ظهر قدامي بوست فيه ميم عن ( أهل البحيرة )

ظهر قدامي بوست فيه ميم عن ( أهل البحيرة ) , و بما إني من دمنهور .. فتحت التعليقات بفضول بريء , و ده وصلني إني أشوف فيديو البهيمة ذات ال4 شهور , و اللي عندها ورم للأسف , سبب لها إنها تبدو و كإنها حامل .. فأنشأ حواليها أهل القرية البسطاء قصص و أساطير سريعاً .. و لبسوها سبح .. و تأكدوا ( وهماً ) إنها حامل في 9 شهور .. و إنها ( معجزة ) أستغفر الله . .. عقلي فجأة إمتلأ بعدد كبير أوي من المشاعر في نفس ذات اللحظة : .. 1- جزء كبير جوايا كان بيضحك طبعاً من سخرية الموقف و هزليته .

2- جزء تاني كبير كان غضبان جداً و متنرفز .. لما إفتكرت مئات المواقف اللي جمعتني بأشخاص عقولهم فعلاً بتصدق في أشياء مشابهة .. و إفتكرت مدي المعاناة اللي عشت فيها لما كنت باتعامل مع الشخصيات دي .

3- جزء تاني كان غضبان لمجرد فكرة إن الشخصيات اللي من النوعية دي لها حق التصويت في قرارات ليها علاقة بمصيري الشخصي .. و إن صوت الشخص اللي كان عايز يعمل للبهيمة مقام يتعبد فيه البشر .. مساوي قدام القانون لصوتي … مساوي لصوت أستاذ دكتور جامعة متخصص في الإقتصاد مثلاً .

4- و بعدين جزء تاني غضب أكتر .. لمجرد إني تخيلت أفكار ناس كتير حتعمم و تقول إن ( أى إنسان متدين .. أكيد بيفكر بنفس الطريقة الجاهلة دي ) .. و حيطلع ناس كتير من اللي بيهيجوا في المواقف المشابهة .. و يفضلوا يزيطوا فإن ( دول هما الإسلامجيين الفلاحين الفقراء ) .. . النهاردة الصبح بالذات شفت بوست كاتبه واحد مشهور غالباً بيهاجم بلال فضل .. و قرأت الكومنتات عليه .. و معظمها كانت كومنتات بتشرح إن ( بلال فضل ) مش حلو .. و سيء .. و إن السبب في ده هو إنه في شبابه كان ( فقير عايش وسط الفلاحين الفقرا الإسلامجيين ) .. و إنه أتأثر بيهم . . البوست ده إستفذني جداً النهاردة الصبح .. و لكن الفيديو ده فكرني بالموضوع زيادة . … … فكرت إني أخصص البوست ده فإني أتكلم عن ( the mormon church = كنيسة المورمون ) و دي قصة كبيرة جداً عن طائفة من أكتر الطائفات تحكماً في المجتمع الأمريكي .. و اللي مبنية بالكامل علي نصب و هري .. .. و كنت حاستخدم ده في توضيح إن : جهل البشر سائد منذ بداية التاريخ .. و اللي بيستغلوه كتير جداً .. و مش معني إن كتير من الإستغلال ده بيحصل تحت عباءة الأديان .. إن الدين غلط أو فكرة المفروض ننبذها بالكامل . بالعكس .. الفهم الصح للدين و العقيدة .. بيحميك بالكامل من أى إستغلال .. حتي لو كان بإسم الدين . … و لكن بوست زي ده كان حياخد مني شوية وقت طوال عشان أكتبه .. و أنا مشغول حالياً .. يمكن في وقت لاحق أكتب البوست ده . و لكن لو عندك وقت إنت … روح دور علي فيديوهات يوتيوب سريعة تشرح لك موضوع كنيسة المورمون دول … حتستمتع . خصوصاً لما تعرف إن فئة المورمون دول .. هما أكتر فئة بيتم تعيينهم في جهات حكومية أمريكية سيادية زي الFBIو ال CIA .. و سبب ده .. هو إن عقلهم مزروع فأساساته فكرة هيمنة الدولة الأمريكية ذاتها .. و إن الطاعة واجبة بدون سؤال … و إن لون بشرتك بيحدد مدي جودتك كإنسان 🤣 … … و لكن .. حاكتفي بإني أقول : حسبنا الله و نعم الوكيل … … … و أسأل سؤال مهم أنهي بيه البوست ده : .. أنا و إنت متأكدين تمام التأكد إن كل واحد من اللي في الفيديو دول ماسك موبايل .. صح ؟ .. و غالباً جداً جداً رنة موبايله حتكون آذان .. أو دعاء .. أو أناشيد دينية .. صح ؟ .. .. سؤالي هو : تتوقع هو آخر مرة قضي وقت علي موبايله ” بيفهم ” أى شيء له علاقة بالدين كان إمتي ؟! .

و تتوقع هو بيقضي وقت علي موبايله .. بيعمل إيه ؟! .