازم كل فرد فى المجتمع يبقى دكتور .. أو كل فرد فى المجتمع يبقى عازف موسيقى .. يكفى جداً واحد أو إتنين فكل مجتمع .. و دول يغنوا عن الباقيين .

و حديثا بقى في فرض ال ( مثلاً مثلاً يعني).. نسبة للأغنية الشعبية بتاعت حكيم (افرض مثلاً مثلاً يعني اني قابلتك يوم). و للأسف تقريباً ناس كتير بقت ملتزمة بالفرض ده اكتر من النوعين التانيين بمراحل..

أنا اتفرجت على ماتش صلاح اللي فات.. و انبهرت بيه فعلا.. ما شاء الله عليه ربنا يحميه هو لاعب أمهر من اني اتكلم عنه بثقافتي الضحلة في الكورة.. و لكنه.. بمهارته دي.. و أخلاقه.. و تأثيره على كل اللي بيشوفه.. لا يكفي عني اي شئ.. يعني انا وضعي في العالم قبل صلاح… بيساوي تماما وضعي في العالم أثناء وجوده.. و كل اللي باقوله هو : اننا لازم نفرق بين احساسنا بالفرحة لانجازاته.. واحساسنا بالفرحة لانجازاتنا احنا… و نفهم أن إنجازاته لا تغني و لا تعني انجازاتنا… و اننا لازم بدل ما نركز على أسباب وهمية لشرح و وصف نجاحه زي (الفرعون.. النيل…).. لازم نركز و نشرح الأسباب الأساسية (التدريب.. التعب.. الالتزام… المثابرة)… و نشرح ازاي يطبقها كل واحد فينا على فرضه الخاص.

انا متفق فعلا مع الكومنت ده.. و فعلاً شايف ان تأثير صلاح رائع… و لكن نفس النجاح ده ممكن يسبب تاثيرين مختلفين بالكامل على شخصين قاعدين جنب بعض.. شخص حيتحمس و يقرر انه ينافس و يثبت نفسه هو كمان.. و شخص تاني حيفرح و يحتفل بإنجازات لم يشارك إطلاقا في أي جزء فيها. ََ و للأسف. َ احنا تاريخنا مليان باحتفالات و أعياد بإنجازات 7000 سنة عدت.. و لسة بنحتفل…

صلاح رائع… و لكن عشان يطلع صلاح تاني و تالت و رابع… لازم ندى التربة اللي طلع منها.. و لو جزء ضئيل من اللي بنديه للثمرة اللي بنحتفل بيها حالياً. … و الله اعلم.