اللاب القديم فحت رجع كأنه جديد و سريع أوى

اللاب القديم فحت رجع كأنه جديد و سريع أوى .

عايز تعرف إزاى اللاب القديم فحت رجع جديد و سريع أوى .. إنزل لحد الفقرة المتعلمة ب ( *** ) .. و مش لازم تقرا باقى الكلام لو حابب . … باقى الكلام :) : زماااااان .. أيام الكلية (2007-2008) .. كانت بدايات معرفتى إن فى حاجة فى الحياة إسمها لينوكس ( linux) .. أو نظام تشغيل مختلف عن الويندوز … بكل التفاصيل التقنية بقى اللى إنت أكيد عارفها لو إنت عارف ( لينوكس ) .. أو (أوبونتو ) .. أو أى ديسترو منه مثلاً .. من حاجات زى رخص مجانية مقابل إحتكار مايكروسوفت .. و جنو .. و تيرمينال .. و ليلة كبيرة فى الوقت ده كان كله بالنسبة ليا جديد جداً .. .. أتذكر الموضوع كان إبتدى بندوة تم دعوتى ليها فى الوقت ده فمكتبة إسكندرية للتعريف باللينوكس .. و أوبونتو … و البطريق الجميل بتاعهم . … إزاى المحاضر فى الندوة دى فضل يورينا مزايا إنك يبقى عندك أكتر من سطح مكتب … و الأنيميشن المكعب بتاع تغيير سطح المكتب فأوبنتو 7 .. أو 6 .. مش متذكر . … فاكر إن فى مرة إتجمعنا أنا و إتنين إصحابى فبيت واحد منهم بعد الندوة دى بشهر تقريباً .. و إجتمعنا حوالين جهاز الكمبيوتر بتاعه بالظبط زى منظر فيلم ثقافى .. و عينينا كلها متعلقة بالشاشة و بأصابع صديقنا اللى كان بينزل أوبنتو لصديقنا التانى … … فاكر إزاى لما الماوس البي إس تو بتاعته ماشتغلتش .. إضطريت أنزل أشترى ماوس يو إس بى عشان تشتغل … أو العكس .. مش متذكر بالكامل للأسف . … و يلى ده بعد كده تاريخ من الديستروهات و التفاصيل مع الأوبنتو و اللينوكس و مينت و كالي و باك تراك و مانجارو .. و تعاويذ تانية بالنسبة لك لو ماعندكش معلومات عن العالم ده . … … أحد اللابات اللى موجودة عندى فى البيت كان بيتم إستخدامه كصينية طعام خلاص .. حتى بالرغم من تصليح شاشته و زيادة راماته من 2 جيجا ل 6 جيجا … .. إلا إنه برضو إستخدام أى جهاز تانى موجود كان بيبقى أسرع من فتح كروم عليه .. .. و بعدين شفت فيديو ل (linus tech tips) .. أحد القنوات اللى بتابعها بشكل أساسى على اليوتيوب .. كان بيشرح فيه منتج ليه علاقة باللينوكس … الموضوع خلانى أفكر .. هممم .. طب ليه لا .. … رحت منزل نسخة لوبنتو .. و سطبتها .. و إديت الجهاز لزوجتى تجرب تشتغل عليه .. و كان رد فعلها هو : ( اللاب القديم فحت رجع كأنه جديد و سريع أوى ) . .. شرحتلها إيه هو اللينوكس .. و اللوبنتو ..
كانت أول مرة تعرف عن العالم ده .. و فوسط خطبتى العصماء عن حرية الإبداع التقنى و القوة الخارقة للمجتمع الحر جنو .. و جوجل ستاديا على فولكان و لسة باقول هييييييييييه .. .. وقفتنى و قالتلي : ( تعرف كام واحد ممكن يستفيد لو شرحت حاجة زى كده للناس ؟ ) . … … و دى حاجة أنا دايماً بامر بيها … معلومات عن اللينوكس … و أوبنتو و … كلها معلومات بالنسبة ليا أصبحت بمرور الزمن أكتر من بديهية … باستخدمها و كأنى باستخدم القلم و الورقة مثلاً … و بانسى … بانسى إن ناس كتير بالنسبة لها كل ده جديد جداً جداً … … التغلب على الإحساس ده .. كان أول حاجة إضطريت أصارعها أيام ما بدأت أشرح أى حاجة لأى حد . .. ما علينا .. كفاية حكايات كده …

(****) بص هو أكيد فى ناس شارحين الموضوع ده أفضل منى .. عشان كده حاقولك تعمل سيرش علي إيه بدل ما أشرحه أنا بنفسى .. و برضو مش حاحط لينكات … إتعلم تسيرش بنفسك و تتعب شوية .. و يا ريت لو تعمل ده بالإنجليزى .. بس إتطمن ..حتلاقى كل الكلام بالعربى برضو .. .. 0- لو اللاب بتاعك أو جهازك قديم و إمكانياته ضعيفة و بطئ 1- إعمل سيرش على ( التعريف بنظام لينوكس ) - what is linux 2- اعمل سيرش على ( التعريف بنظام لوبنتو ) - what is lubunto 3- إعمل سيرش على ( تسطيبب لوبنتو ) - installing lubunto

ببساطة .. لأن اللينوكس بشكل عام نظام أخف بكتيييييييييير من الويندوز … فبيبقى أسرع .. و لو جهازك قديم و نزلت حاجة زى لوبنتو عليه .. حتحس إنه طيارة بالمقارنة بدلوقتى .. و على إستخدام معظم الناس .. حتلاقى فى النظام ده كل اللى هى بتحتاجه من الويندوز … و أكتر .. … جرب .