في رواية جميلة مشهورة إسمها "دون كيهوتى" .. مشهورة أوى

في رواية جميلة مشهورة إسمها “دون كيهوتى” .. مشهورة أوى .. و تعتبر من أشهر الروايات فى التاريخ .. بس للأسف ماعتقدش إنك حتلاقيها شغالة على mbc2 أو 1 أو 3 أو 4 أو أى cbc فيهم … ولا حتى سفرة . و أغلب الظن مش حتلاقى أخبار كتير عنها فى النيوزفيد بتاعك على الفيس .. و لو كانت موجودة .. غالباً حاتتوه فوسط أخبار الكورة و فساتين الفنانات . … الرواية بتتكلم عن واحد عجوز بعافية حبتين و عقله رايح شوية … قرر ينصب نفسه فارس “دون” .. و يعلن الحرب على الوحوش اللى بتهجم على القرية بتاعته … اللى هى طلعت فى الآخر (طواحين هوا ) .. و من هنا طلعت جملة ( يحارب طواحين الهوا) .. كتعبير عن العنترية اللى بتعود على صاحبها بالضرر وليس بالنفع .. … أو بالمصرى الفصيح المثل اللى والدي بارك الله فيه كان شرحه لينا زمان عن التلات طزات … واحدة منهم (طز فى الراجل اللى يروح يتخانق فمنطقة مش منطقته ) … إقرا عن الإتنين التانيين . … عمك الكبير الدون ” مش كريستيانو يابنى” .. الدون كيهوتى أقصد .. فى الرواية بتلاقيه قرر يبقى فارس يحمى الأخلاق .. و العزة .. و الشهامة .. و الشرف .. فقرية مافيهاش أيها حاجة من الحاجات دى خاااااالص .. قرية مات فيها الأخلاق .. و العزة .. و النخوة .. و الشهامة .. و الشرف .. و الناس كلها كانت بتضحك عليه و تتهمه بالجنون … كالمعتاد . … أحياناً كتير باسأل نفسى .. لو كنت قابلته .. كنت حاقول له إيه .. كنت حاشرح له إزاي هو كمان يبقى فريلانسر و يشتغل أونلاين ؟! غالباً ده كان ممكن ينفع بشكل ما .. بس فعلاً فى كلام تانى عايز أقوله ليه .. هو و كل اللى بيحس إن هو كمان فى جواه دون صغنن بيلعب .. بيخليه يحس إنه عايز يشهر سيفه ” اللى هو حتة خشب بالمناسبة ” .. و يطلع ياخدله جولتين تلاتة مع طواحين الهوا .. و بعدين يا إما طاحونة الهوا بتف**** .. همممم .. بتفلقه … أو هو بيخاف بتف***** … همممم .. يتفلق منهم … فبيقرر يغطى سيفه ” اللى هو حتة خشب” .. تانى .. و يتنازل عن منصب الدون .. و مهمة الدون . … كلامى لكل دون كالتالى : … بالله عليك ماتنساش إحساسك ده … خليك فاكره كويس و إنت رايح تقعد عالقهوة .. و إنت بتتفرج عالتيليفزيون .. و إنت بتتفرج عالفيس .. و إنت بتفتح كيس الشيبسى و تبلع بالبيبسى .. و إنت بتحط كل طوبة تكبر طواحين الهوا .. لأن كل خطوة إنت بتعملها فدنيتك دى .. يا إما بتكبر طاحونة هوا … يا إما بتكسر واحدة .. و هى إسمها كده .. طاحونة هوا … أو (هوى) .. كل ما حتطيع هواك .. و تجرى وراه .. كل ما طواحين ال ( هوى ) حتكبر أكتر .. و لما تحصل حاجة تحسسك إن الدون جواك بيتحرك .. حتلاقيك نفسك فى الآخر هزمت الدون بتاعك بنفسك .. بهواك .. اللى كبر الطاحونة .. … و الله أعلم .